Read Maru YEREMIA 14 Bible Online

YEREMIA 14 - Maru bible

YEREMIA 14

¹ASANG wa ngore- kyaug' ho: ru we' sin: yang ta" ra".

²Yuda wa kaug' ngug: na: ra" yao" vomo" jham wa qam: nang" jo; avako". Yao: nho: mung" byu qe wa myid gaung mae kaug' qhui: lang" jo; ako". Aimung: Yerusalem wa bao" yu nae" mho' yao: na: ra".

³Jo,nho" qo" mo, wa yao: bam: daui daui o: kaung qere qid ye: yu nhao: ako". Yao: bam wa qid thaung: khyo ye" ako". Ngadqere: qid mabo ngad: ra". Yao: bam wa yao: bam: keim thaung: akeim dam: ci tug' lo: ako". Yao: bam wa qam: shan mung: nhag' cad' ru we' yao: bam: myo, khung: re nyham" ci: ako".

⁴Mug: maqu mung: myid gaung kyaug' ho: byaug: ra" mathao mae yo kad' zo: mo, wa nhag' lam: no: ako". Yao: bam wa yao: bam: myo, khung: jham re nyham" ci: ako".

⁵Jao: gyu" mae vohau: majo, mung: shocid myhi" wa yao: zo: shocid nau" nin" re khau: shapye' to: co' ra".

⁶Loze lae" jham wa bam gaung: khaung: ye, jo; bam mung: zag nae jham we' dakhyo: myaung: so' tha" na: ako". Yao: bam zo:ve maqo" gemung:- yao: bam: myo, mamyao lo:ngad: ako".

⁷Nga" nho: byumyu" qe wa ngore hug' yao: ako". Ngonhaung" nho: qobo jham wa ngonhaung" re qobo zhaug' ngadqere: ASANG we"- nao dao:so: byid' to: va" ru we' dakhyo: ngonhaung" re bao" yu la,- Ngonhaung" wa- nao mae" va: khyo myo: sho' lhang phaug' phao: lo" bam va". Ngonhaung" wa nao re qobo shad' bam va".

⁸Nao wa Israel nho: dagau: za" myid: lao" khyo ngad: ra". Nao wa ngonhaung" re- byo; qeim: lo" rumae" khyad' yu yaug ngad: ra". Nao wa pe"mung: ngonhaung" we' dakhyo: boe" na: i? Pe"mung:- damyi za: yab: lai: lo" ra" gyaung: su: yaug we' dakhyo: boe" na: i?

⁹Nao wa pe"mung: nyag din taung" jhui" yu qhug' yaug we' dakhyo: bao" yu nae" qam: mabo: ra" gyezo: we' dakhyo: boe" na: i? ASANG we"- gaigai: yao: nao wa ngonhaung" we' daga" na: ra". Ngonhaung" wa ni" byumyu" qe ngad:- ngonhaung" re dashapye' to: co' la, wo"- ga: hug' yao: ako".

¹⁰ASANG wa- ce: byumyu" nho: khyo re ta" ra" yao: bam wa ngo mae" phao: lo" nae" taung" ngaui: ako". Aimung: yao: bam: gaung re maeib khang" ngad: ako". Aimung: ngo wa- yao: bam re maqu" ngaui- ngo wa yao: bam kad' shad' ru jham re myid: xam" ci mung: yao: bam: qobo jham: mathao mae yao: bam re qobo dae byid: nae"- ga: ta" ra".

¹¹ASANG wa ngore ta" ra". Ce: byu qere bao" yu nhao nae" qhid' mae" ngojhao" damho'-

¹²Yao: bam zo: shaug' jao" gengadqere:- yao: bam re bao" yu nae" mho' yao: thoe re ngo matae" gyo: byid: nae". Yao: bam wa ngore phad' ngaui" xeim: we' gaug zo xeim: qhaug' byid: gengadqere:- ngo wa aijham re malham: qu" ngaui byid: nae". Ai: atha" ngo wa yao: bam re mang zin: jao: mae se' pye' mung:- vae: moe; qhug' ru we' no phyo: khyo" yang se' pye' nae"- ga: ta" ra".

¹³Ailao" ngo wa- kho:kham ASANG we"- lapa qe wa- nao dao:so: byid' to: va" rumung: mang: zin" ru mangad: lao" vae: moe; phau" ru majo, nae" ga: myid: lam: na ko" ra" mathao mae ngonhaung" nho: mug: myid mae ngaui pyo: yaug yo ru za: ajo, nae" ga: mung" byu qere ta" shid' na: ako" ein: ta" va".

