Read Maru YEREMIA 44 Bible Online

YEREMIA 44 - Maru bible

YEREMIA 44

¹ASANG wa Egutu mung" mae" Migdo, Taphanhe- Memphi we' mung"dan: nho: mug: thao tam" mae na ko" ra" Israel byu qe alhab' we' sin: yang: ngore dao: jhau: ra".

²Israel nho: Mao"So- qam: bo: ra" ASANG wa- Yerusalem we' Yuda mung" mae" gatau: vogaung: alhab' dao mae ngoyang boe" nhao: ra" phyo' pye' rure naonhaung" yao: myao: lo gau ngad: ako". Ana" joe" sho' lhao" re: byo; qeim: jo,mung: khag' dayaug re: aijham mae mana lo:ngad: ako".

³Pe"mung:ga"re aijham: vobyu qe wa makhyang" ra" lo,mau" kad' ru we'- ngore nhag' yo: nhao: ako". Gatau: so jham re yao: bam ngaui" xeim: ngaui" byid: mung: yao: bam re:- nao re:- ni" phug' pho" qere: macaung:pa" qu" ra" so jham re caung da" byid' ako".

⁴Ngo nghang" ra" ce: gyaug din taung" ra" mau" re makad' nae" qhid' mae" naonhaung" re ta" kyo" ra". Nga" daui daui mo, lapa qere naonhaung" jhao" ngo xo' yang: nhao: ke' byid: va".

⁵Ngadqere: naonhaung" manug: gyo:- dajhid' re: matae" gyo: ngad: ako". Gatau: so jham re ngaui" xeim: ngaui" byid' ra" makhyang" ra" lo, mau" re naonhaung" manug: to" pye' ngad: ako".

⁶Aimung: nga" nho: nhag' yo:- nhag' jam: yo" rure Yuda mung" vogaung: jham we' Yerusalem mae" hau" mo" khyodang dao mae vhe' sheim" khyo" ke' mung: aijham re myi" yang ngo ngha" pye' va". Aijham wa ana" ba boe" jo; ru we' dakhyo:- byo; qeim: jo, mung: qu" gyaug qu" din sho' ra" myao jao: boe" lo: ra".

⁷Airumung: Israel nho: Mao"So qam: bo: ra" ASANG ngo wa naonhaung" yao" gaung re airu" ra" makhyang" ru pe"mung: kad' na ko" i? ein: ana" ngo myid: geli"- naonhaung" mung" byu qe dayaug re: madang lo: sho' yauggai- myiqe:- zoshao qe- zonau" qe: dao mae byo; qeim: ru boe" nhao nug ko" i?

⁸So alho jham re caung:pa" byid' ra" khyo" yang re:- naonhaung" li" joe" na: jo, ko" ra" ce: Egutu mung" mae" gatau so jham re ngaui" xeim: ngaui" byid' ra" khyo" yang re: naonhaung" ngore pe"mung: nhag' yo: nhao ko" i? Mug: myid dao mae na ko" ra" byumyu" khao: ngo" naonhaung" re qi: jung" pye' nae" we' naonhaung" mang re nhang: kheim: khyo" ci geshao:- naonhaung" gaung re phyo' qheim" pye' nae" qhid' mae" ceru re naonhaung" kad' na ko" i?

⁹Naonhaung" nho: phug' pho" qeyang re:- Yuda kho:kham qe we' yao: bam: yham sang myhi" qeyang re:- naonhaung" yham sang myhi" qeyang re:- Yuda mung" mae" vogaung: jham mae we' Yerusalem hau" mo" khyodang jham mae kad' ra" makhyang" ra" lo, mau" jham re naonhaung" to" myhid' pye' vako" i?

¹⁰Ngadqere: ana" ba joe" sho' naonhaung" gaung re nhag' lam: manyham: khyo" ngad: ako". Naonhaung" ngore nga: mayhe' byid:- naonhaung" re we' naonhaung" phug' pho" qere ngoyang byid' to" ra" tarha" jham alhab' re cao" yang: kao so' madaui ngad: ako".

