Read Maru YEREMIA 1 Bible Online

YEREMIA 1 - Maru bible

YEREMIA 1

¹Ce: mugsug' paug' wa- Benyamin byumyu" qenho: mug: myid mae" Anathod vogaung: mae na: ra" khinjaung qemae" dayaug ngad: ra" Hilkia nho: yauggai zo: Yeremia nhad' khyo" yang ta" to" ra" akhyo ngad: ra".

²Amon nho: yauggai zo: Yoshia wa Yuda mung" mae kho:kham boe" ru daxe: sam zin ein: zin mae Yeremia re ASANG jhau: ke' ra".

³Aimung: yao: wa Yoshia nho: yauggai zo: Yehoiakim kho:kham boe" ra" au: re yao: re dam: jhau: ke' ra". Ai: thao ASANG wa- Yoshia nho: yauggai zo: Zedekia eib: ru daxe: dazin ein: zin joe" sho' yao: re myo: sho' lhang dam: jhau: ra". Ai: zin lho" ngo" khye' ein: khye' mae Yerusalem vobyu qere pyaung" jhui" yu: pye' ako".

⁴ASANG ngore ta" ra".

⁵Ngo wa nao re kao so' make' byid: shimae" nao re khyin va". Aimung: nao makhau: li" shimae" nao re byumyu" qejhao" lapa boe" nae" qhid' mae" ngo khyin: san: to: va".

⁶Ngo tau: va"- ASANG we"- ngo wa dao: maba: jhau- ngai re: ngai shi" ein: tau: va". Ai: dao: thang" asag' re Mao"So: byumyu" qe mho" pho" yang mata" peim: ca" lo: qo" cao" li" genae"- pe"mung:ga"re aire yao: bam yao" nhag' lam: mae tung" xam" to" ako".

⁷Ngadqere: ASANG ngore ta" ru wa nao gyai ngai shi" ein: nao data"- nao re ngo yeqhug' nhao: ra" byu qejhao" ye: wa,. Aimung: nao re ngo ta" nae" amyin" byid' to" ru ja: khao: ngo" yao: bam re yeta" kyo: wa,.

⁸Yao: bam re dagyaug- pe"mung:ga"re- ngo wa nao re gug: gam byid: nae" qhid' mae" nao we' daga" na nae". Ngo ASANG ta" to: va".

⁹Ailao" ASANG wa yao" lo, yheim" ke' mung: nga" nhad' qid re tin" byid' ra". Aimung: ngore tae" gyo: wa- ngo wa nao ta" ca" ra" dao: kheim: jham re byid: nae"- ga: ta" ra".

¹⁰Ana" ba ngo wa nao re- byumyu" qe we' kho:kham mung"dan: jham re phan" pye' nae" we' phyo' khyo" pye' nae" qhid' mae" phyo' qheim" pye' nae" we' tau: khyo" pye' nae" qhid' mae"- tau: zhaug' nae" we' qho" yhaug' nae" qhid' mae" amyin" kheim: so' byid: va".

¹¹ASANG wa ngore Yeremia we"- nao pe" re the' myao: i? ga: myid' ra". Ngo wa Shiham: kaung dakaung re the' myao: ein: tau".

¹²ASANG wa- nao ta" ru jo: ra". Aimung: nga" nho: dao: kheim: jham dang: lo nae" madang: lo nae" ru ngo lhaug' qu" na:- ga: ta" ra".

¹³Ailao" ASANG wa ngore dam: jhau: ke' ra". Nao gatau pe" re myao shi" i? ga: myid' ra".

¹⁴Yao: wa ngore ceru: ta" ra". Ce: mug: myid mae na mo, alhab' dao mae byo; qeim: ru wa mug: am: shad' khyo" zhau: ma: sheim: li" na: ava".

¹⁵Pe"mung:ga"re ngo wa- mug: am: shad' mae" byumyu" alhab' re li" genae" qhid' mae" khai: na va". Yao: bam: kho:kham qe wa Yerusalem kham: mo" jham mae we' ai: nho: vang jham gam: gam: mae re:- Yuda mung" mae" vomo" gatau lhang" gam: mae re: yao: bam: zaung tao" jham zhaung: to" li" genae".

¹⁶Ngo wa nga" byumyu" qere qobo dae byid: nae" pe"mung:ga"re yao: bam qobo shad' avako". Yao: bam wa ngore to: co' avako". So gaje qere xeim: ngaui" byid: mung: sulho jham kad' ru we' aijham re caung:pa" ako".

¹⁷Yeremia we"- byin seim" ci wa,- nao re ngo ta" nae" amyin" byid' to" ru ja: khao: ngo" yao: bam re yeta" kyo: wa,- ana" yao: bam re dagyaug- mangad: re- ngo wa nao re yao: bam we' daga" ngad: na: au: je: gyaug nhao nae".

¹⁸Yeremia we"- tae" gyo: wa,- ce: mug: myid dao mae na: ra" yaug khao: ngo"- Yuda kho:kham qe- mung" zug: ade, qe- khinjaung qe we' mung" byu qe wa nao re gye kad' li" genae". Ngadqere: ana" ba ngo nao re- nao: yang yao: bam re qo" tam" pye' nae" qam: byid: na:- nao wa vang tang tang qae: jhid' to" ra" vomo" we' dakhyo:- jo,to' zang baung: we' dakhyo: gyid: ne khinqae we' dakhyo: ngad: li" nae". Yao: bam wa nao re aung: pye' li" genae" mangad:- pe"mung:ga"re- nao re gug: gam byid: nae" qhid' mae" ngo nao we' daga" na: li" nae"- ngo ASANG ta" to: va".