Read Maru YEREMIA 30 Bible Online

YEREMIA 30 - Maru bible

YEREMIA 30

¹Israel nho: Mao"So ASANG wa ngore-

²Ngo nao re ta" ra" gu: ja: khao: ngo" re mugsug' paug' mae tung" to: wa,-

³Pe"mung:ga"re nga" byumyu" Israel we' Yuda re dam: nyhang" byao nae" ayo, joe" lo: na: ra". Ngo wa yao: bam: phug' pho" qere byid' to" ra" mung"dan: khyo yao: bam re dam: jhui" tug' lo mung: yao: bam aire dam: qo" sang: yu: li" genae". ASANG ngo ta" to: va"- ga: ta" ra".

⁴ASANG wa Israel we' Yuda byu qere-

⁵Ngo wa ngaui pyo: yaug yo: ra" thoe re mangad:- gyaug: din: ra" thoe we' gyaug: ra" thoe re the' gyo: va".

⁶Ana" thang yang: myid: qu" ge,- yauggai dayaug wa zoshao qo" khau: i? Aire pe"mung: yauggai yaug khao: ngo" wa zo:khau: ra" myiqe: we' dakhyo: lo, re yao" vae: dug: dao mae kai" ci: rure ngo the' myao: i? Yaug khao: ngo" pe"mung: aiqhi" myo, khung: bo"bo" mung: ra" i?

⁷Gyaug din pho" ra" ba na wa joe" lo: na: ra" gatau: ba na we' aire maqo" gai: tau" ra" nga" byu qe: qhid' mae" kyi" khyag' ra" ayo, joe" lo: na: ra". Ngadqere: yao: bam wa na: dang: li" genae"- ga: ta" ra".

⁸Qam: bo: ra" ASANG wa- ai: ba joe" lo lao"- yao: bam: lang zang: mae vhin: to" ra" kyau: re khyug' pye' mung: yao: bam: jao co: jao jham re yu: pye' byid: nae". Amung: yao: bam wa taung bug byu qenho: jeim qe madoe, lo: genae".

⁹Ai: atha"- yao: bam wa yao: bam: Mao"So ASANG ngo rere:- amung: ngoyang kho:kham khyo" kho:kham tao" mae zaung nhao ra" Davi nho: myid:zo: dayaug rere: caung da" byid' li" genae".

¹⁰Nga" byu qe we"- dagyaug ge,- Israel byu qe we"- dagyaug: din ge,- ngo wa- naonhaung" re ai: va" ra" mung"dan: mae"- naonhaung" kyam: byu doe; na ko" ra" mung"dan: mae"- naonhaung" re khyad' yu nae". Naonhaung" yham khyo tug' lo mung: ngaui pyo: yaug yo za: qo" na: li" genae". Naonhaung" gug: gam qo" yu mung: khag' dayaug re: naonhaung" re gyaug nhao nae" mangad:-

¹¹Ngo naonhaung" jhao" li" mung: khyad' yu nae". Ngo yaug naonhaung" re nha: sin" to" ra" jo, qo mae" byumyu" qe alhab' re phyo' qheim" pye' nae". Ngadqere: naonhaung" re wa ngo maphyo' qheim" pye' nae". Ngo naonhaung" re qobo dae mabyid: lo:- manhao: ke' nae"- ngadqere: ngo wa nyang nyang za: kad' nae". ASANG ngo ta" to: va"- ga: ta" ra".

¹²ASANG wa yao" byu qere- naonhaung" dae khu jham wa magai: ya ngad: ra". Naonhaung" dae khu jham wa magai: gai byid: ngad: ra".

¹³Naonhaung" re gun caung byid: nae" byu khag' mana- naonhaung" dae jad: re khag' mapho byid:- gai byid: nae" naonhaung" qhid' mae" myid: lao" khyo majo,-

¹⁴Naonhaung" nho: zoqae: qe wa naonhaung" re to" myhid' pye' avako". Yao: bam naonhaung" re pe" masun: lo: ko" ngad: ra". Ngo wa naonhaung" re gyevo qere we' dakhyo: khe' zin: va". Naonhaung" nho: qobo jham saung" myo" ru we' naonhaung" makhyang" ru wa saung" xo yang: naonhaung" qobo dae wa gyai thin: ra".

¹⁵Naonhaung" nho: dae we' sin: yang:- danyhung lo: ge,- naonhaung" qhid' mae: ya: gai nae" khyo majo,- naonhaung" qobo jham wa saung" laug: ru we' naonhaung" makhyang" ru wa saung" xo: ruyang ngo ceru: naonhaung" re qobo dae byid' ru ngad:-

¹⁶Ngadqere: ana"- naonhaung" re bin: zo: mo, wa bin: zo" ru qhug' li" genae". Naonhaung" nho: gyevo qe wa kyam: byu qekhyo" taung" yu: pye' ru qhug' li" genae". Naonhaung" re zag zo: mo, alhab' wa zag zo" ru qhug' li" genae". Naonhaung" re lhad zo: mo, alhab' wa lhad' zo" ru qhug' li" genae".

¹⁷Ngo wa naonhaung" re nyang" za: dam: kad' nae". Naonhaung" gyevo qe wa Ziun wa taung bug ngad: ava". Yao: re khag' pe" masun: lo:- ga: ta" gesho' ngadqere: ngo wa naonhaung" dae khu re ngo gai byid: nae". ASANG ngo ta" to: va"- ga: ta" ra".

¹⁸ASANG ta" ru wa- nga" byu qere yao: bam: mug: myid re dam: byid: nae". Yham khaung khao: ngo" re nhag' khyag' byid: nae". Yerusalem wa dam: zao: to' ru qhug' mung: ainho: kho:kham kho" wa dam: nyhang" kad' ru qhug' nae".

¹⁹Aimae na: ra" mo, wa Nghaui"caung: khin" li" genae". Yao: bam bau: yang: hug' li" genae". Nga" shaman" jeju mathao mae yao: bam je" myo" li" genae". Nga" shaman" jeju wa yao: bam re nga: yhe' byid' li" nae".

²⁰Ngo wa byumyu" nho: ganhae" mae" qam: so' dam: byid: mung: aire tang sho' dam: kad' nae". Yao: bam re zag zo: mo, alhab' re ngo qobo dae byid: nae".

²¹Yao: bam: zug: wa yao bam yao" byumyu" mae" thug' li" nae". Yao: bam: kho:kham nau" wa yao: bam yao" byumyu" mae" thug' li" li" nae". Yao: re ngo khai lao"- yao: wa ngojhao" te' lo: li" nae". Makhai: ru khag' vae" li" ra" i? Yao: bam wa nga" byu qe ngad: li" genae". Amung: ngo wa yao: bam: Mao"So ngad: li" nae". ASANG ngo ta" to: va"- ga: ta" ra".

²³ASANG: nhag' yo" ru wa la qam" ngad: ra". Aiwa- makhyang: mo; au: dao mae hug' lai: lo" nae" ra" thin: ra" la ngad: ra". Aiwa yao: kad' nae" yaung: to" gu: alhab' mabin: kad' kad' wa mathao" nae". Joe" lo nae" ayo, mae byu qe wa ceru re sho' sho' za: ba: gyo" li" genae".