Read Maru XEIM: NGAUI" 6 Bible Online

XEIM: NGAUI" 6 - Maru bible

XEIM: NGAUI" 6

¹ASANG wa o mae ta" to" ra" thung" li jham re Moshe re byid' ra".

²Dayaug yaug Israel byu ba nam pho" yang ab byid' to" ra" ngaui jham re dam: tug' byid: nae" ha: pye' ra" khyo" yang ngad: re ngad- daja: ja: re khug' yu yang: ngad: re ngad- mhug' pyag' zo" yu yang: ngad: re ngad-

³Zai" phyaug' ra" zai re mhug' nyham" yu mung:- yao: mamyao ga: jham tang: yang: ta" ra" khyo" yang ASANG re qobo shad' lhoe' ngad: re ngaui" xeim: nyhang" ca" ra".

⁴Byu dayaug wa ce: qobo mae" daja: ja: re shad' lhoe" lao"- yao: wa madangman" ra" khyo" qo" yu: ra" ja: pe" re ngadqere: dam: tug' byid: ca" ra". Yao: qobo qo" rure qhug' myao: ra" ba na mae yao: wa ai: asang re jab sho' dam: tug' byid: mung:- ai: dao mae ngo" zhao" laung: yang: tug' byid: ca" ra".

⁶Yao: wa yao" dam: khyug' byid' ra" ngaui" xeim: khyo"- ASANG re ngaui" byid: nae" qhid' mae" pe" qo mabo: ra" yao lo: mangad: lao"- cad' be, lo:- dadau: re khinjaung pho" jhao" cili" nae" ngad: ra". Ai: aphug' re tarha" vao: ra" azhao" re cao" yang: gau jho re phyid' nae" ngad: ra".

⁷Khinjaung pho" wa aiyaug: qobo qhid' mae xeim: re ngaui" byid: lao" yao: wa qobo khyad' byid' ru qhug' li" nae".

⁸ASANG wa Moshe re-

⁹O mae ta" to" ra" phad' ngaui" byid' ra" ngaui" xeim: qhid' mae" thung" li jham re Arun we' yao" yauggai zo: qere ta" kyo: nae" qhid' mae" Amyin" byid' ra". Phad' ngaui" byid' ra" ngaui" xeim: re phan dao mae damyi geim" kai" to: mung:- myi: mathang nga" na: qo: ra".

¹⁰Ai: thao khinjaung pho" wa yao" jid:mo" bau: qhang jid:mo" lhodaung: re ve; ci yang:- phan dao mae dang: jo; ra" nyhad nyhad ga" ra" myimhab jham re gag: yu mung:- aijham re phan ayae mae to: nae" ngad: ra".

¹¹Ai: thao yao: wa yao" mai bau: jham re tha" pye' mung:- caung:pa" thung" khyo" san sin" jo, qo ngad: ra" thang: na: ra" Jamu taung gaung shad' khyo ai: myimhab jham re yeshapye' nae" ngad: ra".

¹²Phan dao mae" myi: wa abang mabyid nga" na ca" mung:- khonhae" re: magai: shid nhao ngad: ra". Khinjaung pho" wa ne,seim khao: ngo" ai: dao mae thao: ngha" mung:- phad' ngaui" byid' ra" ngaui" xeim: jham re ai: dao mae nyhang" jaung yang:- zam" khug: ra" ngaui" xeim: mae" xau re phad' ngaui" nae" ngad: ra".

¹³Myi: wa phan dao mae khonhae" re: mathang nga" ca" mung:- khonhae" re: magai: shid: lo" nhao ngad: ra".

¹⁴O mae ta" to" ra" thung" li jham wa cinman" ngaui" xeim: ngaui" byid' ru qhid' mae" ngad: ra". Arun kaung mae" khinjaung pho" wa ASANG re ngaui" byid' ra" cinman" ngaui" xeim: re phan qhid' kheim: mae to: nae" ngad: ra".

¹⁵Ai: thao yao: wa ai: cinman" phaui: mae" dazhab' re we' xau re yu: yu mung:- nae pyo: ja: re ai: dao mae ke' yang:- aire ASANG re alhab' ngaui" byid: va" ra" aso: khyo"- phan dao mae phad' ngaui" nae" ngad: ra". Ce: xeim: meim sheim wa ASANG re ngaui nhao: ra".

