Read Maru NGUG JI: 2 Bible Online

NGUG JI: 2 - Maru bible

NGUG JI: 2

¹ASANG wa yao" nhag' yo" ruyang Ziun re cad' no; yang no, nghoe' pye' byid' ra". Yao: wa ai: nho: mug:gaung mae" qi" qhang khid: rure byo,qeim: ru boe" byaug nhao: ava". Yao: nhag' yo" ra" ba re- yao: wa yao" Caung:pa" Yham re lhao" re: shapye' to: co' ra".

²ASANG wa- nhag' makhyag' lo: sho' Yuda vogaung: lam: khao: ngo" re phyo' qheim" pye' ra". Aimung: ai: mug: re gug: gam gye vha byid' ra" gyetab jham re phyo' khyo" pye' ra". Yao: wa- ai: kho:kham mung" we' mung" eib kho:kham qere nga: ngai nhao: ra".

³Yao: wa yao" nhag' jam: yo" ruyang Israel nho: qam: re phyo' sin" pye' byid' ra". Gyevo qe li" ra" au: yao: ngore mabao" yu ngad: ra". Yao: wa ja: khao: ngo" re phyo' qheim" ra" myi: we' dakhyo: ngonhaung" re nga" ra".

⁴Yao: wa- gyevo dayaug re we' dakhyo: yao" myo: ngonhaung" re qang: ra". Yao: wa ngonhaung" nho: ngaui baui ngaui lho" jo, qo ngad mo, alhab' re se' pye' byid' ra". Ce: Yerusalem mae yao" zab zab zhau: ra" nhag' jam: yo" ru ngonhaung" the' kham zo" ra".

⁵ASANG wa- gyevo we' dakhyo: Israel re phyo' qheim" pye' ava". Yao: wa ai: nho: gyetab jham we' kho:kham kho" jham re byo; qeim: jo,nhao: ava". Yao: wa- Yuda byumyu" qe: dao mae mathao" magan: ra" kaug' qhui: ru ci: lo byid' ava".

⁶Yao: re ngonhaung" caung:pa" lai: lo: ra" Caung:pa" Yham re yao" yang aje, aman" phyo' sin" pye' ra". Yao: wa gyang" lho" ba na jham we' Dugno: Ba na jham re thao" byaug nhao: ava". Kho:kham pho" we' khinjaung wa dakhyo: za: yao" nhag' yo: re leim zo" ako".

⁷ASANG wa yao" phan re ngag: ha: pye' mung: yao" gyang" lho" ra" Caung:pa" Yham re shapye' to: co' ra". Yao: wa ai: nho: khinqae jham re gyevo qeyang phyo' sin" pye' nae" akhang" byid' ra". Ganhae" dayo, ngonhaung" ngaui bau: ngaui lho" lhaung" caung:pa" lai: lo: ra" jo, qo mae yao: bam aung doe; ra" khyo" hug' ako".

⁸ASANG wa Ziun vang jham gyoe; gyo" ca" nae" ga: myid: phyid' pye' gau ngad: ra". Yao: wa aijham re bin sho' phyo' qheim" pye' nae" rure dang dang qo" ba: yu sho' ka" pye' va". Gyekhug zaung jham we' vang jham wa ana" daga" gyang: gyoe; lang" jo; ako".

⁹Vang" kham: mo" jham wa laug zo: bam mae gyoe; lang" jo; ako". Aijham: nho: kham: kyao" jham wa aje, aman" phyo' sin" pye' ru qhug' ako". Kho:kham we' zug: ade, qe wa ana" pyaung" nha: to" ru qhug' na: ako". Tarha" re mamho" byid: lo:- aimung: lapa qere:- ASANG mae" ve, lho mathe' yu lo:ngad: ako".

¹⁰Yerusalem mae" phug' mao: qe wa myid kang dam: mae sae za: zaung: jo; ako". Yao: bam: au: lam: mae phalhug gag: sheim: mung: yao: bam: gaung mae wa jid: mo" mai bau: yang" ci: ako". Zomyi: nau" qe wa yao: bam: au: lam: re myid gaung khyo goe; gam" ci: ako".

¹¹Nga" nho: myo,jid' jham wa- saung" ngug mung: kyam: byaug va". Nga" alo zo: wa dayin dayo: phyag' ra". Nga" byumyu" qe byo; qeim: ko" ruyang kaug' mung: ngo myaung" byaug va". Zoshao qe we' nug' nau" qe wa vomo" khug mae" hau" mo" khyo jham mae mo; lang" bam: ako".

