Read Maru YEREMIA 27 Bible Online

YEREMIA 27 - Maru bible

YEREMIA 27

¹Yoshia nho: yauggai zo: Zedekia Yuda kho:kham boe" thao- ASANG wa-

²Sag' thaung: kyau: mae shoqid taui: te' mung: ngo yao" qhid' mae" nung: kyau: dalam: kad' yu yang: aire nga" lang zang: dao mae kai: nae" ngore ta" ra".

³Ai: thao ASANG wa yao: bam: mug: va: lagyo: qekhyo" yang Yerusalem khyo kho:kham Zedekia re li" qhug' nae" qhid' mae" joe" li" ko" ra" Edom- Moba- Amon Ture we' Sidon kho:kham qere mungdao: vhin: ke' byid: nae" ngore ta" ra".

⁴Israel nho: Mao"So qam: bo: ra" ASANG wa ASANG ta" to" rure yao: bam: kho:kham qere lo" ta" genae" qhid' mae" yao: bam re amyin" byid: nae" ngore ta" ra".

⁵ASANG ta" ra" Nga" nho: qi" qhang: ra" kheim: so' we' qam" yang mug: myid xao su byu- myid gaung mae na: ra" gug'nyhug' alhab' re ngo phan" to"- amung: aire ngo khyin: yu yaug khag' re ngadqere: ngo byid' ra".

⁶Ngo wa nga" nho: daui daui yaug Babelon kho:kham Nebugkhaneza nho: qam: so' qao: mae ai: byumyu" alhab' re ke' to: byid: yaug ngad:- yao: re caung da" byid: nae" seyo: gug'nyhug' lhe: jham re lhao" re: phan" to: byid: va".

⁷Byumyu" alhab' wa yao: re caung da" byid: mung: yao" byumyu" mung"dan: yao: yao: gyoe; gyo" lo" yo, joe" sho' yao: bam wa yao" yauggai zo: yao" myid:zo: qere caung da" byid' li" genae". Ai: thao re yao" byumyu" wa qam: so' bo: ra" byumyu" qe re we' kho:kham qi: qere caung: da" byid' li" nae".

⁸Ngadqere: byumyu"- mung"dan: dalam: lam: wa yao" eib: ra" qao: mae mana nae" ngad: re ngo wa ai: byumyu" re gye poe vae: moe' kyaug' ru- no boe" nhao: ra" khyo" yang qobo dae byid' ru we'- aire ngoyang Nebugkhaneza re bin sho' phyo' qheim: pye' nhao sho' qobo dae byid: nae".

⁹Naonhaung" nho: lapa qe: dao: re datae" gyo: ge,- dayaug yaug yab mo, khyo" shid mo, nho: subyo re khai: ra" khyo" vha" ra" khyo" joe" lo nae" ayo, re lapa qo" pa: ga: ta" yaug: dao: rere: datae" gyo: ge,- yao: bam alhab' mo, wa naonhaung" re Babelon kho:kham qao: mae mana genae" qhid' mae" ta" ako".

¹⁰Yao: bam wa naonhaung" re mhug' pyag' na gemung: naonhaung" mung"dan: mae" jhui" lo" qhug' rure naonhaung" re boe" nhao: li" genae". Naonhaung" re ngo khe' thug' pye' mung: naonhaung" phyo' qheim" pye' qhug' li" genae".

¹¹Ngadqere: Babelon kho:kham qao: mae na nae" khae: yu: mung: yao: re caung da" byid' ra" byumyu" kholam: re ngad ngad ngo wa yao" mung"dan: mae na: jo, nhao mung: aire yo kad' zo: mung: na nhao nae". ASANG ngo ta" to: va"- ga" ru ngad: ra".

¹²Ngo wa Yuda kho:kham Zedekia re Babelon kho:kham qao: mae na nae" khae: yu wa,- yao: re we' yao" byu qere caung da" byid: mung: naonhaung" daui: na: li" genae".

¹³Nao we' ni" mung" byu qe gye poe mae vae: moe' kyaug' rumae- no boe" ruyang pe" ein: shid genae" i? Aiwa Babelon kho:kham qao: mae na nae" rure makhae: yu: ra" byumyu" dao mae boe" li" nae" ga: ASANG ta" to" ra" khyo ngad: ra".

¹⁴Yao: re aseim" byid: la, matau nae" qhid' mae" nao re ta" ra" lapa qe: dao: re datae" gyo: byid: wa,- yao: bam wa nao re mhug' pyag' na: ako".

¹⁵ASANG ai bam re yao" yang nhao: ke' ru mangad:- yao: bam wa yao" mang re mhug' na mo, ngad: ako" ga: ASANG yao: yao: ta" to" ava". Airumung: yao: wa naonhaung" re khe' thug' pye' li" nae". Naonhaung" we' naonhaung" re ce: mhug' dao: jham ta" ko" ra" lapa qe naonhaung" se' pye' qhug' li" genae" ein: ra" dao: re yao: ta" kyo: va".

¹⁶Ai: thao ngo wa ASANG ta" to" ra" dao: re khinjaung qe we' mo,byu qere ta" kyo: va". Aiwa Caung:pa" Yham mae" phug' de; jo,nho" jham wa mamyao" re Babelon mae" dam: cilo: li" genae" ga: ta" ko" ra" lapa qe: dao: re datae" gyo: ge,- yao: bam naonhaung" re mhug' na: ako".

¹⁷Yao: bam: dao: re datae" gyo: ge,- Babelon kho:kham eib: ra" qao: mae na nae" kham: yu ge,- naonhaung" daui: na: li" genae" ce: vogaung: wa pe"mung: byo; qeim: bam: jo, nae" i?

¹⁸Yao: bam lapa dang za: ngad ko" re- yao: bam nga" mungdao: re qo" yu ko" ngad: re- Caung:pa" Yham mae we' kho:kham kho" mae dang: jo; ra" jo,nho" jham re Babelon mung" khyo maci lo" nhao nae" qhid' mae" qam: bo: ra" ASANG ngore yao: bam mho' vageshao:.

¹⁹(Kho:kham Nebugkhaneza yang Yuda kho:kham Yehoiakim nho: yauggai zo: Yehoiakhin we' Yuda we' Yerusalem mae" au: jhaung qere Babelon mung" khyo sham" jhui" lo" au:- yao: wa zang baung: jham- gyid: qid lhao:- lhin" jham we' Caung:pa" Yham mae" jo,nho" gatau daqhae: re tang" to: co' ra".)

²¹Caung:pa" Yham mae we' Yerusalem mae" kho:kham kho" mae dang: jo; ra" jo,nho" jham: khyo we' sin: yang: Israel nho: Mao"So- qam: bo: ra" ASANG ngo ta" ra" dao: re tae" gyo: ge,.

²²Aijham wa Babelon khyo sham" cilo" ru qhug' mung: aijham re nga" myid dam: phaug' lo" ra" ayo, joe" sho' aimae dang: jo; li" nae". Ai: thao- ngo wa aijham re dam: tug' yu mung: ce: jo, qo mae aijham re dam: ke' to: nae". ASANG ngo ta" to: va"- ga" ru ngad: ra".