Read Maru YEREMIA 46 Bible Online

YEREMIA 46 - Maru bible

YEREMIA 46

¹ASANG wa byumyu" qe: khyo re Egutu we' qhid yang: ngore dao: jhau: ra".

²Ceru wa Yuda kho:kham Yehoiakim kho:kham kad' ru byid zin: ein: zin mae Babelon kho:kham Nebugkhaneza yang Uphrad qid gyaung: nhae mae" Khakhemi jo, qo mae gyekhe' aung: pye' ra". Egutu kho:kham Nekho nho: gyetab we' sin: yang: yao: ta" ra" khyo ngad: ra". Aiwa-

³Egutu gyezug: qe wa naonhaung" go jham re jin" jin" kad' mung: gyekhe' poe khyo to" ye: ge,.

⁴Naonhaung" nho: myao: jham mae myao: khin te' yang: aijham mae do; zaung ge,- jin: ye, mung: naonhaung" maug jham re zhaung: ge,. Naonhaung" nho: lhae tad' jham re tho' sho' saui: ge,- naonhaung" gyekhin re ve, ge,- ga: zag: hug' ako".

⁵Ngadqere: ngo pe" re myao i? ga: ASANG ngore myid' ra". Yao: bam wa gyaug: din yang: tug' lo: ako". Yao: bam: gyezo: qe wa khe' tug' ke' qhug' mung: gyaug yang: yao: bam qo" qao: qhi" tao" ako". Nhaung thao" malhang: qu" ngad: ako".

⁶Ai: tao: qao mo, wa maqo" phao ngad: ako". Gyezo: qe wa maqo" phao: loe, ngad: ako". Mug: am: shad' Uphrad qid yae mae yao: bam khyid au: thaung: yang: gyang: lang" lo" ako".

⁷Nila gyaung: ru: do, li" mo, dang" kam" joe" sho' qid je" li" ru we' dakhyo: to" li" mo, khag' ngad: ako" i?

⁸Nila gyaung: we' dakhyo: do, li" ru dang" kam" joe" sho' qid je" li" ra" qid gyaung: we' dakhyo: do, li" ru wa Egutu ngad: ra". Egutu wa ngo to" li" mung: mug: myid re nghoe' pye' nae". Ngo wa vogaung: jham re we' aimae na mo, re se' tam" pye' nae".

⁹Myao: jham re su: nae" amyin" byid: mung: myao: lhin" jham re lhang nae" amyin" byid' ra". Ethiopia we' Libya mae" go jham ci: ra" yauggai qe we' Ludia mae" lo,la: bag jhao mo,- gyezo: qere nhao: thug' ke' ge,- ga: ta" ra".

¹⁰Ce: ba na wa qam: bo: ra" ASANG kho:kham nho: ba na ngad: ra". Ana" ba yao: lage, phaug' li" nae"- ana" ba yao" gyevo qere qobo dae byid' li" nae". Yao" shae pyang: wa gyi: sho' yao: bam re zo" li" nae". Nhag' dag sho' ai bam: sa: re shaug' li" genae" qam: bo: thao" ra" ASANG re xeim: khyo" ngaui byid: nae" qhid' mae" mug: am: shad' Uphrad qid yae mae yao: bam se' pye' ru qhug' li" genae".

¹¹Egutu byu qe wa Gilead khyo ye: mung: mocid' yeqho: ge,. Naonhaung" nho: mocid alhab' wa pe" magai- yao: bam re pe" mocid' yang re maqo" pho: gai lo:-

¹²Byumyu" qe wa ni" aqho' aqhid re the' gyo" avako". Nao gyi: ngug: rure yaug khao: ngo" the' gyo" avako". Gyezo: dayaug we' dayaug yao: cao: jho" tha" lang: mung: shid' yaug: geim" myid gaung khyo gyang: lang" lo" avako".

¹³Egutu mung" re gyekhe' nae" qhid' mae" Babelon kho:kham Nebugkhaneza joe" li" au:- ASANG wa ngore dao: jhau: ra". Yao: wa-

¹⁴Aire Egutu mung" mae" vogaung: jham ngad: ra" Migdo- Memphi- Taphanhe jham re ta" kyo: wa,. Aiwa naonhaung" yao" gaung re gug: gam nae" jin" jin" kad' ge,- naonhaung" alhab' wa gye poe mae se' pye' qhug' li" genae".

¹⁵Qam: bo: ra" naonhaung" Api so pe"mung: gyo" byaug: i? ASANG wa aire be; khyoe' khyo" pye' ava".

