Read Maru YEREMIA 29 Bible Online

YEREMIA 29 - Maru bible

YEREMIA 29

¹Khinjaung qe- lapa qe- amyu" byu au: jhaung qe we' Nebugkhaneza yang kyam: byu qekhyo" Yerusalem mae" Babelon mung" khyo sham" jhui" lo" qhug' ko" ra" gaje alhab' mo, re ngo mugsug' tung" ke' ra".

²Ngo wa aire kho:kham Yehoiakhin- yao: myhi" kho:kham kho" mae" zug: qe- Yuda we' Yerusalem au: jhaung qe- lo,mau" zaui: mo,- mau" zaui: jhao mo, re pyaung" jhui" lo" byaug thao re tung" ru ngad:-

³Ngo wa vhin tung" re Yuda kho:kham Zedekia yang Babelon kho:kham Nebugkhaneza jhao" nhao: ke' ra" Shaphan nho: yauggai zo: Elasa we' Hilkia nho: yauggai zo: Gemaria re byid' ke' ai: vhin tung" mae-

⁴Israel nho: Mao"So- qam: bo: ra" ASANG wa kyam: byu qekhyo" Yerusalem mae" Babelon khyo Nebugkhaneza re taung" jhui" lo" nhao: pye' ra" amyu" byu alhab' re ta" ra".

⁵Yham jham re kad' mung: te" na ge,- khyae kad' mung: naonhaung" qho" rure zo: yang: na ge,.

⁶Lo,xo' xo' yang: zoshao khau ge,- naonhaung" zoshao qere lo,xo' xo' yu nhao ge,- yao: bam re: zoshao qo" vageshao:- naonhaung" wa myo" je" li" ca"- magai: nang" lo"-

⁷Ngo yang kyam: byu khyo" naonhaung" re ye: nhao: ra" jo, qo mae" vogaung: jham: qhid' mae" gai: ra" mau" kad' ge,. Yao: bam: gaung tha" ngore akyu" mho' gela,- pe"mung:ga"re yao: bam na: dai ye; dai geyang: ngad: re- naonhaung" re:- na: dai: li" genae".

⁸Naonhaung" phaung mae na ko" ra" lapa qeyang re:- joe" lo nae" ayo, re lapa qo" pa: ga: ta" ko" ra" gatau khag' yang re: naonhaung" re mamhug' pyag' nhao genae" qhid' mae" Israel nho: Mao"So- ASANG ngo naonhaung" re ta" peim: byid' ra". Yao: bam: yab mo, jham rere: datae" gyo: ge,.

⁹Yao: bam wa nga" mang re lao: yang:- naonhaung" re mhug' na: ako". Yao: bam re ngo manhao: ke'- qam: bo: ra" ASANG ngo ta" to: va".

¹⁰ASANG ta" ra" Babelon nho: nhad' xe zin gan: lo" lao"- ngo wa naonhaung" re sho no: rure qhu" byid: nae". Naonhaung" re yham khyo dam: jhui" yu nae" ein: ta" to" ra" nga" dao:so: re zaui" pyang" nae".

¹¹Naonhaung" qhid' mae" ngo yaung: to" ra" khyo re ngad: ra" naonhaung" re na: dai nhao nae" khyo- kyi khyag' qug: khai: mangad:- joe" lo nae" ayo, mae naonhaung" myid: lao" khyo boe" li" nae" khyo jham re ngo yaung: to" rure ngo dayaug za: aba: ra".

¹²Ailao" naonhaung" ngore yao: li" genae". Naonhaung" ngojhao" li" mung: akyu" li" mho' li" genae". Amung: ngo naonhaung" re tau: byid: nae".

¹³Naonhaung" ngore qho: li" genae". Naonhaung" aung khug alhab' yang naonhaung" ngore qho genae" ngad: ruyang ngore myao: li" genae".

¹⁴Ngad va"- ngo ta" ru wa- naonhaung" ngore myao: li" genae". Ngo wa naonhaung" mug: myid re dam: byid: nae". Mung"dan: lam: khao: ngo" mae" we' ngoyang nha: sin" to" ra" jo, qo khao: ngo" ngo naonhaung" re zhang: yu nae". Ngo yang pyaung" nha: pye' va" ra" jo, qo mae" mung"dan: khyo ngo dam: jhui" tug' yu nae" ASANG ngo ta" to: va".

¹⁵ASANG wa Babelon mung" mae naonhaung" re lapa qere byid' to" ava" ga: naonhaung" ta" ako".

¹⁶Davi eib: lo: va" mung"dan: re eib: ra" kho:kham qe we' sin: yang: re:- kyam: byu qekhyo" naonhaung" we' daga" taung" jhui" lo" maqhug' mo, ngad ko" ra" naonhaung" ba nam sang: cao: ngad: ra" ce: vogaung: byu qe we' sin: yang: ASANG ta" ra" dao: re tae" gyo: ge,.

¹⁷Qam: bo: ra" ASANG wa ngo wa gye poe vae: moe' kyaug' ru- no boe" ru yao: bam: dao mae boe" nhao mung: ngo wa yao: bam re zo: magai losho' bab: ra" pho' ham" shi: we' dakhyo: boe" nhao nae".

