Read Maru XEIM: NGAUI" 19 Bible Online

XEIM: NGAUI" 19 - Maru bible

XEIM: NGAUI" 19

¹ASANG wa Moshe re-

²Israel byu qere ceru ta" kyo: byid: nae" ta" ra". Aiwa Gyang" Lho" ge,- pe"mung:ga"re naonhaung" Mao"So ASANG ngo wa gyang" lho" yaug ngad: ra".

³Naonhaung" yaug khao: ngo" wa yao: myhi" we' yao: pho" tao re phug' myao: ca" ako". Amung: ASANG amyin" byid' to" ru we' dakhyo:- Dugno: Ba re phug' cao" ca" ra". Ngo wa naonhaung" Mao"So ASANG ngad: ra".

⁴Ngo re dashapye' gela,- amung: solho jham re dacaung:pa" ge,- so jham re to' yang alho kad' yang: aijham re dacaung:pa" ge,- ngo wa naonhaung" Mao"So ASANG ngad: ra".

⁵Naonhaung" wa zam" khug: ra" ngaui" xeim: gug'nyhug' re se' gelao"- naonhaung" re ngo byid' to" ra" thung"li jham re phug' cao" ge,- ailao" ngo wa ai: ngaui" xeim: re khae: yu nae".

⁶Sho: re ai: gug'nyhug' se' ra" ba na mae- mangad: lao" thao: ba mae zo" pye' ca" ra". Sam ba ein: ba mae dang: jo; ra" sho: alhab' re wa ngha" pye" ca" ra".

⁷Pe"mung:ga"re- airu wa caung:pa" thung" khyo" masan masin" ru ngad: ra". Aire dayaug yaug zo" ngad: re ngo wa ai: ngaui" xeim: re makhae: yu nae".

⁸Aire zo" ra" yaug wa ngore qhaug' byid' to" ra" ja: re maphug' makhyad' kad' ra" qobo qo" li" nae". Aimung: yao: re nga" byu dayaug khyo" majho: yu byid: lo nae" ngad: ra".

⁹Naonhaung" yothaung: jham re yad: yu ko" ra" au:- yothaung: gyeim: yae mae" gaug jham re dayad: yu ge,- amung: gaug gyo" jham rere: daye: tug' yad: yu ge,.

¹⁰sabyi agyo" jham re yedam: phyo' zhang: yu nae" qhid' mae" mangad: lao"- myidgaung khyo shu: gyo" lo" byaug: ra" sabyi shi: jham re yegaug: yu nae" qhid' mae" naonhaung" sabyi khyae khyo datug' ye: ge,. Aijham re myaung sho" ra" mo, we' taung bug byu qe: qhid" mae" tang" to: co' ge,. Ngo wa naonhaung" Mao"So ASANG ngad: ra".

¹¹Dakhug' ge,- dapyag' vhan" ge,- damhug' ge,.

¹²Nao dao:so: mazaung nae" yaung: to: yaug ngad: re- nga" mang mae dao:so: dato: wa,. Airu wa nga" mang re phoe nhao: ra". Ngo wa naonhaung" Mao"So ASANG ngad: ra".

¹³Dayaug yaug: nho: akyu" jeju re dalhad' yu wa,- yao: re dalhad' zo: wa- nao okaung lhaung: to" ra" yaug: nho: okaung phug' re dazaui" zag: ci wa,- damyi lhao" re: dazaui" zag: ci wa,.

¹⁴Nojid yaug re danhang:- mangad: lao" yao: re tha" lang: nhao nae" qhid' mae" myo, jid yaug: qhid' au: mae daja: ja: dato: byid: wa,- ngore gyaug phug' gela,- ngo wa naonhaung" Mao"So ASANG ngad: ra".

¹⁵Din: din: man: man: kad' wa,- tarha" vao: ra" mung man: re nao myid: phyid' ra" au:- myaung sho" ra" yaug rere: myo, nho dabyid: wa,- jo,nho" qo" ra" yaug rere: dagyaug wa,.

¹⁶Dayaug yaug: khyo re lau damhug' hau:- byu dayaug yaug yao" kao so' qhid' mae" gyaug ca" ra" tarha" myid' ca: qu" ru qhug' na: au:- ni" nho: sagse: kham: ra" dao: wa yao: re qo" bao" thaug' byid: nae" ru ngad: re wa ta" thug' wa,- ngo wa ASANG ngad: ra".

¹⁷Khag' rere: manug masho: dakad' ngadqere: yao" mathao mae nao qobo mashad' nae" qhid' mae" yao: we' jho" shai" ra" khyo jham re nyang nae" kad' wa,-

¹⁸Khag' rere: lage, daphaug'- mangad: lao"- yao: re danghang" jo,- ngadqere: nao kam" wa naoyao" gaung re nao jhid'de; ru we' dakhyo:- ni" nho: yham kyo: cao: re jhid'de; wa- ngo wa ASANG ngad: ra".

