Read Maru YEREMIA 6 Bible Online

YEREMIA 6 - Maru bible

YEREMIA 6

¹Benyamin byumyu" qe we"- gug: gam: qo" yu nae" qhid' mae" tao" phao ge, Yerusalem mae" phao: loe; lo" ge,. Tekoa mae labo" mad mung: Bed- Hakherem mae myi: mad aso: byid: ge,- Byo; qeim: ru we' phyo' qheim" ru wa mug: am: shad' khyo" gyo" lo: na: ava".

²Ziun vomo" wa yaung" ra" ngadqere: aire phyo' qheim" pye' li" genae".

³Kho:kham jham wa yao: bam: gyetab jham we' ai: jo, qo mae jamu kad' na: li" genae". Yao: bam wa vomo" lhang" gam: mae yao: bam: jamu jham re zhaug' mung: yao: yaug yao: nug: ru mae thang: bam: li" genae".

⁴Yao: bam wa Yerusalem re khe' zin: nae" qhid' mae" seim" ci ge, jin" jin" kad' ge,- ba khaung tau: re ngonhaung" khe' zin: nae" ga: ta" li" genae". Ngadqere: ai: thao yao: bam wa ba gyam va". Ana" ba: gu: alaug lai: byaug va" myi" thao zo" re: ba vao: cae" lo" na va".

⁵Ngonhaung" wa myi" ayo, re akhe' zin: lo: nae" vomo" gyetab jham re phyo' qheim" pye' nae"- ga: ta" li" genae".

⁶Qam: so' bo: thao" ASANG wa ce: kho:kham qere sag' gae jham thau: pye' mung: Yerusalem re vang: nae" qhid' mae" myid bam" jham dau" bam" nhao: to: va". Yao: wa ce: vomo" mae zag zo" ru saung" byang" jo, va" rumung:- aire ngo qobo dae byid: nae"- ga: ta" ava".

⁷Qid thaung: wa qid re asag' boe" jo,nhao: ru we' dakhyo: Yerusalem re: yao" makhyang: mashab: rure asag' boe" jo, nhao: ra". Ngo wa vomo" khug mae phyo' qheim" ru we' aqan alan mau" re the' gyo" ra" no phyo: we' dae de' rure za: ngo the' myao: na:-

⁸Yerusalem vobyu qe we"- ce: qug: khai: jham wa naonhaung" qhid' mae" ta" peim" ru ngad vashao:- ai mangad re wa- naonhaung" re ngo shapye' to: co' naeva" ngo wa naonhaung" vomo" re din"pyad' yo boe" lo" nhao nae". Byu khag' mana: ra" jo, qo boe" nhao: pye' nae".

⁹Qam: so' bo: thao" ASANG wa ngore ta" ra" Israel re sabyi shi alhab' phyo' yu: pye' va" sabyi yo we' dakhyo: phyo' shao: pye' nae". Aimung: ayo, jo, shi" au: re nao wa yaug khao: ngo" re khyad' khyui: yu ca" ra".

¹⁰Ngo wa ceru: tau: va"- yao: bam re ngo jhau mung: ta" peim" re khag' ba: tae" gyo: genae" laug i? Yao: bam wa sang: dang gemung: ni" nho: mungdao: re matae" gyo: qad ngad: ako". Yao: bam wa- nao ngore ta" nhao: rure qi: jung" pye' byid' ako".

¹¹Yao: bam re nao nhag' yo" ru wa nga" gaung khug mae re: nga" laung: jo; ra". ASANG we"- aire ngo maqo" zang" cilo: ngad: kyi:- ein: ta" va". Ailao" ASANG wa ngore- nga" nho: nhag' yo: re hau" mo" khyo mae" zoshao qe: dao khyo vhe' sheim" ke' wa,- aimung: zolau: qe: phaung mae vhe' sheim" ke' wa,. Yham sang pho" qe we'- yham sang myhi" qere jhui" lo" li" genae". Aimung: gyai mao" byaug va" mo, re lao" re: khyam" sa byid' to" li" genae" mangad:.

¹²Yao: bam: yham jham re gayaug qere byid' pye' li" genae". Ai we' dakhyo: yao: bam: yo jham we' yham sang myhi" jham re: byid' pye' ru qhug' li" genae". Ngo wa ce: mug: myid mae" byu qere qobo dae byid: naeva".

¹³Byuqi: byungai yaug khao: ngo" wa ngaui re madin: man" ra" khyo" qho: yu nae" phin" ako". Lapa qe we' khinjaung qe lao" re: mung" byu qere mhug' zo" ako".

¹⁴Yao: bam wa- nga" byumyu" qenho: dae jad: re sho: yam" qid' ru za: angad nhohab kad' na: ako". Alhab' wa magai: ru- alhab' gai: ga: yao: bam ta" ako".

¹⁵Yao: bam wa- ce: maca' majhad' mau" jham re kad' mung: qho' ko" ra" i? Maqho'- yao: bam dajhid' re: maqho' ngad: ako". Yao: bam wa myo,nho lao" maba: qeim ngad: ako". Aimung: yao: bam wa- ngo qobo dae byid' re gayaug qe gyang: gyo" ru we' dakhyo: gyang: gyo" lo" li" genae". Aiwa yao: bam: nho athao" ngad: li" nae". Ngo ASANG ta" to: va".

