Read Maru YEREMIA 8 Bible Online

YEREMIA 8 - Maru bible

YEREMIA 8

¹Ai: ayo mae Yuda mung" mae" kho:kham qe we' zug: ade, qenho: shoqug: jham- khinjaung qenho: shoqug: jham- lapa qenho: shoqug: jham- Yerusalem mae na: ra" mung" byu gaje: nho: shoqug: jham wa yao: bam: lab khug mae" phoe' yu: pye' ru qhug' genae".

²Gaug: zhang: yu mung: nyhab' pye' nae" atha" yao: bam: shoqug: jham wa myid xau nam phun we' dakhyo: myid gaung mae gyo" jo; li" genae". Aijham wa- ce: byumyu" qe jhid'de; mung: caung da" byid' lo: ru we'- boe, phyid' mung: caung:pa" ra" ba zho yo- lho" zho yo we' kyi bao: qab mae sin" jo; li" genae".

³Aimung:- mashid na: dang mung: ngo: yang khe' sin" ke' ra" jo, qo mae na: bam: ra" ce: makhyang: mashab: ra" byumyu" mae" mung" byu qe wa- xo' yang: na nug nae" atha" shid nae" lam: je: o: li" genae". Ngo qam: so' qi" thao" ASANG ta" to: va".

⁴ASANG wa- yao" byumyu" qere ta" kyo: nae" qhid' mae" ngore ta" ra". Byu dayaug yaug gyang: lang" lo" re yao: madam: to" lo:ngad: ra" i? Byu dayaug yaug khyonghung: nghung" re yao: madam: tug' lo ngad: ra" i?

⁵Aire nga" nho: byumyu" naonhaung" wa ngojhao" re: madam: tug' lo lo:- pe"mung: ngo mae" phao: lo" ko" i? Naonhaung" wa naonhaung" solho jham khyo nhag' lam: de, mung: ngojhao" malhang: tug' lo nug ngad: ako". Ngo wa nyang" za: tae" gyo" ngadqere: naonhaung" wa dang: rure mata" ngad: ako".

⁶Naonhaung" mae" khag' dayaug re: yao: yao" makhyang: mashab nhag' lam: o ngaui: ru qhid' mae" makaug'- naonhaung" mae" khag' dayaug re:- ngo pe" kad' shad' va" laug i? ga: mata". Yaug khao: ngo" wa mang: zin: jao: khyo tao" thug' ye" lo" ra" myao: we' dakhyo: yao: yao: nug: khyo xo' ye" lo" ako".

⁷Qid ngho' lang qhang jham lao" re: khonhae" tug' phao nae" ga" ra" ayo, re ba: ako". Phaung" kyug' jham- jhin: dao: jham we' ngho' vhai: jham lao" re: khonhae" zaug byaung: nae" ga" ru ba: ako". Ngadqere: nga" byumyu" naonhaung" wa naonhaung" re ngo eib: ra" tarha" re maba ngad: ako".

⁸Naonhaung" wa- pha,jhi" ba ein: ru we' nga" nho: tarha" re ba: ein: khoru: qo" ta" genae" i? Qu" qu" ge, tarha" re madin: man" ra" jham: tung" pho" qe jham: ba geyang: tha" pye' ako".

⁹Naonhaung" nho: pha,jhi" bo mo, wa qho' phau" ako". Yao: bam wa nhag' cad' nayaug boe" byaug gemung: khyothaung" jheim mae magai: lab lo:ngad: ako". Yao: bam wa nga" nho: mungdao: jham re ngag: ha: lhaui" pye' ako". Ana" yao: bam pe" pha,jhi" qo" shiko" ra" i?

¹⁰Aimung: ngo wa- yao: bam: yo jham re su gaje jhao" byid' pye' mung: yao: bam: yham sang myhi" qere yauggai gaje jhao" byid' pye' nae". Byuqi: byungai yaug khao: ngo" wa madin: maman" ra" khyo" ngaui qho: yu nae" phin" ako". Lapa qe we' khinjaung qe lao" re: mung" byu qere mhug' pyag' zo" ako".

¹¹Yao: bam wa- nga" byumyu" qe: nho: dae jad: jham re mageim: the' khyang" ru za: angad nhohab kad' ako". Alhab' wa ma re: gai: rure alhab' gai: ga: ta" ako".

