Read Maru YEREMIA 11 Bible Online

YEREMIA 11 - Maru bible

YEREMIA 11

¹ASANG wa ngore ta" ra".

²Dao: thang" mae" dao: kheim: jham re tae" gyo: ge,- Yuda mung" byu qe we' Yerusalem vobyu qere-

³Ce: dao: thang" mae" dao: kheim: jham re maphug' cao" ra" yaug khao: ngo" dao mae Israel nho: Mao"So ASANG ngo nhang: kheim: ke' va" ru ta" kyo: wa,.

⁴Aiwa- naonhaung" phug' phyid' qere- yao: bam: qhid' mae" khyeim" mo" myi: we' dau: ra" Egutu mae" ngo jhui" thug' lo: ra" au:- yao: bam we' to" ra" dao: thang" ngad:- ngo wa ngore phug' cao" mung: ngo amyin" byid' to" ru ja: khao: ngo" re kad' cao" nae" qhid' mae" yao: bam re ta" to: va". Yao: bam ngore phug' cao" ko" ngad: re- yao: bam wa nga" nho: byumyu" qe boe" mung: ngo wa yao: bam: byumyu" boe" li" genae" ein: yao: bam re ngo ta" to: va".

⁵Ailao" ngo wa- ana" yao: bam na: ra" jo,nho" bo mung: myid xau gai: ra" mug: myid re yao: bam: phug' pho" qere byid: nae" ein: ra" dao:so: re ngo zam: nae" ngad:- ga: ta" ra". Ngo wa- ngad va" ASANG we" ein: ta" va".

⁶Ailao" ASANG wa ngore ta" ra". Yuda vomo" jham khyo we' Yerusalem hau" mo" khyo jham khyo ye: wa, ai: jo, qo mae" nga" nho: lau dao: re hau" kyo: wa, aimung: Dao: thang" mae" dao: kheim: jham re tae" gyo: mung: phug' cao" genae" qhid' mae" ai: vobyu jham re ta" kyo: wa,-

⁷Ngo wa- yao: bam: phug' phyid' qere Egutu mae" jhui" thug' lo: au: ngore phug' cao" genae" qhid' mae" yao: bam re jham tang: sho' ta" peim: va". Aimung: ngo wa- ai: byu qere ana" ba joe" sho' xo' ta" peim" lo va".

⁸Ngadqere: yao: bam wa gyo: re matae" gyo: phug' re: maphug' cao" ngad: ako". Ai: atha" yaug khao: ngo" wa ga- au: we' dakhyo: za: xo'- yang: sang: dang: ru we' makhyang: mashab kad' ako". Ngo wa yao: bam re- Dao: Thang" cao: genae" qhid' mae" amyin" byid' to: va". Ngadqere: yao: bam wa ngag: lhaui" pye' ako". Aimung: ngo wa- aimae tung" qhu" to" ra" qobo dae alhab' re yao: bam: dao mae ciye: byid: va"- ga: ta" ra".

⁹Ailao" ASANG wa ngore ta" ra". Yuda mung" byu qe we' Yerusalem vobyu qe wa ngore khug yang: tau: lhan" ako".

¹⁰Yao: bam wa- ngo mho: khyo: makad' ra" yao: bam: phug' phyid' qenho: qobo khyo dam: tug' lo" ako". Yao: bam wa so alho gaje re caung:pa" avako". Yuda we' Israel shid' zo" geim" yao: bam: phug' phyid' qe we' ngo so" to" ra" Dao: thang" re phyo' pye' ako".

¹¹Aimung: ana" ngo ASANG wa- yao: bam: dao mae byo; qeim: ru cilo byid: nae" ein: ta" peim" na va". Aimung: yao: bam wa loe, genae" mangad:- aimung: yao: bam ngore bao" yu nae" mho' yao ngadqere:- yao: bam re ngo matae" gyo: byid: nae".

¹²Ailao" Yuda mung" byu qe we' Yerusalem vobyu qe wa- yao: bam ngaui" xeim: qhaug' byid' ra" so alho jham jhao" ye: mung: bao" yu nae" mho' li" genae". Ngadqere: ce: byo; qeim: ru joe" li" au: re ai: so alho jham wa yao: bam re maqo" bao" yu: li" genae".

