Read Maru XEIM: NGAUI" 18 Bible Online

XEIM: NGAUI" 18 - Maru bible

XEIM: NGAUI" 18

¹ASANG wa Moshe re

²Israel byu qere ceru: ta" wa,- ngo wa naonhaung" Mao"So ASANG ngad:.

³Naonhaung" na: qu" ko" ra" Egutu mung" mae" byu qenho: ave, lo, mau" jham rere:- ana" ngo naonhaung" re jhui" ye" lo" na: ra" Khanan mung" mae na ko" ra" byu qenho: ave, lo, mau" jham re dacao" kad' ge,.

⁴Nga" tarha" jham re phug' cao" mung:- ngo amyin' byid' rure kad' ge,. Ngo wa naonhaung" Mao"So ASANG ngad: ra".

⁵Ngo naonhaung" re byid' to" ra" tarha" jham re cao" kad' ge,- airu: kad' ra" khyo" yang naonhaung" wa naonhaung" kaoso re khyad' yu: li" genae". Ngo wa ASANG ngad:- ga: ta" ra".

⁶ASANG wa o mae ta" to" ra" thung"li jham re byid' ra". Aijham wa- naonhaung" ba nam sang: cao: khag' we' re:- gaung sho: dajho" zam" ge,.

⁷Ni" myhi" we' gaung sho: jho" zam" ra" khyo" yang ni" pho" re qho' daphyo' wa,- nao wa ni" myhi" re qho' magai: phyo' ngad: ra".

⁸Yao" nho: yham sang myhi" dayaug we' re: gaung sho: jho" zam" ra" khyo" yang ni" pho" re qho' daphyo' wa,.

⁹Ni" nhae: mo" we' gaung sho: dajho" zam"- nao we' dayham mae za: na: qi" li" ra" ni" nhae: mo" abye" mangad: lao" gatau: nhae: mo" bye" qe: we' gaung sho: dajho" zam" ge,.

¹⁰Ni" myid: myiqe: zo: we' gaung sho: dajho" zam" ge,- airu wa nao re: qho' phyo' ra" mau" ngad: ra".

¹¹Yao: pho" qhan: mung: yao: myhi" maqhan" ra" nhae: mo" we' gaung sho: dajho" zam" ge,. Yao: wa ni" nhae: mo" ngad: ra".

¹²Ni" pho" nho: nhae: mo" ni" na we' re:-ni" myhi" yao:nhaung: we' re:- gaung sho: dajho" zam" ge,.

¹⁴Ni" phomo"- ni" gan nho: yham sang myhi" we' gaung sho: dajho" zam" ge,- yao: re: ni" mo"- ni" thao" ngad: ra".

¹⁵Ni" dau mo" we' re: mangad: lao"-

¹⁶Ni" mao:- ni" nhaung" nho: yham sang myhi" we' re: gaung sho: dajho" zam" ge,.

¹⁷Nao we' gaung sho: jho" zam" va" ra" myiqe: myhi" nho: myiqe: zo: we' re:- yao: myid: myiqe: zo: we' re:- gaung sho: dajho" zam" ge,- yao: bam wa ba nam dau mung: airu wa kheim bam khyui: ra" mau" ngad: ra".

¹⁸Ni" yham sang myhi" adaui: na na wa- ni" yham sang myhi" nho: yao: bai: yao:nhaung: we' gaung sho: dajho" zam" ge,.

¹⁹Mai ci: na: ra" ayo, gyo: mae ai: myiqe: we' gaung sho: dajho" zam" ge,- pe"mung:ga"re- yao: wa caung:pa" thung" khyo" masan sin" ngad: ra".

²⁰Su gaje: nho: yham sang myhi" we' gaung sho: dajho" zam" ge,- airu wa caung:pa" thung" khyo" nao re masan masin" boe" nhao: ra".

²¹Moleg so re caung:pa" rumae ci nae" qhid' mae" ni" zo: qemae" dayaug rere: da ab byid: wa pe"mung:ga"re airu wa ASANG Mao"So: mang re qho' phyo' ru ngad: ra".

²²Yauggai yao: cao: gaung sho: dajho" zam" ge,- Mao"So wa aire nghang" ra".

²³Myiqe: ngad ngad- yauggai ngad ngad gug'nyhug' we' gaung sho: dajho" zam" ge,. Airu: kad' ru wa nao re caung:pa" thung" khyo" masan masin" ru boe" nhao: ra".

²⁴Ai: lo, mau" daja: ja: kad' ra" khyo" yang naonhaung" yao" gaung re masan masin" daboe" nhao ge,- pe"mung:ga"re naonhaung" ai: mung" khyo qo" vao ye: genae" qhid' mae" ASANG: yang khe' thug' pye' ra" ai: mung"dan: mae naonhaung" qhid' mae na ko" ra" solho caung:pa" ra" mo, wa airu: kad' yang: yao: bam yao" gaung re masan masin" kad' pye' ako".

²⁵Yao: bam: lo, mau" jham wa ai: mung" re masan masin" boe" nhao: ako". Airumung:- ASANG wa ai: mung" re qobo dae byid: mung:- aimae na: ra" mo, re ngag: pye' ra".

²⁶Yao: bam wa ai: qu" ca' qu" yao: ra" lo, mau" jham re kad' gemung: ai: mung"dan: re masan masin" boe" nhao: ako". Ngadqere: naonhaung" wa yao: bam ru: dakad' ge,- Israel byu qe mangad: lao"- naonhaung" we' daga" na ko" ra" taung bug byu qe naonhaung" alhab' wa ASANG: tarha" jham we' amyin" dao: jham re phug' cao" ca" ako".

²⁸Airulao"- naonhaung" qhid' mae na ko" ra" solho re caung:pa" ko" ra" mo, ngag: ha: pye' qhug' ko" ru we' dakhyo:- ai: mung"dan: wa naonhaung" re mangag: ha: pye' nae".

²⁹Ce: qu" ca' qu" yao: ra" lo, mau" jham mae" daja: ja: re kad' ra" yaug khag' ngadqere: yao: re Mao"So: byu dayaug khyo" mamyid: jho: yu lo nae" rure naonhaung" ba: ako".

³⁰ASANG wa- ngo byid' ra" amyin" dao: jham re phug' cao" mung:- naonhaung" qhid' mae ai: mung"dan: mae na ko" ra" byu qenho: ave, lo, mau" jham re dacao" kad' ge,- amung: ai: lo, mau" jham mae" daja: ja: re kad' ra" khyo" yang naonhaung" yao" gaung re masan masin" daboe" nhao ge,- ngo wa naonhaung" Mao"So ASANG ngad: ra"- ga: ta" ra".