Read Maru XEIM: NGAUI" 23 Bible Online

XEIM: NGAUI" 23 - Maru bible

XEIM: NGAUI" 23

¹ASANG wa Moshe re-

²Israel byu qe caung:pa" nae" qhid' mae" daga" zang" ham gelao" phug' cao" genae" qhid' mae" tung" to" ra" caung:pa" thung" poe" we' sin" ra" thung"li jham re byid' ra".

³ASANG wa naonhaung" yao" mau" re zaui: nae" ba na khyaug' ba naonhaung" qo" ako". Ngadqere: Dugno: Ba ngad: ra" Nhad' ba ein: ba wa no" na: ra" ba na ngad: rure beim: ge,. Ai: ba na mae mau" dazaui: ge,- caung:pa" nae" qhid' mae" kam" wa daga" zang" ham: na ge,. Naonhaung" khai: mae na na- Dugno: Ba na wa ASANG: ba na ngad: ra".

⁴O mae ta" to" ra" caung:pa" thung" we' sin" ra" poe jham re san: to" ra" ayo, mae ta" pyo byid: wa,-

⁵ASANG re phug' te' nga: yhe' byid: nae" kad' ra" Lai co' poe re- lho" sao qhid' khye mae" daxe: byid ba ein: ba- ba vao yo, mae qhid yang: kad' ge,.

⁶Daxe: ngo" ba ein: ba mae Man" make' mug poe re qhid mung:- nhad' ba lam: lam: man" ke' yang: kad' ra" mug pe" ja: rere: naonhaung" magai: zo: ngad: ako".

⁷Ai: sao qhid' ba na jham: gu: mae caung:pa" nae" qhid' mae" naonhaung" daga" zang" ham: na genae" ngad mung:- naonhaung" mau" pe" re: magai: zaui: genae" ngad: ra".

⁸Nhad' ba lam: lam: naonhaung" zo:ve ngaui" xeim: jham re ASANG re ngaui" byid: ge,. Nhad' ba ein: ba mae caung:pa" nae" qhid' mae" naonhaung" daga" dam: ham nae" ngad gemung: naonhaung" mau" pe" re: magai: zaui: nae" ngad: ra".

⁹ASANG: yang naonhaung" re byid: nae" ngad: ra" mung"dan: khyo joe" vao ye: mung:- naonhaung" gaug zo: re yad: yu gelao"- sao qhid' mae" gaug dang: re khinjaung pho" jhao" ciye: byid: ge,.

¹¹Naonhaung" khae: yu: ru qhug' genae" qhid' mae" yao: wa aire gakai: lai mung: ra" ngaui" xeim: khyo" ASANG re qhaug' byid: nae" ngad: ra". Khinjaung pho" wa Dugno: Ba thao: ba aire qhaug' byid: nae" ngad: ra".

¹²Gaug zo ngaui: xeim: re naonhaung" qhaug' byid: ko" ra" ba na mae qo mabo: ra" dazin bo: ra" yao lo: nau" dadau: rere: phad' ngaui" byid' ra" ngaui" xeim: khyo" ngaui" byid: nae" ngad: ra".

¹³Ai we' daga"- zhanlun xau we' lhag' to" ra" cinman" dajoe: je re zo:ve ngaui" xeim: khyo" qhaug' byid: nae" ngad: ra". Ce: ngaui" xeim: meim sheim wa ASANG re ngaui nhao nae" ngad: ra". Naonhaung" wa ai we' daga" sabyi qang: ngaui" xeim: shid' soe: rere: qhaug' byid: nae" ngad: ako".

¹⁴Ce: ngaui" xeim: re Mao"So jhao" maye: bin: qhaug' byid: byid: wa ai: gaug sag' re cin ngad ngad- gaug shin: ngad ngad- mug khyo" ngad ngad dajhid' re: dazo: ge,- ce: thung" tarha" wa joe" lo nae" yo, khyin: alhab' mae naonhaung" myid:zo: qeyang phug' cao" nae" tarha" jham ngad: ra".

