Read Maru XEIM: NGAUI" 9 Bible Online

XEIM: NGAUI" 9 - Maru bible

XEIM: NGAUI" 9

¹Lo, kai: byid' ra" khyo agu bin: ra" thao ba mae Moshe wa Arun- yao" yauggai zo: qe we' Israel au: jhaung qere khai: yu: ra".

²Yao: wa Arun re- pe" qo mabo: ra" nung: jaung lo: nau" dadau: we' yao lo: nau: dadau: re she: yu mung:- nung: jaung lo: re wa qobo ngaui" xeim: qhid' mae" yao lo: re wa phad' ngaui" byid' ra" ngaui" xeim: qhid' mae" ngaui" byid: wa,-

³Ai: thao Israel byu qere qobo ngaui" xeim: qhid' mae" cad' be, lo: dadau:- amung: phad' ngaui" byid' ra" ngaui" xeim: qhid' mae" pe" qo mabo: ra" dazin byang" va" nung: nau" dadau:- yao nau" dadau:-

⁴Amung:- zam" khug: ra" ngaui" xeim: qhid' mae" nung: jaung lo: we' yao lo: dadau: dau: she: li" genae" qhid' mae" ta" ra". Yao: bam wa aijham re xau we' lhag' to" ra" cinman" ngaui" xeim: we' daga" ASANG re ngaui" byid: genae" ngad: ra". ASANG wa ana" ba yao: bam jhao" li" na: qhu" byid: nae" ngad: ruyang yao: bam wa ceru re kad' ca" ako".

⁵Yao: bam wa Moshe amyin" byid' to" ra" gu: ja: khao: ngo" re Zaung qhid' au: khyo cili" gemung:- ASANG re caung:pa" byid: nae" qhid' mae" mo,phaung geim" aitau mae zang" ham: na: ako".

⁶ASANG wa yao" qhid' kheim: mae" bao qhui: ra" bo" bao naonhaung" re qo" qhu" byid: nae" qhid' mae" cegu: alhab' naonhaung" kad' genae" amyin" byid' to" ru ngad: ra" ga: Moshe ta" ra".

⁷Ai: thao yao: wa Arun re- ni" nho: qobo we' mo, byu qe: qobo yu: pye' nae" qhid' mae" phan khyo ye: mung:- phad' ngaui" byid' ra" xeim: we' qobo ngaui" xeim: re yengaui" byid: wa,- ASANG amyin" byid' to" ru we' dakhyo:- mo, byu qenho: qobo jham re yu: pye' nae" qhid' mae" ce: ngaui" xeim: re yengaui" byid: wa,- ga: ta" ra".

⁸Ailao" Arun wa phan khyo ye: mung:- yao: yao" qobo ngaui" xeim: qhid' mae" ngad: ra" nung: jaung lo: nau" re se' ra".

⁹Yao" yauggai zo: qe wa sa: re yao: jhao" cili" byid' ako". Amung: yao: wa ai: sa: mae yao" lo, nyhug' thug' jam mung:- aimae" daqhae: gu: re phan: nho: akhyug jham mae" zang khyug au: jham mae gyad: yang:- dang: ra" gu: re wa phan qao: mae vhe' khyo" pye' ra".

¹⁰Ai: thao yao: wa ASANG amyin" byid' to" ru we' dakhyo:- xau- noce' shid' ce' we' gai: thao" ra" sang: dau re phan dao mae phad' ngaui" byid' ra".

¹¹Ngadqere: yao: wa sho: we' shoqid re wa thang: na: ra" jamu taung gaung shad' mae ngha" pye' ra".

¹²Yao: wa yao: yao" phad'ngaui" byid' ra" ngaui" xeim: qhid' mae" ngad: ra" gug'nyhug' re se' ra". Yao" yauggai zo: qe wa sa: re yao: jhao" cilo: ako". Yao: wa phan: nho: byid shad' alhab' geim" khyo ai: sa: re shapye' ke' ra".

¹³Yao: bam wa yao: re au: lam: we' gug'nyhug' nho: gatau shikhai" jham re byid: gemung:- yao: wa aijham re phan dao mae ngha" pye' ra".

¹⁴Ai: thao yao: wa khuglam khugsang: jham we' khyid jham re cid' shaung mung:- phad' ngaui" byid' ra" xeim: dang: ra" gu" nho: adao mae- phan dao mae aijham re ngha" pye' ra".

¹⁵Ai bin thao re yao: wa mo, byu qenho: ngaui" xeim: jham re ngaui" byid" ra". Yao: wa mo, byu qe: qobo qhid' mae" ngaui" byid: nae" ra" cad' be, re she: yu mung:- aire se' yang:- yao" qobo ngaui" xeim: re ngaui" byid: va" ru we' dakhyo:- ngaui" byid' ra".

¹⁶Yao: wa phad' ngaui" byid' ra" ngaui" xeim: qhid' mae" gug'nyhug' rere: she: li" mung:- thung"li re cao" yang: aire ngaui" byid' ra".

¹⁷Yao: wa cinman" ngaui" xeim: re qhaug' byid: mung:- aimae" cinman" phaui: dazhab' re yu yang: aire phan dao mae ngha" ra". (Ceru wa ba khao: ngo" phad' ngaui" byid' ra" ngaui" xeim: re laung: yang: kad' ru ngad: ra".)

¹⁸Yao: wa nung: jaung lo: we' yao lo: re mo, byu qe: qhid' mae" zam" khug: ra" ngaui" xeim: khyo" se' ra". Yao" yauggai zo: qe wa sa: re yao: jhao" cili" byid: mung:- yao: wa ai: sa: re phan: nho: byid shad' geim" khyo shapye' ke' ra".

¹⁹Arun wa nung: jaung lo: xau jham we' yao lo" xau jham re-

²⁰gug'nyhug' shid' dau" nho: qao mhaung" adao mae kai: mung: ai: gu: alhab' re phan khyo vo; ye" ra". Yao: wa xau re phan dao mae ngha" pye' mung:-

²¹Qao mhaung" we' lo, yo shad' paung sin re Moshe amyin" byid' to" ru we' dakhyo:- gakai: lai mung: ra" jhaung qhu" khyo" ASANG re qhaug' byid' ra".

²²Arun wa ngaui" xeim: jham alhab' re bin: ngaui" byid: lao"- mo, byu qe: dao khyo yao" lo, tau: to' yang:- yao: bam re shaman" byid' ra". Ai: thao yao: wa aimae" gyo" lo" ra".

²³Moshe we' Arun tao wa ASANG: qhid' kheim: Zaung khug khyo vao ye" ako". Yao: shid' tao dam: thug' lo gelao"- yao: shid' tao wa mo, byu qere shaman" byid' ako". ASANG: qhid' kheim: mae" bao qhui: ra" bo" bao wa mo, byu qe alhab' mo, jhao" thug' li" ra".

²⁴nyag din taung"-ASANG wa myi: re nhao: ke' mung: phad' ngaui" byid' ra" ngaui" xeim: re we' phan dao mae" xau jham re nga" pye' ra". Airu re mo, byu qe the' myao gelao"- yao: bam alhab' mo, wa zag: hug' mung:- yao: bam: myo,khung: jham re myidgaung khyo goe; gyo" ako".