Read Maru YEREMIA 25 Bible Online

YEREMIA 25 - Maru bible

YEREMIA 25

¹Yoshia nho: yauggai zo: Yehoiakim Yuda kho:kham kad' ru byid zin ein: zin mae Yuda byu alhab' mo, we' sin" ra" ASANG mae" mungdao: re ngo qo" khae: yu:- (Ce wa Nebugkhaneza kho:kham kad' ru sao qhid' zin ein: zin mae ngad: ra".)

²Ngo wa Yuda we' Yerusalem byu alhab' re-

³Amon nho: yauggai zo: Yoshia Yuda kho:kham boe" ru daxe: sam zin ein: zin mae" ana" ba joe" sho' shid' xe: sam zin lam: lam: ASANG ta" rure naonhaung" re khonhae" re: malhaui" pye' lo: ta" kyo: va". Ngadqere: naonhaung" nyang" matae" gyo: ngad: ako".

⁴ASANG wa yao" daui daui mo, lapa qere xo' yang: naonhaung" jhao" nhao: ke' byid: sho' ngadqere: naonhaung" wa manug: tae" gyo:- nyang" matae" gyo: ngad: ako".

⁵Gang" tang: ra" jo,nho" khyo" naonhaung" re we' naonhaung" phug' pho" qere ASANG: yang byid' to" ra" mung"dan: mae naonhaung" xo' yang: qo" na genae" qhid' mae" yao: bam wa naonhaung" re naonhaung" makhyang" ra" kao so' daui khyo mae" we' naonhaung" kad' na ko" ra" makhyang" ra" lo, mau" jham mae" tug' lo nae" naonhaung" re ta" avako".

⁶Yao: bam wa naonhaung" re gatau: so jham re macaung:pa" nae" we' macaung da" byid: nae". Amung: naonhaung" yang kad' to" ra" so alho jham re caung da" byid' ra" khyo" yang ASANG re nhag' jam: mayo: nhao nae" qhid' mae" ta" avako". Naonhaung" ASANG re mho dao: gyo: geyang: ngad: re yao: wa naonhaung" re qobo dae mabyid: nae".

⁷Ngadqere: naonhaung" wa yao: re tae" gyo: nae" ha: pye' ako" ga: ASANG yao: yao: ta" ava". Ai: atha" naonhaung" so alho jham: yang yao: re naonhaung" nhag' jam: yo: nhao: mung: yao" qobo dae byid' rure naonhaung" yao" dao mae joe" nhao: avako".

⁸Airumung: naonhaung" yao: re manug: tae" gyo: byid: ko" ruyang qam: bo: ra" ASANG wa-

⁹Ngo wa mug: am: mae" byumyu" alhab' re we' nga" daui daui yaug Babelon mae" kho:kham Nebugkhaneza re khai nhao: ke' nae". Ngo wa yao: bam re Yuda we' aimae na: ra" mo,- mung" kyo: cao: alhab' mae" byumyu" alhab' re gyekhe' nae" qhid' mae" jhui" lo nae". Ngo wa ce: byumyu" mung"dan re we' ainho: mung" kyo: cao: jham re phyo' qheim" pye' mung: apyad ato mae qu" gyaug qu" lhaung sho' byo: jo, nhao nae". ASANG ngo ta" to: va".

¹⁰Ngo wa yao: bam: bau" ru we' ngaui bau: ngaui yao hug' thoe jham- lo,xo' poe pyo" ra" thoe jham tae" lo" nhao nae". Yao: bam: myikaug' jham: qhid' mae" xau maqo" genae". Gaug zo re: maqo" lo: genae".

¹¹Mung"dan: geim" wa byo; qeim: jo; mung: qu" din sho' ra" myao jao: ngad: li" nae". Amung: mung" kyo: cao: mung"dan jham wa Babelon kho:kham re nhad' xe zin caung da" byid' li" genae".

