Read Maru YEREMIA 48 Bible Online

YEREMIA 48 - Maru bible

YEREMIA 48

¹Ceru wa Moba we' sin: yang: qam: bo: ra" ASANG ta" ru ngad: ra". Aiwa- Nebo byu qe wa masho: majhin ngad: ako". Yao: bam: vogaung: jham wa phyo' qheim" pye' qhug' ava". Kiriathaim wa sang: yu: pye' ru qhug' ava". Yao" nho: qam: bo: ra" gyetab vogaung: re phyo' khyo" pye' avako". Yao" nho: vobyu qe wa qho' phyo' ru qhug' avako".

²Gyag mung: qi" qhang: ra" Moba wa baui" byaug va". Gyevo qe wa Heshbon re sang: pye' avako".

³Moba byu qere phyo' pye' nae" gye khug' kad' ako". Madmen vogaung: wa jhag' kad' pye' qhug' ava". Gyezo: qe wa aire gye kad' su" lai: lo" li" genae". Horomim byu qe wa aqan alan wo"- Byo; qeim ru wo"- ga: zag: hug' ako".

⁴Moba wa phyo' qheim" pye' ru qhug' ava". Zoshao qe gyi: ngug: na: rure tae" gyo: ge,.

⁵Yao: bam: ngug thoe re Luhid khyo do, lo" ra" khyo cao" yang: the' gyo" ra". Nhag' lam: thao" yang: gyi: hug' ra" thoe re Horonaim khyo gyo" lo" ra" khyodang cao" yang: the' gyo" ra".

⁶Phyad ge,- naonhaung" kao so' loe, nae" qhid' mae" tao: ge,. Din" pyad' yo mae" loze lae" tao" ru we' dakhyo: tao ge,- ga: yao: bam ta"ako".

⁷Moba we"- nao wa ni" qam: re we' ni" jo,nho" re lam khug: ra". Ngadqere: ana" lhao" re: nao wa aung pye' ru qhug' ava". Ni" nho: so Khemo wa yao" kho:kham nau" we' khinjaung qe we' daga" pyaung" jhui" lo" ru khyo ye" lo" li" nae".

⁸Vogaung: dalam: re: byo; qeim: rumae" maloe, nae". Lao: khaung: we' pa: din" alhab' byo; qeim: lo" li" genae". ASANG ngo ta" to: va".

⁹Moba qhid' mae" lab laug zang tau: to' ge,- ai wa mamyao" re phyo' qheim" pye' qhug' li" nae". Ainho: vogaung: jham wa byo; qeim: jo; li" nae". Ai mae khag' re: madam: na logenae" ga" ru ngad: ra".

¹⁰Yao" aung khug nhag' lam: alhab' we' ASANG: mau" re makad' yaug wa nhang: kheim: zao" vashao: wo"- shae: yang byu mase' ra" yaug wa nhang: kheim: zao" vashao: wo"-

¹¹ASANG wa- Moba wa khonhae" re: gug: gug: za: qo" na mung: khonhae" re: pyaung" jhui" lo" ru maqhug' qu" ngad: ra". Moba wa mazai" lhaui: lo: to" to" ra" sabyi qang: we' dakhyo: ngad mung: khonhae" re: yae: dalam: mae" dalam: khyo vhe' zaui: ru maqhug' ngad: ra". Yao" nho: sabyi sheim wa khonhae" re: maqeim ngad: ra". Yao" nho: myho' ru wa khonhae" re: myho' jo; ra".

¹²Aimung: ana"- Moba re sabyi qang: we' dakhyo: vhe' nae" byu ngo nhao: ke' nae" ayo, wa joe" lo: na: ra". Yao: bam wa ainho: sabyi yae: re akeim kad' pye' mung: aijham re aje, aman" be; khyoe' pye' li" genae".

¹³Ailao" Israel byu qe yao: bam lam khug: ra" so Bethela yang phoe nhao: pye' qhug' ru we' dakhyo: Moba byu qe wa yao: bam: so Khemo yang phoe nhao: pye' ru qhug' li" genae".

¹⁴Moba byu qe we"- pe"mung: yang: sulhe: qe- gye poe mae jham" qu" va" vae" ra" gyezo: qe ngad: ein: pe"mung: ta" ko" i?