¹⁶Naonhaung" nho: gyezo: qe wa khyid au: thaung: yang: gyang: lang" lo" avako". Yaug khao: ngo" yao: cao: phyad hin wa,- ngonhaung" byu qejhao" yham phao: lo" gelang:- gyevo qe: shae mae" phao: loe, gelang:-

¹⁷Egutu kho:kham re- yao" agu gai re lai: pye' yaug la am- ein: ra" mang sag' mhang" ge,.

¹⁸Qam: bo: ra" ASANG- ngo wa kho:kham ngad:- ngo wa daui: na: ra" Mao"So ngad:- Tabo bam wa bam jham tho' mae myhao ra". Khame bam wa panglai: tho' amyhao mae ye; jo; ra". Ai we' dakhyo: naonhaung" re gyekhe' zin: nae" yaug wa- airu: qam: bo yaug ngad: ra".

¹⁹Egutu byu qe we" kyam: byu khyo" jhui" lo" qhug' nae" rure jin" jin" kad' to: ge,. Memphi wa khag' mana ra" byo; qeim: jo,ra" din"pyad' yo kad' pye' ru qhug' li" nae".

²⁰Egutu wa gyai qi" yaung" ra" nung: jaung myhi" we' dakhyo: ngad mung: mug: am: shad' mae" daung: yang pe' ra" yao khaung" yang gyekhe' zin" ru qhug' ra".

²¹Yao" yang lhaung: to" ra" gyezo: qe lhao" re: qam mabo: ra" nung: nau" we' dakhyo: boe" jo; ako". Yao: bam to" ye, yang gye mazin: ngad: ako". Yao: bam alhab' mo, tug' yang: tao" phao: lo" li" genae". Yao: bam jeim: nae" ba na we' yao: bam: byo; qeim yo, wa joe" lo: ava".

²²Egutu wa gyevo: qe: gyetab te' li" na: au: shi shi ga: myang: ra" lhao maui we' dakhyo:- tao" phao: lo" ra". Yao: bam wa yao: re byu qe sag' gae jham re thau: khyang: pye' ru we' sag' mo" yo re thau: khyo" pye' ru we' dakhyo: vozaung" yang yao: re khe' baug: li" genae".

²³Yao: bam: gyezo: qe wa- matho' nghe' losho' myo" ako". Aibam: gyezo: qe wa khyag' phaung" jham tho' je: myo" ako".

²⁴Egutu byu qe wa qho' phyo' ru qhug' ako". Yao: bam wa mug: am: shad' mae" byu qeyang aung: pye' ru qhug' ako". ASANG ngo ta" to: va" ga" ru ngad: ra".

²⁵Israel nho: Mao"So- Qam: bo: ra" ASANG wa- ngo wa Thebe so Amon re Egutu we' yao" so jham- kho:kham jham we' daga" qobo dae byid: nae". Ngo wa Egutu kho:kham re we' yao: re lam khug: na: ra" mo, alhab' re jhui" yu yang:-

²⁶Yao: bam re se' pye' nug: ko" ra" mo, we' Babelon kho:kham Nebugkhaneza we' yao" gyetab jham: lo, khyo ngo ab: pye' nae". Ngadqere: thao re wa yao: bam lai: lo: ra" ayo, mae we' dakhyo:- byu qe wa Egutu mae dam: na: li" genae". ASANG ngo ta" to: va"- ga: ta" ra".

²⁷Nga" byumyu" we"- dagyaug wa,- Israel byu qe we"- dagyaug: din wa,- ngo wa nao re ai: va" ra" mung" mae" naonhaung" kyam: byu qe boe" na: ra" mung" mae" ngo khyad' yu nae". Naonhaung" yham khyo dam: tug' phao: lo mung: ngaui pyo: yaug yo za: qo" na: li" genae". Naonhaung" gug: gam qhug' mung: khag' dayaug: yang re: naonhaung" re makyaug' genae".

²⁸Ngo nao jhao" joe" li" mung: nao re khyad' yu nae". Naonhaung" re ngoyang nha: sin" to" ra" jo, qo mae" byumyu" qe alhab' re se' tam" pye' nae". Ngadqere: naonhaung" re wa ngo mase' tam" pye' nae". Naonhaung" re qobo dae mabyid: lo: ngo manhao: ke' nae". Ngadqere: naonhaung" re ngo qobo dae byid' au: nyang nyang za: kad' nae". ASANG ngo ta" to: va".