Read Maru XEIM: NGAUI" 16 Bible Online

XEIM: NGAUI" 16 - Maru bible

XEIM: NGAUI" 16

¹Yao: shid' tao ASANG re magyang" lho" ra" myi: qhaug' byid: au: se' pye' qhug' ko" ra" Arun nho: yauggai zo: tao shid gethao re ASANG wa Moshe re dao: jhau: ra".

²Yao: wa- ni" mao: Arun re- gai ang: ra" ayo, mae za: ai: gyang" lho" thao" ra" jo, qo akyo pin: lung: nhaung thao" khyo yao: ye: nae" qhid' mae" ta" kyo: wa,- pe"mung:ga"re ngo wa ai: Dao:Thang" Ban" apyid' dao mae jham thaui: khug mae na: qhu" byid: nae" mung: ngad: ra". Yao" mho dao: maphug' cao" re wa se' pye' ru qhug' li" nae".

³Yao: wa ai: gyang" lho" thao" ra" jo, qo khyo qobo ngaui" xeim: qhid' mae" nung: jaung lo: dadau: re- phad' ngaui" byid' ra" ngaui" xeim" qhid' mae" yao lo: dadau: yao: cili" mung: ngaui" byid: thao re za: ai: khug gai: vao ye" ra"- ein: ta" kyo: wa,- ga: ta" ra".

⁴Ai: thao ASANG wa o mae ta" to" ra" mho" shid' dao: jham re byid' ra". Aijham wa gyang" lho" thao" ra" jo, qo khyo Arun vao ye: naeqid re- yao: wa gaung cid' pye' mung:- khinjaung mai bau: jham ngad: ra"- jid: mo" bau: qhang- lho daung:- phyid' cui:- au: thab' jham re shaung ve; ci ca" ra".

⁵Israel mo, byu qe wa Arun re qobo ngaui" xeim: qhid' mae" cad' lo: shid' dau:- phad' ngaui" byid' ra" ngaui' xeim: qhid' mae" yao lo: dadau: re byid: genae" ngad: ra".

⁶Yao: wa nung: jaung lo: dadau: re yao: yao" qobo jham we' yao" yham byu qenho: qobo jham re yu: pye' byid: nae" qhid' mae" ngaui" xeim: khyo" ngaui" byid: nae" ngad: ra".

⁷Ai: thao re yao: wa ai: cad' be, shid' dau: re ASANG: qhid' kheim: Zaung kham: dung: khyo she: ye: nae" ngad: ra".

⁸Aitau mae" dace' mae ASANG: qhid' mae" ga: gatau dace' mae wa Azaze qhid' mae" ga: axam: te' to" ra" laugbaui shid' ce' re ci yang: yao: wa pha" ce' lhaui" qu" nae" ngad: ra".

⁹Arun wa ASANG qhid' mae" ga: pha" ce' yang khyin byid' ra" cad' be, re qobo ngaui" xeim: khyo" ngaui" byid: mung:-

¹⁰Azaze qhid' mae" ga: khyin: to" ra" cad' be, dau: re wa adaui geim" ASANG re qhaug' byid: mung:- mo, byu qenho: qobo jham re yu: pye' byid: nae" qhid' mae" Azaze jhao" din"pyad' yo khyo nhao: ke' nae" ngad: ra".

¹¹Arun wa nung: jaung lo: re qobo ngaui" xeim: khyo" yao" qhid' mae" we' yao" yham byu qe: qhid' mae" xeim: jham re ngaui" byid' ra" au:-

¹²Yao: wa myi: ug' dalam: mae phan dao mae" myi: gyang" ra" myi:gyoe: jham byang" sho' ke' yu mung:- aimae gai: ra" nae pyo: shid' zhab' ke' mung:- gyang" lho" thao" ra" jo, qo khyo ciye: nae" ngad: ra".

