Read Maru YEREMIA 3 Bible Online

YEREMIA 3 - Maru bible

YEREMIA 3

¹ASANG ta" ra". Yauggai dayaug wa yao" yham sang myhi" re kao" pye' yang: ai: myiqe: wa gatau yauggai dayaug: nho: yham sang myhi" boe" lo:ngad: re yao: re madam: gai: yu lo: nae". Ce: lo,mau" wa mug: myid re bin sho' masan masin" boe" nhao: li" nae". Ngadqere: Israel we"- nao wa zoqae: pho" myo: sho' yaug qo" lai: lo: ava". Aimung: ana" nao wa ngojhao" dam: tug' phao: lo nug: ra".

²Bug gaung au: jham khyo qu" ke' wa, nao shava myhi" we' dakhyo: makad' lai: lo: ra" jo, qo dalam: jo; ashi" i? Arab byu dayaug wa din"pyad' yo mae zo: sho: re lham: na ru we' dakhyo:- nao wa hau" mo" khyoyae cao" yang zoqae: pho" jham re lao" na: ra". Nao wa ni" shava myhi" mau" yang ai: mug: re masan masin" kad' pye' ava".

³Ai: mathao mae mug: qid re tam" pye' mung: xaung: thug' au: mae" mug: qu magyo" lo:- nao wa shava myhi" we' qu" dau mung: nao maba: qho' ngad: ra".

⁴Aimung: ana" nao wa- ngore nao wa nga" pho" ngad mung: ngo zoshao: yo, mae" ngore nao jhid'de; lo: ava".

⁵Nao wa khyao za: nhag' yo" na nae" mangad: nao wa ngore apyad ato mae nhag' yo: nae" mangad:- ga: ta" ra". Israel we"- ceru wa nao ta" ru ngad: ra" ngadqere: nao wa makhyang: mashab: rure nao qo" kad' nho" kad' ra".

⁶Yoshia kho:kham boe" na: au: ASANG wa ngore ta" ra". Ai: jhaug' mazaug: ra" myiqe: Israel pe" kad' rure nao the' myao va" i?Yao: wa ngo mae" phaug' lo" mung: myhao: ra" bug gaung khao: ngo" dao mae we' nyug lao qam" ra" sag' gae khao: ngo" qao: mae yao: wa shava myhi" we' dakhyo: kad' ra".

⁷Yao: wa cegu: alhab' re bin: kad' thao ngojhao" dang dang yao: tug' phao: lo: li" nae" ein: ngo lhaung" taung" myid:- ngadqere: yao: wa malhang: tug' phao: lo- aimung: yao" jhaug' mazaug: ra" yao: nhaung: Yuda wa ai alhab' re the' myao: ra".

⁸Yao: airu: ngo mae" phaug' lo" mung: shava myhi" boe" byaug: ra" mathao mae Israel re ngo kao" pye' yang: phao nhao: pye' rure re: Yuda the' myao: ra". Ngadqere: Israel nho: jhaug' mazaug: ra" yao: nhaung: Yuda wa magyaug ngad: ra". Yao: re: shava myhi" boe" li" mung:-

⁹Yao: wa dajhid' re: maqho' ngad: ra". Yao: wa ai: mug: myid masan masin" kad' pye' mung:- laug zang jham we' sag' gae jham re caung:pa" ra" khyo" myi: lao shad' ra".

¹⁰Aimung: cegu: alhab' thao mae- Israel nho: jhaug' mazaug: ra" yao: nhaung: Yuda wa- ngojhao" dam: lhang: tug' lo geim kad' mhug' mung:- gaigai: yao: wa airu: mangad: ngo kho:kham ASANG ta" to: va".

¹¹Ai: thao ASANG wa ngore ceru: ta" ra". Israel wa yao: mae" lhang: phaug' lo" ngadqere:- yao: wa jhaug' mazaug: ra" Yuda tho' je: gai shi" ru qhu" byid' ra"- ga: ta" ra".

¹²Yao: wa ngore- Israel jhao" ye: mung: ceru: ta" nhao: ra". Jhaug' mazaug: ra" Israel we"- ngojhao" tug' phao: lo wa,- ngo wa nhag' khyag' myid bo mung: nhag' mayo: nae". Ngo wa nao re apyad ato mae nhag' yo" jo,nae" mangad:-

¹³Nao qobo qo" va" ein: ru we'- ni" nho: ASANG ni" Mao"So re nao tau: lhan: va" ein: rure za: khae: yu: wa,- nyug lao: qam" ra" sag' gae khao: ngo" qao: mae taung bug: so jham re ni" nho: jhid'de; myid byid' pye' va" ein ru we'- nao wa nga" nho: amyin" dao: jham re maphug' cao" vanhaung ein: rure- qobo lhang: khae: yu: wa, ngo ASANG ta" to: va".

