Read Maru YEREMIA 15 Bible Online

YEREMIA 15 - Maru bible

YEREMIA 15

¹Ai: thao ASANG wa ngore ta" ra". Moshe we' Samuela shid' zo: cemae ye; jo, gemung: ngore mho' na ko" ngad: re lao" re:- ngo wa ce: byumyu" re nhag' khyag' myid maqhu" byid: nae". Yao: bam re phao: lo" nhao ge,. Yao: bam re nga" qhid' kheim: mae" khe' ke' ge,.

²Yao: bam: yang ni" shid' zo: re- yao: bam khai: khyo ye: ca" ru myid: ko" re- ngo ceru ga: ta" ein: yao: bam re ta" kyo: ge,- damyo" wa no phyo: qhug' yang: shid lo" genae" ai wa yao: bam ye" lo" nae" khyo ngad: ako". Gatau damyo" gu: wa mang: zin: jao mae shid: lo" nae" ngad: ako". Aiwa yao: bam ye" lo" nae" khyo ngad: ra". Damyo" wa zo:ve moe; mung: shid lo" li" genae". Aiwa yao: bam ye" lo" nae" khyo ngad: ra". Dang: ra" daqhae" gu: wa- kyam: byu jham khyo" taung" lo" ru qhug' li" genae". Aiwa yao: bam ye" lo" nae" khyo ngad: ra".

³Yao: bam mae gyaug:din pho: byid ja: boe" lo nae" ein: ngo ASANG myid: phyid' to: va". Yao: bam wa gyekhe' poe mae se' pye' ru qhug' li" genae". Yao: bam: mao gaung jham wa- lakha: jham: yang she: khyad' lo" li" genae". Aijham re ngho' jham: yang zo" pye' byid' li" genae". Zo" tang" to" ra" gu: re seyo: qug'nyhug' lhe: jham ceim" lhad' zo" pye' li" genae".

⁴Hezekia nho: yauggai zo: Manashe yang- yao: Yuda kho:kham boe" ra" au: Yerusalem mae kad' lai: lo: ra" mau" zo" mathao mae- damung kan geim" mae" byumyu" qe yao: bam re qu" gyaug qu" din genae" khyo:- ngo kad' ke' nae".

⁵ASANG ta" ra". Yerusalem vobyu naonhaung" re khag' nhag' khyag' mung: naonhaung" qhid' mae" khag' kaug' genae" i? Naonhaung" qao" zin" ko" laug maqo" zin" ko" laug ga: myid: mae" khag' ba: thang: na genae" i?

⁶Mung" byu naonhaung" wa ngore ngag: lhaui" pye' avako". Naonhaung" wa ngore nhaung thao" phaug' co' avako". Aimung: naonhaung" re khyoe' ke' pye' va" nga" lo, yheim" ke' yang Pe"mung:ga"re- ngo wa nga" nho: nhag' yo" rure zang" nghang: va".

⁷Ai: mug: myid mae" vogaung: khao: ngo" mae ngo wa naonhaung" re khofo we' dakhyo: la khug khyo shapye' sin" ke' va". Ngo wa- nga" nho: byumyu" naonhaung" re phyo' qheim" pye' va". Ngo wa naonhaung" zoshao jham re se' pye' byid: va". Pe"mung:ga"re- naonhaung" wa- naonhaung" makhyang: mashab: ra" khyo re mato" pye' ngad: ako".

⁸Pang:lai:: nhae mae" ma coe tho' naonhaung" mug: myid mae cug mo" je: myo" na: ako". Ngo wa naonhaung" zolau: qere- yao: bam nghau: nghau: ngad: au: se' pye' mung:- Yao: bam: yao: myhi" bam re dayin dayo: qug: khai: qhug' nhao va". Ngo wa yao: bam re dayin dayo: we' gyaug din pho: khyo" nyag din taung" yhin" va".

⁹Zoshao nhad' yaug shid: pye' ra" yao: myhi" zang wa so' mo" shae mung: so' kho' mo; lang" lo" ava". Yao" nho: na" gaung bo" bao wa mug: cad' boe" byaug: ava". Yao: wa nga: yeim mung: nhag' lam: mae no: jo; ava". Ngo wa naonhaung" mae" daui: na: jo, shi" mo, re naonhaung" gyevo qeyang se' pye' ru qhug' nhao nae". Ngo ASANG ta" to: va".

