Read Maru YEREMIA 4 Bible Online

YEREMIA 4 - Maru bible

YEREMIA 4

¹ASANG wa- Israel byumyu" qe we"- naonhaung" lhang: lo: nug ko" ngad: re ngojhao" lhang: tug' phao: lo ge, naonhaung" wa- ngore jhaug' zaug mung: ngo nghang" ra" sulho jham re yu: pye' ko" ngad: re-

²Naonhaung" wa nga" nho: mang lao: yang: jham tang" ru jo genae". Ailao" byumyu" alhab' mo, wa yao: bam re shaman" byid: nae" qhid' mae" ngore ta" li" genae". Aimung: yao: bam wa ngore caung:khin" li" genae"- ga: ta" ra".

³ASANG wa- Yuda we' Yerusalem vobyu qere- to" lhae" to" ra" naonhaung" yothaung: jham re phaug' pye' ge,. Naonhaung" nho: qhovo: qhoshi: myug: jham re- zau: kyi yo agaung: mae daqho: ge,- Yuda we' Yerusalem mae" byu qe we"-

⁴Naonhaung" nho: ASANG ngo we' dao: thang" to" rure phug' cao" ge,- aimung: naonhaung" yao" gaung re ngojhao" qhaug' byid: ge,. Airu: makad' gelao"- naonhaung" kad' ra" makhyang: mashab: ra" mau" jham: mathao mae nga" nho: nhag' yo: wa myi: we' dakhyo: nga" lo" li" nae". Airu: nga" de; lo mung: aire khag' yang maqo" se' pye' genae"- ga: ta" ra".

⁵Damung" geim" mae labo" mad: ke' ge, thoe mo" yang jao jao za: hug' ge,. Yuda we' Yerusalem mae" byu qere gyetab vogaung: jham khyo tao" phao nae" qhid' mae" ta" kyo: ge,.

⁶Ziun ye: khyo re ceim" shid' ge, gug: gam qo" yu nae" qhid' mae" tao" phao ge, dayam" na ge,. ASANG wa kyi" khyag' ru we' mug: am: shad' khyo" byo; qeim: ru qi: sho' re jhui" lo: li" nae".

⁷Byumyu" qe: nho: phyo' qheim" yaug wa- vho' na jao: mae" thug' li" ra" khang khyi we' dakhyo: thug' lo va". Yao: wa Yuda re phyo' qheim" pye' li" nae". Yuda vomo" jham wa byo; qeim jo, ra" jo, qo shapye' to" ru qhug' li" genae". Amung: ai: vomo" jham mae khag' mana genae".

⁸Aimung: jid:mo" mai bau: ve, yang: ngug: myang: na ge,- pe"mung:ga"re ASANG: gyaug pho: nhag' yo: wa Yuda mae" malhang: tug' lo" byaug shi: ngad: ra".

⁹ASANG ta" ra"- ai: ba na mae kho:kham qe we' mung" eib zug: ade, qe wa ve" myid byaug: byaug mung: khinjaung qe din: mo, lo" ru we' lapa qe wa mug' hao" byaug: li" genae".

¹⁰Ailao" ngo ta" va"- kho:kham ASANG we"- nao wa Yerusalem mae" byu qere bin sho' yao: mhug' pyag' pye' ava". Nao wa yaug yo cae: tae" ru jo; li" nae"- ga: ta" ra". Ngadqere: shae pyang: dalam: wa yao: bam: khyaung: do; mae ajo; jo; ra".

¹¹Yerusalem mae" byu qere din"pyad' yo mae" la laung wa yao: bam jhao" hug' lo: na: ra"- ga: ta" shid: ra" ayo, joe" lo: li" nae". Airu wa vo,phaui: gaug seim re za: mad: hug' lhaui" pye' ra" la hug' yo yo mung: ru za: mangad: nae".

¹²ASANG: amyin" khyo" li" ra" la wa aitho' mago" myo" sho' je: thin: ru ngad nae". Aiwa- ASANG yao" byumyu" qe: dao mae dao: kho' ru ta" ra" ASANG yao: ngad: li" nae".

¹³Qu" ge,- gyevo wa jham thaui: jham we' dakhyo: lo: na: ra". Yao" nho: gye myao: lhin" jham wa la sham" we' dau: ako". Aimung: yao" myao: jham wa zeim baung: jham tho' qao: ako". Ngonhaung" wa jeim: va". Ngonhaung" wa byuxa: voqoe, qhug' va".

¹⁴Yerusalem we"- nao khyad' yu qhug' nae" qhid' mae" ni" nho: nhag' lam: khug mae makhyang: mashab: rure cid' pye' wa,- nao wa khomyhao" myao" sho' qobo mau" re xo' myid: na nae" i?

¹⁵Dan nho: vomo" mae" we' Ephrim nho: bam jham mae" lau dao: vin: ra" lagyo: qe wa magai: ra" lau dao: re ta" hau" ako".

¹⁶Yao: bam wa- byumyu" qe we' Yerusalem re va" ra" mung" damung" mae" gyevo qe li" na ko" ru ta" peim: nae" qhid' mae" li" lo: ako". Ce: gyevo qe wa- Yuda vomo" jham re li" hug' zag: li" genae".