¹²Ai: thao re ngo wa Babelon mung" re we' yao" kho:kham re yao: bam: qobo mathao mae qobo dae byid: nae". Ngo wa ai: mung"dan: re phyo' qheim" pye' mung: apyad ato mae byo; jo, nhao nae".

¹³Ngo wa Babelon mung" re Yeremia nhad' khyo" ta" au: byumyu" qe: dao mae boe" nhao nae" ngoyang kyaug' nhin" ra" qug: khai: kyi" khyag' alhab' yang qobo dae byid: nae". Kyi" khyag' qug: khai: ru alhab' re ce: mugsug' paug' mae tung" xam" to" ako".

¹⁴Ngo wa Babelon re yao: bam kad' lo: ru qhid' mae" aphug' dam: tug' byid: nae". Byumyu" myo: sho' we' qam: qi" ra" kho:kham qe wa yao: bam re jeim kad' pye' li" genae"- ein: ta" ra".

¹⁵Israel nho: Mao"So ASANG wa ngore- nga" nhag' yo" ru ein: ru byang" jo; ra" sabyi qang: keim cemae ngad: ra". Aire yu: ci mung: nao re ngoyang nhao: ke' byid' ra" byumyu" alhab' re aimae" yao: bam re shaug' nhao wa,-

¹⁶Yao: bam aimae" shaug' gelao"- yao: bam re gye kad' nae" ngoyang nhao: ke' byid' ra" gye poe mathao mae yao: bam apyi avhang: boe" li" mung: mabeim: maso: boe" li" genae"- ga: ta" ra".

¹⁷Aimung: ngo wa ASANG: lo, mae" keim re yu: yu mung: ASANG: yang ngore nhao: ke' ra" byumyu" alhab' re byid: mung: yao: bam re aimae" shaug' nhao va".

¹⁸Yerusalem- Yuda vogaung: alhab' yao: bam: kho:kham qe we' au: jhaung qe alhab' wa aimae" shaug' nhao: ru qhug' ako". Airumung: yao: bam wa din"pyad' yo- qu" gyaug qu" lhaung sho' ra" myao jao: boe" li" mung: yao: bam ana" joe" sho' kad' ko" ru we' dakhyo: yao: bam: mang re nhang: kheim: ke' ru mae amyu" byu qe ci: ra" mang boe" lo: ako".

¹⁹Ce wa ai: keim mae" shaug' vako" ra" gaje alhab' mo; nho: japhin: ngad: ra". Aibam wa- Egutu kho:kham- yao" gyezug: qe we' au: jhaung qe- Egutu byu qe alhab' we' Egutu mung" mae na ko" ra" taung bug byu qe alhab'- Uza mung" mae" kho:kham qe alhab'- Philisti vogaung: jham ngad: ra" Ashkelon- Gaza- Ekron- kho:kham qe alhab' we' Ashdod mae dang: na: ra" mo,- Edom- Moba- Amon byu qe alhab'- Ture we' Sidon kho:kham qe alhab'- Mug:gaung: panglai: mung"dan: jham mae" kho:kham qe alhab' Dedan Tema- Bu vogaung: jham- yao: bam xae re lang" ra" khyo" ko' ko" ra" byumyu" alhab' Arabia kho:kham qe alhab'- Din" pyad' yo mae na ko" ra" byumyu" kaung jham: kho:kham qe alhab'- Zimri- Elam- Media- kho:kham qe alhab' mug: am: shad' va" ru- jhao" ru- jo, qo khyi" khao: ngo" mae" kho:kham qe alhab' mo, ngad: ako". Myid gaung dao mae" byumyu" khao: ngo" wa aimae" shaug' ca" ako". Lo" thao" mae Babelon kho:kham re: aimae" shaug(...)