¹⁰Ngo wa khoqhi" mapyo" ra" yaug ngad yha"- nga" myhi" wa pe"mung: ngore ce: mug:myid khyo khau: ke' laug i? Ngo wa ai: mug: myid mae na: ra" yaug khao: ngo" we' myan" myo: mung: jho" ngag ca" ra". Ngo wa ngaui re: majhid' byid: zo" qu" su mae" re: ngaui majhid' yu: qu"- ngadqere: yaug khao: ngo" wa ngore nhang" ako".

¹¹ASANG we"- nao re nyang" za: macaung da" byid' lo ngad: re- nga" nho: gyevo qe qug: khai: qhug' mung: nhag' lam: thao" na ko" ra" au: yao: bam: gaung tha" khyo" ngo akyu" mamho' byid' ngad: re yao: bam nhang" ra" nhang: kheim: jham alhab' boe" lo vashao:-

¹²(Jo,to' re khag' maqo" khyug' pye' je yang: gyid: bo" we' lhag' to" ra" mug: am: shad' mae" jo,to' re maqo" khyug' pye')

¹³ASANG wa ngore ta" ra". Ngo wa- nga" nho: byumyu" qe ai: mug: myid khyi" khao: ngo" gam: sho' mae shad' lhoe" ko" ra" qobo jham: mathao mae- yao: bam re qobo dae byid: nae" qhid' mae" gyevo jham re nhao: ke' byid: mung: nga" byumyu" qe: nho: ngaui qhang we' jo,nho" jham re tai: phao: lo" nhao nae".

¹⁴Ngo wa yao: bam re- yao: bam pe" dace' re: maba: ra" mug: myid mae yao: bam: gyevo qere caung da" byid: nhao nae". Pe"mung:ga"re- nga" nho: nhag' yo" ru wa myi: we' dau mung: ai wa apyad ato mae de; na nae"- ga: ta" ra".

¹⁵Ailao" ngo wa- ASANG we"- nao ba: gyo" ra". Ngo re myid: beim: mung: bao" yu la,- ngore yhin" ra" mo, re lage, phaug' nhao la, yao: bam ngore se' nae" ru aung doe, sho'- nhag' lam: qhang qhang da zang" ci- ni" mathao mae ngo roe" qhug' ru ngad: ga" rure myid: beim: byid: la,-

¹⁶Nao ngore jhau: ke' mung: ngo wa dao: kheim: khao: ngo" re tae" gyo: va". ASANG qam so' qi" thao" Mao"So we" ngo wa nao: yang sang: ru ngad:- aimung: ni" nho: dao: kheim: jham wa nga" nho: nhag' lam: khug mae ngaui bau: ngaui lho" ru byang" jo, nhao: ava".

¹⁷Ngo wa su gaje we' qi: keim" pyo" keim" mung: ayo, mana: lai: pye' ngo wa ni" nho: amyin" dao: re phug' cao" ra" khyo" yang- ngo yao: za: na: jo; mung: nhag' yo" na:-

¹⁸Ngo pe"mung: dayin dayo: xo' qug: khai: na: nae" laug i? Nga" nho: dae khu jham wa pe"mung: maqo" gai: laug i? Aijham wa pe"mung: no: maba: gai: ko" laug i? Nao wa ngore- xaung: gaung re kyaug' ho: byaug: ra" qid zo: gyaung: jham re we' dakhyo: nhag' lam: thao" nhao nae" ein: myid: yaung: to" i? ein: ta" va".

¹⁹Ceru re ASANG phaug' tau" ra"- nao dam: tug' lo:ngad: re nao re ngo dam: jhui" yu nae". Aimung: nao wa nga" nho: daui daui yaug dam: boe" li" genae". Nao qe- pe" lajheim: mabo: ra" dao: jhau nae" atha" phug' de; ra" lau dao: re hau" kyo" ngad: re- nao wa nga" nho: lapa dam: boe" nae". Mung" byu qe wa nao jhao" dam: tug' lo mung: nao wa yao: bam jhao" maye: ca" nae".

²⁰Ngo wa nao re- gyid: ne vang khinqae we' dakhyo: gang" tang nhao nae". Yao: bam wa nao re khe' zin: gengadqere: nao re yao: bam aung: pye' genae" mangad:- ngo wa nao re gug: gam byid: mung: nao re gug: gug: za: qo" na sho' nao we' daga" na nae".

²¹Ngo wa nao re- makhyang: nhag' lam: kaui mo; aqan alan byu qe: qam: so' mae" khyad' yu nae". Ngo ASANG ta" to: va".