Read Maru YEREMIA 38 Bible Online

YEREMIA 38 - Maru bible

YEREMIA 38

¹ASANG wa- ce: vogaung: mae na: dang: jo; ra" mo, khag' ngadqere: gye poe mae- vae: moe' kyaug' shid: rumae- no boe" rumae shid: li" nae" ngadqere: thug' ye: mung: Babelon byu qere lo, yetau: pye' yaug khag' ngadqere: se' pye' ru maqhug' nae". Yao: wa nang" thao" yao" kao phao: loe; li" nae" ga: ASANG ta" ra". Matam nho: yauggai zo: Shephatia- Pashu nho: yauggai zo: Gadalia- Shelemia nho: yauggai zo: Yehukha- Makhia nho: yauggai zo: Pashu bam wa ngo ta" na: ra" ASANG: dao: re the' gyo" ako".

³Ngo wa yao: bam re vogaung: re Babelon gyetab khyo ab byid' pye' mung: yao: bam wa aire sang: yu: pye' li" genae" ga: ASANG ta" to" rure: ta" kyo: byid: va".

⁴Ailao" gyezug: qe wa kho:kham jhao" ye: mung: byu ceyaug re wa se' pye' ca" ra". Yao: ceru: ta" na: ruyang ce: vogaung: mae na: ra" gyezo: qe wa yao: bam: lhe: myid byaug: byaug ako". Amung: yao: wa vogaung: khug mae na: dang: jo, ko" mo, gatau yaug khao: ngo" re dakhyo: za: kad' na: ra". Yao: wa amyu" byu qere bao" thaug' byid: nae" qam: make' ngad: ra". Yao: bam re dae za: de, nhao nug: na: ra"- ga: ta" ako".

⁵Kho:kham Zedekia wa ailao" wa gai va"- yao: re naonhaung" o: khyo" kad' ge,- naonhaung" re ngo maqo" tam" pye' ga: phaug' tau" ra".

⁶Airumung: yao: bam ngore jhui" yu yang: kho:kham kho" vang" khug mae jo; ra" kho:kham nau" Malkhia nho: qid thaung: khug khyo taui" yang ngore taui" khyo" ke' ako". Ai: qid thaung: khug mae qid mabo ngad: ra". Tham: bab: za: bo mung: ai: mae ngo nab: lo" ra".

⁷Ngadqere: kho:kham kho" mae mau" zaui" ra" unug Ethiopia byu Ebedmeleg wa yao: bam ngore qid thaung: mae ke' to" ra" khyo re the' gyo" ra". Ai: ayo, mae kho:kham wa Benyamin kham: mae na: jo; ra".

⁸Aimung: Ebedmeleg wa ai: khyo ye: mung: kho:kham pho" re-

⁹ASANG kho:kham we"- ce: byu qe kad' ra" lo, mau" wa shad' ra". Yao: bam wa Yeremia re qid thaung: khug mae ke' to" ako". Vogaung: khug mae zo:ve madang lo" ruyang yao: aimae dang za: vae: moe' shid nae" ngad: ra"- ga: ta" ra".

¹⁰Ailao" kho:kham pho" wa byu sam yaug re yao: we' daga" jhui" ye: mung: ngo mashid shire qid thaung: khug mae" ngore she: phoe' yu nae" qhid' mae" Ebedmeleg re amyin" byid' ke' ra".

¹¹Ailao" ngo mashid shi" re qid thaung mae" ngore phoe' yu nae" qhid' mae" Ebedmeleg re byu sam yaug yao: we' daga" jhui" ye: nae" qhid' mae" amyin" byid' ra". Aimung: Ebedmeleg wa ai: byu sam yaug we' daga" kho:kham jhi khyo cao: ye: mung: mai jad: daqae: re ye yu: yu mung: aire taui" yang ngore khyo" byid' ra".

¹²Yao: wa ngore- taui" yang ngore masaui" cad' nae" qhid' mae" ai: mai jad: jham re nga" lo, jhe' khyaung" mae ke' nae" ta" ra".

¹³Ceru re ngo kad' mung:- yao: bam wa ngore qid thaung mae" she: thug' yu: ako". Ai: thao ngore vang" khug mae nha: to" ako".

¹⁴Kho:kham Zedekia wa Caung:pa" Yham kham: dung: sam: lam: ein: lam mae ngore yao: jhao" khai: yu nhao mung: nao re ngo dao: dakheim: myid: nae"- nao dang: rure ta" nae" rure ngo o: ra"- ga: ta" ra".

¹⁵Ailao" ngo wa- ngo nao re dang: ru ta" ngad: re nao ngore se' pye' li" nae". Ngo nao re pha,jhi" byid: qere: nao tae" gyo: nae" mangad: ein: ngo phaug' tau: va".