¹⁴Jhaug' mazaug: ra" byumyu" qe we" dam: tug' phao: lo ge,- naonhaung" re ngo sang: ru ngad:- ngo wa naonhaung" re- vogaung: lam: khao: ngo" mae" dayaug yaug byumyu" kaung khao: ngo" mae" shid' zo: zo: re Ziun bam khyo dam: jhui" tug' yu nae".

¹⁵Nga" dao: re phug' cao" ra" mung" eib mo, re naonhaung" qhid' mae" ngo byid: nae". Yao: bam wa naonhaung" re pha,jhi" we' laba lajhao khyo" yang eib: li" genae".

¹⁶Ai: thao naonhaung" wa ai: mug: myid mae myo" je" li" gelao"- mung" byu qe wa nga" nho: Dao: Thang" Ban" ra" khyo re- malhaung" ta" lo: genae". Yao: bam wa ai: khyo re mamyid lo: genae". Yao: bam wa aire lhao" maci ca" lo: genae". Yao: bam wa gatau dalam: re: makad' li" genae".

¹⁷Ai: ayo, joe" lo lao"- Yerusalem re- ASANG: zaung tao"- ga: mhang" li" genae". Aimung: byumyu" qe wa ai: jo, qo mae ngore caung:pa" nae" qhid' mae" zang" qham: na: li" genae". Yao: bam wa- yao: bam: qao: ra" nhag' lam: we' makhyang: mashab: ra" nhag' lam" yang ta" ra" khyo re khonhae" re: macao" kad' lo: genae".

¹⁸Israel wa Yuda we' qam: qhan: mung:- yao: shid' zo: wa mug: am: shad' mung"dan: mae pyaung" nha: to" rumae" daga" phao: lo mung:- naonhaung" phug' phyid' qere apyad ato mae" jo,nho" zai kug khyo" ngo byid' to" ra" mug: myid khyo tug' phao: lo: li" genae".

¹⁹ASANG ta" ra"- Israel we" ngo wa nao re nga" nho: yauggai zo: khyo" lham: khae: yu nug: ra". Aimung: nao re na pyo: taung" ra" myid gaung: dao mae" yaung" thao" mug: myid byid: nug: ra". Ngo wa nao: yang ngore pho" we" ga: yao mung: ngo mae" khonhae" re: maphaug' lo" nae" ru o: ra".

²⁰Ngadqere: nao wa- jhaug' mazaug: ra" myhi" zang we' dakhyo: nao ngore jhaug' mazaug: lo ngad: ra". Ngo ASANG ta" to: va".

²¹Bug gaung au: jham mae" thoe dathoe the' gyo: va". Aiwa Israel byumyu" qe qobo shad' ra" kao so' gyaung: khyo mae na mung: ASANG yao: bam: Mao"So re to" myhid' pye' ko" ruyang- ngug: yang: mho' yao: na ko" ra" thoe ngad: ra".

²²ASANG mae" lhang: phaug' lo" mo, naonhaung" alhab' dam: tug' lo ge, yao: wa naonhaung" re no gai byid: mung: jhaug' zaug nhao: li" nae". Naonhaung" wa- ngad va"- yao: wa ngonhaung" nho: Mao"So ngad: rumung:- ngonhaung" wa ASANG jhao" lo nae"- ga: ta" ako".

²³Ngonhaung" wa bug gaung au: jham mae ngonhaung" caung:pa" ra" ngonhaung" nho: taung bug caung:pa" khyo: yang pe" bao" ru maqo" yu- Israel qe: qhid' mae" bao" thaug' ru wa- ngonhaung" ASANG Mao"So mae" za: joe" li" ra".

²⁴Aqho' aqhid so Bala re caung:pa" ru wa- ngonhaung" re cad'- yao kyaung" jham we' nung: kyaung" jham- yauggai zo:- myiqe: zo: qe seim" gan: lo" nhao mung: ganhae" gaco' yo, mae" ngonhaung" nho: phug' phyid' qe mau" khao" yang qo" to" ru ja: khao: ngo" seim" pye' va".

²⁵Ngonhaung" wa qho' ru we' lang" jo, mung: nga: yeim: ru wa ngonhaung" re nghoe' pye' vashao:. Ngonhaung" we' ngonhaung" nho: phug' phyid' qe wa- ASANG ngonhaung" nho: Mao"So re khonhae" re qobo shad' lai: lo: bam va". Ngonhaung" wa- yao" amyin" dao: jham re khonhae" re: maphug' cao" genhaung- ga: ta" ako".