Read Maru YEREMIA 32 Bible Online

YEREMIA 32 - Maru bible

YEREMIA 32

¹ASANG wa Zedekia Yuda kho:kham kad' ru daxe zin ein: zin Babelon kho:kham Nebugkhaneza kho:kham kad' ru daxe: she' zin ein: zin mae ngore dao: jhau: ra".

²Ai: ayo, mae Babelon kho:kham nho: gyetab wa Yerusalem re gye zin" na mung: ngo wa kho:kham vang" mae pyid' lhaung" to" ru qhug' ra".

³Kho:kham Zedekia wa ngore ai: jo, qo mae thaung: lhaung" to: mung: ASANG ta" to" ra" dao: re ta" hau byid' ra" qobo mathao mae ngore ta" zhaug' to" ra". ASANG wa ngore- ngo wa ce: vogaung: re Babelon kho:kham re sang: yu pye' nhao yang:-

⁴Kho:kham Zedekia wa maloe, nae". Yao: wa Babelon kho:kham lo, khyo ab byid' pye' ru qhug' li" nae". Yao: wa aimae kho:kham Nebugkhaneza we' myo,khung: te' jho" myao mung: yao: we' qo" jho" jhau: li" nae".

⁵Zedekia wa Babelon khyo jhui" lo" ru qhug' li" nae". Yao: wa aimae ngo we' zam" khug ra" ayo, joe" sho' na: dang: jo; li" nae". Yao: wa Babelon byu qere gyekhe' sho' ngadqere: yao: ma aung nae". ASANG ngo ta" to: va".

⁶ASANG wa ngore-

⁷Nga" phomo" Shalum nho: yauggai zo: Haname wa Benyamin mug: myid mae" Anathod mae jo; ra" yao" yothaung: re vai: yu wa,- ga: ta" nae" qhid' mae" ngojhao" li" li" nae". Pe"mung:ga"re ngo wa yao" ba nam sang: cao: ngad mung: aire vai: yu nae" akho: akhang" qo" yaug ngad: ra" ga: ta" ra".

⁸Ai: thao ASANG ta" to" ru we' dakhyo: Haname wa ai: vang" khyo ngojhao" joe" li" mung: yothaung: re vai yu byid: nae" li" mho' ra". Aimung: ASANG ngore dang za: dao: jhau: rure ngo ba: yu: ra".

⁹Haname mae" yothaung: re vai: yu mung: yao: re ngaui lag byid: va". Aphug' ngaui daxe: nhad' kye' ngad: ra".

¹⁰Ngo wa aso: tung" mung: ai: mau" re dazid thaung: mung: sagse kad' to: yang: jao mae ngaui lag byid: va".

¹¹Ai: thao ngo wa dazid de; ra" myid vang" mugsug' we' ai: akhyo jham- adao mae" khye' bobo mung: ai: vai: ra" mau" myid vang" mugsug' khye' jham re yu: yu yang:-

¹²Aijham re Maseia nho: yao: myid:- Neria nho: yauggai zo: Barug re byid: va". Ngo wa yao: re aijham re Haname nho: qhid' kheim:- ai: vai: ra" myid vang" mugsug' mae axam: bokad' ko" ra" sagse qe alhab' mo; we'- vang" khug mae zaung: jo,ko" ra" byu qe: qhid' kheim: mae byid: va".

¹³Ngo wa yao: bam: qhid' kheim: mae Barug re-

¹⁴Israel nho: Mao"So- qam: bo: ra" ASANG wa ce: myid vang" mugsug' we' dazid thaung" to" ra" vai: ra" myid vang" mugsug' dazid mathaung" ra" mugsug' re yu mung: zin na myhao" sho' kham nae" qhid' mae" zhogang" yae: mae aijham re ke' to: wa,.

¹⁵Israel nho: Mao"So- Qam: bo: ra" ASANG wa yham jham- yothaung: jham- sabyi khyae jham wa ce: mung"dan: mae dam: vai: li" genae"- ga: ta" to" ra" ga: yao: re amyin" byid' ra".

¹⁶Ngo wa vai: ra" mau" myid vang" mugsug' re Barug re bin: byid: thao-

¹⁷Kho:kham ASANG we"- ni" nho: qi" qhang: ra" kheim: so' we' qam" yang mug:gaung we' myid gaung re phan" to" ra". Ni" qhid' mae" pe" ja: re: gyai qug' ru majo, ngad: ra".

