Read Maru NGUG JI: 3 Bible Online

NGUG JI: 3 - Maru bible

NGUG JI: 3

¹Ngo wa- Mao"So: yang qobo dae byid' ga" ru pe" ngad: rure ba yaug ngad:-

²Yao: wa ngore- mug: cad' khug khyo je je yang: khe' vhao" ke' ra".

³Aimung: ngore- nhag' khyag' myid mabo: lo: dam: be, be, kad' ra".

⁴Yao: wa nga" gaung sho: re byo; jad: lo" nhao mung: shokhyi" myao nhao: ra". Aimung: nga" shoqug: rere: khyug' pye' ra".

⁵Yao: wa ngore- nhag' lam: mamyan: makhyad' mung: ru we' dayin dayo: kham zo" ra" thaung: mae pyid' lhaung" to" ra".

⁶Yao: wa ngore- shid: ra" cae: jhug tag mug: cad' khug mae maqad maqui" deim" zag: na nhao: ra".

⁷Yao: wa ngore- jao co: taui: jham: yang taui" ra". Ngo wa phao: loe, nae" myid: lao" khyo majo, lo" ra" kyam: byu dayaug ngad: jo, va".

⁸Ngo wa bao" yu: ru qhug' nae" qhid' mae" thoe qi: zag: hug' yao: ke' ngadqere: Mao"So wa matae" gyo: byid: qad ngad: ra".

⁹Ngo khyo su" re khyid au: thaung" ra" ngo lhang: lo" ra" shad' mae laug vang jham kham" go: to" ra".

¹⁰Yao: wa vae dadau: we' dakhyo: ngore lham: na: ra". Yao: wa khangkhyi dadau: we' dakhyo: nga" dao mae byae: zag: ra".

¹¹Yao: wa ngore khyodang cao" yang cao" khe' ra". Ngo re aje, aman" boe" sho' lao" cad' pye' mung: to: co' ra".

¹²Yao: wa- yao" lo, la: re phoe' yu mung: ngore yao" myo: jham: qhid' mae" thao te kad' ra".

¹³Yao: wa yao" myo: jham re nga" nho: gaung khug khyo no, sho' bag: zhaug' ke' ra".

¹⁴Byu qe wa ngore ba gyam ceim" qi: ako". Ngo wa yao: bam alhab' qhid' mae" qinug tu" keim" pho: boe" va".

¹⁵Nga" zo: shaug' qhid' mae" yao" yang ngore byid' gu: alhab' wa kyid kyid kho" ra" dayin dayo: qug: khai: za: ngad: ra".

¹⁶Yao: wa nga" myo,khung: re myid kang dam: mae deim" gyad: ra". Aimung: nga" zaui jham re laug baui yo mae be; phan" pye' ra".

¹⁷Ngo wa qao" zin" ru- yaug yo cae: tae" ru- we' ngaui bau" ru pe" ngad: rure to" myhid' pye' va".

¹⁸Ngo wa myao" sho' daui: na: lo nae" mangad:- ASANG re ngo myid: lao" ru thao" byaug va".

¹⁹Ngo dae no: ru we' na nae" yham maqo" rure myid: beim" na: ru wa nga" qhid' mae" kyid kyid kho" ra" daug ngad: ra".

²⁰Ngo wa aire khyao za: myid: na mung:- nga" byo wa qam: shan: ra".

²¹Ngadqere:- ce: daja: re ngo myid: beim" ke' re myid: lao" jo, qo dam: thug' lo: ra".

²²ASANG: magan mathao" ra" jhid'de; myid we' nhag' khyag' ru wa xo' yang: ajo; jo; shi" ra".

²³Airu wa ne, seim we' dakhyo: gyang: co: mung: ba thug' yo, we' dakhyo: dang: jo, ra".

²⁴Ngo qo" ru alhab' wa ASANG yao: za: ngad: ra". Aimung: yao: mae nga" myid: lao" khyo to" to: va".

²⁵ASANG wa yao: re lam khug: na mo; qhid' mae" gai: ra".

²⁶Aimung: ngonhaung" khyo" yang nhag' lam: qhang qhang to: mung: lao" nae"- yao" yang ngonhaung" re khyad' yu nae" rure lao" nae" ru wa gai: thao" ngad: ra".