¹³Yuda mung" byu qe wa yao: bam qo" ra" vogaung: jham nho" yao: so alho jham qo" ako". Aimung: Yerusalem mae na mo, wa ai: vomo" mae jo; ra" hau" mo" khyo jham nho" yao: ai: maca' majhad' mung: sho' ra" Bala so re xeim: ngaui" byid: nae" phan jham zhaug' to" ako".

¹⁴Yeremia we"- ce: byumyu" qe: qhid' mae" gaung tha" khyo" kad' mung: ngore akyu" damho'- yao: re damho' yao- yao: bam qug: khai: qhug' mung: bao" thaug' yu nae" ngore mho' yao: ra" au: re yao: bam re ngo matae" gyo: byid: nae".

¹⁵ASANG ta" ra". Ngo jhid'de; ra" byumyu" qe wa makhyang: mashab: ra" mau" jham re kad' ako". Yao: bam wa- nga" nho: Caung:pa" Yham mae na nae" pe" akhang" qo" ako" i? Yao: bam wa- dao:so: jham byid: mung: gug'nyhug' jham xeim: ngaui" byid: yang: kyi" khyag' rure gug: gam nae" ga: myid: ako" laug i? Airuyang yao: bam wa qo" ngaui bau: genae" ga: ko" laug i?

¹⁶Qhid' phyao: dalhang ngo wa yao: bam re afo' maung" mung: ashi: byang" sho' zaui" ra" zhanlun gae ein: lhaung" mhang" lo va". Ngadqere: ana" kam" wa ngo wa mug: dam: we' dakhyo: myang: ra" thoe: yang yao" sag' fo' jham re myi: ngha" pye' mung:- ai: nho: sag' kaung jham re khyug' pye' byid: nae".

¹⁷Qam: so' qi" thao" ra" ngo ASANG wa- Yuda we' Israel re qho" to: va". Ngadqere: ana" ngo wa- ai: shid' zo: re byo; qeim: ra" qam" yang kyaug' tin" va". Yao: bam wa shad' ru kad' mung:- ceru re yao: bam yao" dao mae yu: de, zo" ako". Yao: bam wa- Bala so re xeim: ngaui" byid' ruyang ngore nhag' yo: nhao: ako".

¹⁸ASANG wa- nga" gyevo qeyang ngore kung" na: ra" khyo alhab'- ngore ta" shid' ra".

¹⁹Ngo wa- se' pye' nae" qhid' mae" jhui" thug' ye" lo" au: lam jang" taung" cao" ye" lo" ra" yao nau" dadau: we' dau: ra". Aimung: yao: bam makhyang" ra" byin phyo kyae: na: ru wa nga" qhid' mae" ngad nhaung: rure ngo maba:. Yao: bam wa sag' jam: gae ngonhaung" qu" yaung" taung" yaug, jo, shi" au:- thau: khyang: pye' gelang:- yao: re khag' yang mamyid: beim: lo: gesho' yao: re se' pye' gelang:- ga: ta" na: ako".

²⁰Ailao" ngo akyu" mho' va". Qam: so' bo: thao" ra" ASANG we"- nao wa din:man" ra" tarha" agyi ngad: ra". Nao wa byu qenho: myid: ru we' nhag' lam: mae kham zo" rure ca: qu" ra". Ngo wa nga" mau" khyo re ni" nho: lo, khug mae ke' to: va". Aimung:- cebam re nao lage, phaug' ru ngore myao nhao la,- ein: akyu" mho' va".

²¹Anathod mae" byu qe wa ngo se' pye' qhug' nae" o: ako". Aimung: yao: bam wa ASANG: mungdao: re ngo xo' ta" hau: lao" se' pye' nae" ga: ngore ta" kyo" ako".

²²Aimung: qam: so' bo: thao" ra" ASANG ta" ra". Yao: bam re ngo qobo dae byid: nae". Yao: bam: zolau: qe wa gyekhe' jao: mae se' pye' ru qhug' genae". Yao: bam: zoshao qe wa- vae: mo; mung: shid lo" li" genae".

²³Ngo wa- Anathod vobyu qe: dao mae kyi" khyag' ru cili" byid: nae" ba na so" to: va". Aimung: ai: ayo, joe" lo lao"- yao: bam mae" dayaug re: maqang" genae".