¹⁶ASANG wa yao" byumyu" re ta" ra" khyokao: jham mae ye; jo, mung: qu" ke' ge,- ganhae" gaco' mae" khyo re myid: ge,- aimung: khyo kholam: gai: thao" ru myid' yu ge,. Ai: khyo khyo" su: ge, aire naonhaung" yaug yo cae: te" ru we' qo" na: li" genae"- ga: ta" ra". Ngadqere: yao: bam wa mangad:- ngonhaung" masu: ga: ta" ako".

¹⁷Ailao" ASANG wa- labo" yang ta" peim" ra" thoe re tae" gyo: nae" lhaug' byu qere khyin: san: nha: to" ra". Ngadqere: mung" byu qe wa- ngonhaung" matae" gyo: nae"- ga: ta" ako".

¹⁸Aimung: ASANG wa- byumyu" naonhaung" we"- tae" gyo: ge,- aimung: nga" byumyu" mae pe"mung: lo nae" rure qu" yu ge,.

¹⁹Myid gaung we"- tae" gyo: wa, ngo wa- yao: bam: byin phyo: mathao mae qobo dae byid' ra" khyo" yang ce: byumyu" re byo; qeim nhao nae". Pe"mung:ga"re yao: bam wa nga" mho" shid' rure ngag: ha: lhaui" pye' mung: nga" mungdao: jham re maphug' cao" ngad: ako".

²⁰Yao: bam Sheba mae" ngojhao" cili" byid' ra" nae pyo: xau jham re ngo pe" xan: seim" byid' i? Mug: va: mae" cilo byid' ra" xeim: ngae cao: phaui: jham re ngo o byid: ra" i? Ngo wa yao: bam: jhaung qhu" xeim: re makhae: yu byid: nae". Yao: bam: ngaui" xeim: jham rere: malham: qu" ngaui byid: nae".

²¹Aimung: ngo wa ce: byumyu" re khyid au: thaung: mung: lang: be, nhao nae". Yao: pho" jham we' yauggai- myiqe: zo: qe shid: li" genae". Ai we' dakhyo:- ba nam qe we' yham kyo: qere: shid: shao" byaug genae".

²²ASANG wa ceru: ta" ra"- mug: am: shad' mae" mung"dan: dalam: mae" byu qe li" lo: na: ako". Mug: va: mae" qam: so' qi" ra" byumyu" damyu" wa gye seim" na: ako".

²³Yao: bam wa lo, la: jham we' shae pyang: jham re gaug: ci: avako". Yao: bam wa- akhyi: akyaung manug makhyad' ru we' nhag' maba: khyag' ngad: ako". Yao: bam wa- yao: bam: myao: jham zaung: re myang: na: ra" panglai: we' dakhyo: thoe thug' ako". Yao: bam wa- Yerusalem we' gyekhe' nae" qhid' mae" jin" jin" seim" ci: avako".

²⁴Ngonhaung" wa lau dao: the' gyo: va" ga: Yerusalem vobyu qe ta" ako". Aimung: ngonhaung" lo, gyi: shid va". Ngonhaung" wa zo:khau no no: ra" myiqe: dayaug we' dakhyo: no: na va ".

²⁵Ngonhaung" wa- seyo: vogaung: khyo mavae" ye:- hau" mo" khyo jham mae re: mavae" su:- pe"mung:ga"re- ngonhaung" nho: gyevo jham wa she lhae gyezai ci mung: ngonhaung" nho: avai: ayae gam: sho' mae gyaug din: ru jo; bam: ra"- ga: ta" na: ako".

²⁶ASANG wa yao" byumyu" re ta" ra". Jid:mo" mai bau: ve, mung: myiqe, bam" mae lang" lhau" qin" ge,- yauggai zote: zo: qhid' mae" kaug' ngug: ru we' dakhyo:- ngug byid ngug nhe' we' kaug' ngug ge,- pe"mung:ga"re- naonhaung" re phyo' qheim" pye' nae" yaug wa nyag din taung" li" khe' zin" li" nae".

²⁷Yeremia we"- to' re nao kyang" ca: qu" ru we' dakhyo: nga" nho: byumyu" re ca: qu" wa,- aimung: yao: bam khoru" mo, ngad ko" rure qho: qhu" wa,-

²⁸Yao: bam alhab' mo, wa- gyid: ne we' jo,to' ru: sang dang: ra" tau: lhan: mo, ngad: ako". Yao: bam alhab' ave, qeim mung: su: gaui ta" jung" qin" ako".

²⁹Khyeim" mo" myi: wa- gang" qhi" de, jo, ngadqere:- to' zu jham wa manga" yug mung: shao re: mashao: gyo" ngad: ra". Nga" nho: byumyu" re- yeshao: kyang: yang: pe" akyu" mabo- pe"mung:ga"re- ai: makhyang: mashab mo, re mayu: pye' yang: ngad: ra". Yao: bam re pe" akyu" mabo: ra" zu pe' ga: mhang" pye' li" genae". Pe"mung:ga"re- ngo ASANG wa yao: bam re ngag: ha: lhaui" pye' va".