Read Maru YEREMIA 10 Bible Online

YEREMIA 10 - Maru bible

YEREMIA 10

¹Israel byumyu" qe we"- naonhaung" qhid' mae" ASANG: mungdao: re tae" gyo: ge,-

²Yao: wa- gatau: byumyu" qenho: khyo mae dacao" ye: ge,. gatau: byumyu" qe gyaug: din gengadqere: mamyao: qu" ra" mug:gaung dao mae" myao jao: jham: mathao mae myid dashug ge,.

³Ce: byumyu" qe: nho: lalam lakhug wa pe" akyu" mabo ngad: ra". Seyo mae sag' gae dagae re thau: khyang: ke' va". Aire sag' lag sama lo; yang co' kyaung" to" ra".

⁴Aimung: ngaui we' qhang: yang dam: thab' shaung: pye' ako". Aire magyang: lang" lo" nae" qhid' mae" tin" zi: yang be, jin" to" ako".

⁵Ai: solho jham wa lashau: yo mae" jo kyaug' jham we' dau: ako". Aijham wa maqo" jhau ngad: ako". Yao: bam maqo" su: gemung: yao: bam re vo; qin" ca" ako". Aijham re dagyaug ge, yao: bam wa naonhaung" re pe" dae maqo" te' ngad: ako". Aimung: yao: bam wa naonhaung" re gai: rure: maqo" kad' byid ngad: ako".

⁶ASANG we"- nao we' dau: ru khag' mana ngad: ra". Nao wa qam: so' qi" ra" aimung: ni" mang wa qi" qhang mung: kheim: so' thin: ra".

⁷Byumyu" alhab' nho: kho:kham nao re nga: mayhe' nae" khag' na: i? Nao wa phug' myao: mung: nga: yhe' byid: nae" man: qi" ra". Byumyu" qenho: pha,jhi" bo mo, khug mae ngad ngad yao: bam: kho:kham khoyaug mae" ngad ngad nao we' dau ru khag' mana ngad: ako".

⁸Yao: bam alhab' mo, wa nhag' magyang: mung: adu: adae: ngad: ako". Sag' solho jham mae" yao: bam pe" qo" mho" yu genae" i?

⁹Yao: bam: solho jham wa Spain mae" ngaui: yang thab' pye' mung: Upha mae" qhang: yang: sheim" pye' ra". Lo,mau" ba mo; mau" zo" za: ngad: ra". Aijham wa- jhao: ra" qo,gin: qo, mo, qo; to" ra" khalhae: nyhug we' mai: mai: mung: ra" pin: cug' jham: yang vhe' to" ako".

¹⁰Ngadqere: Mao"So we"- nao wa dangman" ra" Mao"So agyang" ngad: ra". Nao wa kao so' daui: ra" Mao"So ngad mung: apyad ato mae" kho:kham ngad: ra". Nao nhag' yo: lao" mug: myid nin" ra". Byumyu" qe wa- ni" nho: nhag' yo: re matho' zang" kham ngad: ako".

¹¹(Mung" byu naonhaung" khyo" yang myid gaung we' mug:gaung re makad' to" ra" so jham re phyo' qheim" pye' nae" ein: yao: bam re ta" kyo: ca" ako". Aijham wa myid gaung dao khai: mae re: majo, lo: genae".)

¹²ASANG wa myid gaung re yao" qam: so' yang kad' to" ra". Yao" nho: pha,jhi" yang mung"dan: mug: myid re phan" to: mung: mug:gaung re myhung" to" ra".

¹³Yao: amyin" byid' ke' lao" mug:gaung tho' mae" qid myang: li" ra". Yao: wa jham thaui: jham re myid gaung thao" mae" khai: yu: ra". Yao: wa lhe' cad' re mug: qu khug mae cad' ke' nhao: ra". Aimung: la hug' re zai to: kug qe, mae" nhao: thug' ke' ra".

