Read Maru YEREMIA 33 Bible Online

YEREMIA 33 - Maru bible

YEREMIA 33

¹Vang" khug mae ngo thaung: laung" na shi" au: ASANG: mungdao: wa ngojhao" dam: joe" li" ra".

²Myid gaung re phan" to" ra" ASANG aire akhyao kad' mung: yao" jo, qo mae to" to: yaug wa ngore dao: jhau: ra". Yao" mang ASANG ga: yaug wa- ngore ta" ra".

³Ngo re yao la,- nao re ngo tau: byid: nae". Nao pe" maba: ra" mug' pho: we' mug' mau" zo" we' sin" ra" khyo ngo ta" kyo: nae".

⁴Israel nho: Mao"So- ASANG ngo wa vang" ci: ru we' gyekhe' ra" athao khyo"- Yerusalem yham jham we' Yuda kho:kham kho" phyo' khyo" pye' ru qhug' li" nae".

⁵Byu daqhae: wa Babelon byu qere gye kad' yang khe' zin" li" genae". Aibam wa yham jham mae ngo nhag' jam: kyid kyid yo: yang: ngoyang se' khyo" pye' nae" ngad: ra" mo; mao gaung we' byang" sho' kad' li" genae". Amyu" byu qe kad' ko" ra" makhyang" ra" mau" zo" jham: mathao mae ce: vogaung: mae" ngo phaug' lo" byaug va".

⁶Ngadqere: ce: vogaung: re we' ainho: vobyu qere gai byid: mung: yao: bam re dam: qao" zin" nhao nae". Ngo wa yao: bam re magan: mago" ra" ngaui pyo: yaug yo: ru we' gug: gam: ru qhu" byid: nae".

⁷Ngo wa Yuda we' Israel re na: dai nhao nae". Yao: bam qhid' phyao: ngad: lo ko" ru we' dakhyo: ngo yao: bam re dam: te: byid: nae".

⁸Yao: bam ngore gye kad' yang: yao: bam shad' lhoe" vako" ra" qobo jham mae" yao: bam re ngo kyang" san: pye' byid: nae". Yao: bam: qobo jham re we' yao: bam: geim lau to" tau: lhan" ra" khyo re ngo qobo khyad' pye' byid: nae".

⁹Yerusalem wa ngaui bau" ru- nga: yhe' ru- nga" mathao mae phug: ru: nho: ajhaung boe" li" nae". Mug: myid dao mae na ko" ra" byumyu" khao: ngo" wa Yerusalem byu qe: qhid' mae" ngo kad' byid' ra" gai: ra" lo,mau" jham we' ngoyang vogaung: re na: dai nhao: ra" khyo jham we' sin: yang: yao: bam the' gyo: gelao"- gyaug yang: ko,ko, nin" li" genae"- ga: ta" ra".

¹⁰ASANG wa ce: jo, qo wa byu re: gug'nyhug' jham re: mana: ra" din"pyad' yo we' dau: ra" ga: ta" na: ako". Amung: yao: bam ta" ru jo: ra". Yuda mung" mae" vogaung: jham we' Yerusalem hau" mo" khyodang jham wa akeim ngad: ra". Byu re: gug nyhug' jham re: aimae mana ngad: ako". Ngadqere: ce: jo, qo jham mae wa-

¹¹Ngaui: bau: yang: hug' ra" thoe- lo,xo' poe mae" pyo" ra" thoe jham naonhaung" dam: the' gyo" li" genae". Amyu" byu qe nga" Caung:pa" Yham khyo jeju so: ngaui" xeim: cili" na ko" au: yao: bam nghaui"caung: ko" rure naonhaung" the' gyo" li" genae". Yao: wa gai shab: yaug ngad mung:- yao" jhid' nhag' wa apyad ato mae ngad: jo; ruyang- qam: bo: thao" ra" ASANG re jeju caung:khin" ge,- ga: ta" li" genae". Yao" jhid'de; myid wa apyad ato ngad: ra". Ngo wa ce: mung"dan: re qhid' phyao: na: dai: ru qhi" na: dai sho' kad' nae". ASANG ngo ta" to: va"- ga: ta" ra".