¹⁹Nga" amyin" dao: jham re phug' cao" ge,- yham mae khau: ra" majho" dau: ra" gug'nyhug' jham re majho" dau: ra" gug'nyhug' amyug: dake' wa,- yothaung: dakhyao: mae za: amyug: shid' ja: daqho: wa,- khyang shid' ja" yang qo; yang: khyab' to" ra" mai bau: jham re dave,.

²⁰Jeim myhi" dayaug wa yauggai dayaug: yang myingai kad' nae" khyo" xam: so" to: qhug' mung:- yao" qhid' mae" aphug' byid: yang: lhoe' ke' maqhug' shire- gatau yauggai dayaug we' gaung sho: jho" zam" yang: ngad: re- yao: shid' yaug wa qobo dae byid: qhug' li" genae". Ngadqere: yao: wa jeim ngad: ruyang se' pye' qhug' nae" mangad:.

²¹Ai: yauggai wa yao: dam: khyug' byid' ra" ngaui" xeim: khyo" yao lo: dadau: re nga" qhid' kheim: Zaung kham: dung: khyo she: li" nae" ngad: ra".

²²Amung: khinjaung pho" wa aiyaug: nho: qobo re yu: pye' byid: nae" qhid' mae" ai: yao re ci yang: caung:pa" thung" khyo" kyang" san: pye' ra" khyo re kad' nae" ngad: ra". Ailao" Mao"So wa yao: re qobo khyad' pye' byid' li" nae".

²³Naonhaung" wa Khanan mung" khyo joe" vao: lo mung:- shigae aja: ja: re qho: gelao"- sao qhid' sam zin gu: wa ai: shi: re caung:pa" thung" khyo" masan masin" ru ngad: ein: myid: jho: yu nae" ngad: ra". Naonhaung" wa ai: ayo, gyo: mae aire dazo: ge,.

²⁴Byid zin ein: zin mae wa ASANG ngore naonhaung" jeju so: myid qhu" byid: nae" ngaui" xeim: khyo" shi: alhab' re qhaug' byid: genae" ngad: ra".

²⁵Ngadqere: ngo" zin ein: zin mae wa ai: shi: re naonhaung" gai: zo" ako". Naonhaung" airu: cao" kad' gelao"- naonhaung" shigae jham wa ashi: je: zaui" li" nae". Ngo wa naonhaung" Mao"So ASANG ngad: ra".

²⁶Sa: bo: jo, shi" ra" sho: pe" rere: dazo: ge,- vha" ra" lo, mau" pe" ja: rere: dakad' ge,.

²⁷Naonhaung" nho: au: ayae mae" xae jham rere: dako' ge, naonhaung" nhad' maui: rere: daphyid' vhang" ge,.

²⁸Shid: ra" yaug qhid' mae" kaug' qhui yang naonhaung" yao" gaung re mhaug' dathug' ge,- mangad: lao" naonhaung" yao" gaung re dae dalhai: tung" ge,- ngo wa ASANG ngad: ra".

²⁹Yao: bam re caung:pa" yham mae shava myhi" kad' nhao: ra" khyo" yang naonhaung" nho: myiqe: zo: qere qho' daphyo' ge,- naonhaung" aru: kad' ko" re wa naonhaung" wa gatau: so jham khyo phaug' lo" li" genae". Airulao" mung"dan: wa akyang byo; qeim: ru byang" jo; li" nae".

³⁰Dugno: Ba re phug' cao" ge,- ngore caung:pa" byid' ra" jo, qo re nga: yhe' byid: ge,- ngo wa ASANG ngad: ra".

³¹Shid: ra" mo; nho: byo jham we' jho" jhau: ko" ra" mo, jhao" pha,jhi" daye: mho' ge,. Naonhaung" airu: kad' ko" re wa naonhaung" wa caung:pa" thung" khyo" masan masin" ngad: li" genae". Ngo wa naonhaung" Mao"So ASANG ngad: ra".

³²Mao: zo: qere phug' myao: wa,- yao: bam re nga: yhe' byid: wa,- phug' myao: yang: nga" mho dao: re tae" gyo: wa,- ngo wa ASANG ngad: ra"

³³Naonhaung" mung"dan: mae na: jo, ko" ra" taung bug byu qere magun masun: dakad' ge,.

³⁴Nao wa yao: bam re Israel byu qere we' dakhyo: kad' wa,- amung: naoyao" gaung re nao jhid'de; ru we' dakhyo:- yao: bam re jhid'de; wa,- naonhaung" wa ganhae" Egutu mung" mae taung bug byu qe boe" qu" vako" ra" khyo re myid: beim: ge,. Ngo wa naonhaung" Mao"So ASANG ngad: ra".

³⁵Naonhaung" wa maman" ra" jao laug: we' jao lag jham re ci yang: khag' rere: dapyag' zo: ge,.

³⁶Man" ra" jao- man" ra" jao laug: we' man" ra" jao lag jham re ci ge,- ngo wa naonhaung" Mao"So ASANG ngad mung: Egutu mung" mae" ngo naonhaung" re jhui" thug' lo: ra".

³⁷Nga" nho: tarha" jham alhab' re we' amyin" dao: jham alhab' re phug' cao" ge,. Ngo wa ASANG ngad: ra"- ga: ta" ra".