¹⁸Nao wa byu ataung taung re mabaui mabyo; ra" jhid'de; myid qhu" byid' ava". Ngadqere: nao wa byu qere yao: bam: myhi" pho" qe: qobo qhid' mae" qobo dae rere: byid' ra". Nao wa qi" qhang: ru we' qam: so' bo: ra" Mao"So ngad: ra". Nao wa qam: bo: ra" ASANG ngad: ra".

¹⁹Nao wa pha,jhi" bo: ra" myid yaung khyo jham re kad' mung: qam: bo: ra" mau" jham re kad' ra". Nao wa byu jham kad' ru ja: khao: ngo" re myao mung: nao wa yao: bam: lo,mau" jham re cao" yang: yao: bam re aphug' jhaung qhu" byid' ra".

²⁰Ganhae" nao wa Egutu mung" mae mug' pho: ve, lho jham we' mug' pho: mau" zo" jham kad' lo: ra". Aijham re ana" ba joe" sho' xo' yang: Israel byu qe we' gatau: byumyu" qe: phaung mae nao kad' qhu" lo: ra". Airumung: nao re khyi" khao: ngo" mae" mo, ba: avako".

²¹Mug' pho: ve, lho jham we' mug' pho: mau" zo" jham: mathao mae ngonhaung" gyevo qe din: gyaug: avako". Ni" byumyu" re Egutu mung" mae" jhui" thug' lo nae" qhid' mae" ni" kheim: so' we' qam: rere: nao ci: ava".

²²Yao: bam: phug' pho" qere nao dao:so: byid' to" ru we' dakhyo:- nao wa yao: bam re ce: jo,nho" we' myid xau gai: ra" mung"dan: re byid' to" ra".

²³Ngadqere: yao: bam ce: mung"dan: khyo joe" lo mung: aire losang: pye' ko" au:- ni" amyin" jham re yao: bam mho dao: magyo:- ni" mho" shid' khyo re cao" yang: kao so' madaui ngad: ako". Nao: yang yao: bam re kad' nae" amyin" byid' to" ra" khyo re yao: bam pe" makad' ngad: ako". Airumung: ce: phyo' qheim" ru alhab' yao: bam: dao mae nao boe" nhao: ava".

²⁴Babelon byu qe wa vogaung: re qo" sang: yu nae" qhid' mae" vogaung: re lhang" gam: myid bam" jham zao: ako". Amung: yao: bam gyekhe' ako". Gye poe vae: moe' kyaug' ru- no boe" ru wa vogaung: re yao: bam: lo, khyo gyo" lo" nhao: li" nae". Nao ta" to" ru alhab' jab byang" va" rure nao qo" myao: ra".

²⁵Ngadqere: ASANG kho:kham we"- vogaung: wa Babelon byu qeyang sang: yu: pye' nae" jhao" sho' ngad sho' ngadqere: sagse: qe: qhid' kheim: mae yothaung: re vai: yu nae" amyin" byid: yaug wa nao ngad: ra" ein: akyu" mho' ra".

²⁶Ailao" ASANG wa ngore-

²⁷Ngo wa xao su byu alhab' nho: Mao"So- ASANG ngad:- nga" qhid' mae" gyai qug' ru pe" majo,-

²⁸Ce: vogaung: re Babelon kho:kham Nebugkhaneza we' yao" gyetab: lo, khyo byid' pye' naeva". Yao: bam aire sang: yu: pye' mung: myi" yang ngha" pye' li" genae".

²⁹Yao: bam wa aire- yham khaung dao mae Bala re sheim nae pyo: ja: phad' ngaui" byid' ra" khyo" yang re:- gatau: so jham re sabyi qang: ngaui" xeim: vhe' sheim: byid' ra" khyo" yang re: byu qeyang ngore nhag' jam: yo: nhao ko" ra" yham jham we' daga" ngha" khyo" pye' li" genae".

³⁰Yao: bam: mhomyi: qhid: ra" ayo, mae" Israel byu qe we' Yuda byu qe wa ngore mangaui nhao nae" kad' mung: yao: bam: kad' ra" lo,mau" yang ngore nhag' jam: yo: nhao: ako".