¹²Yao: bam wa vae: moe; qid shab' ru we' yao: bam: yao: myhi" jham re gyi: ngug: qhu" ako". Yao: bam wa dae de; ruru: hau" mo" khyo jham mae gyang: lang" qin" ako". Aimung: yao: bam: yao: myhi" qe: tao: kheim" khug mae zo" mae" shid: lo" ako".

¹³O" Yerusalem we"- ngo jhid'de; ra" Yerusalem we"- ngo khoru: ba: tho' ta" nae" yha? Nao re ngo khoru: nhag' qo" tang" byid: nae"- khag' re: ceru: dayin dayo: maleim: zo" qu" ngad: ako". Ni" byo,qeim: ra" qug: khai: kyi" khyag' wa nammugdara tham: we' dakhyo: thao" ga: ru majo, ngad: ra". Gai: boe" nae" myid: lao" khyo majo,.

¹⁴Ni" lapa qe wa nao re mhug' ta" ra" dao: mae" je yang: ta" kyo: nae" pe" maqo" ngad: ako". Yao: bam: tarha" kho" dao: wa ni" qobo re khonhae" re: mapug: qhu" lo: nao re mhug' pyag' pye' ra". Yao: bam wa nao re- nhag' lam: tha" maca" ga: myid: jho nhao: ako".

¹⁵Vomo" khyo" su" lai: jao" lo" mo, wa nao re ceim" qu" jung" ako". Yao: bam wa au: lhang lhang mung: Yerusalem nho: byo; qeim: ru jham re qi: jung" ako". Ceru wa ai: yaung" lho" vomo" ngad va" i? Ceru wa mug: myid: nho: nga: yu jao: ngad: ra" i?

¹⁶Ni" gyevo qe alhab' mo, wa nao re ceim" nyhe' mung: nao re nghang" ru we' zhaug' qu" ako". Yao: bam wa yao: bam: nhad' qid jham re lhan" ci mung:- ngonhaung" yang aire phyo' qheim" pye' va". Ce: ba na wa ngonhaung" lao" na: ra" ba na ngad va"- ga: ceim" nyhe' ako".

¹⁷ASANG wa yao: kad' ke' nae" ga: kyaug' lai: lo: ra" mau" re lo" thao" mae kad' thug' ke' ava". Yao: wa ganhae" gaco' yo, mae" ngonhaung" re ta" peim" lai: lo: ru we' dakhyo:- ngonhaung" re nhag' makhyag' lo: phyo' qheim" pye' ava". Yao: wa ngonhaung" nho: gyevo qere aung doe; nhao: ra". Yao: wa ngonhaung" gyang gyo" lo" rumae yao: bam re ngaui bau: nhao: ra".

¹⁸O" Yerusalem we"- ni" vang jham yao: ASANG re zag: hug' yao ge vashao:- ni" ngug byid jham wa myi" re: na" re: qid gyaung: mo" jham we' dakhyo: yug vageshao:- kaug' ngug mung: nao yao" gaung re myaung: gyoe; shid nhao wa,.

¹⁹Myi khyeim khyeim dam: so" to" li"li" mung: yang:-ASANG re hug' yao wa,- Ni" nhag' lam: alhab' we' mung: ni" zoshao qe: qhid' mae"- Hau" mo" khyo kao: khyi" khao: ngo" mae vae: moe' shid: lo" na: ra" zoshao qe: qhid' mae" nhag' khyag' yu: ru qhug' sho' mho' wa,.

²⁰O" ASANG we"- nao: yang yhin" na: ra" mo, re qu" qu" wa,- myiqe: qe wa yao: bam jhid'de; ra" zoshao qenho: maogaung re zo" na: ako". Khinjaung qe we' lapa qe wa- Caung:pa" Yham yao: mae se' pye' qhug' na: ako".

²¹Zoqae qere: mao: zo: qere:- dakhyo: za: hau" mo" khyo mae shid: lang" bam: ako". Zolau: qe we' zomyi: zo: qe wa gyevo qe: shae pyang" yang qam" se' pye' ru qhug' ako". Nao wa nao nhag' yo" ra" ba na mae yao: bam re nhag' makhyag' lo: sho' se' tam" pye' ra".

²²Nao wa nga" avai: ayae gam: sho' mae gyaug ci" ja: poe kad' nae" qhid' mae" nga" gyevo qere khai: to" ra". Aimung: ni" nhag' yo" ra" ai: ba na mae khag' maqo" loe, ngad: ako". Yao: bam wa ngo khau: qhi: mung: jhid'de; ra" nga" zo: bam re se' pye' ako" wo".