¹⁵Moba we' ainho: vogaung: jham wa phyo' qheim" pye' qhug' ava". Ainho: lhe" ra" zolau: qe wa se' pye' ru qhug' avako". Ngo wa kho:kham- qam: bo: ra" ASANG ngad mung: ngo ta" to: va".

¹⁶Moba nho: jeim: maug yhaung: wa te' li" na mung: ai: nho: byo; qeim: ru wa joe" li" na: ra".

¹⁷Ainhae mae na ko" ra" naonhaung" we"- ai: nho: lahau: re the' gyo" ra" mo, naonhaung" alhab' we"- ai: byumyu" qhid' mae" kaug' ngug ge,- yao" qam: bo: ra" eib: ru wa qeim: byaug: ava". Yao" nho: phungbao we' qam: wa majo, lo:ngad: ra" ein: ta" ge,.

¹⁸Dibon mae na mo, naonhaung" we"- nga: ye; ra" naonhaung" jo, qo mae" gyo" lo ge,- phalhug bam myid gaung dao mae zaung ge,. Moba nho: phyo' qheim" yaug wa cemae ngad mung: yao" gyetab vogaung: jham wa byo; qeim: jo; ava".

¹⁹Aroe mae na mo, naonhaung" we"- khyoyae mae ye; jo; yang: lao" na ge,- tao" phao: lo" na mo, re myid: ge,- pe" boe" va" rure yao: bam mae" ca: yu ge,.

²⁰Moba wa gyo" seim" lo" byaug va". Yao" qhid' mae" ngug ge,- ai wa nga: yeim pho: ngad: ra". Moba wa phyo' qheim" pye' ru qhug' ava" ein: Arnon gyaung: cao" yang: ta" hau: ge,- ga: yao: bam phaug' tau" li" genae".

²¹Bug dam: mae" vogaung: jham ngad: ra" Holon- Yahza- Mephad-

²²Dibon- Nebo- Beth Diblathaim-

²³Kiriathaim- Badgamu- Bethmeon-

²⁴Keriod we' Bozra- dao mae dao: kho' ru joe" ava". Moba vogaung: ava: ajhao" alhab' dao mae dao: kho' ru joe" ava".

²⁵Moba nho: qam: wa mhan" kad' pye' qhug' ava". Yao" nho: qam so' wa phyo' qheim" pye' qhug' ava". ASANG ngo ta" to: va"- ga: ta" ra".

²⁶ASANG wa Moba re jhaug' yhid' ge,- pe"mung:ga"re yao: wa ngore gye kad' tau: lhan" ava". Moba wa yao" daug: to" ra" vhope' bam mae lang" lhe' lhau: li" nae" aimung: byu jham wa qi: li" genae".

²⁷Moba we"- Israel byu qere nao khoru: qi" jung" pye' rure myid: beim" i? Nao wa yao: bam re damya, phung: qe we' daga" the' taung" yu: ru we' dakhyo: yao: bam re kad' ra".

²⁸Moba mae na ko" ra" byu qe naonhaung" we"- naonhaung" vogaung: jham mae" to" thug' lo" ge,- laug byo, jham mae yena ge,- yao" ngho' sad' re byo, nhad' mae sad' ra" phaung" kyug' we' dakhyo: boe" ge,.

²⁹Moba wa gyai ngad beim" ra". Yao: khoqhi" ngad beim:- phug: ru we' nhag' lam: myhao: ru- yao: bam yao" gaung re khoqhi" myid: myhao mo, ngad: ako" i?

³⁰ASANG ngo wa yao: bam: ngad beim" rure ba: ra". Yao: bam phug: ru wa pe" mangad: ngad: ra". Yao: bam kad' ra" mau" wa madang: jo, nae".

³¹Airumung: ngo wa Moba mae" yaug khao: ngo" re we' Kira Here mae" byu qere sham" pye' nae".

³²Ngo wa Sibma byu qe: qhid' mae" Yaze byu qe: qhid' mae" tho' lhao" re: ngug nae". Sibma vogaung: we"- nao wa akaung qe Tham: Shid re lai: phyid' ye: mung: Yeze joe" sho' naui: joe" ye" ra" sabyi naui we' dau: ra". Ngadqere: ana" wa ni" nho: xaung: shi: we'- ni" sabyi shi: wa phyo' qheim" pye' ru qhug' ava".