¹³Yao: wa ai: ASANG qhid' kheim: mae nae pyo: ja: re myi: mae ke' nae" ngad: ra". Amung: ai: nae pyo: ja" nho: myikhug' wa ai: Dao: Thang" Ban" apyid' re go: to" li" nae". Airulao"- yao: wa aire mathe' myao mung:- mashid nae" ngad: ra".

¹⁴Yao: wa nung: jaung lo" nho: sa: daqhae: re yu mung: yao" lo, nyhug' yang qhid' au: shad' apyid' dao mae vhag' sheim: nae" ngad: ra". Ai: thao daqhae: re wa Dao: Thang" Ban" qhid' au: shad' mae nhad' lhang vhag' sheim: byid: nae" ngad: ra".

¹⁵Ai: thao re- yao: wa cad' be, re mo, byu qe: qhid' mae" qobo ngaui" xeim: khyo" se' mung: ainho: sa: re gyang" lho" thao" ra" jo, qo khyo ciye: yang: apyid' dao mae we' Dao: Thang" Ban" qhid' au: shad' mae nung: jaung lo" nho: sa: re kad' ru we' dakhyo: vhag' sheim: nae" ngad: ra".

¹⁶Ceru: kad' yang: yao: wa Israel byu qenho: masan masin" rumae" we' yao: bam: qobo jham alhab' mae" khyo" Gyang" Lho" Thao" Ra" Jo, qo re kyang" san: pye' nae" qhid' mae" caung:pa" thung" we' sin" ra" khyo re kad' li" nae". Yao: wa jamu re ceru: kad' ca" ra". Pe"mung:ga"re ai: Zaung wa jamu agaung: mae jo, mung: caung:pa" thung" khyo" masan masin" ngad: ra".

¹⁷caung:pa" thung" khyo" kyang" san: ra" khyo kad' nae" qhid' mae" Gyang" Lho" Thao" Ra" Jo, qo khyo Arun vao: ye" lo" ra" ayo, mae" yao: dam: thug' lo: ra" ayo, joe" sho' Zaung khug mae khag' magai: na: jo, ngad: ra". Yao: wa yao: yao" qhid' mae"- yao" yham byu qe: qhid' mae"- mo, phaung geim" qhid' mae" caung:pa" thung" we' sin" ra" khyo re bin: kad' lao"-

¹⁸Yao: wa phad' ngaui" byid' ra" xeim: ngaui" byid: nae" we' aire kyang" san: pye' nae" qhid' mae" phan khyo thug' ye" lo" ca" ra". Yao: wa nung: jaung lo: sa: daqhae: re we' cad' be, sa: daqhae: re yu mung: aire phan akhyug jham mae" ai: zang khyug au: jham alhab' mae gyad ca" ra".

¹⁹Yao: wa yao" lo, nyhug' yang sa: daqhae: re phan dao khyo nhad' lhang vhag' sheim: byid: ca" ra". Ceru: kad' yang: yao: wa Israel byu qenho: qobo mae" aire kyang" san: pye' mung:- aire gyang" lho" nhao nae" ngad: ra".

²⁰Arun wa Gyang" Lho" Thao" Ra" Jo, qo- ASANG qhid' kheim: Zaung: nho: dang: ra" gu: we' phan re caung:pa" thung" khyo"- kyang" san: pye' ra" khyo bin: kad' lao"- yao: wa Azaze qhid' mae" yao: bam: khyin: to" ra" cad' be, daui dau: re ASANG jhao" qhaug' byid: nae" ngad: ra".

²¹Yao: wa yao" lo, shid' shad' geim" re cad' be, nho: au: dao mae kai: mung:- makhyang" ra" qobo jham alhab' Israel byu qenho: geim lau to" ra" khyo alhab' re ai: cad' be, au: dao mae ta" lhang: yu nae" ngad: ra". Airu: kad' yang: ai: qobo jham re cad' be, nho: au: dao khyo tha" qhui: byid: nae" ngad: ra". Ai: thao ai: cad' be, re wa san: to" ra" yaug: yang din"pyad' yo khyo keim" ke' nae" ngad: ra".

