Read Maru XEIM: NGAUI" 27 Bible Online

XEIM: NGAUI" 27 - Maru bible

XEIM: NGAUI" 27

¹ASANG wa Moshe re-

²Israel byu qe: qhid' mae" o mae ta" to" ra" thung"li jham re byid' ra". Aijham wa byu dayaug yaug ASANG re gakai: lai mung: ra" thao: ce' re zaui" pyang" byid: nae" dao: byid' to: lao"- ai: byu wa tarha" vao: ra" azhao" re cao" yang: o mae ta" to" ra" aphug' ngaui re byid: yang: gai: loe; beim: ra".

³Shid' xe zin mae" khyaug' xe: zin gyo: mae" -yauggai qe wa ngaui thang: the: 50 -myiqe: qe wa ngaui thang: the: 30 -ngo" zin mae" shid' xe zin agyo: mae" yauggai qe wa ngaui thang: the: 20 -ngai: ra" myiqe: qe wa ngaui thang: the:10 -ngo" zin o mae" yauggai zonau" qe wa ngaui thang: the: 5 -myiqe: zonau" qe wa ngaui thang: the: 3 -khyaug' xe zin tho' mae" yauggai qe wa ngaui thang: the: 15 -khyaug' xe zin tho' mae" myiqe: qe wa ngaui thang: the: 10 byid: qo: ra".

⁸Thao: ce' to" ra" byu dayaug wa mhai" to" ra" aphug' re byid: nae" gyai myaung sho: yang: ngad: re- yao: wa aiyaug re khinjaung pho" jhao" jhui" ye: mung: khinjaung pho" wa byu aiyaug qo" byid: nae" rure cao" yang: nyham: ra" gau jho re mhai" byid: nae"- ngad: ra".

⁹Xeim: khyo" ASANG re qhaug' byid' ra" khae: yu man" ra" gug'nyhug' we' sin" ra" thao: ce' to" ru ngad: re- byid' ra" jhaung qhu" ja: khao: ngo" wa gyang" lho" ra".

¹⁰Thao: ce' to" ra" yaug wa ai: qhid' mae" gug'nyhug' gatau re magai: tha" byid: ngad: ra". Yao: airu: kad' re gug'nyhug' shid' dau" geim" ASANG: ngad: ra".

¹¹Ngadqere: caung:pa" thung" khyo" masan masin" ra" gug'nyhug' we' sin" ra" thao: ce' ngad: re wa airu wa ASANG re qhaug' byid' ra" ngaui" xeim: khyo" magai: khae: yu ngad: ra". Ai: gug'nyhug' re khinjaung pho" jhao" she: ye: nae" ngad: ra".

¹²Khinjaung pho" wa aire gai: ru- qeim: rure cao" yang: gau jho mhai" byid: nae" ngad: ra". Amung: ai: gau jho wa lo" thao" gau jho ngad: li" nae".

¹³Byu aiyaug wa aire dam: tug' vai: yu nug yang: ngad: re yao: wa ai: gau jho: nho: ngo" bam mae" dabam re laung: yang: vai: ca" ra".

¹⁴Byu dayaug yaug yao" yham re ASANG re qhaug' byid: lao"- khinjaung pho" wa ai: yham gai: ru- magai: rure cao" yang: gau jho mhai" byid: nae" ngad: ra".

¹⁵Ai: yham re qhaug' byid' ra" yaug aire dam: tug' vai: yu nug yang: ngad: re yao: wa ai: gau nho: ngo" bam mae" dabam re laung: yang: aire dam: vai: yu nae" ngad: ra".

¹⁶Byu dayaug wa mug:myid dadau re ASANG re qhaug' byid: yang: ngad: re ai: mug: myid gau: jho re amyug: khonho" vao rure cao" yang: bale gaug daxe bye: re ngaui thang: the: daxe khyo" gau jho mhai" nae" ngad: ra".

¹⁷Yao: wa mug:myid: re dam: tug' byid' ra" zin na thao lao" jao" qhaug' byid' ngad: re gau jho byang" sho' ngad ca" ra".

¹⁸Yao: wa thao re khoyo, mae ngad ngad qhaug' byid: yang: ngad: re- dam: tug' byid' ra" zin na joe" nae" zin na khomyhao" zin dang shi" rure cao" yang: khinjaung pho" wa gau jho re tag yang: gau jho khyo" mung: mhai" byid: ca" ra".

