Read Maru XEIM: NGAUI" 2 Bible Online

XEIM: NGAUI" 2 - Maru bible

XEIM: NGAUI" 2

¹Byu dayaug yaug wa cinman" ngaui" xeim: ASANG re ngaui" byid: nae" lao"- yao: wa sao qhid' aire cinman" phaui: gyag: yu ca" ra". Yao: wa aimae zhanlun xau we' nae pyo: ja: ke' ca" ra".

²Amung: Arun kaung mae" khinjaung qejhao" aire ciye: qo: ra". Tarha" vao: ra" khinjaung pho" wa cinman" phaui: dazhab' we' nae pyo: ja: alhab' re yu: yu mung:- ASANG re alhab' geim" ngaui" byid: va" ra" aso: khyo" aire phan dao mae phad' ngaui" byid: nae" ngad: ra". Ce: zo:ve xeim: meim sheim wa ASANG re ngaui nhao: ra".

³Dang: ra" cinman" ngaui" xeim: wa khinjaung qe: qhid' mae" ngad: ra". ASANG re ngaui" byid' ra" zo:ve ngaui" xeim: mae" yu: to" rumung: airu wa gyai gyang" lho" ru ngad: ra".

⁴Mug ngaui" xeim: byid' ngad: re airu wa man" mabo lo: kad' to" ra" mug ngad ca" ra". Airu wa cinman" we' zhanlun xau we' lhag' yang: thau sho' kad' to" ra" mug mangad: lao"- zhanlun xau gyad: to" ra" mug sao: po: ngad ca" ra".

⁵Ai: ngaui" xeim: wa jo, to' ug' the" mae kad' ra" mug ngad: re wa- aiwa cinman" we' zhanlun xau lhag' mung: man" make' lo: kad' to" ru ngad ca" ra".

⁶Nao ngaui" xeim: khyo" aire ngaui" byid: lao"- ai: mug re khyoe' phai" mung:- aimae xau vhe' zaui nae" ngad: ra".

⁷Xeim: ngaui" mug wa ug' the" mae kad' to" ru ngad: re wa- aiwa cinman" we' zhanlun xau: yang kad' to" ru ngad ca" ra".

⁸Airu re ngaui" xeim: khyo" ASANG jhao" cili" mung:- aire phan khyo ciye: nae" yaug ngad: ra" khinjaung pho" re yebyid: nae" ngad: ra".

⁹Khinjaung pho" wa alhab' re ngaui" byid: va" ru ngad: ra" aso: khyo" aimae" daqhae: re yu: yu mung:- yao: wa aire phan dao mae phad' ngaui" byid' li" nae". Ce: zo:ve xeim: meim sheim wa ASANG re ngaui nhao: ra".

¹⁰Dang: ra" ngaui" xeim: gu: wa khinjaung qe: qhid' mae" ngad: ra". Airu wa ASANG re ngaui" byid' ra" zo:ve mae" yu:to" ru ngad: ruyang aiwa gyai gyang" lho" ru ngad: ra".

¹¹Nao ASANG re qhaug' byid' ra" cinman" ngaui" xeim: jham pe" daja: rere:- man" we' magai: kad' ngad: ra". Nao wa ASANG re ngaui" byid' ra" zo:ve mae man" mangad: lao"- byoyhid magai: ci ngad: ra".

¹²Zin khao: ngo" mae nao qo" yad: yu: ra" gaug zo sao qhid' mhang" rure ASANG jhao" cili" byid: nae" ngad: ra"- ngadqere: aire phan dao mae magai: phad' ngaui" byid: nae" ngad: ra".

¹³Cin man" ngaui" xeim: ja: khao: ngo" mae xo: ke' wa,- pe"mung:ga"re xo: wa naonhaung" we' Mao"So: agyo: mae dao: thang" re gaung tha" kad' byid' ru ngad: ra". (Naonhaung" wa naonhaung" ngaui" xeim: jham alhab' mae xo: ke' ca" ako".)

¹⁴Nao wa sao qhid' mhang" ra" gaug zo re ASANG re ngaui" byid: nae" cili" lao"- aire kao yang:- mangad: lao"- laug lhang mae gyag yang: ngaui" byid: nae" ngad: ra".

¹⁵Aimae zhanlun xau we' nae pyo: ja: boke' nae" ngad: ra".

¹⁶Khinjaung pho" wa ai: cin daqhae: re we' xau re yu mung:- aso: khyo" caung da" byid: nae" ngad: ra". ASANG re ngaui" byid' ra" zo:ve ngaui" xeim: khyo" nae pyo: ja: alhab' rere: ngaui" byid: nae" ngad: ra".