¹²Nga" byumyu" qe we"- naonhaung" wa- ce: maca' majhad' ra" mau" jham re kad' ra" mathao mae qho' ko" i? Mangad: naonhaung" wa dajhid' re: maqho' ngad: ako" naonhaung" wa myo, nho lao" maba: laung ngad: ako". Aimung: naonhaung" re ngo qobo dae byid' ra" au: naonhaung" wa- su gaje gyang: lang" lo" ru we' dakhyo: gyang: lang" lo" li" genae". Aiwa naonhaung" lo" thao" ru ngad: li" naeva". Ngo ASANG ta" to: va".

¹³Byu dayaug wa yao" qhovo: qhoshi: re jham" yu ru we' dakhyo: ngo wa nga" nho: byumyu" qere zhang: yu nug: ra". Ngadqere: yao: bam wa- ashi: mazaui" ra" sabyi naui we' dakhyo: re: pho' ham" shi: mazaui" ra" pho' ham" gae we' dakhyo: re: ngad: ako". Afo' lao" jhoe' byaug va" ru we' dakhyo: ngad: ako". Aimung: ngo wa- taung gaung mae" gaje: byu qere ai: mug: myid mae sang: yu nhao: pye' va"- ga: ta" ra".

¹⁴Mao"So: byu qe wa myid' ako"- ngonhaung" pe"mung: sae za: tae" jo; bam: i? Sa" ge,- ngonhaung" wa gyetab vomo" jham khyo tao" vao ye: mung: ai: mae ye:shid gelang:-ASANG ngonhaung" nho Mao"So wa- yao: re ngonhaung" yang qobo shad' bam mung: ngonhaung" re shid nae" qhid' mae" dao: phyid' pye' va". Yao: wa ngonhaung" re- khincid' myino; byid: jhaug' ava".

¹⁵Ngonhaung" wa mang yo nae" ayo, we' no gai nae" ayo, re myid: lao" ngadqere:- pe" akyu" mabo ngad: ra" ai: atha" gyaug din: ja: joe" li" ra".

¹⁶Ngonhaung" nho: gyevo jham wa Dan vomo" mae li" joe" na: jo; avako". Ngonhaung" wa- yao: bam: myao: jham nho mad: myhang" rure the' gyo: va". Yao: bam: myao: jham myang: re damug: myid geim" nin" ra". Ngonhaung" nho: gyevo jham wa ngonhaung" nho: mug: myid re we' ai: mae bo: ra" ja: alhab' re- ngonhaung" nho: vomo" we' ai: vobyu jham alhab' re phyo' qheim" pye' nae"- ga: joe" li" avako".

¹⁷ASANG wa- lha" ge,- naonhaung" nho: agyo: mae lhao maui magai: mhai" yu: ra" daug thin: ra" lhao maui jham re nhao: ke' byid: nae". Aimung: aijham wa naonhaung" re thoe" li" genae"- ga: ta" ra".

¹⁸Nga" nho: nhag' kaug' myid wa matho' ya: gai: pye'- ngo wa nhag' lam: mae no jo, va".

¹⁹Tae" gyo: shige,- damug: myid geim" mae nga" nho: byumyu" qe ngug: hug' na: rure ngo the' gyo"- ASANG wa Ziun mae mana lo: i? Ziun nho: kho:kham wa ai: mae mana lo" laug i? ga: ngug: hug' ru the' gyo". ASANG yao: bam: kho:kham phaug' tau" ra" naonhaung" wa- naonhaung" solho jham re caung:pa" ra" khyo we' pe" akyu" mabo: ra" naonhaung" taungbug: mang: mae" so jham re goe; pa" ra" khyo" ngore pe"mung: nhag' yo: nhao ko" i? ga: phaug' tau" ra".

²⁰Mung" byu qe wa xaung: gaung lai: lo" byaug va". Qhovo: yad: yu yo lai va". Ngadqere: ngonhaung" wa khyad' yu: ru maqhug' shi: ga: ngug: hug' ke' ako".

²¹Nga" byumyu" qe khyoe' pye' qhug' gemung: nga" nho: nhag' lam: re khyoe' boe" byaug va". Ngo wa kaug' ngug: na:- ngo wa nhag' lam: thao" mung: qam: shan va".

²²Gilead mae mocid' majo, i? Ai: mae mocid' sara mana ko" i? Aire pe"mung:- nga" byumyu" qe no magai shi:ko" i?