Read Maru XEIM: NGAUI" 24 Bible Online

XEIM: NGAUI" 24 - Maru bible

XEIM: NGAUI" 24

¹ASANG wa Moshe re- Israel byu qere o mae ta" to" ra" amyin" dao: byid: wa,- ga: ta" ra".

²Aiwa- mathang nga" bao: na vashao:- Zaung khug mae jo; ra" myikaug' jham qhid' mae" gai: thao" ra" zhanlun xau gyang" re ci:ye: ge,.

³Arun wa myi" thao khao: ngo" ai: myikaug' jham re myi: te' mung: Gyang" Lho" Thao" Jo, qo ngad: ra" Dao: Thang" Ban" qhid' au: mae" akyo pin: lung: taung gaung shad' ASANG: qhid' kheim: mae ne, kao joe" sho' xo' yang: nga" bao: jo, nhao ge,- ce: thung"li wa joe" lo nae" ayo, alhab' mae phug' cao" nae" ra" thung"li ngad: ra".

⁴Arun wa qhang gyang" yang kad' ra" myikaug' tao" dao mae jo; ra" myikaug' jham re qu" caung nae" ngad mung:- ASANG: qhid' kheim: mae ai: myikaug' jham mathang nga" bao: jo; rure qu" na ca" ra".

⁵Cin man" she' joe: ko re yu mung: mug daxe: shid' khai" kad' nae" ngad: ra".

⁶Ai mug jham re ASANG: qhid' kheim: mae jo; ra" qhang gyang" yang thab' to" ra" saboe" dao mae dajin mae khyaug' khai" khai" mung: kad' yang: shid' jin to: nae" ngad: ra".

⁷ASANG re qhaug' byid' ra" zo:ve ngaui" xeim: mug atha" khyo"- ai: mug shid' jin geim" mae sheim nae" pyo: ja: agyang" daqhae: re vhe' gyad nae" ngad: ra".

⁸Joe" lo nae" ayo, Dugno: Ba khao: ngo" mae mug re ASANG: qhid' kheim: mae to" to: qo: ra". Ceru wa Israel byu qenho: apyad ato: ra" qo ngad: ra".

⁹Mug wa Arun we' yao" myid:zo: qenho: qhid' mae" ngad mung:- yao: bam wa aire gyang" lho" jo, qo mae zo: genae" ngad: ra". Pe"mung:ga"re ceru wa khinjaung qe: qhid' mae" ASANG re ngaui" byid' ra" zo:ve ngaui" xeim: mae" gyai gyang" lho" ra" dau: ngad: ra"- ga: ta" ra".

¹⁰Yao: pho" wa Egutu byu- yao: myhi" wa Dan kaung mae" Dibri ga: yaug: myiqe: zo: Shelomid ga: mang: ra" Israel byu tao: yao: zo: dayaug na: ra". Thang: na: ra" jamu dalam: mae byu ceyaug wa Israel byu dayaug we' jho" myan" myo" ako". Jho" myan" myo: ko" au: byu aiyaug wa Mao"So re nhang" ra". Airumung: yao: bam wa yao: re Moshe jhao" jhui" lo mung:-

¹²Yao: re zaung" to" ako". Amung: yao: re khoru: kad' nae" ASANG: yang yao: bam re ta" nae" rure lao" na: ako".

¹³ASANG wa Moshe re-

¹⁴Ai: yaug re jamu mae" she: thug' pye' ge,- yao: nhang" rure the' gyo" ra" mo, yaug khao: ngo" wa yao: qobo qo" ra" khyo re sagse: kham nae" qhid' mae" aiyaug au: dao mae yao" lo, re kai" genae" ngad: ako". Ai: thao byumyu" phaung geim" wa yao: re laugbaui: yang pye' se' pye' nae" ngad: ako".

¹⁵Ai: thao Mao"So re nhang" ra" yaug khag' ngadqere: ainho: akyu" re kham zo: ca" mung:- se' pye' ru qhug' nae" ngad: ra" khyo re Israel byu qere ta" kyo: nae" ngad: ra".

¹⁶Israel byu khag' ngadqere:- mangad: lao"-Israel mung" mae na: ra" taung bug byu khag' ngadqere:- ASANG re nhang" ra" yaug wa byumyu" phaung geim" yang laugbaui: yang pye' se' pye' ru qhug' nae" ngad: ra".

¹⁷Byuse' yaug khag' ngadqere: se' pye' ru qhug' li" nae".

¹⁸Amung: su gaje: nho: gug'nyhug' re se' ra" yaug khag' ngadqere: aire dam: khyug' byid: ca" ra". Apan aqao: tarha" wa kao so' qhid' mae" kao so' ngad: ra".

¹⁹Byu dayaug: yang gatau dayaug re dae te' byid' ngad: re yao: kad' ruru: yao:- yao: re kad' nae" ngad: ra".

²⁰Yao: wa shoqug: dakhe' re gyug: nhao yaug ngad: re yao" shoqug: dakhe' rere: khyug' pye' byid: nae" ngad: ra". Yao: wa myo, dashad' re zai" cid' pye' yang: ngad: re- yao" myo, zai" cid' pye' ru qhug' nae". Yao: wa zaui dakhe' re thaung" phan" pye' yang: ngad: re yao" zaui dakhe' rere: thaung" phan" pye' byid: nae" ngad: ra". Yao: wa su gatau re khoru: dae te' byid' re- yao: rere: airu: yao: dae dam: te' byid: nae" ngad: ra".

²¹Gug'nyhug' re se' ra" yaug khag' ngadqere: aire dam: khyug' byid: nae" ngad: ra". Ngadqere: byuse' ra" yaug wa se' pye' ru qhug' nae" ngad: ra".

²²Ce: tarha" wa Israel byu qe- naonhaung" phaung mae na ko" ra" taung bug byu qe we' naonhaung" alhab' mo, ci nae" tarha" ngad: ra". Pe"mung:ga"re ngo wa naonhaung" Mao"So ASANG ngad:- ga: ta" ra".

²³Ceru re Moshe yang Israel byu qere bin: ta" kyo: lao" yao: bam wa byu aiyaug re thang: na: ra" jo, qo taung gaung shad' khyo jhui" thug' ye: mung: laugbaui: yang yao: re pye' se' pye' ako". Ceru: kad' yang: Israel byu qe wa ASANG: yang Moshe re amyin" byid' to" rure kad' ako".