¹¹Airumung: Israel nho: Mao"So ASANG ngo wa naonhaung" re gye kad' mung: Yuda mung" alhab' re phyo' qheim" pye' nae".

¹²Yuda mung" mae na: dang: jo; ra" Yuda byu qe we' Egutu mung" khyo yena nae" myid: phyid' ko" ra" mo, kam" wa- alhab' mo, phyo' qheim" pye' qhug' ko" rure ngo the' myao nae". Aqi: angai yao: bam mae" alhab' mo, wa gyepoe mae- vae: moe' kyaug' shid yang: ngad: la,- Egutu mung" mae shid: li" genae". Yao: bam wa qu" gyaug qu" din sho' ra" myao jao: ngad: li" genae". Byu qe wa yao: bam re qi: jung" pye' li" genae". Amung: yao: bam: mang re nhang: kheim: khyo" ci: li" genae".

¹³Ngo wa- Yerusalem re qobo dae byid' ru we' dakhyo: ngo wa Egutu mung" mae na: ra" mo, rere: gye poe- vae: moe' kyaug' ru- no boe" ruyang qobo dae byid: nae".

¹⁴Yuda mung" mae na: dang mo, we' Egutu mung" khyo yejoe" na ko" ra" Yuda byu qemae" dayaug re: maphao: loe,- mana: dang nae". Yao: bam dam: qhug' na nae" nhag' nghae" ra" Yuda mung" khyo yao: bam mae" dayaug re: maqo" tug' lo" genae". Phao: khug: na: ra" byu damyo" mae" je yang khag' re: maqo" tug' lo" genae".

¹⁵Ailao"- yauggai alhab' wa gatau: so jham re yao: bam: yham sang myhi" qe ngaui" xeim: ngaui" byid: lo ko" ra" khyo ba: li" genae". Amung: ai: mae ye; jo, ko" ra" myiqe: qe- Egutu mung" mug: thao shad' mae na ko" ra" Israel byu qe- byu phung: mo" bobo mung: alhab' wa ngore-

¹⁶ASANG: mang mae nao: yang ngonhaung" re ta" to" ra" khyo re tae" gyo: nae" ngonhaung" ha: pye' bam va".

¹⁷Ngonhaung" kad' nae" ein: ta" to" ru ja: khao: ngo" re ngonhaung" kad' nae". Ngonhaung" we' ngonhaung" phug' pho" qe- ngonhaung" kho:kham qe we' au: jhaung qe Yuda vogaung: jham mae we' Yerusalem hau" mo" jham mae ngonhaung" lhaung" kad' lo: ru we' dakhyo:- ngonhaung" nho: so myhi" jham- mug: khaung mae" kho:kham myhi" jham re ngonhaung" ngaui" xeim: ngaui" byid: mung: yao: re sabyi qang: vhe' sheim: byid: nae". Ailao"- ngonhaung" wa zo:ve magan: mago" qo" mung: na: dai yang: qug: khai: maqhug' nae".

¹⁸Ngadqere: mug: khaung: kho:kham myhi" re ngaui" xeim: ngaui" byid' ru we' yao: re sabyi qang: vhe' ngaui" byid' rure ngonhaung" thang: pye' va" ayo, mae" ngonhaung" wa pe" maqo" lo:- ngonhaung" byu qe wa gye poe mae we' vae moe' kyaug' rumae shid: avako"- ga: ta" ako".

¹⁹Amung: myiqe: qe wa- mug: khaung: nho: kho:kham myhi" alho khyao mug cug kad' mung: yao: re ngaui" byid: mung: sabyi qang: ngonhaung" vhe' ngaui" byid' au: ngonhaung" kad' na: rure ngonhaung" nho: yham sang pho" qe myid vang" byid' ako"- ga: bota" ako".

