Read Maru YEREMIA 42 Bible Online

YEREMIA 42 - Maru bible

YEREMIA 42

¹Ai: thao Karea nho: yauggai zo: Yohanan- Hoshaia nho: yauggai zo: Azaria bobo mung: gyetab au: jhaung alhab' we' azhao" khao: ngo" mae" byu qe wa joe" li" mung:-

²Aibam wa ngore- jeju khyo" ngonhaung" mho' rure kad' byid: la,- ngonhaung" nho: Mao"So ASANG re ngonhaung" qhid' mae" akyu" mho' byid: la,- na: dang: ra" mo, ngonhaung" alhab' qhid' mae" akyu" mho' byid: la,- ganhae"- ngonhaung" wa myo: sho' ngad: nao the' myao: ru we' dakhyo:- ana" wa ngonhaung" dajhid' za: adang lo"-

³Ngonhaung" ye: ang: ra" khyo we' kad' ang: ra" mau" re ngonhaung" Mao"So ASANG wa- ngonhaung" re qhu" byid: vashao: akyu" mho' byid: la,- ga: ta" ako".

⁴Ailao" ngo wa- gai va"- naonhaung" mho' ko" ru we' dakhyo: ngonhaung" Mao"So ASANG re ngo akyu" mho' nae". Yao: pe" ta" ta" ngo naonhaung" re dam: ta" kyo: nae". Daja: re: naonhaung" re ngo mazug' nae" ein: tau: va".

⁵Ailao" yao: bam wa ngonhaung" Mao"So ASANG: yang nao re ngonhaung" qhid' mae" byid' ra" amyin" dao: jham alhab' re ngonhaung" maphug' cao" ngad re wa- ASANG wa ngonhaung" shad' mae gye kad' yang: dangman" ru we' jhaug' zaug: ra" sagse boe" vashao:-

⁶Ngonhaung" re ngaui nhao: ru ngad: re ngad mangaui nhao ngad: re ngad- nao re akyu" mho' byid: la, ein: ngonhaung" mho' ra" yaug ngonhaung" Mao"So ASANG re ngonhaung" phug' cao" nae". Yao: re ngonhaung" mho dao: gyo: byid' re wa ngonhaung" alhab' gaigai za: ngad nae" ga: ngore ta" ako".

⁷Daxe ba thao re ASANG wa ngore dao: jhau: ra".

⁸Airumung: ngo wa Yohanan- yao: we' daga" ngad: ra" gyetab au: jhaung qe- mo,byu gaje qere khai: zhang" yu mung: yao: bam re-

⁹Ngo wa yao: bam re- naonhaung" yang ngore mho' nhao: ke' yaug- Israel nho: Mao"So ASANG wa ceru: ta" ra".

¹⁰Naonhaung" ce: mung"dan: mae xo' na nug geyang: ngad re- naonhaung" re ngo zao: to' byid: mung: naonhaung" re maphyo' khyo" pye' nae". Naonhaung" re ngo qho" yhaug' mung: maphan" pye' nae". Naonhaung" dao mae phyo' pye' ru ngo boe" nhao: ru wa ngore qi: sho' nhag' kaug' nhao: ra".

¹¹Babelon kho:kham re gyaug: ko" rure thang: pye' ge,- ngo wa naonhaung" we' daga" ngad mung: yao" kheim: so' lo, mae ngo khyad' yu nae". Pe"mung:ga"re ngo wa nhag' khyag' shogu yaug ngad:- ngo wa yao: re naonhaung" re nhag' khyag' sho' kad' mung: yham khyo tug' lo" nhao nae". ASANG ngo ta" to: va"- ga: ta" ra".

¹³Ngadqere: Yuda mung" mae na: dang: jo, ra" mo, naonhaung" Mao"So ASANG re mho dao: magyo: magai: kad' ce: mung"dan: mae na nae" re: magai: ha: pye' nae". Naonhaung" wa airu: magai: ta" ngad ako". Ngonhaung" Egutu khyo yena nae"- aimae ngonhaung" wa gye poe re: mathaung" qhug' nae"- gyekhe' poe khai thoe re: magyo: nae"- vae: moe; re: maqhug' nae". Naonhaung" ceru: ta" ko" re wa- Israel nho: Mao"So- qam: bo: ra" ASANG wa naonhaung" Egutu mung" khyo yena genae" myid: phyid' ko" re wa-

¹⁶Naonhaung" gyaug ko" ra" ai: gye poe wa- naonhaung" re khe' myhi" li" nae". Naonhaung" gyaug: ra" moe, shab' ru wa naonhaung" thao cao" li" mung:- naonhaung" ai: Egutu mung" mae shid: li" genae".

¹⁷Egutu mung" khyo yena nae" myid: phyid' mo, alhab' wa gye poe mae vae: moe' kyaug' ru- no boe" ru daja: ja" yang shid li" genae". Yao: bam mae" dayaug re: mana: dang genae". Yao: bam: dao mae ngo boe" nhao nae" ra" qug: khai: kyi" khyag' rumae" dayaug re: maqo" phao: loe, genae"- ga: ta" ra".

¹⁸Israel nho: Mao"So ASANG wa naonhaung" Egutu mung" khyo ye: yang: ngad: re nga" nhag' jam: yo" rure Yerusalem vobyu qe: dao mae vhe' sheim: byid' ru we' dakhyo:- nga" nhag' jam: yo" rure vhe' sheim: byid: nae". Naonhaung" wa qu" ca' qu" lhaung sho' ra" myao jao: boe" nae". Byu qe wa- naonhaung" re jung" mung: naonhaung" mang re nhang: kheim: khyo" ci: li" genae". Ce: jo, qo re khonhae" re: madam: myao: genae"- ga: ta" ra".

¹⁹Ailao" ngo wa xo' yang: Yuda mung" mae na: dang: ra" naonhaung" re Egutu mung" khyo maye: nae" qhid' mae" ASANG ta" to" ra". Airumung: ana" ngo naonhaung" re-

²⁰Shid man" ra" shad' ra" mau" re kad' na: ako" ein: ta" peim: byid' ra". Ngonhaung" Mao"So ASANG re naonhaung" qhid' mae" akyu" mho' byid: nae" qhid' mae" naonhaung" ngore mho' ako". Yao" nho: amyin" dao: jham ja: khao: ngo" re naonhaung" phug' cao" genae" ga: dao:so: byid' ako".

²¹Ana" naonhaung" re ngo ta" va". Ngadqere: ngonhaung" nho: Mao"So ASANG: yang ngo naonhaung" re ta" nhao: ke' ru ja: khao: ngo" re naonhaung" mho dao: matae" gyo: ngad: ako".

²²Airumung: ceru re myid: beim: ge,. Naonhaung" wa naonhaung" yena nug: ra" mung"dan: mae gye poe- vae: moe' ru- no boe" ru daja: ja" yang shid: li" genae"- ga: ta" ra".