¹⁴Ngadqere: ASANG wa- Lapa qe wa nga" nho: mang khyo" mhug' ta" na: ako". Yao: bam re ngo manhao: ke' va" re- yao: bam re ngo amyin" daja: re: mabyid: yao: bam re dao: dakheim: lao" majhau. Yao: bam ta" ra" qhu" lho wa ngo mae" li" ru mangad:- yao: bam boe" li" nae" ga: tag: ta" ru jham wa- pe" aphug' made; ra" yao: bam: byu ba: ru za: ngad: ako".

¹⁵Ngo ASANG wa nao re- ngo: yang nhao: ke' rure: mangad' ra" mo, nga" mang khyo" jhau yang:- ce: mug: myid moe; phau" ru majo, nae"- ga: ta" ra". Ai: lapa qere- ngo pe" kad' nae" ga" ru ta" kyo: nae"- ngo wa yao: bam re mang: zin: jao: mae we' vae: moe; phau" ruyang se' pye' nae".

¹⁶Yao: bam: yang cejham ta" kyo" to: mo, rere:- ai we' dakhyo: za: se' pye' nae". Yao: bam: mao gaung jham re- Yerusalem mae" hau" mo" khyo jham mae shapye' sin" to" li" genae". Aimung: aijham re gaug: nyhab' pye' nae" byu mana genae". Ceru wa yao: bam alhab' mo, dao mae re: yao: bam: yham sang myhi" qe- yao: bam: yauggai zo: qe we' yao: bam: myiqe: zo: qe mae boe" lo: li" nae". Ngo wa yao: bam re- yao: bam: makhyang: mashab: ra" mau" zo" qhid' mae" jhin xe' nhao nae".

¹⁷ASANG wa mung" byu qere nga" nho: kaug' qhui: ra" khyo ta" kyo: mung:- ceru: ta" wa, ga: ngore amyin" byid' ra". Nga" nho: myo,jid' jham wa na" re: myi" re: ngug byid yug gyo" mung: ngo wa khonhae" re: ngug: ru mathang shao: wo". Pe"mung:ga"re- nga" byumyu" qe wa dae xo sho' dae de' yu: mung: gyai no: byaug: avako".

¹⁸Jao: gyu" khyo ngo thug' ye" lo" re- mang: zin: jao: mae se' pye' qhug' ra" yauggai qe: nho: maogaung jham re yethe' myao:- vogaung: jham khyo ngo vao ye" re- vae: moe' shid: lo" na: ra" vobyu qere yethe' myao:- lapa qe we' khinjaung qe wa- yao: bam: mau" re xo' zaui" na: ako". Ngadqere: yao: bam wa- yao: bam pe" kad' na: rure maba ngad: ako"- ga: ta" nhao: ra".

¹⁹ASANG we"- nao wa Yuda re bin sho' yao: ngag: lhaui" pye' va" i? Nao wa Ziun vobyu qere nghang" i? nao wa pe"mung:- ngonhaung" re no magai losho' dae te' byid' i? Ngonhaung" wa- yaug yo cae: tae" rure qho: na: bam:- ngadqere: gai: ru pe" daja: re: maboe" li" ngad: ra". Ngonhaung" wa- no gai nae" qhid' mae" qho: na: ngadqere: ai: atha" gyaug din: ru za: joe" li" va".

²⁰ASANG we"- ngonhaung" wa nao re qobo shad' bam va". Aimung: ngonhaung" yao" qobo jham we' ngonhaung" nho: phug' phyid' qe qobo jham re lhang: yu: bam va".

²¹Ni" dao:so: jham re myid: beim: mung: ngonhaung" re daqu" yo:- ni" nho: nga: lho" ra" kho:kham tao" jo; ra" Yerusalem dao mae nga: yeim: ru daci: li" byid:- Ngonhaung" we' ke' to" ra" ni" dao: thang" re daphyo' pye'.

²²Byumyu" qe: nho: sulho jham mae" daja: re: mug: qu re maqo" nhao: ke' ngad: ako". Mug:gaung wa- yao: za: yao: la jham: mug: re maqo" qu nhao ngad: ra". Ngonhaung" wa- nao mae myid: lao" na: bam:- O"- ASANG ngonhaung" nho: Mao"So we"- pe"mung:ga"re cejham re kad' ke' ru wa nao ngad: ra".