³³Ngaui pyo" ru we' ngaui bau" ru wa myid xau gai: ra" Moba mung" mae" yu: lo" byaug: avako". sabyi nao: jao: mae" sabyi qang: yug: rure ngo tam" pye' va". sabyi qang: kad' mung: bau: yang: hug' nae" byu dayaug re: mana lo:-

³⁴Heshbon byu we' Eleale byu wa gyi: hug' mung: yao: bam: hug' thoe wa Yaha joe" sho' mae" the' gyo" ra". Ai: rure Zoa mae" byu qeyang the' gyo" ako". Aire Horonaim we' Eglad Shelishiya vha" mae" the' gyo" ra". Nimrim qid gyaung: zo: lhao" re: kin" byaug va".

³⁵Moba byu qere yao: bam: caung:pa" ra" jo, qo mae ngaui" xeim: phad' ngaui" byid' rumae" we' yao: bam: so jham re ngaui" xeim: ngaui" byid' rumae" ngo tam" pye' nae". ASANG ngo ta" to: va".

³⁶Airumung: nga" nhag' lam: wa Moba we' Kira Here byu qe: qhid' mae" byushid yham mae dayaug yaug yang kholhao: mad: ru we' dakhyo: kaug' ngug: ra". Pe"mung:ga"re- yao: bam sang: gu: ja: khao: ngo" wa baui" byaug: va".

³⁷Yao: bam alhab' mo, wa yao: bam: au: re myhaug' pye' mung: yao: bam: nhad' maui: jham re gaug: pye' ako". Yao: bam alhab' mo, yao: bam: lo, jham mae dae khu lhai" cad' ci mung: yaug khao: ngo" wa jid: mo" mai bau: ve; ako".

³⁸Moba bam: yham khaung dao jham alhab' mae we' ai nho: shava jao: jham mae kaug' za: kaug' ngug: na: ako". Pe"mung:ga"re khag' yang ma o: ra" yae: we' dakhyo: Moba re ngo kho' pye' va".

³⁹Zag: hug' ge,- Moba wa mhan" kad' pye' qhug' ava". Moba wa nga: yeim: ava". Aiwa byo; qeim: jo, mung: ai: lhang" gam: mae na: ra" byumyu" qe wa qi: jung" pye' ako". ASANG ngo ta" to: va".

⁴⁰ASANG dao:so: byid' to" ru wa- daung phyid: lhu: ci: ra" zeim baung: we' dakhyo: byu damyu" wa Moba dao mae dao" gyo" lo: li" nae".

⁴¹Vogaung: jham we' gyetab vang jham re sang: yu: pye' li" nae". Ai: ba na mae Moba gyezo: qe wa zo:khau: ra" myiqe: gyaug: din: ruru: gyaug: din: li" nae".

⁴²Moba wa phyo' qheim" pye' qhug' mung: byu damyu" maboe" lo nae". Pe"mung:ga"re yao: wa ngore gye kad' tau: lhan" yaug ngad: ra".

⁴³Gyaug: nin" ja:- dung: gyan: jham- lha" jham wa Moba byu qere lao" na: ako". ASANG ta" to" ra". Gyaug: nin" ja: mae" phao: loe, nae" seim" yaug wa dung: gyan: mae byid: gyo" lo" li" nae". Dung: gyan: mae" do; lhoe" thug' yaug khag' ngadqere: lha" mae myi" li" nae". Pe"mung:ga"re Moba nho: byo; qeim: rure ASANG ayo, mhai" to: byid' ava".

⁴⁴Bao" thaug' byu maqo" ra" phao: khug: na ra" byu qe wa ganhae" kho:kham Sihon eib: lo: ra" vogaung: Heshbon mae gug: gam: ru qho: ako". Ngadqere: aimae myishae ngad: ra" myi: wa mug: jheim khaung: mae nga" mung: gye' khe' kao bau: ra" Moba nho: bam myhao jham re nga" pye' ra".

⁴⁵

⁴⁶Moba byu qe masho: majhin ngad: lhe"- Khemo re caung:pa" ra" byu qe wa phyo' qheim" pye' qhug' mung: yao: bam: yauggai myiqe: zo: qe wa kyam: byu khyo" taung" jhui" lo" qhug' ako".

⁴⁷Ngadqere: joe" lo nae" ayo, re ASANG wa Moba re dam: na: dai nhao nae". ASANG ta" to" ru cegu: alhab' wa Moba dao mae boe" li" nae"- ga" ru ngad: ra".