Read Maru YEREMIA 22 Bible Online

YEREMIA 22 - Maru bible

YEREMIA 22

¹ASANG wa Davi nho: myid:zo: ngad: ra" Yuda nho: kho:kham kho" khyo ye: mung: aimae kho:kham yao" gyezug: qe- Yerusalem byu qere ASANG ta" to" ra" dao: re tae" gyo: genae" qhid' mae" yeta" wa,- ga: ngore ta" ra".

³Aiwa ASANG ngo wa din:man" ru we' jo: rure kad' nae" ngo nao re amyin" byid' ra". Mhug' pyag' qhug' na yaug re yao: re mhug' pyag' na: ra" yaug: lo, mae" gug: gam byid: wa,. Taung bug byu qe- cug' zo: qe- cug' mo" qere magai dakad' ge,- dazag zo: ge,- ce: gyang" lho" jo, qo mae pe" qobo maqo" ra" mo, re dase' pye' ge,.

⁴Ngo amyin" byid' to" ru we' dakhyo: naonhaung" kad' geyang: ngad lao" wa Davi nho: myid:zo: qe wa kho:kham xo' boe" li" genae". Amung: yao: bam wa yao: bam: gyezug: qe we' yao: bam: mang: byu qe we' daga" myao: lhin" jham we' myao: jham: dao mae zaung yang: ce: kho:kham kho" mae" kham: jham khyo" xo' yang: su" lai: lau: li" genae".

⁵Ngadqere: naonhaung" nga" amyin" jham re maphug' cao" geyang: ngad lao" wa ce: kho:kham vang" wa byo; qeim: byaug: li" nae" ein: rure ngo naonhaung" re jham tang: ta" ra" ga: ASANG ngo ta" to: va".

⁶Nga" qhid' mae" Yuda nho: kho:kham kho" wa Gilead mung" we' Lebanon bam jham qhi" yao: yaung" ra". Ngadqere: ngo wa aire byu khag' mana: ra" cae: jhug tag jo, qo kad' pye' nae".

⁷Aire phyo' qheim" pye' nae" byu qere ngo nhao: ke' byid: nae". Yao: bam alhab' wa yao: bam: vozaung: jham ci yang: ai: nho: shaug' zang baung: jham re thau: khyang: pye' mung: aijham re myi: khug khyo pye' zaui: pye' li" genae".

⁸Ai: thao re- ai: khyo" su" lai: lo" ko" ra" taung bug byu qe wa ASANG ngo: yang ce: qi" qhang: vogaung: re airu" ra" mau" pe"mung: kad' va" laug i? ga: yao: cao: jho" myid' li" genae".

⁹Ailao" yao: bam wa naonhaung" Mao"So ngo we' kad' to" ra" naonhaung" dao: thang" re naonhaung" shapye' pye' mung: so gatau jham re caung:pa" caung da" byid: geyang: ngad: ako"- ga: yao: bam tau" li" genae" ga" ru ngad: ra".

¹⁰Yuda byu qe we"- kho:kham Yoshia mathao mae ngug byid dagyo" ge, yao: shid: rure dakaug' ngug ge,- ngadqere: yao" yauggai zo: Yoahaza mathao mae kam" wa alokho: sho' ngug ge,- Yao: bam yao: re jhui" lo" byaug: ako". Khonhae" re: matug' lo lo nae". Yao: khau: li" ra" mung" re khonhae" re: madam: myao lo nae".

¹¹ASANG wa Yuda kho:kham khyo" yao: pho" khu mae kho:kham xo' kad' yaug Yoshia nho: yauggai zo: Yoahaza we' sin: yang: yao: wa khonhae" re: matug' lo lo nae" qhid' mae" ce: jo, qo mae" lo" byaug: ava".

¹²Yao: wa yao: re yao: bam: yang jhui" lo" ra" mung"dan: mae shid: li" nae". Aimung: yao: wa ce: mung"dan: re khonhae" re: madam: myao lo nae" ngad: ra"- ga: ta" ra".

¹³Madin: man" ra" khyo" yao" yham re kad' mung: aire madin: maman" ra" khyo" yang qi: nhao: ra" yaug yao" mao:nhaung: qere pe" aphug' mabyid: lo: mau" khao" nhao mung: yao: bam: ba na phug' ngaui mabyid' ra" yaug wa jeim" ava".

¹⁴Ngo wa tho' pyae mae gakai: lai qe, jham ke' mung: ngo yao" qhid' mae" yham zang dayham kad' nae" ga: ta" yaug wa jeim" ava". Aimung: yao" yham mae bao: zo: kham: re shaug' the" yang daung" te' mung: ane: yang tung" ra".

¹⁵Gatau tho' je: gai: ra" shaug' the" yang nao yham jham re kad' re ai yang nao re je: gai: ra" kho:kham boe" nhao nae" i? Ni" pho" wa kao qhang sho' qo" na: ra". Yao: wa khonhae" re: tarha" din:man" ru we' tarha" din: nyang yang: yao: kad' ru ja: khao: ngo" mae dai bo: ra".