¹⁶Aimae" dang: ra" gu: re wa khinjaung qe zo: nae" ngad: ako". Aire man" make' lo: mug kad' mung:- gyang"lho" ra" jo, qo, ngad: ra" ASANG: qhid' kheim: Zaung vang" khug mae zo: genae" ngad: ra". ASANG wa ai: zo:ve ngaui" xeim: mae" yao: bam: gae bam khyo" khinjaung qere byid' to" ra". Airu wa Qobo ngaui" xeim: jham we' dam: khyug' byid' ra" ngaui" xeim: jham we' dakhyo: gyai gyang" lho" ru ngad: ra".

¹⁸Joe" lo nae" ayo, alhab' mae Arun nho: myid:zo: qemae" yauggai qe alhab' wa ASANG re ngaui" byid' ra" zo:ve mae" abang mabyid: ra" yao: bam: gae bam khyo" zo: genae" ngad: ra". Ai: zo:ve ngaui" xeim: re the' tin" ra" yaug gaje khag' ngadqere: ainho: gyang" lho" ra" qam: so' yang dae te' ru qhug' li" nae".

¹⁹ASANG wa Moshe re-

²⁰Arun kaung mae" khinjaung dayaug re lo, kai: byid" ra" thung" li jham re o mae ta" to" ru we' dakhyo:- byid' ra". Yao: lo, kai: byid' rure kham: yu: ra" ba na mae yao: wa ASANG re ngaui" byid' ra" ngaui" xeim: khyo"- cinman" phaui: dakyin: je (Aiwa ba khao: ngo" ngaui" byid' ra" cinman" ngaui" xeim: we' dano" ngad: ra".) re agaung: daqi" re ne,kao mae agaung: daqi" re myi" thao re ngaui" byid: nae" ngad: ra".

²¹Aire xau we' lhag' mung: ug' the" mae kao yang:- khyoe' phai" mung:- cinman" ngaui" xeim: khyo"- meim sheim ASANG re ngaui nae" qhid' mae" ngaui" byid: nae" ngad: ra".

²²Joe" lo nae" ra" ayo, alhab' mae Khinjaung Yin" khyo" caung da" byid' ra" Arun nho: myid:zo: yaug khao: ngo" wa ce: ngaui" xeim: re kad' ca" ako". Aire ASANG re ngaui" byid' ra" ngaui" xeim: khyo" bin sho' phad' ngaui" byid: nae" ngad: ra".

²³Khinjaung pho" kad' ra" ce: ngaui" xeim: re khag' magai: zo: ngad: ra"- aire alhab' phad' ngaui" pye' ca" ra".

²⁴ASANG wa Moshe re-

²⁵Arun we' yao" yauggai zo: qere qobo ngaui" xeim: we' sin: yang:- o mae ta" to" ra" thung" li jham re ta" kyo: nae" qhid' mae" amyin" byid' ra". Qobo ngaui" xeim: qhid' mae" ci: ra" gug'nyhug' re phad' ngaui" byid' ra" ngaui" xeim: qhid' mae" gug'nyhug' jham re se' ra" jo, qo ngad: ra" phan: nho: mug: am: shad' mae se' nae" ngad: ra". Ceru wa gyai gyang" lho" ra" ngaui" xeim: ngad: ra".

²⁶Ai: gug'nyhug' xeim: jham re ngaui" byid' ra" khinjaung pho" wa aire gyang" lho" jo, qo ngad: ra" ASANG: qhid' kheim: Zaung vang" khug mae zo: nae" ngad: ra".

²⁷Ai: gug'nyhug' sho: re the' tin" ra" yaug khag' ngadqere: mangad: lao"- pe" ja: ngadqere: ainho: gyang" lho" ra" qam: so' yang dae te' ru qhug' li" nae". Mai bau: dakhye' khye' mae ai: gug'nyhug' sa: zin: seim: yang: ngad: re- yao: wa aire gyang" lho" jo, qo mae cid' pye' nae" ngad: ra".

²⁸Ai: sho: re xaug' ra" zhogam: ug' khye' khao: ngo" re be; kho' pye' ca" nae" ngad: ra". Amung: gyid: ug' re ci: ngad: re aire deim" boe; khyag' yang: qid: yang cid' pye' nae" ngad: ra".

²⁹Khinjaung yham byu qemae" yauggai qe wa ce: ngaui" xeim: re zo: genae" ngad: ra". Aiwa gyai gyang" lho" ru ngad: ra".

³⁰Ngadqere: ainho: sa: re Zaung khug khyo civao ye: mung:- qobo re yu: pye' byid: nae" qhid' mae" caung:pa" thung" khyo" ci: ra" gug'nyhug' sho: re wa magai: zo: ngad: ra". Aire wa ngha" pye' ca" ra".