¹⁵Naonhaung" nho: gaug dang: re ASANG re naonhaung" qhaug' byid' ra" Dugno: Ba thao: ba mae" nhad' laban byang" sho' nghe' yu ge,.

¹⁶Dugno: Ba nhad' ba ein: ba thao: ba ngad: ra" ngo" xe ba ein: ba mae gaug sag' ngaui" xeim: gatau re ASANG re qhaug' byid: genae" ngad: ra".

¹⁷Ug' khug' dinkhu: khao: ngo" gakai: lai jhaung qhu" khyo" mug shid' khai" re ASANG re qhaug' byid: genae" ngad: ako". Mug khai" khao: ngo" dajoe: je re man" we' mug kad' mung: sao qhid' yad: yu: ra" gaug sag' ngaui" xeim: khyo" ASANG re qhaug' byid: nae" ngad: ra".

¹⁸Ai: mo, byu phaung wa mug we' daga" qo mabo: ra" dazin bo: ra" yao nau" nhad' dau:- nung: jaung lo: dadau:- yao lo: shid' dau:- re qhaug' byid: genae" ngad: ra". Yao: bam wa phad' ngaui" byid' ra" ngaui" xeim: khyo" gaug zo ngaui" xeim: we' sabyi qang: ngaui' xeim: re daga" za: ASANG re ngaui"byid: genae" ngad: ra". Ce: ngaui" xeim: meim sheim wa ASANG re ngaui nhao: ra".

¹⁹Qobo ngaui" xeim: khyo" cad' lo: dadau: re we' zam" khug: ra" ngaui" xeim: khyo" dazin bo: ra" yao lo: nau" shid' dau: rere: ngaui" byid: genae" ngad: ra".

²⁰Khinjaung pho" wa khinjaung qe: qhid' mae" gakai: lai jhaung qhu" khyo" mug we' yao lo: nau" shid' dau: ASANG re qhaug' byid: nae" ngad: ra". Ce: ngaui" xeim: jham wa gyang" lho" ra".

²¹Ai: ba mae naonhaung" mau" pe" re: dakad' ge,- caung:pa" nae" qhid' mae" kam" wa daga" zang" ham: na ge,- joe" lo nae" ayo, alhab' mae naonhaung" myid:zo: qe wa yao: bam khai: mae na: re na ce: thung"li jham re phug' cao" ca" ako".

²²Naonhaung" yo re yad: yu gelao"- gyeim: yae mae" gaug re dayad: yu ge,- gaug gyo" jham re daye: dam: tug' yad: yu ge,. Aijham re myaung sho" ra" mo, we' taung bug byu qe: qhid' mae" tang" to: co' byid: ge,- ASANG wa naonhaung" Mao"So ngad: ra".

²³Lho" nhad' khye' ein: khye' sao qhid' ba re gakai: lai no" na: ra" ba na khyo" phug' cao" mung:- labo" jham mad thoe myang: thug' li" lao"- caung:pa" nae" qhid' mae" daga" zang" ham: na ge,.

²⁵ASANG re zo:ve ngaui" xeim: qhaug' byid: mung: naonhaung" mau" pe" re: dazaui: ge,.

²⁶Lho" nhad' khye' ein: khye' daxe ba ein: ba wa mo, byu qe: qobo re khyad' pye' byid: nae" qhid' mae" caung:pa" thung" re cao" yang: dazin dalhang kad' ra" ba na ngad: ra". Ai: ba na mae pe" rere: dazo: ge,- caung:pa" nae" qhid' mae" daga" zang" ham: na ge,- amung: ASANG re zo:ve ngaui" xeim: qhaug' byid: ge,.

²⁸Ai: ba mae mau" dazaui: ge,- pe"mung:ga"re ai: ba na wa qobo jham re yu: pye' byid: nae" qhid' mae" caung:pa" thung" re cao" yang: kad' ru ngad: ra".

²⁹Ai: ba na mae daja: ja: re zo" ra" yaug khag' re ngadqere: yao: re Mao"So: byu dayaug khyo" myid: jho: yu lo nae" mangad: nae".

³⁰Ai: ba na mae dayaug yaug mau" kad' yang: ngad: re yao: re ASANG yao: se' pye' li" nae".

