Read Maru YEREMIA 41 Bible Online

YEREMIA 41 - Maru bible

YEREMIA 41

¹Aizin lho" nhad' khye' ein: khye' mae Elishama nho: yao: myid:- Nethania nho: yauggai zo: kho:kham yham khaung mae bobo: ru we' kho:kham pho" nho: zug: mo" ngad: ra" Ishmae wa Gedalia re ye kam: nae" qhid' mae" Mizpa khyo byu daxe yaug we' daga" ye" lo" ra". Yao: bam zo daga" zo" na ko" au:-

²Ishmae- yao: we' daga" ye" ra" byu daxe yaug wa yao: bam: shae pyang: re she: yu yang: Gedalia re se' pye' ako".

³Ishmae wa Mizpa mae Gedalia we' daga" na: jo, ko" ra" Israel byu qe alhab' re we' aimae na: ra" Babelon gyezo: qe alhab' rere: se' pye' ra".

⁴Thao: ba- Gedalia re se' pye' ra" khyo re khag' maba shire-

⁵Shekhem- Shilo- Samari mae" byu she' xe yaug joe" li" ako". Yao: bam wa yao: bam: nhad' maui: re qaug: pye'- yao: bam: mai bau: re cad' pye'- dae khu zai" te' ci: ako". Yao: bam wa Caung:pa" Yham mae ngaui" byid: nae" cin man we' sheim nae pyo: ja: vin: ako".

⁶Aimung: Ishmae wa yao: bam re yetug: yu nae" qhid' mae" thug' ye" lo" ra". Yao: wa ngug: zo" ye" lo" ra". Yao: bam jhao" joe" ye: lao"- yao: wa jeju khyo" Gedalia re li" qu" geri:- ga: ta" ra".

⁷Yao: bam vogaung: khug khyo joe" we' Ishmae we' yao" byu qe wa yao: bam re se' pye' mung: yao: bam: mao gaung jham re qid thaung dalam: mae pye' zaui: pye' ako".

⁸Ngadqere: daxe yaug mung: daphung: wa Ishmae re jeju khyo" ngonhaung" re dase' la,. Ngonhaung" wa yo mae nyam" to" ra" jung: gaug- bale gaug- zhanlun xau jham qo" ga: ta" ako". Airumung: yao: wa ai bam re tang" to" ra".

⁹Yao: se' pye' ra" byu qenho: mao gaung jham re Ishmae pye' zaui: pye' ra" qid thaung: wa Israel kho:kham Basha yang yao: re gyekhe' zin" na: au: kho:kham Asa dau" ra" qid thaung: aqi: lam: ngad: ra" Ishmae wa qid thaung: re maogaung byang" sho' kad' pye' ra".

¹⁰Ai: thao yao: wa kho:kham nho: myiqe: zo: qere kyam: byu kad' pye' mung: gyezug: pho" Nebuzaradan yang Gedalia nho: gun caung byid' ra" qao: mae nha: to: co' qhug' ko" ra" Mizpa mae na ko" ra" byu alhab' re taung" yu: ra". Ishmae wa kyam: byu qere jhui: mung: Amon mug: myid khyo lo" ra" shad' khyo to" lo" ako".

¹¹Yohanan we' yao: we' daga" ngad: ra" gyezug: qe wa Ishmae shad' lhoe" ra" yug: mau" re the' gyo" ako".

¹²Airumung: yao: bam: byu qe we' daga" yao" thao khyo cao" khe' ako". Gibeon mae" qid tham: ai: nhae mae yao: re lo" myhi: ako".

¹³Ishmae nho: kyam: byu qe wa Yohanan we' yao: we' daga" ngad: ra" gyetab au: jhaung qere myao gelao"- yao: bam bau: mung: lhang lo: yang: yao: bam shad' khyo tao" ye" ako".

¹⁵Ngadqere: Ishmae we' yao" byu she' yaug we' Yohanan mae" phao: lo" mung: Amon mung" shad' khyo phao: loe; lo" byaug: ako".

¹⁶Ishmae yang Gedalia re se' pye' thao re- gyezo: qe- Mizpa mae" kyam: byu qekhyo" jhui" lo" qhug' ko" ra" gyezo: qe- myiqe:- zoshao qe we' u nug' qere- Yohanan we' yao: we' daga" ngad ko" ra" gyetab au: jhaung qe wa- ai bam re jhui" yu: ako".

¹⁷Babelon kho:kham: yang mung"dan: re mang: zug: kad' nhao: to" ra" Gedalia re Ishmae yang se' pye' ruyang yao: bam wa Babelon byu qere gyaug: ako". Airumung: yao: bam Babelon byuqe: lo, mae" loe, nae" qhid' mae" Egutu khyo to" lo" ako". Yao: bam khyole; mae Betlehem nhae mae" Khimham mae thang: ako".