Read Maru YEREMIA 21 Bible Online

YEREMIA 21 - Maru bible

YEREMIA 21

¹Yuda kho:kham Zedekia wa Makhia nho: yauggai zo: Pashu we' Masea nho: yauggai zo: khinjaung Zephani re ngojhao" nhao ke' mung: ceru: ga: ta" nhao: ke' ra".

²Aiwa jeju khyo" ngonhaung" qhid' mae" ASANG re dao: jhau byid: la,- pe"mung:ga"re Babelon kho:kham Nebugkhaneza we' yao" gyetab jham wa vogaung: re vang" ci: ako". ASANG wa ngonhaung" qhid' mae" yao" mug' pho: ve, lho jham mae" daja: re kad' qhu" byid: mung: Nebugkhaneza re maqad maqui" dam: zad: phao: lo" nhao: re nhao maba ga" ru ngad: ra".

³Ailao" Yeremia wa- yao: bam re ceru:- ga: ta" ra". Zedekia re ta" wa,- Israel nho: Mao"So ASANG wa ceru: ga: ta" ra"- ngo wa ngojhao" nhao: ke' qhug' ko" ra" mo, re- ngo wa Babelon kho:kham re we' yao" gyetab re- gyekhe' zin" na ko" ra" ni" gyetab re seim" lo" nhao nae". Ni" gyezo: qenho: shae lhae jham re vogaung: kao" mae ngo bam: to: nae".

⁵Ngo wa nao re nga" qam: nga" nhag' yo" ru- nga" nhag' jam: yo" ru nga" nhag' lam: qan ru alhab' yang gyekhe' zin: nae".

⁶Vogaung: khug mae na mo, yaug khao: ngo" re ngo se' pye' nae". Byu qe- gug'nyhug' jham dakhyo: za: qu" gyaug qu" lhaung sho' ra" no boe" yang: shid: li" genae".

⁷Ngadqere: nao we' ni" gyezug: qe- gye poe bao" khug'- no mae" mashid lo: na: dang: jo; ra" mo, kam" wa naonhaung" re se' pye' nug: ra" kho:kham Nebugkhaneza we' ni" gyevo qeyang naonhaung" alhab' mo, re ngo taung" yu: pye' nhao nae". Nebugkhaneza wa nao re se' pye' li" nae". Yao: wa naonhaung" mae" dayaug rere: nhag' khyag' shagu: ru- shono: ru maqhu" byid: nae".

⁸Xo' mung: byumyu" qere ta" wa,- ASANG ceru: ta" ra"- tae" gyo: ge,- ngo wa naonhaung" re- kao so' daui nae" khyo we' shid nae" khyo shid' lam" agyo: mae" khyin: yu nae" akho: akhang" naonhaung" re byid' to".

⁹Vogaung: khug mae na mo, khag' ngadqere: gye poe mae mangad: lao"- vae: moe' kyaug' shid: ru- mangad: lao" no boe" yang: shid: li" genae". Ngadqere: ana" vogaung: re khe' zin" na ko" ra" Babelon byu qe: lo, khyo" thug' ye: mung: lo, yetau: ra" yaug khag' ngadqere: se' pye' ru maqhug' nae". Yao: wa nang" thao" yao" kao so' we' phao: loe; lo" li" nae".

¹⁰Ngo wa ce: vogaung: re matang" to: lo: phyo' qheim" pye' nae" qhid' mae" myid: phyid' to: va". Aire Babelon kho:kham nho: lo,khyo ngo ab byid' pye' nae". Amung: yao: wa aire myid gaung khyo ngha" pye' li" nae".

¹¹Xo' yang Yuda nho: kho:kham yham khaung re ta" wa,- Davi nho: yham khaung we"- ASANG: dao: re tae" gyo: ge,- ASANG ta" ru wa- ba khao: ngo" tarha" din:nyang: ru boe" va" rure qu" ge,- mhug' pyag' ru qhug' na: ra" yaug re yao: re mhug' pyag' ra" yaug: lo, mae" gug: gam byid: ge,- naonhaung" magug: gam gere wa naonhaung" kad' na: ra" makhyang" ra" mau" wa nga" nhag' jam: yo" rure maqo" se' pye' losho' de; nga" na: ra" myi we' dakhyo: nga" nhao: li" genae".

¹³Nao Yerusalem wa pa: din" tho' mae" to" jo; ra" laung: mo" baui we' dakhyo: lao: khaung: tho' myhao sho' mae zaung: jo; ra". Ngadqere: ngo wa nao re gye kad' yang: khe' zin: nae". Naonhaung" wa naonhaung" re khag' dayaug re: gye maqo" khe' nae"- naonhaung" gye go jo, qo jham re khag' re: maqo" phyo' lai: vao ye: nae" ga: naonhaung" ta" ako".

¹⁴Ngadqere: ngo wa naonhaung" kad' ru qhid' mae" naonhaung" re qobo dae byid: nae". Ngo wa kho:kham kho" re myi: ngha" pye' nae". Ai: myi: wa ai: lhang" gam: jo; ra" ja: alhab' re nga" pye' li" nae". ASANG ngo ta" to: va" ga" ru ngad: ra".