³¹Naonhaung" myid:zo: qe alhab' wa yao: bam khai: mae na na- ce: thung"li jham re ci genae" ngad: ra".

³²Gug ba ein: ba- ba vao yo, mae" daxe ba ein: ba- ba vao yo, joe" sho' ce: ba re gakai: lai no" na: ra" ba na khyo" phug' cao" mung:- ai ayo, gyo: mae pe" re: magai: zo: ngad: ra".

³³Zaung poe re lho" nhad' khye' ein: khye' daxe: ngo" ba: mae qhid mung: xo' yang: nhad' ba lam: lam: kad' nae" ngad: ra".

³⁵Sao qhid' ba ein: ba mae caung:pa" nae" qhid' mae" daga" zang" ham: na mung: naonhaung" mau" pe" rere: dazaui: ge,.

³⁶Nhad' ba lam: lam: ba khao: ngo" mae naonhaung" wa zo:ve ngaui" xeim: re qhaug' byid: genae" ngad: ako". She' ba ein: ba mae wa caung:pa" nae" qhid' mae" daga" zang" ham mung: zo:ve ngaui" xeim: re qhaug' byid: ge,. Ai: ba na wa caung:pa" byid: nae" ba na ngad mung:- naonhaung" wa mau" mazaui: nae" ngad: ako"- ga: ta" ra".

³⁷(Aijham wa caung:pa" nae" qhid' mae" daga" zang" ham: na mung: zo:ve ngaui" xeim: jham- phad' ngaui" byid' ra" ngaui" xeim: jham- cinman" xeim: jham- xeim: ngaui" jham sabyi qang: ngaui" xeim: jham- re qhaug' byid' ra" khyo" yang ASANG re nga: yhe' phug' te' byid' ra" caung:pa" thung" we' sin" ra" poe jham ngad: ra".

³⁸Ai: poe jham wa Dugno: Ba jham mae laung: yang: kad' ra" poe jham ngad mung:- ai: ngaui" xeim: jham wa naonhaung" jhaung qhu" jham- thao: ce' re zaui" pyang" ra" khyo" qhaug' byid' ra". Naonhaung" nho: ngaui" xeim: jham- naonhaung" ASANG re byid: ko" ra" naonhaung" myid bug: ngaui" xeim: jham re laung: yang qhaug' byid: ra" ngaui" xeim: jham ngad: ra".

³⁹Naonhaung" yo jham bin: yad: yu gelao"- lho" nhad' khye' ein: khye' daxe: ngo" ba ein: ba mae" qhid yang: ce: poe re nhad' ba lam: lam: kad' ge,. Sao qhid' ba wa gakai: lai: ra" ba na ngad: li" nae".

⁴⁰Ai: ba mae naonhaung" shigae jham mae" gai: thao" ra" shi: daqhae: re we' laso' kaung jham- avho' maung" ra" sag' gae jham mae" akaung jham cu: yu mung:- naonhaung" Mao"SoASANG re phug' te' nga: yhe' byid: nae" qhid' mae" caung:pa" thung" we' sin" ra" poe re kad' qhid ge,.

⁴¹Ai: poe re nhad' ba lam: lam: kad' ge,- ce: thung"li wa naonhaung" myid:zo: qeyang joe" lo nae" ra" ayo, alhab' mae phug' cao" genae" ra" thung"li ngad: ra".

⁴²Israel byumyu" alhab' wa zaung khug mae nhad' ba lam: lam: na: jo, nae" ngad: ako".

⁴³Airulao" ASANG wa yao: bam re Egutu mung" mae" jhui" thug' lo: ra" au: re- Israel byu qere ba sham zaung khug mae na nhao: lo: ra" khyo re naonhaung" myid:zo: qe ba nae" ngad: ako". Yao: wa naonhaung" Mao"So ASANG ngad: ra"- ga: ta" ra".

⁴⁴Ceru: Moshe wa Israel byu qere-ASANG re phug' te' nga: yhe' byid: nae" caung:pa" thung" we' sin" ra" poe jham re kad' rumae phug' cao" genae" ra" thung"li jham re byid' ra".