¹²Qam: bo: ra" ASANG wa din"pyad' yo we' dakhyo: ngad mung: byu re:- gug'nyhug' jham re: mana: ra" ce: mung"dan: mae yao lhaug' mo, yao: bam: yao jham re gai: jhui" ye" ra" mhin: gyo, jao: dalhang dam: boe" li" nae".

¹³Bug gaung mae" vogaung: jham mae- bug gaung khyid jham mae- Yuda mug: thao shad' mae- Benyamin mug: myid mae Yerusalem avai: ayae vogaung: jham mae Yuda vogaung: jham mae yao lhaug' mo, wa yao: bam: yao jham re dalhang dam: nghe' li" genae". ASANG ngo ta" to: va"- ga: ta" ra".

¹⁴ASANG wa Israel we' Yuda byu qere ngo byid' to" ra" dao:so: jham re ngo zaui" pyang" byid: nae" ra" ayo, joe" lo: na: ra".

¹⁵Ai: ayo, mae din:man" ra" Davi myid:zo: dayaug re kho:kham khyo" ngo khyin: yu nae". Ai: kho:kham pho" wa jo: ru we' tarha" din: nyang: ra" mau" re mung"dan: jao: sho' mae kad' li" nae".

¹⁶Yuda byu qe we' Yerusalem byu qe wa khyad' yu: ru qhug' mung: gug: gam za: qhug' na: li" genae". Vogaung: re ngonhaung" khyad' yu ASANG ga: mhang" li" genae".

¹⁷Davi myid:zo: dayaug wa khonhae" re: Israel nho: kho:kham kad' li" nae".

¹⁸Amung: ngore caung da" byid: nae" qhid' mae" we' phad' ngaui" xeim: jham- cin man" ngaui" xeim: jham- ngaui" xeim: jham re ngaui" byid: nae" qhid' mae" Levi kaung mae" khinjaung qe khonhae" re: na: li" nae" ein: rure ASANG ngo dao:so: byid' to: va"- ga: ta" ra".

¹⁹ASANG wa ngo wa-

²⁰Khonhae" re: dau ang: ra" ayo, mae joe" li" genae" qhid' mae" ngo wa myi" we' na" we' dao: thang" kad' to: va". Ai: dao: thang" wa khonhae" re: magai: byo; qeim: lo" ngad: ra".

²¹Ai we' dakhyo: yao: ngo wa khonhae" re: myid:zo: dayaug kho:kham boe" nae" ein: ra" khyo re nga" daui daui yaug Davi we' dao: thang" kad' to: va". Amung: yao: bam ngore khonhae" re: caung da" byid: genae" ein: rure Levi kaung mae" khinjaung qe we' ngo dao: thang" kad' to: va". Ai: dao: thang" jham wa khonhae" re: magai: byo; qeim nae".

²²Nga" nho: daui daui yaug Davi nho: myid:zo: qe we' Levi kaung mae" khinjaung qe wa myo" je" li" genae". Airulao" mug:gaung mae" kyi jham re we' panglai: qid yae mae" ma coe ce' re maqo" gai: nghe' lo sho' myo" ru we' dakhyo: myo" li" genae"- ga: ta" ra".

²³ASANG wa ngore-

²⁴Ngonhaung" khyin: to" ra" yham khaung shid' lam: ngad: ra" Yuda we' Israel re ngoyang ngag: ha: pye' va" ruyang byu qe khoru: ta" na: ko" rure nao qu" xam: va" i? Airumung: yao: bam wa nga" byumyu" dao mae qu" jung" qu" phoe: ako". Yao: bam re byumyu" damyu" ngad: ga: majho lo:ngad: ako".

²⁵Ngadqere: ASANG ngo wa- myi" we' na" we' dao: thang" qo" to: mung: myid gaung we' mug:gaung re khang" ra" tarha" jham re ngo kad' to: va".

²⁶Ngo ceru: dang za: kad' va" ru we' dakhyo:- Yaku nho: myid:zo: qe we' nga" daui daui yaug Davi we' kad' to" ra" nga" dao: thang" re ngo zaui" ci nae". Abraham- Isag- Yaku bam: myid:zo: qere eib nae" Davi nho: myid:zo: qemae" dayaug re ngo khyin: yu nae". Nga" byu qere ngo nhag' khyag' shogu mung: yao: bam re dam: na: dai nhao nae"- ga: ta" ra".