²⁷Ai: thao ASANG wa ngore- yao: bam re gye kad' nae" ngoyang nhao: ke' ra" gye poe mathao mae yao: bam yid sho'- daug sho'- gyang: lang: sho'- maqo" ta" lo: gesho' shaug' genae" qhid' mae" Israel nho: Mao"So qam: bo: ra" ASANG ngo yao: bam re amyin" byid' ra" khyo re byumyu" qere ta" kyo: wa,-

²⁸Yao: bam ni" lo, mae" keim re yu nae" ha: pye' geyang: ngad: re- yao: bam aimae" shaug' ca" shi: genae" ngad: ga: qam: bo: ra" ASANG ta" to" ra" khyo yao: bam re ta" kyo: byid: wa,-

²⁹Ngo wa phyo' pye' ra" nga" mau" re ngoyao" vogaung: mae" qhid nae". Yao: bam wa qobo dae maqhug' genae" ga: jho: ako" i? Mangad: yao: bam qobo dae byid' ru qhug' genae". Pe"mung:ga"re myid gaung dao mae" byu alhab' mo; dao mae gye poe re ngo nhao: ke' byid: nae". Qam: bo: ra" ASANG ngo ta" to: va".

³⁰Nao Yeremia wa- ngo ta" to" gu: alhab' re ta" hau: ca" ra". Nao wa ce: byu qere ASANG wa mug: khaung mae" kyid' li" nae"- myhao: ra" mug: khaung mae" mug: dam: dam" li" nae". Yao: wa yao" byumyu" re gye kad' yang: kyid' li" nae". Yao: wa sabyi shi: nao: yaug we' dakhyo: hug' li" nae". Myid gaung dao mae" yaug khao: ngo" yao" thoe re the' gyo" li" genae".

³¹Thoe wa myid gaung thao" sho' lao thao tau" li" nae". ASANG wa byumyu" mung"dan: jham re qobo zhaug' ra" si: daja: qo" ra". Yao: wa byu alhab' re myid ca: qu" nae" jhui" lo li" nae". Amung: makhyang: mo, re wa se' pye' ra". ASANG ta" to" ava"- ga: ta" ra".

³²Qam: bo: ra" ASANG wa byumyu" damyu" thao damyu" dao mae qug: khai: kyi" khyag' ru wa joe" li" na mung: la qam" zang wa va" ra" mug: thao mae zang" na: ako".

³³Ai: ba na mae ASANG: yang se' pye' qhug' ko" ra" mo; nho: mao gaung jham wa mug: myid thao" sho' mae sin" jo; li" genae". Yao: bam: mathao mae khag' re: makaug' ngug genae". Yao: bam wa dao: lo yang: nyhab' shaung: ru maqhug' genae". Yao: bam wa myid gaung mae myid xau we' dakhyo: bam: jo; li" genae".

³⁴Au: jhaung qe naonhaung" we"- gyi: ngug ge,- nga" byumyu" qenho: yao lhaug' mo, we"- zag: hug' ge,- kaug' ngug mung: phalhug bam dao mae lang" lhe' lhau ge,. Naonhaung" qhid' mae" se' pye' qhug' nae" ayo, joe" lo: mung: naonhaung" wa yao lo: re we' dakhyo: se' ru qhug' li" genae".

³⁵Naonhaung" qhid' mae" phao: loe, khyo majo, nae".

³⁶ASANG wa yao" nhag' yo" ru we' naonhaung" byumyu" re phyo' qheim" pye' va" ru we' naonhaung" ngaui pyo: yaug yo: ra" mung"dan: wa byo; qeim: jo; ruyang naonhaung" nokyang: kyang: mung: nhag' lam: thao" yang: gyi: ngug: ako".

³⁸ASANG wa yao" byumyu" re khang khyi wa yao" laug aug' re shapye' pye' ru we' dakhyo: shapye' pye' ava". Qu" ca' qu" din sho' ra" gye poe we' ASANG: thin: ra" nhag' yo" ru wa mung"dan: re din"pyad' yo boe" lo" nhao: ava".