Read Maru YEREMIA 13 Bible Online

YEREMIA 13 - Maru bible

YEREMIA 13

¹ASANG wa ngore ye" lo" mung: nga" qhid' mae" jid: mo" pin phyid' cui: vai ve; nhao: ra". Ngadqere: aire qid mae majam nae" qhid' mae" ngore pyang: ke' ra".

²Aimung: ngo airu ye: vai ve; va".

³Ai: thao ASANG ngore dam: ta" ra".

⁴Uphrad qid gyaung: khyo ye: mung: laug bam jham mae" dungkhung: mae phyid' cui: re ye: nyham" to: wa,- ga: ta" ra".

⁵Aimung: ngo wa ye: mung: ai: phyid' cui: re Uphrad qid gyaung: nhae mae ye: nyham" to: va".

⁶Ai: thao khomyhao" makyo re ASANG wa ngore Uphrad qid gyaung: khyo dam: ye: nhao mung: ai: phyid' cui: re yeyu nhao: ra".

⁷Aimung: ngo dam: tug' ye" qu" re ai: phyid' cui: nyham" to" ra" jo, qo re yeqhug' myao: aire ai: phyid' cui: wa qeim" byaug mung: ve, magai lo" rure ye: the' myao:-

⁸Ailao" ASANG ngore dam: ta" ra"- yao: wa-

⁹Ceru wa- Yuda nho: ngad beim" ru we' Yerusalem nho: gyai ngad beim" rure ngo khoru: phyo' qheim" pye' nae" ein: ru ngad:-

¹⁰Ce: makhyang: mashab: ra" byumyu" wa ngore maphug' cao" qad ngad: ako". Yao: bam wa ga-au: mae" we' dakhyo: yao: nhag' lam: qao mung: nhag' lam: kaui: ako". Aimung: so alho geje qere caung:pa" mung: caung da" byid' ako". Aimung: yao: bam wa- ce: magai lo" ra" phyid' cui: we' dakhyo: boe" lo: li" genae".

¹¹Phyid' cui: wa phyid' dam: mae tang za: qhab' to" ru we' dakhyo: Yuda mung" byu qe we' Yerusalem vobyu qere ngo mae tang za: ge; vo; ci genae" qhid' mae" ngo yaung: to: va" ru ngad:- ngo wa yao: bam re nga" byumyu" boe" nhao mung: yao: bam: yang ngore caung:khin" ru we' nga" mang re nga: yhe' byid: gashao: ein: ceru re kad' ke' ru ngad:- ngadqere: yao: bam wa ngore maphug' cao" nug ngad: ako".

¹²ASANG Mao"So ngore ta" ra". Yeremia we"- sabyi qang: keim thaung: khao: ngo" re sabyi qang: ke' pyang" to: ca" ra" ein: Israel byumyu" qere ta" kyo: wa,. Yao: bam wa- sabyi qang: keim thaung: khao: ngo" wa sabyi qang: we' byang" jo, ca" rure ngonhaung" ba: ga: yao: bam phaug' tau" li" genae".

¹³Aimung: ngo ASANG wa yao: bam re shaug' yid: bam gesho' ce: mug: myid mae Israel byumyu" qe Davi nho: myid:zo:- kho:kham qe- khinjaung qe- lapa qe we' Yerusalem vobyu alhab' mo, re sabyi qang: ke' pyang" byid: nae" ga" ein: ta" kyo: wa,-

¹⁴Ailao" ngo wa keim thaung: dalam: we' dalam: re ko' khyoe' pye' ru we' dakhyo: yao: bam re- mao: zo: zoshao makhyin lo: khyoe' mhan" tam" pye' nae". Yao: bam re ngo se' pye' rure pe" nhag' khyag' myid- sang no myid- mangad lao" qu" shono nhag' myan" ruyang re maqo" tam" pye' nae".

¹⁵Israel mung" byu qe we" ASANG ta" to" ava". Nhag' lam: nyham: khyo" mung:-

¹⁶Naonhaung" yao: re tae" gyo: ge, mug: cad' ru ma cili" shimung: bam jham mae naonhaung" khyid au: mathaung" lang: shire yao: wa naonhaung" myid: lao" na: ra" bo" bao re- no, sang: kyid makad' pye' shire- ASANG naonhaung" Mao"So re nga: yhe' byid: ge,.