¹⁷Aimung: yothaung: dalam: re lhaug' zaung" na: ra" byu jham we' dakhyo: Yerusalem re li" lhang" kham" lhaung" to: genae". Pe"mung:ga"re- yao" vobyu qe wa ASANG re tau: lhan" avako". ASANG ta" to: va".

¹⁸Yuda we"- nao wa nao yao: na: ra" ave, we' nao kad' ra" mau" jham khyo" yang ceru re nao yao" dao mae tau: vin: yu: ava". Ni" nho: qobo wa ce: dayin dayo: no: rure boe" nhao: ava". Airu wa nao re sang: kheim: mae thug' kyao" byid' ava".

¹⁹Dae no: ra" dae no re ngo matho' zang" kham- nga" sang: yao: we"- nga" sang: gaug wa gyai thaung" na: ra". Ngo wa sae za: maqo" tae" to: ngo wa labo" jham: thoe re the' gyo" ra". Mang: zin: jao: mae" hug' thoe rere: the' gyo" ra".

²⁰Kyi" khyag' ru daja: bin thao daja: cao" lo: ra". Damung" geim" wa byo; qeim jao: mae shapye' to" ru qhug' ava". Ngonhaung" nho: zaung jham wa nyag din taung" phyo' qheim" pye' ru qhug' ako". Aijham: nho: qe, kyo pin: lung: geim" geim" ajad amyho cad' pye' qhug' va".

²¹Gyai thin: ra" gyekhe' poe re khomyhao" myao" sho' ngo the' myao ca" mung:- labo" mad: myhang" rure the' gyo: ca" nae" laug i?

²²ASANG ta" ra"- nga" byumyu" qe wa nhag' magyang" ngad: ako". Yao: bam wa ngore maba ngad: ako". Yao: bam wa nhag' magyang" ra" zoshao jham we' dakhyo: ngad: ako". Yao: bam wa laba lajhao ba: gyo: myid mabo ngad: ako". Yao: bam wa makhyang: mashab: ru kad' nae" gyai jhao mo, ngad: ako". Ngadqere: yao: bam wa gai: rure kad' nae" lhaui" pye' mo, ngad: ako".

²³Ngo wa myid gaung khyo qu" ke'- ai wa cae: jhug tag myhaug' myhaug' mung: jo; ra"- mug:gaung khyo qu" ke' re ai wa myi: made, bo" bao majo,.

²⁴Ngo wa bam jham khyo qu" ke'- aijham wa laui" nan" na: ako". Aimung: bug gaung jham wa thao khyo qhid' khyo thug' jhu" na: ako".

²⁵Ngo wa byu mana: rure the' myao: ngho' jham lao" re dao" phao: byaug: avako".

²⁶Myid xau gai: ra" mug: myid wa din"pyad' yo boe" byaug va". Ai: nho: vomo" jham wa ASANG: gyaug pho: nhag' yo" ra" mathao mae byo; qeim: rumae jo; jo; ako".

²⁷(ASANG wa- mug: myid dagye, geim" cae: jhug tag mug: kyaug' boe" nae" ngadqere: yao: wa aire bin sho' maphyo' qheim" pye' nae"- ga: ta" to: va".)

²⁸Myid gaung wa kaug' ngug: li" nae"- mug:gaung wa cad' no; lo" nae" ASANG ta" to: va". Aimung: yao" myid matha" nae". Yao: wa myid: phyid' to" ava"- aimung: madam: tug lo: nae".

²⁹Myao: zaung mo; thoe we' lo, la: ci mo; thoe re the' gyo: lao" yaug khao: ngo" wa tao" phao: lo" li" genae". Damyo" wa seyo khyo tao" phao: lo" li" genae". Gaje: gu: wa laug bam jham: dao khyo do, lo" li" genae". Vogaung: khao: ngo" wa akeim to: co' ru qhug' genae". Aimung: khag' re: aijham mae madam: na lo: genae".

³⁰Yerusalem we"- nao wa byuxa: voqoe, qhug' ava". Nao wa nae nae mung: ra" mai bau: pe"mung: shaung ve; ci: i? Pe"mung: phug' de; laug sin" shaung: ve; ci mung: myo, re macid' xug' ci: i? Nao wa naoyao" gaung re pe" mangad' ru qhid' mae" yaung" sho' shaung: ci: ra". Ni" nho: zoqae: pho" jham wa nao re ngag: ha: pye' vako" ra". Aimung: yao: bam wa nao re se' pye' nug: ako".

³¹Ngo wa- zo:khau: na: ra" myiqe: dayaug gyi: ngug: rure the' gyo". Zoqhid' re khau: na: ra" myiqe: dayaug gyi: hug' ra" thoe ru" ru the' gyo". Aiwa so' khan dau" dau" shae: na: ra" Yerusalem nho: ngug: hug' thoe ngad: ra". Yao: wa yao" nho: lo, re yheim" ke' mung: ngo wa byuxa: voqoe, qhug' va". Yao: bam wa ngore se' pye' nae" ga: li" na: avako"- ga: ta" na: ru ngo the' gyo".