Read Maru YEREMIA 26 Bible Online

YEREMIA 26 - Maru bible

YEREMIA 26

¹Yoshia nho: yauggai zo: Yehoiakim Yuda kho:kham boe" thao-

²ASANG wa ngore- Caung:pa" Yham vang" mae yeye; jo, mung: aimae caung:pa" nae" Yuda vogaung: jham we' joe" li" ko" ra" mo,byu qere ta" kyo: nae" ngoyang nao re amyin" byid' to" gu: alhab' re ta" hau" kyo: wa,- dakheim: rere: datang" to:-

³Mo,byu qe wa tae" gyo: mung: yao: bam: makhyang" ra" khyo jham re to" re to" pye' ko" maba- yao: bam to" pye' geyang: ngad: re yao: bam: makhyang" ra" lo,mau" alhab' qhid' mae" yao: bam: dao mae boe" nhao nae" ein: ngo yaung: to" ra" phyo' pye' ru we' sin: yang: nga" myid mae ke' to" rure ngo lhai" pye' li" nae"- ga: ta" ra".

⁴ASANG wa ngore- naonhaung" re ngoyang byid' to" ra" mho" shid' khyo re phug' cao" ra" khyo" yang re:-

⁵Naonhaung" jhao" ngo xo' yang: nhao: ke' byid' lo: ra" nga" daui daui mo,- lapa qenho: dao: jham re nyang" za: tae" gyo" ra" khyo" yang naonhaung" wa ngore mho dao: gyo: byid: ca" ein: ASANG ngo ta" to: va". Yao: bam ta" rure naonhaung" khonhae" re: mho dao: magyo: ngad: ako".

⁶Naonhaung" wa xo' yang: mho dao: magyo: geyang: ngad: re ngo Shilo re kad' ruru: ce: Caung:pa" Yham rere: ngo kad' nae". Amung: mug: myid geim" mae" byumyu" alhab' wa ce: vogaung: re nhang: kheim: ke' rumae ci: li" genae" ga" rure mo,byu qere ta" kyo: nae" ta" ra".

⁷Khinjaung qe- lapa qe we' mo,byu qe alhab' ceru: ta" ra" nga" dao: re Caung:pa" Yham mae the' gyo" ako".

⁸ASANG: yang jhau nae" ngore amyin" byid' to" ru alhab' re ngo bin: ta" we' yao: bam wa ngore taung: mung:- nao wa ce: mathao mae se' pye' nae" ang yaug ngad: ra".

⁹Ce: Caung:pa" Yham wa Shilo we' dakhyo: boe" nae". Amung: ce: vogaung: wa phyo' qheim" pye' ru qhug' mung: aimae khag' re: mana genae" ein: ASANG: mang re lao: yang: nao pe"mung: ta" i? ga: zag: hug' ako". Ai: thao mo,byu qe wa ngore lhang" gam: yang: mo, thaui: thaui" na: ako".

¹⁰Yuda au: jhaung qe wa boe" ra" khyo re the' gyo: gelao"- yao: bam wa kho:kham kho" mae" Caung:pa" Yham khyo hin hin ye" lo" gemung: kham: asag' mae jo, qo yeyu: to" ako".

¹¹Ailao"- khinjaung qe lapa qe wa au: jhaung qe we' mo,byu qere- byu ceyaug wa se' pye' nae" qhid' mae" dao: phyid' qhug' nae" man: qi" ra" yaug ngad: ra". Pe"mung:ga"re yao: wa ngonhaung" nho: vogaung: re gye kad' yang: dao: jhau: ava". Naonhaung" yao" nokhye' yang yao: yao" dao: re the' gyo" avako"- ga: ta" ako".

¹²Ai: thao ngo wa- ce: caung:pa" yham re we' ce: vogaung: re gye kad' yang: ngo ta" ra" dao: re naonhaung" the' gyo" ru ja: khao: ngo" re ta" hau: nae" qhid' mae" ASANG wa ngore nhao: ke' va".