¹⁷Naonhaung" matae" gyo: gengad: re- naonhaung" ngad beim: myid: mathao mae ngo wa vho' jo; ra" khyi" hug' ke' nae". ASANG: byumyu" qere kyam: byu khyo" taung" lo" va" mathao mae ngo wa gang" qhi" gyi: ngug mung: nga" nho: ngug byid jham yug: lo" nae".

¹⁸ASANG wa ngore ta" ra". Kho:kham pho" we' yao: myhi" re yao: shid' ma" nho: kho:kham zaung tao" mae" gyo" lo nae" qhid' mae" ta" kyo: wa,- pe"mung:ga"re- yao: shid' ma" nho: yaung" ra" ba maug: jham wa yao: shid' ma" nho: au: mae" byid: gyo" lo" avako".

¹⁹Yuda mung" mug: thao shad' mae" vogaung: jham wa vang" to: qhug' avako". Yao: bam jhao" khag' maqo" joe" vao ye: ngad: ako". Yuda mung" byu alhab' mo, wa pyaung" nha: to" khyo jhui" yu: ru qhug' avako".

²⁰Yerusalem we"- qu" qu" wa,- ni" nho: gyevo qe wa mug: am: shad' khyo" gyo" li" na: avako". Nao re lam mung: ab: to" ra" vobyu qe khai: lo" shao" vako" i? Nao gyai lhaung" phug: ra" ni" nho: vobyu qe wa khai" mae i?

²¹Ni" ba nam jham ein: nao myid: lam: to: mo, yang nao re mang: zin" aung: pye' mung: ni" nho: dao mae eib zo: ko" re nao khoru: ein: ta" nae" i? Nao wa zo:khau: na: ra" myiqe: we' dakhyo: no nae" ngad: ra".

²²Cegu: alhab' pe"mung: nao mae boe" lo: i? ga: myid' re pe"mung: ni" mai bau: jham re lao" cad' pye' byid: mung: nao re deim" zag: yab: ru qhug' re ai wa ni" nho: qobo saung" dae xo yang: ngad: ra".

²³Ethiopia byu dayaug wa yao" shoqid mae" anyug re qo" tha" pye' nae" i? Mangad: lao" myang kha: tung" nintin wa yao" gaung mae" atung" tung" rure qo" byaug nhao nae" i? Ai shid' ja: qe qo" tha" pye' ko" ngad: re- makhyang: mashab: rumae" lai yang: pe" daja: re maba: kad' ra" naonhaung" re: jo: rure kad' nae" qhid' mae" qo" mho" zhao: yu: li" genae".

²⁴ASANG wa din"pyad' yo mae" la hug' yang mad: lhaui" pye' ra" khovho re we' dakhyo: naonhaung" re khe' sin" pye' li" nae".

²⁵Ceru wa naonhaung" au: pa lo, kyo' ngad: li" nae" ga: yao: ta" to" ava". Ceru wa naonhaung" re yao: kad' nae" ga: myid: phyid' to: va" ru ngad: ra". Pe"mung:ga"re- naonhaung" wa yao: re to" myhid' pye' va" rumung: so alho apyag' jham re lam khug: avako".

²⁶ASANG yao:- naonhaung" re mai bau: khyad' pye' byid: mung:- naonhaung" re qho' phau: nhao: li" nae".

²⁷Yao: wa yao: nghang" ra" mau" zo" jham re naonhaung" kad' ko" ru the' myao byid' ava". Naonhaung" wa yham kyo: cao: nho: yham sang myhi" re qu" shab' ra" yaug we' dakhyo: mangad: lao"- myao: myhi" thao khyo cao" shab' mhin: qin" ra" myao: lo: we' dakhyo:- bug gaung jham mae we' jao: gyu" jham mae Mao"So maba: ra" taung bug: so alho jham: nho: thao khyo cao" ye" rure yao: the' myao byid' ava". Yerusalem vobyu qe we"- naonhaung" wa byuxa: voqoe, qhug' avako". Naonhaung" wa- khonhae" gyang" san lo: genae" i?