²²Cad' be, wa yao: we' daga" byu mana: ra" mug:myid khyo yao: bam: qobo alhab' re vin: ye" lo" li" nae".

²³Ai: thao Arun wa Zaung khug khyo vao ye: mung: ai: Gyang" Lho" Thao" Ra" Jo, qo khyo vao ye: naeqid re ve; ra" khinjaung mai bau: jham re khyad' pye' yang:- aitau mae to: co' nae" ngad: ra".

²⁴Yao: wa ai: gyang" lho" jo, qo mae gaung cid' mung: yao" mai bau: jham re ve, ca" ra". Ai: thao yao: wa thug' ye: mung:- yao: yao" qobo jham re we' ai: mo, byu qenho: qobo jham re yu: pye' nae" qhid' mae" phad' ngaui" byid' ra" ngaui" xeim: re yengaui" byid: nae" ngad: ra".

²⁵Yao: wa qobo ngaui" xeim: qhid' mae" gug'nyhug' xau re phan dao mae phad' ngaui" nae" ngad: ra".

²⁶Din" pyad' yo khyo- Azaze jhao" cad' be, re akeim: byid' ke' ra" yaug wa yao" mai bau: jham zab: pye' ca" mung:- jamu khyo yao: madam: vao lo shire gaung cid' pye' ca" ra".

²⁷Qobo yu: pye' nae" qhid' mae" gyang" lho" thao" ra" jo, qo khyo sa: civao ye: byid' ra". Qobo ngaui" xeim: qhid' mae" ci: ra" nung: jaung lo: we' cad' be, re- jamu thaung gaung shad' khyo vo; ye: mung: ngha" pye' nae" ngad: ra". Shoqid- shogai- au: alhab' re ngha" pye' nae" ngad: ra".

²⁸Aijham re ngha" pye' ra" yaug wa yao" mai bau: jham re zab: pye' mung: yao: wa jamu khyo madam: tug' lo shire gaung cid' pye' ca" ra".

²⁹O mae ta" to" ra" thung"li jham wa joe" lo nae" ayo, alhab' mae phug' cao" nae" qhid' mae" ngad: ra". Lho" nhad' khye' ein: khye- daxe ba ein: ba mae Israel byu qe we' yao: bam: phaung mae na: jo, ko" ra" taung bug byu qe wa zo:ve jao" mung:- Pe" mau" re: magai: kad' ngad: ako".

³⁰Ai: ba mae yao: bam wa- yao: bam: qobo alhab' re kyang" san: pye' nae" qhid' mae" caung:pa" thung" re cao" yang: kad' ca" ako". Airulao" yao: bam wa caung:pa" thung" khyo" san sin" ra" mo, ngad: li" genae".

³¹Ai: ba wa gyai gyang" lho" ra" ba na ngad: mung: naonhaung" wa ai: ba mae zo:ve jao" mung: mau" dajhid' re: magai: zaui: ngad: ako".

³²Yao: pho" khu mae aya: xo' yu mung: qhaug' byid' to: yang: nyang" za: lo, kai: byid' ru kham: yu: to" ra" Khinjaung agyi pho" wa caung:pa" thung" khyo" kyang" san: pye' ra" khyo re kad' nae" ngad: ra". Yao: wa khin mai bau: jham re ve, mung:-

³³Gyang" Lho" Thao" Ra" Jo, qo- ASANG qhid' kheim: Zaung nho: dang: ra" gu: mae phan- khinjaung qe- mo, byu qe alhab' re kyang" san: pye' nae" qhid' mae" caung:pa" thung" we' sin" ra" khyo re kad' nae" ngad: ra".

³⁴Ce: thung" li jham wa joe" lo nae" ayo, alhab' mae phug' cao" ca" ra" thung" li jham ngad:- Israel byu qere yao: bam: qobo alhab' mae" kyang" san: pye' byid: nae" qhid' mae" ai: caung:pa" thung" we' sin" ra" khyo re dazin re dalhang kad' ca" ako". Airumung: Moshe wa ASANG amyin" byid' to" ru we' dakhyo: kad' ra".