¹⁹Yo mug:myid re qhaug' byid' to" ra" yaug wa aire dam: tug' vai: yu nug yang: ngad: re- yao: wa ai: gau jho: nho: ngo" bam mae" dabam re laung: yang: vai: yu ca" ra".

²⁰Yao: wa ASANG mae" shi" sao qhid' matug' vai: yu lo:- gatau dayaug yaug re ai: yo myid aung: yang: ngad: re- yao: wa dam: tug' vai: yu nae" akho: akhang" seim" pye' ra".

²¹Thao azhao: mae" ru: dam: kad' ra" zin mae ai: myid wa ASANG: khonhae" re: mabab malaui" ra" jo,nho" dai kham boe" lo: li" nae". Aiwa khinjaung qe sang nae" ngad: ra".

²²Byu dayaug wa yao: vai: yu: ra" yo myidgaung re- ASANG re qhaug' byid: yang: ngad: re-

²³Khinjaung pho" wa- Thao: lhang dam: tug' byid' ra" zin na joe" sho' gyo: mae" zin na jham re cao" yang: ai: aphug' gau jho re myid: tau" yang: mhai" byid: nae" ngad: ra". Byu aiyaug wa ai: gau jho re ai: ba re yao: byid: ca" ra". Ai: ngaui wa ASANG: ngaui ngad: ra".

²⁴Ai: myid yo, myid azhao mae" ru: dam: kad' ra" zin na mae azhao aire sang: ra" yaug- mangad: lao" yao" myid:zo: qere dam: tug' byid: nae" ngad: ra".

²⁵Aphug' gau jho alhab' re tarha" vao: ra" azhao" re cao" yang: mhai" nae" ngad: ra".

²⁶Sao qhid' xao" ra" gug'nyhug' wa ASANG: ngad: ra". Airumung: aire khag' re: myid bug: yang: ngaui" byid' ra" xeim: khyo" ASANG re magai: qhaug' byid: ngad: ra". Nung: nau"- yao nau"- cad' be, nau" wa ASANG: mae" ngad: ra".

²⁷Ngadqere: sao qhid' xao" ra" masan masin" ra" gug'nyhug' re wa tarha" vao: ra" gau jho: nho: ngo" bam mae" dabam re laung: yang dam: tug' vai: yu ca" ra". Aire madam: tug' vai: yu yang: ngad: re gatau dayaug re tarha" vao: ra" aphug' gau jho we' aung" pye' nae" ngad: ra".

²⁸ASANG re thaug qhaug' byid' to" ra" xao su byu- gug'nyhug'- mug:myid ngad: re ngad khag' re: aire magai: aung:- magai: vai: yu nae" ngad: ra". Airu wa khonhae" re: malai: ra" ASANG: mae" ngad: ra".

²⁹Xao su byu re lhao" re: thaug qhaug' byid' to: va" yaug re magai: tug' vai: yu ngad: ra". Yao: wa se' pye' ru qhug' ca" ra".

³⁰Gaug zo ngad: re ngad- shi: ngad: re ngad mug:myid mae" thug' ra" gu: alhab' daxe bam mae" dabam wa ASANG: mae" ngad: ra".

³¹Byu dayaug wa aimae" daja: ja: re dam: tug' vai: yu nug: ngad: re- yao: wa tarha" vao: ra" aphug' gau jho: nho: ngo" bam mae" dabam re laung: yang: byid: ca" ra".

³²Yham mae myhung: ra" gug'nyhug' jham mae" daxe mae" dadau: khao: ngo" wa ASANG: mae" ngad: ra". Gug'nyhug' jham re nghe' ra" au:- daxe dau: mae" dadau: wa ASANG: ngad: ra".

³³Mayaung" ra" gug'nyhug' jham re mathe' khyin: yu nae" qhid' mae" gug'nyhug' sang wa gug'nyhug' jham re magai: jaung ngad: ra". Yao: wa pe" rere: atha" magai: ke' ngad: ra". Yao: wa dadau" qhid' mae" gug'nyhug' dadau: re atha" kad' yang: ngad: re- ai: gug'nyhug' shid' dau" geim" wa ASANG: mae" boe" li" nae". Aire magai: tug' vai: yu ngad: ra"- ga: ta" ra".

³⁴Cejham wa Israel byu qe: qhid' mae" Sina bam dao mae Moshe re ASANG: yang byid' ra" amyin" dao: jham ngad: ra".