¹³Naonhaung" wa naonhaung" kao so' daui khyo we' naonhaung" kad' na ko" rure lhai" pye' ca" ako". Amung: naonhaung" Mao"So ASANG re mho dao: gyo: byid: ca" ako". Naonhaung" lhai" pye' geyang: ngad: re- yao: wa naonhaung" dao mae boe" nhao nae" ga: yao: ta" to" ra" phyo' pye' ru we' sin: yang: yao" myid re lhai" pye' li" nae".

¹⁴Ngo kam" wa- naonhaung" lo,khug mae bo yaug ngad:- din: nyang: ru we' jo: ein: naonhaung" jho: ru pe" khyo" ngad ngad ngore kad' gela,-

¹⁵Ngadqere: cere ba: to: ge,- naonhaung" ngore se' geyang: ngad: re- naonhaung" we' ce: vogaung: byu qe wa pe" qobo maqo" ra" byu re se' ra" qobo qo" li" genae". Pe"mung:ga"re naonhaung" re ceru: ta" peim: byid: nae" ngore nhao: ke' yaug wa ASANG ngad: ra" ein: ta" va".

¹⁶Ailao" au: jhaung qe we' mo,byu qe wa khinjaung qe we' lapa qere- byu ceyaug wa ngonhaung" re dao: jhau: ra". Yao: wa se' pye' qhug' nae" ma ang ngad: ra"- ga: ta" ako".

¹⁷Ai: thao lau: de; qe daqhae: to" ye; li" mung: zang" ham: na ko" ra" mo,byu qere-

¹⁸Hezekia Yuda kho:kham kad' na: au: mo,byu qe alhab' re- Ziun wa yothaung: re we' dakhyo: phaug' pye' ru qhug' li" nae". Yerusalem wa byo; qeim: bam: jo; li" nae" Caung:pa" Yham wa sag mo" yo boe" byaug: li" nae" ga: qam: bo: ra" ASANG ta" to" rure ta" kyo" lo: ra".

¹⁹Kho:kham Hezekia we' Yuda byuqe wa Mikha re mase' pye' ngad: ako". Airu: kad' nae" atha"- Hezekia wa ASANG re nga: yhe' byid: mung: ASANG: yang myo, nho byid: ru qhug' nae" qo" sho' kad' yu: ra". Amung:ASANG wa yao: bam: dao mae boe" nhao nae" ga: yao: ta" to" ra" qug: khai: kyi" khyag' khyo we' sin: yang: yao" myid re tha" pye' ra". Ana" ngonhaung" wa ai: qug: khai: kyi" khyag' ra" ru ngonhaung" yao: yao: boe" nhao nae" khyo: boe" jo; ava"- ga: ta" ako".

²⁰(Yeremia we' dakhyo: ce: vogaung: we' byumyu" re gye kad' yang: ASANG: mang mae dao: jhau: ra" Kiriad Yearim mae" Shemia nho: yauggai zo: Uria ga" ra" byu gatau dayaug na: qu" ra".

²¹Kho:kham Yehoiakim we' yao" gyezo: qe- yao" gyezug: qe Uria ta" ra" dao: re the' gyo: gelao"- kho:kham pho" wa yao: re se' pye' nae" seim" ra". Ngadqere: Uria ai: khyo re the' gyo: mung: gyaug: ru we' Egutu khyo phao: loe; lo" byaug: ra".

²²Ngadqere: kho:kham Yehoiakim wa Akbo nho: yauggai zo: Elnathan we' gaje byu daqhae: re Uria re taung" yu nae" Egutu khyo nhao: ke' ra".

²³Yao: bam wa yao: re kho:kham Yehoiakim jhao" jhui" lo mung: kho:kham pho" wa yao: re se' pye' yang: yao" mao gaung re shava lab bug mae shapye' pye' ako".)

²⁴Ngadqere: ngo wa Shaphan nho: yauggai zo: Ahikam yang bao" thaug' byid' ru qo" yu yang: ngo wa mo,byu qe: lo, khyo ab byid: yang: se' pye' ru maqhug' ngad: ra".