¹⁴Cere the' myao gelao"- byu qe wa nhag' cad' noyaug mung: lo" ako". Solho jham re kad' to: mo, wa myid myo: byaug: ako". Pe"mung:ga"re- yao: bam kad' to" ra" so jham wa apyag' ngad mung: kao so' mabo ngad: ako".

¹⁵Aijham wa pe" aphug' made, mung: ca' nghang" pye' ca" ra". Yao: bam re ASANG: yang dao: phyid' nae" ga: li" ra" au: phyo' qheim" pye' ru qhug' genae".

¹⁶Yaku nho: Mao"So kam" wa aijham we' madau ngad: ra". Yao: wa ja: khao: ngo" re kad' to: yaug ngad: ra". Aimung: yao: wa- Israel byumyu" re yao" qhid' mae" khyin: yu: to" ava". Qam: so' qi" thao" ASANG ga: ru wa yao" mang ngad: ra".

¹⁷Yerusalem vobyu qe we"- naonhaung" wa khe' lhaung" to: qhug' ako". Naonhaung" nho: jo,nho" zai jham re gaug: zhang ge,.

¹⁸ASANG wa naonhaung" re ce: mug: myid mae" khe' thug' ke' naeva". Yao: wa naonhaung" re- dayaug re: madang losho' khyoe' se' pye' naeva" myao: ASANG ta" to" ava".

¹⁹Yerusalem mae" vobyu qe hug' yao: ako". Ngonhaung" wa gyai yao: dae no: bam vanhaung. Ngonhaung" nho: dae jham wa magai: byaug lo nae". Aimung: ngonhaung" wa ceru re qo" zang" kham nae" ein: lhaung" jho:-

²⁰Ngonhaung" nho: zaung jham wa phyo' pye' qhug' va". Aijham re myag: to" ra" taui: jham wa byid: shao" byaug va". Ngonhaung" nho: zoshao qe alhab' mo, wa phao: shao" byaug: avako". Naonhaung" nho: zaung khyae: jham re dam: tau: zhaug' nae" khag' mana lo:- aijham: nho: pin: lung: jham re gaug: lhao: byid: nae" khag' mana lo:- ga: ta" ra".

²¹Ngo wa- ngonhaung" nho: au: jhaung qe nhag' magyang" ngad: ako". Yao: bam wa ASANG re bao" yu nae" mamho' ngad: ako". Cemung: yang yao: bam maaung doe, mung: ngonhaung" nho: byumyu" qe byo: sin" lo" avako".

²²Tae" gyo: ge,- lau dao: joe" lo va"- mug: am: shad' mae" byumyu" damyu" mae lhau: zhung: mung: yhau: na: ako". Ai: byumyu" nho: gyetab jham wa Yuda vomo" jham re- zagne jham na: ra" din"pyad' yo boe" nhao: pye' li" genae" ein: phaug' tau: va".

²³ASANG we"- khag' re: yao: yao" au: pa lo, kyo' re maqo" sang: ru ngo ba: ra". Khag' re: yao: yao" kao so' re maqo" eib: ru ngo ba: ra".

²⁴ASANG we"- ni" nho: byumyu" qere mho, jhao" yu wa, ngadqere:- ngonhaung" dao mae dae xo sho' dakad' nao nhag' yo" au: re ngonhaung" re qobo dae dabyid: la, ai wa ngonhaung" na: thao" ru ngad: li" nae".

²⁵Nao re macaung:pa" ko" ra" byumyu" qejhao" ni" nhag' yo" rure lhang: phaug' ke' wa, aimung: nao re ngag: ha: lhaui" pye' ra" byumyu" qejhao" lhang: phaug' ke' wa,- Yao: bam wa ni" nho: byumyu" re se' pye' ako". Yao: bam wa- ngonhaung" re bin: sho' phyo' qheim" pye' mung: ngonhaung" nho: mung"dan: re byo; qeim: jo, nhao: to: co' ako".