Read Maru YEREMIA 40 Bible Online

YEREMIA 40 - Maru bible

YEREMIA 40

¹Gyezug: pho" Nebuzaradan yang Rama jo, qo mae ngore lhoe' ke' byid: thao re ASANG wa ngore dao: jhau: ra". Ngo wa kyam: byu khyo" Babelon khyo jhui" lo" ru qhug' ra" Yerusalem we' Yuda mae" byu gaje qe we' daga" jao co" yang taui" she: lo" qhug' ra".

²Gyezug: pho" wa ngore gatau san jhui" yu yang: ni" nho: Mao"So ASANG wa ce: mung"dan: re byo; qeim: ruyang kyaug' nhin" mung: ana"-

³Yao: kad' nae" ga: ta" to" rure yao: kad' ava". Ni" byumyu" qe wa ASANG re qobo shad' lhoe" mung: yao: re mho dao: matae" gyo: geyang: cegu: alhab' boe" ru ngad: ra".

⁴Ana"- ngo wa ni" lo, mae" jao co: taui: re yu: pye' byid: nae". Amung: nao re pheim: ke' nae". Nao ngo we' daga" Babelon khyo cao" nug: re gai: cao" ra". Nao re ngo gun caung byid: nae". Ngadqere: nao manug: ye: re wa maye: yang: wa- mung"dan: geim" mae" nao gai: khyin: yu: ra". Nao nug: ra" khyo gai: ye" ra"- ga: ta" ra".

⁵Ngo dao: phyid mabyid: lao"- Nebuzaradan wa Babelon kho:kham: yang Yuda vogaung: jham: nho: mang: zug: kad' nhao: to" ra" Shaphan nho: yao: myid:- Ahikam nho: yauggai zo: Gedalia jhao" tug' lo" wa,- nao wa yao: we' daga" amyu" phaung gaung: mae na mung: nao: gai: ye" ein: jho: ra" jo, qo khyi" khao: ngo" khyo gai: ye" ra"- ga: ta" ra". Ai: thao yao: wa ngore jhaung qhu" we' vin nae" zo:ve daqhae: byid: mung: ngore nhao: ke' ra".

⁶Ngo wa Mizpa mae" Gedalia we' daga" ai mung"dan: mae na: dang: jo, ko" ra" amyu" byu qe: phaung mae daga" yena nae" ye" lo" va".

⁷Yuda mung" mae" gyezug: qe we' gyezo: qe damyo" wa lo, matau ko" ngad: ra". Babelon kho:kham wa Gedalia re mung"dan: nho: mang: zug: kad' nhao mung: Babelon khyo majhui" lo" ra" mung"dan: mae" myaung: thao" mo, alhab' nho: au: jhaung khyo" kad' nhao: ra" khyo re the' gyo" ako".

⁸Aimung: Nethania nho: yauggai zo: Ishmae- Karea nho: yauggai zo: Yohanan- Tanhumed nho: yauggai zo:- Seraia- Netopha mae" Ephai nho: yauggai zo: qe- Makha mae" Yezania bam wa- Mizpa khyo yao: bam: byu qe we' daga" Mizpa mae na: ra" Gedalia jhao" ye" ako".

⁹Gedalia wa yao: bam re- Babelon byu qere lo, tau nae" naonhaung" gyaug maca" ein: rure naonhaung" re ngo dao: byid' ra". Ce: mung"dan: mae te" na ge,- Babelon kho:kham re caung da" byid: ge,- naonhaung" alhab' gaigai za: ngad li" genae".

¹⁰Ngo yao: re Mizpa mae na mung: Babelon byu qe cekhyo joe" li" gelao"- naonhaung" gaung tha" boe" ge,. Ngadqere: naonhaung" wa sabyi shiqang:- zhanlun xau re zhang: yu yang: gai: qaung" to" ra". Amung: naonhaung" sang: to" ra" vogaung: jham mae na ge,- ga: ta" ra".

¹¹Ai: ayo, gyo: mae Moba- Amon- Edom we' gatau: mung"dan: mae na ko" ra" Israel byu alhab' wa Babelon kho:kham: yang: Israel byu qere Yuda mung" mae na nhao mung: Gedalia re yao: bam: mang: zug: kad' nhao: ra" khyo the' gyo" ako".

¹²Airumung: yao: bam wa yao: bam na: sin" qin" ra" jo, qo mae" to" lo" mung: Yuda mung" khyo dam: tug' lo: ako". Yao: bam Mizpa khyo Gedalia jhao" joe" li" mung: yao: bam aimae sabyi qang we' shi: myo: sho' zhang: bam: to" ako".

¹³Ceru thao- lo, matau: ra" gyezo: qenho: au: jhaung qe wa Mizpa khyo Gedalia jhao" joe" li" mung:-

¹⁴Yao: re Amon kho:kham Baali wa nao re se' pye' nae" Ishmae re nhao: ke' rure nao maba i? ga: ta" ako". Ngadqere: Gedalia wa aire malam" ngad: ra".

¹⁵Ailao" Yohanan wa yao: re sae za:- Ishmae re ngore yese' pye' nhao la,- khag' yang se' rure khag' re: maba genae". Pe"mung: nao re yao" yang se' pye' nhao nae" i? Airu wa ni" avai: ayae mae na: jo, ko" ra" Yuda byu alhab' re phao: sin" lo" nhao: li" nae". Amung: airu wa Yuda mung" mae na: dang: jo; ra" byu alhab' dao mae qug: khai: kyi" khyag' ru boe" nhao: li" nae"- ga: ta" ra".

¹⁶Ngadqere: Gedalia wa airu: dakad'- Ishmae we' sin: yang: nao ta" na: ru wa madang ngad: ra"- ga: tau" ra".