³¹Ce: vogaung: byu qe wa ngore nhag' yo: nhao mung: airu re kad' ra" ba na mae" nhag' jam: yo: nhao: ako". Ngo wa aire phyo' qheim" pye' nae" myid: phyid' to: va".

³²Pe"mung:ga"re Israel we' Yuda byu qe- yao: bam: kho:kham we' au: jhaung qe yao: bam: khinjaung qe- lapa qeyang kad' lo ko" ra" makhyang" ra" mau" mathao mae ngad: ra".

³³Yao: bam wa ngore nhaung thao" phaug' pye' avako". Ngo yao: bam re xo' yang: mho" shid' ngadqere: yao: manug: tae" gyo:- manug: zhao: yu ngad: ako".

³⁴Ngo re caung:pa" nae" qhid' mae" kad' ra" Caung:pa" Yham mae yao: bam maca' majhad' mung: ra" so alho jham re lhao" re: yao: bam to" to: mung: aire masan masin" kad' pye' ako".

³⁵Yao: bam: yauggai- myiqe: zo: qere- Moleg so re ngaui" byid: nae" qhid' mae"- Hinnom lao: khaung: mae Bala re yao: bam phan kad' byid' ako". Ceru: kad' nae" yao: bam re ngo amyin" mabyid' to:- yao: bam airu" ra" lo,mau" re kad' nug genae" rure we' Yuda byu qere bobo kad' nhao genae" rure nga" myid mae" lhao" re: mabo: qu" ngad: ra".

³⁶Israel nho: Mao"So ASANG wa ngore- Yeremia we"- gye poe- vae: moe' kyaug' ru no boe" ru wa ce: vogaung: re Babelon kho:kham nho: lo, khyo gyo" vao lo" nhao: li" nae". Ana" ngo ta" nae" gatau re tae" gyo: wa,-

³⁷Ngo nhag' yo: yang: yao: bam re ngo nha: sin" to" ra" mung"dan: alhab' mae" byu qere ngo zhang: yu nae". Yao: bam re ngo ce: jo, qo khyo dam: jhui" tug' yu yang: cemae gug: gug: za: yao: bam re na nhao nae".

³⁸Ailao" yao: bam wa nga" byumyu" boe" mung: ngo wa yao: bam: Mao"So ngad: li" nae".

³⁹Ngo wa yao: bam re myid: yaung: ru daja: za: byid: nae". Aiwa ayo, byang" yao: bam: akyu" qhid' mae" we' yao: bam: myid:zo: qe: qhid' mae" ngore nga: yhe' byid: nae" ru ngad: ra".

⁴⁰Ngo wa yao: bam we' apyad ato dao: thang" kad' nae" yao: bam: qhid' mae" gai kad' rure ngo mathang: pye' nae". Yao: bam ngo mae" maphaug' lo" nae" qhid' mae" yao: bam: nhag' lam: alhab' yang ngore gyaug phug' ra" myid yao: bam re ke' byid: nae".

⁴¹Yao: bam: qhid' mae" gai kad' rumae ngo pyo: nae". Ce: mung"dan: mae ngo yao: bam re malab malaui: lo: zao: to' byid : nae".

⁴²Ce: byumyu" qe: dao mae ce: kyi" khyag' qug: khai: ru ngo boe" nhao va" ru we' dakhyo:- ngo dao:so: byid' to: va"- gai: ra" ja: alhab' yao: bam re ngo byid: nae".

⁴³Ce: mung"dan: wa- byu re:- gug'nyhug' re: mana: ra" din"pyad' yo we' dakhyo: boe" mung:- Babelon byu qere byid' pye' ru qhug' li" nae"- ga: byu qe ta" na: ako". Ngadqere: yothaung: jham re wa ce: mung"dan: mae" dam: vai: li" genae".

⁴⁴Byu qe wa aijham re vai: li" genae". Myid vang" mugsug' wa aso: tung"- dazid thaung:- sagse: to: mung: kad' li" genae". Ceru wa Benyamin mug: myid mae- Yerusalem lhang" gam: vogaung: jham mae- bam mug: mae" vogaung: jham mae- bam khyid jham mae" vogaung: jham mae- Yuda mung" mug: thao shad' mae boe" li" nae". Amyu" byu qere yao: bam: mung"dan: ngo dam: nyhang" byid: nae"- ngo ASANG ta" to: va".