Read Maru YEREMIA 19 Bible Online

YEREMIA 19 - Maru bible

YEREMIA 19

¹ASANG wa ngore zhogang" yae: dalam: yevai nae" ta" ra". Yao: wa byumyu" nho: lau: de, qe daqhae: apyad qi" ra" khinjaung qe daqhae: re jhui: yang:-

²Hinon lao: khaung: khyo thug' lo" ra" ug' go, khao: kham: dung: khyo" ye" lo" wa,- aimae yao" yang byid: nae" mungdao: re ngo ta" hau: nae" khyo rere: ngore ta" ra".

³ASANG wa Yuda kho:kham qe we' Yerusalem vobyu qe we"- Israel nho: Mao"So qam: bo: ra" ASANG ngo ta" nae" rure tae" gyo: ge,- the' gyo" ra" mo, yaug khao: ngo" gyo" din: mug' byaug sho' ngad: ra" qug: khai: kyi" khyag' ru ce: jo, qo mae ngo boe" nhao nae".

⁴Ngo wa ce: mau" re kad' nae". Pe"mung:ga"re- byumyu" qe wa ngore ngag: pye' mung: gatau: so alho jham re xeim: ngaui" byid' ra" khyo" yang ce: jo, qo re masan masin" boe" nhao: pye' ako". Ai: so jham: akhyo re yao: bam re:- yao: bam: phug' pho" qere:- Yuda kho:kham qere: maba ngad: ako". Yao: bam wa ce: jo, qo re pe" qobo maqo" ra" mo; sa: za: byang" sho' kad' to" ako".

⁵Aimung: yao: bam wa ngaui" xeim: jham khyo" myi: mae yao: bam: zoshao qere phad' ngaui" nae" qhid' mae" Bala qhid' mae" phan jham re zao: ako". Ce kad' nae" qhid' mae" yao: bam re ngo khonhae" re: amyin" mabyid:- airu wa nga" myid mae lhao" re: khonhae" re: mabo: qu".

⁶Airumung: ce: jo, qo re Tophed- mangad: lao" Hinon lao: khaung: ga: mamhang" lo nae" ra" ayo, joe" lo: li" nae". Ai: atha" ai: jo, qo wa byu se' lao: khaung: ga: mhang" li"genae".

⁷Ce: jo, qo mae Yuda byu qe we' Yerusalem byu qenho: myid: yaung: khyo jham re zai" qheim" khyo" pye' byid: nae". Ngo wa yao: bam: gyevo qere yao: bam re aung: pye' nhao mung: gyekhe' poe mae se' pye' nhao nae". Ngo wa yao: bam: maogaung jham re ngho' jham we' seyo: gug'nyhug' lhe: jham re zho" pye' nae".

⁸Ngo wa ce: vogaung: re su" lai: lo" mo, yaug khao: ngo" mug' yang: din: hao" byaug genae" ra" qu" gyaug qu" lhaung sho' ra" phyo' qheim" ru boe" nhao nae".

⁹Gyevo qe wa vogaung: re lhang" kham" to: mung: vobyu qere se' seim" seim" li" genae". Vang" to" ru wa gyaug din pho: ngad: ruyang vogaung: khug mae na mo, wa yao: cao: jho" zo" li" genae". Yao: bam yao" zoshao qere lhao" re: zo" li" genae" ga: ngore ta" ra".

¹⁰Ai: thao ASANG wa ngore- ngo we' daga" cao" li" ko" ra" mo; qhid' kheim: mae yae: re kho' pye' nae" ta" mung:-

¹¹Qam: bo: ra" ASANG wa ngo wa ce: byu qere we' ce: vogaung: re kho' pye' nae". Aiwa magai: dam: zam losho' go; byaug: ra" ce: zhogang" yae: we' dakhyo: ngad: li" nae". Byu qe wa yao: bam: sushid re Tophed mae lhao" re: nyhab' li" genae". Pe"mung:ga"re yao: bam re nyhab' nae" jo, qo gatau majo, lo nae" ngad yang: ngad: ra".

¹²Ce: vogaung: re we' aimae na: ra" mo, re Tophed re we' dakhyo: ngo kad' pye' nae" ein: ngo dao:so: byid' ra".

¹³Yerusalem mae" yham jham- Yuda kho:kham qe: yham jham- yham khaung dao mae kyi re sheim nae pyo: ja: phad' ngaui" byid' qu" ru we' gatau: so jham re xeim: khyo" sabyi qang: vhe' sheim" qu" ra" yham jham alhab' gaigai: yao: aijham alhab' wa Tophed qhi" yao: masan masin" boe" li" genae" ga" rure yao: bam re ta" kyo: nae" ngore ta" ra".

¹⁴Ai: thao yao" mungdao: re ta" hau: nae" ASANG: yang ngore nhao: ke' ra" jo, qo Tophed mae" ngo to" lo" va". Ngo wa Caung:pa" Yham vang" khyo vao ye: mung:- ye; jo, yang:-

¹⁵Israel nho: Mao"So qam: bo: ra" ASANG: yang naonhaung" nhag' lam: qao mung: ngo ta" nae" dao: re matae" gyo: genae" ngad: ruyang ngo kad' to: nae" ein: ta" to" ra" qobo dae alhab' re ngo wa ce: vogaung: we' avai: ayae vogaung: khao: ngo" dao mae boe" li" nhao nae"- ga: ta" lo" rure byu alhab' mo, re ta" kyo: byid: va".