Read Maru YEREMIA 35 Bible Online

YEREMIA 35 - Maru bible

YEREMIA 35

¹Yoshia nho: yauggai zo: Yehoiakim Yuda kho:kham kad' au: ASANG wa ngore-

²Rekhabid amyu" kaung mae bobo ko" ra" mo, jhao" ye: mung: dao: yejhau wa,- ai:thao yao: bam re Caung:pa" Yham mae jo, ra" qe, jham mae" daqe, khyo yao: bam re jhui" vao ye: mung: yao: bam re sabyi qang: dajhid' byid: wa,- ga: ta" ra".

³Airumung: ngo wa Rekhabid kaung alhab' (Habazinia nho: yauggai zo: ngad: ra" Yeremia nho: yauggai zo: gayaug) Yazani we' yao: mao: yao: nhaung: qe we' yauggai zo: qere jhui" yu mung:- yao: bam re Caung:pa" Yham khyo jhui" vao ye" ra".

⁴Ngo wa yao: bam re Igdalia nho: yauggai zo: lapa Hanan nho: mho"zo: qenho: qe, khyo jhui" vao ye"- ce: qe, wa Caung:pa" Yham mae" akhyag: ra" zug: dayaug ngad: ra" Shalum nho: yauggai zo: Maseia nho: qe, atho' mae" qe, ngad mung: zug: gaje qenho: qe, jham: nhae mae ngad: ra".

⁵Ailao" keim jham we' sabyi qang: byang" sho' bo: ra" keim jham we' khug' jham re Rekhab' byu qenho: qhid' kheim: mae to: byid: mung: yao: bam re sabyi qang: dajhid' shaug' ge,- ein: ta".

⁶Ngadqere: yao: bam wa ngonhaung" wa sabyi qang: mashaug'- ngonhaung" nho: phug' pho" Rekhab nho: yauggai zo: Yonadab wa ngonhaung" re:- ngonhaung" myid:zo: qere sabyi qang re magai: shaug' ga: ngonhaung" re ta" to: co' ra".

⁷Yham jham- yo jham rere: magai: kad'- sabyi khyae jham rere: magai: qho:- magai: vai- ga: ngonhaung" re ta" to: co' ra". Ce: mung" mae taung bug byu qe we' dakhyo: ngonhaung" qo" na: dang: jo,nae" qhid' mae" khonhae" re: zaung jham mae na nae" qhid' mae" yao: ngonhaung" re amyin" byid: co' ra".

⁸Yonadab yang ngonhaung" re byid' to: co' ra" mho" dao: alhab' re ngonhaung" phug' cao" lo va". Ngonhaung" yao: yao: re: khonhae" re: sabyi qang: mashaug'- ngonhaung" nho: yham sang myhi" qe- yauggai zo: qe- myiqe: zo: qere: mashaug'-

⁹Ngonhaung" wa dinkhu: qhid' mae" yham jham makad'- ngonhaung" wa zaung jham khug mae na:- ngonhaung" wa sabyi khyae- yothaung:- gaug zo re: masang. Ngonhaung" nho: phug' pho" Yonadab yang ngonhaung" re amyin" byid: co' gu: ja: khao: ngo" re ngonhaung" byang" sho' phug' cao" lo va".

¹¹Ngadqere: kho:kham Nebugkhaneza mung"dan: khug khyo jhin" vao li" au:- Babelon we' Suri gyezo: qe: lo, mae" loe, nae" qhid' mae" Yerusalem khyo lona nae" ngonhaung" myid: phyid' va". Ce: mathao mae Yerusalem mae ngonhaung" na: jo; ru ngad: ra"- ga: phaug' tau" ako".

¹²Ai: thao Israel nho: Mao"So qam: bo: ra" ASANG wa Yuda we' Yerusalem byu qejhao" ye: mung: pe"mung: naonhaung" nga" dao: re tae" gyo: nae" ha: pye' mung: nga" nho: mho" shid' dao: re maphug' cao" ko" i?

¹⁴Yonadab nho: myid:zo: qe wa yao" yang sabyi qang: mashaug' genae" qhid' mae" amyin" byid: co' rure phug' cao" mung: ana" ba joe" sho' yao: bam daja: re: mashaug' ngad: ako". Ngo wa naonhaung" re abang mabyid jhau: na ngadqere:- naonhaung" nga" mho dao: re magyo: ngad: ako".

¹⁵Nga" daui daui mo, lapa qe alhab' re naonhaung" jhao" xo' yang: nhao: ke' va". Yao: bam wa naonhaung" re naonhaung" makhyang" ra" mau" jham re to" pye' nae" we' jo: rure kad' genae" qhid' mae" naonhaung" re ta" avako". Ngo yang naonhaung" re we' naonhaung" myid:zo: qere byid' to" ra" mung"dan: re naonhaung" xo' yang qo" na genae" qhid' mae" gatau: so jham re macaung:pa" nae" we' macaung da" byid: genae" qhid' mae" naonhaung" re ta" peim: byid' avako". Ngadqere: naonhaung" nga" dao: re matae" gyo:- ngore nyang" za: matae" gyo: ngad: ako".

¹⁶Yonadab nho: myid:zo: qe wa yao: bam: phug' pho" yang yao: bam re byid' to: co' ra" amyin" re phug' cao" avako". Ngadqere: amyu" byu qe naonhaung" wa ngore maphug' cao" ngad: ako".

¹⁷Airumung: Israel nho: Mao"So qam: bo: ra" ASANG ngo wa Yuda we' Yerusalem byu qe: dao mae ngo dao:so: byid' to" ra" byo; qeim: ru alhab' boe" nhao nae". Naonhaung" re ngo dao: jhau: au: naonhaung" matae" gyo: ko" ruyang- ngo naonhaung" re khai: au: naonhaung" matau: ko" ruyang ceru re ngo kad' nae" ga: ta" ra" ein: yeta" kyo: wa,- ga: ta" ra".

¹⁸Ai: thao ngo wa Rekhabid kaung qere- naonhaung" wa naonhaung" phug' pho" Yonadab yang naonhaung" re amyin" byid' to" rure phug' cao" avako". Yao: mho" shid' to: co' ra" khyo alhab' re naonhaung" phug' cao" avako". Yao" yang naonhaung" re amyin" byid' to" gu: ja: khao: ngo" re phug' cao" avako".

¹⁹Rekhab nho: yauggai zo: Yonadab wa ngore caung da" byid: nae" myid:zo: yauggai zo: khonhae" re: qo" li" nae" ga: Israel nho: Mao"So qam: bo: ra" ASANG ngo dao:so: to" ra"- ga: Israel nho: Mao"So- qam: bo: ra" ASANG ta" to" rure ta" kyo: byid: va".