¹⁸Ngo wa yao: bam re gye poe- vae: moe' kyaug' ru- no boe" nhao: ruyang cao" khe' mung: mug: myid geim" mae" byumyu" alhab' mo, yao: bam the' myao: rumae gyaug: din: byaug genae". Khyi" khao: ngo" khyo ngoyang nha: sin" ke' mung: yao: bam: dao mae boe" rure byu qe wa mo; byaug mung: gyaug: din: byaug: li" genae". Byu qe wa yao: bam re jung" mung:- yao: bam: mang re nhang: kheim: khyo" ci: li" genae".

¹⁹Nga" daui daui mo, lapa qe: nhad' khyo" yang yao: bam re xo' yang: vhin: ke' ra" mungdao: re yao: bam maphug' cao" ko" ruyang yao: bam: dao mae ceru: boe" li" li" nae".

²⁰Babelon mung" khyo ngoyang pyaung" jhui" lo" nhao: ke' ra" mo, naonhaung" alhab' mo, ASANG ngo ta" ra" dao: re tae" gyo: ge,- ga: ta" ra".

²¹Israel nho: Mao"So- qam: bo: ra" ASANG wa yao" mang mae naonhaung" re mhug' ta" ra" mo, ngad ko" ra" Maseia nho: yauggai zo: Zedekia- Kolaia nho: yauggai zo: Ahab khyo we' sin: yang: ta" to" ra". Yao: wa yao: shid' yaug re Nebugkhaneza nho: kheim: so' lo, khyo ab byid' pye' mung: aiyaug wa naonhaung" qhid' kheim: mae ai shid' yaug re se' pye' li" nae".

²²Thaung: byu khyo" Yerusalem mae" Babelon khyo taung" jhui" lo" qhug' mo, dayaug yaug: dao mae nhang: kheim: ke' nug gelao"- yao: bam wa Babelon kho:kham: yang adaui kao: se' pye' qhug' ra" Zedekia we' Ahab re we' dakhyo: ASANG nao re kad' vashao: wo"- ga: ta" li" genae".

²³Yao: bam wa qu" gyaug qu" lhaung sho' ra" qobo jham ngad: ra"- myi: shad' lao shad' ru- ASANG: mang re lao: yang: mhug' dao: ta" ra" qobo qo" ko" ruyang ce wa yao: bam: au: pa ngad: li" nae". Ceru wa ASANG: myid o: rure gye kad' ru ngad: ra". Yao: bam pe" kad' lo: rure yao: ba: ra". Yao: wa yao: bam: shad' re gye kad' ra" sagse: ngad: ra". ASANG ta" to" ava" ga" ru ngad: ra".

²⁴Israel nho: Mao"So- qam: bo: ra" ASANG wa Nehelam byu Shemia qhid' mae" mungdao: ngore byid' ra". Ai: yaug wa yao: yao" mang khyo" Yerusalem byu qe alhab' we' Maseia nho: yauggai zo: lapa Zephani re- khinjaung gaje qe alhab' re vhin tung" vhin: ke' ra". Ce: vhin tung" mae Shemia wa Zephani re tung" ke' ra".

²⁶Aiwa- ASANG wa Yehoiada nho: khu mae nao re khinjaung kad' nhao mung: ana" nao wa Caung:pa" Yham mae au: jhaung qi: ngad: ava". Lapa ngad: ga: geim kad' mung: yao" lang zang: mae jao co: we' jo,to' lang ku: ke' yang: na: ra" byugo yaug khao: ngo" re qu" gam nae" wa ni" mau" ngad: ra".

²⁷Lapa ngad: ra" khyo"- dao: jhau: lo: ra" Anathod byu Yeremia re ceru: nao pe"mung: makad' i?

²⁸Yao: wa Babelon mung" mae na: ra" mo, re yao: bam: kyam: byu khyo" myao" sho' na mung: yham jham kad'- aqao: te" na- qhovo: qho:- khyae kad'- qho: zo: qho: shaug' na genae" khyo re ta" ra" ruyang yao: re tam" pye' ca" ra"- ga" ru ngad: ra".

²⁹Zephani wa ai: vhin tung" ngore nghe' kyo: mung:-

³⁰ASANG wa ngore-

³¹Ce: Shemaia khyo we' sin" ra" mungdao: re Babelon mung" mae na ko" ra" kyam: byu qe alhab' re vhin: ke' nae" ta" ra". Aiwa ASANG ngo wa Shemaia we' yao" myid:zo: qe alhab' re qobo dae byid: nae". Yao: re ngo manhao: ke'- ngadqere: yao: wa lapa we' dakhyo: naonhaung" re dao: jhau mung: mhug' dao: re yao: naonhaung" re lam" nhao: ra". Yao: wa naonhaung" phaung gaung: mae myid:zo: qe maqo" nae". Yao: wa nga" byu qere ngoyang kad' byid' nae" ra" gai shab: ra" ja: the' myao sho' maqo" daui: na nae". Pe"mung:ga"re yao: wa yao: bam re ngore gye kad' tau: lhan: nae" ta" ra". ASANG ngo ta" to: va"- ga" ru ngad: ra".