¹⁶Yao: wa myaung sho: mo, re tarha" din: nyang: ra" khyo" tarha" ca: qu" mung: alhab' mae na: dai ye; dai: ra". Aiwa ASANG re ba: ra" lajheim: ngad: ra".

¹⁷Ngadqere: nao wa naoyao" qhid' mae" za: myid: ra" ni" bug: byid: myid re za: myao: li" nae". Nao wa pe" qobo maqo" ra" mo, re se' pye' mung: ni" nho: mung" byu qere aqan alan zag zo" ra". ASANG ta" to" va".

¹⁸Airumung: ASANG wa Yuda kho:kham Yoshia nho: yauggai zo: Yehoiakim we' sin: yang:- yao: shid: ru mathao mae khag' re: makaug' ngug genae". Nga" ba nam pho" yao: we"- gya we"- ngo ru" ru we"- ga: khag' mata" genae". Khag' dayaug re: nga" ASANG we"- nga" kho:kham we"- ga: yao" qhid' mae" makaug' ngug genae".

¹⁹Loze shid re nyhab' ra" khyo" yao: wa she: khyad' ye" lo" ru qhug' mung: Yerusalem kham: jham: taung gaung shad' khyo ye shapye' pye' ru qhug' li" nae"- ga: ta" ra".

²⁰Yerusalem byu qe we"- Lebanon khyo ye: yang: hug' ge,- Bashan mung" khyo ye: mung: hug' ge, Naonhaung" nho: myid vang" ba nam qe alhab' mo, gye seim" byaug vako" ruyang Moba bam jham mae" hug' yao ge,.

²¹Nao na: dai: ra" ayo, mae ASANG wa nao re dao: jhau: ra". Ngadqere: matae" gyo: ha: pye' ra". Aiwa naonhaung" pyad geim" mae naonhaung" kad' lo: ru ngad: ava". Naonhaung" wa khonhae" re: ASANG re mho dao malhaung" tae" gyo: lo ngad: ako".

²²Naonhaung" nho: au: jhaung qe wa la yang hug' tao" lo" ru qhug' li" genae". Naonhaung" nho: myid vang" ba nam qe wa gye poe mae" kyam: byu qekhyo" taung" jhui" lo" qhug' mung: naonhaung" vogaung: wa nga: yeim yang: naonhaung" kad' lo: ra" makhyang ra" mau" alhab' mathao mae naonhaung" vogaung: jham wa nga: yeim mung: qho' phau" li" genae".

²³Naonhaung" wa Lebanon mung" mae" tai: lo: ra" shaug' gae jham: phaung mae gug: gam qo" na: ra". Ngadqere: myiqe: dayaug zo:khau no no: ru we' dakhyo: dayin dayo: no: ru nao qhug' lao" nao wa khoqhi" masho: majhin qhug' yaug ngad nae" i?

²⁴ASANG wa Yuda kho:kham Yehoiakim nho: yauggai zo: kho:kham Yehoiakhin re- ngo wa kao so' daui: ra" Mao"So dang za: ngad ru we' dakhyo: nao wa nga" lo,yo lo, mae" dazid lo, pin: ngadsho' ngadqere: nao re ngo phan" pye' nae".

²⁵Aimung: nao re se' pye' nug: ra" byumyu" ngad: ra" naonhaung" gyaug: ra" byumyu" lo, khyo nao re ngo byid' pye' nae". Ngo wa nao re Babelon kho:kham Nebugkhaneza we' yao" gyezo: qe: lo, khyo byid' pye' nae".

²⁶Ngo wa nao re we' ni" myhi" re gamung" khyo maqad maqui" pyaung" jhui" lo" nhao nae". Ni" shid' ma khag' re: makhau: ra" mung"dan: khyo nao ye" lo" li" nae". Ai mae ni" shid' ma geim" shid li" genae".

²⁷Nao wa ce: mung"dan: re dam: myao nug: li" nae". Ngadqere: nao khonhae" re matug' lo lo nae".

²⁸Ngo wa kho:kham Yehoiakhin wa ai: shapye' pye' ru ngad mung: khag' yang ma-o lo" ra" yae: go, we' dakhyo: boe" va" ra" i? Yao: we' yao" zoshao qe pe" maba: to" ra" mung" khyo pyaung" jhui" lo" qhug' ra" khyo wa cemung: ngad: ra" i?

²⁹O" mug: myid- mug: myid:- mug: myid we"- ASANG ta" to" rure tae" gyo: wa,-

³⁰Byu ceyaug Yehoiakhin wa yao" zoshao qe ci phyaug' nae" dao: phyid' qhug' yaug- khonhae" re: aung myaug: ru maqhug' nae" yaug ngad: ra". Yao: wa Davi nho: khu mae kho:kham xo' kad' mo, we' dakhyo: Yuda mung" re eib genae" ra" mo, ngad: ko" ra" myid:zo: qe maqo" nae". ASANG ngo ta" to: va"- ga: ta" ra".