¹⁶Aimung: kho:kham Zedekia wa ngo wa nao re mase' pye' nae"- nao re se' pye' nug: ra" mo; lo, khyo re: ngo nao re ma ab byid: nae" ein: rure ngonhaung" re kao so' byid' ra" yaug- daui: na: ra" Mao"So: mang re lao: yang: ngo jham: tang" ra"- ga: sae za: ngore dao:so: byid' ra".

¹⁷Ailao" ngo wa Zedekia re- Babelon kho:kham nho: gyezug: qere nao lo, tau: pye' ngad: re- ni" kao so' beim nae". Ce: vogaung: wa ngha" pye' ru maqhug' nae". Nao we' ni" yham khaung byu qe alhab' kao so' beim genae".

¹⁸Ngadqere: nao lo, matau: pye' re wa ce: vogaung: re Babelon byu qere ab byid' pye' nae". Yao: bam aire ngha" khyo" pye' mung: yao: bam: lo, mae" nao maloe, nae" ga: Israel nho: Mao"So qam: bo: ra" ASANG ta" to" ra" ein: ta" kyo: va".

¹⁹Ngadqere: kho:kham pho" wa- Babelon byu qe shad' khyo phao: de; byaug vako" ra" ngonhaung" byu qere ngo gyaug: ra". Ngo wa yao: bam: lo, khyo ab: pye' ru qhug' mung: yhin" ru qhug' maba ga: tau" ra".

²⁰Ngo wa yao: re- nao wa yao: bam: lo, khyo ab byid' pye' ru maqhug' nae". ASANG: mungdao: re phug' cao" nae" ngo nao re mho' ra". Ailao" alhab' we' nao pe" maca" nae". Ni" kao so' beim nae".

²¹Ngadqere: nao lo, tau: pye' nae" rure ha: pye' yang: ngad: re wa pe" boe" nae" rure ASANG wa ngore qhu" lho mae qhu" byid' ava".

²²Ai mae- Yuda kho:kham kho" mae na: dang: jo, ko" ra" myiqe: alhab' re Babelon kho:kham nho: gyezug: qeyang jhui" thug' lo" na ko" rure ngo myao: ra". Yao: bam ye" lo" na ko" au:- yao: bam ta" ra" dao: re tae" gyo: ge,- yao: bam wa kho:kham pho" nho: gai: thao" ra" ba nam qe wa yao: re khyonghung: jhui" nghung" pye' mung: yao: bam wa yao: re aung: pye' avako". Amung: ana" wa yao" khyid tham: bab: bam mae nab jo; ava". Yao" ba nam qe wa yao: re shapye' to: co' avako"- ga: ta" ako".

²³Ailao" ngo wa ni" nho: myiqe: qe we' zoshao qe alhab' wa Babelon khyo jhui" lo" ru qhug' mung: nao yao: wa yao: bam mae" maqo" phao: loe, nae". Nao wa Babelon kho:kham: yang kyam: byu khyo" taung" jhui" lo" ru qhug' li" nae". Ce: vogaung: wa myid gaung khyo ngha" khyoe' khyo" pye' ru qhug' li" nae" ein: ta" laung: byid: va".

²⁴Zedekia wa- ceru: jho" jhau: ra" khyo re khag' rere: daba nhao wa,- ni" kao so' pe" gyaug maca" nae".

²⁵Ngo nao we' jho" jhau: rure gyezug: qe gyo: geyang: ngad: re- nga" shid' yaug pe" jho" ta" ra" khyo re yao: bam nao re li" myid' li" genae". Nao yao: bam re ja: khao: ngo" ta" kyo: byid' re yao: bam wa nao re mase' pye' nae"- ga: dao:so: byid' li" genae".

²⁶Shid nae" ngad: ra" ai: jo, qo khyo nao re Yonathan nho: yham khyo madam: nhao: ke' byid: nae" qhid' mae nao ngore mho' ra" khyo yao: bam re ta" kyo: byid: wa,- ga: phaug' tau" ra".

²⁷Ai: thao gyezug: qe alhab' ngojhao" joe" li" mung: dao: myid: myid' ako". Ngo wa yao: bam re kho:kham: yang ta" nae" ngore ta" to" ra" gu: re khyag' lham: ta" kyo" ra". Yao: bam gatau pe" re: maqo" kad' ngad: ako". Pe"mung:ga"re dao: jho" jhau: rure khag' re: mathe' gyo: yang: ngad: ra".

²⁸Yerusalem re aung: yu: pye' ra" ba na joe" sho' ngo wa kho:kham vang" khug mae lhaung" to" ru qhug' ra".