²⁰Ailao"- ngore ceru: tau: ko" ra" yauggai myiqe: alhab' re-

²¹Naonhaung" we' naonhaung" phug' pho" qe- naonhaung" kho:kham qe- naonhaung" au: jhaung qe- mung"dan: byu qe wa Yuda mung" mae" vogaung: jham mae we' Yerusalem hau" mo" khyo mae ngaui" byid: ko" ra" ngaui" xeim: jham khyo re ASANG maba ngad: ra"- mangad: lao" to" myhid' pye' va" ra" ein: naonhaung" jho ko" i?

²²Ana" ba joe" sho' naonhaung" mug: myid wa byo; qeim: jo, mung: aimae khag' re: mana ngad: ako". Aiwa qu" gyaug qu" din sho' ra" myao jao: boe" li" mung: naonhaung" makhyang" ru we' makhyang" ra" lo, mau" jham re ASANG maqo" zang: qhao" byid: lo" ruyang byu qe wa naonhaung" mang re nhang: kheim: khyo" ci: li" genae".

²³Ce: ana" boe" na: ra" kyi" khyag' qug: khai: ru wa gatau: so jham re naonhaung" ngaui" xeim: ngaui" byid: mung: yao" amyin" dao: jham alhab' re mho dao: magyo: byid: yang: ASANG re gye kad' qobo shad' lhoe" vako" ruyang naonhaung" dao mae joe" li" ru ngad: ra" ein: ta" va".

²⁴Israel nho: qam: bo" ra" Mao"So ASANG wa- Egutu mung" mae na: jo; ra" Yuda byu qere ta" ra" dao: wa- ngo wa- byu qe alhab' je: yang: myiqe: qere ta" kyo" ru wa- naonhaung" we' naonhaung" yham sang myhi" qe wa mug: khaung: kho:kham myhi" re gyag: ga: dao:so: byid' to" avako". Yao: re naonhaung" ngaui" xeim: ngaui" byid: mung: sabyi qang: vhe' ngaui" byid: nae" ga: naonhaung" dao:so: byid' to" ako". Amung: naonhaung" dao:so: jham re phug' cao" ako". Aire wa gai va"- naonhaung" dao:so: jham re phug' cao" ge,- naonhaung" thao: ce' re zaui" pyang" ge,.

²⁶Ngadqere: Egutu mung" mae Israel byu qe alhab' re ASANG ngo: yang qam: bo: ra" nga" mang mae thao: ce' to" rure ana" tae" gyo: ge,. Ai: thao: ce' wa- daui: na: ra" ASANG kho:kham mang khyo" yang ngo jham tang" ra" ga: ta" yang:- thao: ce' kad' nae" qhid' mae" nga" mang re khag' dayaug rere: khonhae" re: madam: ci nhao nae".

²⁷Naonhaung" mana: dai: ru we' phyo' qheim" pye' ru qhug' genae". Naonhaung" mae" alhab' mo, wa dayaug re: madang losho'- gye poe mae la,- no boe" yang: la, shid: li" genae".

²⁸Ngadqere: naonhaung" mae" daqhae: wa shid: rumae" phao: loe, mung: Egutu mae" Yuda khyo tug' lo" li" genae". Ailao"- na: dang mo, wa nga" dao: la,- yao: bam: dao: la,- khoyaug: dao: lam: jab byang" li" rure ba: li" genae".

²⁹Ce: jo, qo mae naonhaung" re ngo qobo dae byid: nae" ru we' naonhaung" dao mae boe" nhao nae" ein: ngo dao:so: byid' to" ra" byo; qeim: ru jab byang" li" nae" ngad: rure ASANG ngo wa naonhaung" re sagse: qhu" byid: nae".

³⁰Yuda kho:kham Zedekia re yao" gyevo ngad mung: yao: re se' pye' nug: ra" Babelon kho:kham Nebugkhaneza lo, mae ab byid' pye' ru we' dakhyo:- Egutu kho:kham Hophra re yao: re se' pye' nug: ra" yao" gyevo qe: lo, khyo ngo ab byid' pye' nae"- ein: ta" va".