Read Maru YEREMIA 20 Bible Online

YEREMIA 20 - Maru bible

YEREMIA 20

¹Imma nho: yauggai zo: ngad mung: Caung:pa" Yham nho: au: jhaung ngad: ra" khinjaung Pashu wa- ngo ceru: ta" hau" ra" khyo re the' gyo: lao"-

²Yao: wa ngore be, mung: Caung:pa" Yham mae" Benyamin kham tho' mae" kham: nhae mae jao co: yang- taui" to: nhao ra".

³Thao: ba ne, kao- Pashu yang ngore jao co: mae" pheim: ke' thao ngo wa yao: re- ASANG wa nao re Pashu ga: mang mamhang" ngad: ra". Yao" yang nao re- mhang" to" ra" mang wa Khyi" Khao: ngo" Gyaug Pho:- ga: ru ngad: ra".

⁴ASANG yao: yao: ta" ra". Ngo wa nao re nao we' ni" ba nam qe: qhid' mae" gyaug pho: boe" nhao nae". Amung: nao wa yao: bam: gyevo qenho: shae pyang" yang yao: bam alhab' se' pye' qhug' ko" rure myao: li" nae". Ngo wa Yuda byu alhab' re Babelon kho:kham nho: kheim: so' qao: mae ke' to: byid: nae". Yao: wa daqhae: re kyam: byu qekhyo" yao" mung"dan: khyo jhui" lo" mung: gaje daqhae: re wa se' pye' li" nae".

⁵Ngo wa yao: bam: gyevo qere ce:- vogaung" nho: jo,nho" alhab' re lhad' rere: lhad' yu: pye' nhao nae". Amung: ainho: sang: ra" zai- jo,nho" zai yo alhab' re taung" yu: pye' nhao nae". Yuda kho:kham qe: phug' de, ra" jo,nho" jham re lhao" re: taung" yu: pye' nhao nae". Ja: khao: ngo" re Babelon khyo tai: lo" pye' nhao nae".

⁶Pashu we"- nao kam" wa nao we' ni" yham khaung byu alhab' re: taung" yu qhug' mung: Babelon khyo jhui" lo" ru qhug' genae". Aimae nao shid mung: nao: yang myo: sho' mhug' ta" byid' ra" ni" ba nam qe alhab' we' daga" nyhab' pye' ru qhug' li" nae".

⁷ASANG we"- nao ngore mhug' pyag' pye' ava". Amung: ngo wa mhug' pyag' ru qhug' va". Nao wa ngo tho' qam: je: bo yang: ngad: ra". Nao wa ngore aung: pye' ava". Yaug khao: ngo" ngore jung" pye' ako". Yao: bam wa ba gyam sho' ngore qi: jung" pye' ako".

⁸Ngo dao: jhau khao: ngo" aqan alan wo"- phyo' pye' ru wo"- ein: ngo zag: hug' ca" ra". ASANG we"- ni" mungdao: re ngo ta" hau" ruyang ngo wa ayo, byang" jung" ru we' nyhe' ru qhug' ra".

⁹Ngadqere: ngo wa ASANG re to" myhid' pye' mung: yao" mang mae dao: majhau lo nae" ein: ngo ta" lao"- ni" mungdao: wa myi: we' dakhyo: nga" aung khug mae nga" na: ra". Gai: boe" qhi" ngo aire zang" ci ngadqere: aire ngo maqo" zang" ci ngad: ra".

¹⁰Yaug khao: ngo" wa gyaug pho: wa khyi" khao: ngo" mae wo"- Aimung: kheim: so' qo" mo, re yao" khyo lau lo" shid' gelang: ga: dao: so' jho" so' na: rure ngo the' gyo"- nga" nho: te' thao" ra" ba nam qe lhao" re: ngo gyang: gyoe; lo" nae" rure lao" na: ako". Yao: bam wa yao: wa pha,jhi" mha" khyug' mung: ngonhaung" yao: re the' taung" yu yang: lage, qo" phaug' maba ga: ta" ako".

¹¹Ngadqere: ASANG we"- nao wa nga" bo: de, yaug ngad mung: qam: o: qam: so' bo yaug ngad: ra". Ngo re yhin" mo, wa seim" byaug: li" genae". Yao: bam maqo" aung myaug geyang: yao: bam apyad ato mae nga: yeim: li" genae". Yao: bam: nga: yeim: ru wa khonhae" re: mato" myhid' pye' nae".

¹²Ngadqere: qam: bo: thao" ra" ASANG we"- nao byu qere tarha" nyang nyang za: jham" qu" ra". Yao: bam: nhag' lam: mae we' myid khug mae pe" bo: rure nao ba: ra". Airumung: nga" gyevo qere nao: yang lage, phaug' rure ngore myao nhao la,- pe"mung:ga"re ngo wa nga" khyo re ni" lo, khug mae ke' to: va".

¹³ASANG re nghaui"caung: ge,- ASANG re caung:khin" ge, wo"- yao: wa zag: zo: qhug' mo, re makhyang" ra" byu qenho: qam: so' lo, mae" khyad' yu: ra".

¹⁴Ngo khau: ra" ba wa nhang: kheim: zhao" vashao:- ngore nga" myhi" yang khau: ra" ba wa to" myhid' pye' qhug' vashao:-

¹⁵Yauggai nau" wo"- nao yauggai zo: qo" ava" ga: nga" pho" re ngaui: bau: nhao: ra" lau dao: li" ta" kyo" ra" yaug wa nhang: kheim: zao" vashao: wo"-

¹⁶Yao: wa nhag' khyag' shagu myid mabo lo: ASANG: yang phyo' qheim" pye' ra" vogaung: jham we' dakhyo: dau vashao:. Yao: wa ne,seim mae khai" no yang: gyi: hug' ra" thoe re we' ba khaung tau yo, mae gyekhe' poe peim" ra" thoe re yao: the' gyo: vashao:-

¹⁷Pe"mung:ga"re yao: wa ngo makhau shire ngore mase' pye' yang: ngad: ra". Airu ngad lo: re nga" myhi" nho: bata" yham wa nga" lab ngad: lo naeva".

¹⁸Ngo pe"mung: khau: li" va" laug i? Qug: khai: qug: khai: we' kaug' qhui: rure za: kham zo: mung: nga" kao so' re nga: yeim: rumae thao" nae" qhid' mae" za: angad: i?