Read Maru YEREMIA 34 Bible Online

YEREMIA 34 - Maru bible

YEREMIA 34

¹Kho:kham Nebugkhaneza we' yao" gyetab- yao" qao: mae na: ra" mung"dan: jham alhab' we' byumyu" qeyang bao" thaug' byid' ra" gyetab jham wa Yerusalem we' avai ayae mae" vogaung: jham re gyekhe' na: au: ASANG wa ngore dao: jhau: ra".

²Israel nho: Mao"So- ASANG wa Yuda kho:kham Zedekia jhao" ye: mung:- ASANG ngo wa ce: vogaung: re Babelon kho:kham lo, khug khyo ab byid' pye' nae". Yao: wa ai: vogaung: re ngha" khyo" pye' li" nae".

³Nao maphao: loe, nae"- nao wa taung" yu qhug' mung: yao" lo, khyo ab byid' pye' ru qhug' li" nae". Nao wa yao: re myo, khung: zam" zhaung: yang: the' myao: mung: gaung yao: jho" qhug' yang: dao: qo" jhau: li" nae". Ai: thao re nao wa Babelon khyo ye" lo" li" nae".

⁴Zedekia we"- ni" khyo we' sin: yang: ngo ta" rure tae" gyo: wa,- nao wa gyekhe' poe mae se' pye' qhug' nae" mangad:-

⁵Nao wa yaug yo za: shid: lo" li" nae". Ni" nho: phug' pho" qe ngad ko" ra" ni" qhid' au: mae" kho:kham qere yao: bam nyhab' pye' ko" au: byu qe wa sheim nae pyo: ja: phad' nhae" ko" ru we' dakhyo:- yao: bam wa ni" qhid' mae" re: sheim nae pyo: ja: pyad' ngaui" li" genae". Yao: bam wa ni" mathao mae kaug' mung: ngonhaung" kho:kham wa shid: byaug va"- ga: ta" li" genae". ASANG ngo ta" to: va" ein: yeta" kyo: wa,- ga: ngore ta" ra".

⁶Ai: thao Babelon kho:kham nho: gyetab wa- vomo" re gyekhe' na ko" au: Yerusalem mae na: ra" kho:kham Zedekia re ce: mungdao: re ngo ta" kyo: byid: va". Gyetab wa Lakhi- Yuda mung" mae" gyetab vogaung: jham mae" dalam: za: dang: ra" Azeka rere: khe' zin" ako".

⁸Kho:kham Zedekia we' Yerusalem vobyu qe wa khag' dayaug re: yao: yao" Israel mao:nhaung: re jeim khyo" makad' nae" qhid' mae" yao: bam: Hebre jeim pho"- jeim myhi" qere lhoe' ke' byid: nae" myid vang" khyo dalam: kad' ako".

¹⁰Amyu" byu qe we' yao: bam: au: jhaung qe alhab' wa yao: bam: jeim qere lhoe' ke' byid: nae" we' aibam re khonhae" re: jeim madam: kad' nae" myid ceim" vang" ako".

¹¹Ngadqere: yao: bam wa thao re yao: bam: myid re lhai" pye' mung: aibam re dam: jhui" yu yang: jeim dam: deim" zag: kad' ako".

¹²Ailao"- Israel nho: Mao"So- ASANG wa amyu" byuqere- ngo yao: bam re Egutu mung" mae" khyad' yu mung: jeim doe; na: rumae" yao: bam re lhoe' ke' byid' au: naonhaung" phug' pho" qe we' ngo dao: thang" kad' to: va". Ngo wa yao: bam re-

¹⁴Yao: bam re khyaug' zin caung da" byid: va" ra" Hebre jeim kho yaug re ngadqere: nhad' zin ein: zin mae wa yao: bam re lhoe' ke' byid: ca" ra" ein: ta" lo va". Ngadqere: naonhaung" phug' pho" qe wa ngore nyang" matae" gyo:- ngo ta" ra" dao: re matae" gyo" lo ngad: ako".

¹⁵Ana" shid' sam ba gyo: mae za: naonhaung" myid dam: lhai" pye' mung: ngore ngaui nhao: ako". Naonhaung" alhab' mo, wa ngore caung:pa" ra" jo, qo Caung:pa" Yham mae- nga" qhid' kheim: mae naonhaung" Israel mao:nhaung: qere lhoe' ke' byid: nae" myid vang" khyo kad' avako".

¹⁶Ngadqere: naonhaung" myid dam: lhai" pye' mung: ngore nga: mayhe' byid: ngad: ako". Naonhaung" alhab' mo, yao: bam kao bau: ru we' dakhyo: naonhaung" lhoe' ke' byid: vako" ra" jeim qere dam: jhui" yu: ako".

¹⁷Aimung: ana"- naonhaung" ngore mho dao: matae" gyo: ngad: ako" ein: ASANG ta" ra". Naonhaung" nho: Israel mao:nhaung: qe: loe; beim: khyo re naonhaung" mabyid: ngad: ako". Ailao" wa gai va"- ngo naonhaung" re loe; beim khyo byid: nae". Gyepoe- no boe" ru- vae: moe' kyaug' shid nae" rumae" loe; beim khyo byid: nae". Ngoyang naonhaung" re kad' ra" mau" wa mug: myid dao mae" byumyu" khao: ngo" re qu" ca' qu" gyaug nhao nae".

¹⁸Yuda Yerusalem mae" gyezug: qe wa kho:kham kho" mae" gye zug: qe- khinjaung qe au: jhaung qe alhab' daga" za: nung: jaung lo: dadau: re shid' dau je; to" ra" agyo: khyo" su" lai: lo" yang: ngo we' dao:so: kad' ako". Ngadqere: dao: thang" yao: bam khyug' lhoe" pye' mung: aire maphug' cao" ngad: ako". Airumung: ngo wa yao: nung: jaung lo: re kad' vako" ru we' dakhyo: ce: byumyu" re kad' nae".

²⁰Yao: bam re se' pye' nug ko" ra" yao: bam: gyevo: qe: lo, khyo ngo ab byid' pye' nae". Yao: bam: mao gaung jham re ngho' jham we' seyo: gug'nyhug' lhe: jham: yang zo" pye' li" genae".

²¹Yuda kho:kham Zedekia we' yao" gyezug: qere re: yao: bam re se' pye' nug ko" ra" mo; lo, khyo ngo ab byid' pye' nae". Nao re gyekhe' ru thang: pye' va" ra" Babelon gyetab khyo yao: bam re ngo ab: pye' nae".

²²Yao: bam re ngo amyin" byid: mung: yao: bam ce: vogaung: khyo dam: tug' lo: li" genae". Yao: bam aire khe' zin: mung: sang: yu yang: ngha" pye' li" genae". Ngo wa Yuda mung" mae" vogaung: jham re khag' mana: ra" din"pyad' yo we' dakhyo: kad' pye' nae". ASANG ngo ta" to: va" ein: ta" kyo: nae" ngore ta" ra".