²⁷Aimung: ceru re ngonhaung" ve, qae" yo, mae" qo" mho" zhao: yu: re wa gai: thao" ngad: ra".

²⁸Ngonhaung" dayin dayo: qug: khai: phau: zo" re ngonhaung" wa sae za: zaung: jo, nae" ang: ra".

²⁹Ngonhaung" wa- au: gam" mung: goe; vao: re gai: ra". Pe"mung:ga"re- myid: lao" jo, qo bo: re bo shinae".

³⁰Be; ru we' maphug' makhyad' kad' ru qhug' sho' ngadqere:- aigu: alhab' re ngonhaung" khae: yu gai: ra".

³¹ASANG wa nhag' khyag' myid bo: rumung: ngonhaung" re apyad ato maha: pye' nae".

³²Yao: wa ngonhaung" re kaug' qhui nhao ngadqere:- ngonhaung" re jhid'de; ru wa dang mung: qam: bo: ra".

³³Yao: wa ngonhaung" re kaug' nhao: ru we' dae no nhao: rumae ngaui yaug mangad:-

³⁴Ngonhaung" nho: byo jham thaung: khug mae gyoe; gyo" ra" ayo, mae ASANG ba byid' ra".

³⁵Ngonhaung" wa- yao" yang byid' to" ra" akho: akhang" ngag: ha: pye' ru qhug' lao" yao: ba: ra".

³⁶Tarha" yung" mae tarha" din: nyang: re shad' nghung: nhao: ra" au: yao: ba: ra".

³⁷ASANG myid: o: ru za: khonhae" re: alhaung" boe" lo: ra".

³⁸Gai" ru we' makhyang: mashab: ru shid' ja" geim" wa yao" amyin" khyo" boe" lo: ako".

³⁹Ngonhaung" wa- ngonhaung" yao" qobo: ra" mathao mae qobo dae byid' ru leim zo" re- pe"mung: nyhung nae" i?

⁴⁰Ngonhaung" yao" khyo re myid: sun" qu" mung: ASANG jhao" dam: tug' lo" gelang: se,.

⁴¹Ngonhaung" nho: nhag' lam: re- mug:gaung dao mae" Mao"So jhao" phung" byid: mung: akyu" mho' gelang:-

⁴²Ngonhaung" wa qobo shad' mung: tau: lhan" bam va"- aimung: o" ASANG we"- nao wa ngonhaung" re qobo makhyad' byid: shi: ngad: ra".

⁴³Nao wa ngonhaung" re cao" khe' mung: se' pye' ra". Ni" nho: nhag' khyag' myid wa ni" nho: nhag' yo" ruyang nghoe' nyham" pye' va".

⁴⁴Ngonhaung" nho: akyu" mho' thoe: yang maqo" lai: kyao" lo: sho' thau: ra" nhag' jam: yo" ra" jham thaui" yang nghoe' to" ra".

⁴⁵Nao wa ngonhaung" re- mug: myid: dao mae" basad bam boe" nhao: ava".

⁴⁶Ngonhaung" nho: gyevo qe alhab' yang ngonhaung" re ceim" roe" mung: jung" rure qhug' bam va".

⁴⁷Ngonhaung" wa kyi" khyag' ru we' byo,qeim: ru khyo" leim zo" lai: lo va"- ngonhaung" wa gyaug ci" ja: we' gyaug: rumae na: bam:-

⁴⁸Nga" byumyu" qe phyo' qheim" se' tam" pye' ru qhug' ra" mathao mae nga" myo, jid' jham wa ngug byid qid gyaung: jham yug thug' va".

⁴⁹Ngonhaung" re ASANG: yang mug:gaung mae" maqu" qu" wa- nga" ngug byid jham mathao" magan: ra" qid zo: gyaung: khyo" yug: gyo" na nae".

⁵⁰

⁵¹Vomo" mae" myiqe: qe khoru: leim zo" na: rure ngo the' myao lao"- nga" sang: kho: mung: kaug' qhui: ra".

⁵²Ngo wa- ngore nghang: nae" khyo pe" majo; ra" gyevo qe: lo, mae ngho' dadau: we' dakhyo: myhi" lhaung" to" ru qhug' ra".

⁵³Yao: bam wa ngore- dungkhung: khug khyo adaui phe, phe, shapye' khyo" ke' gemung:- dungkhung: nhad' re laug baui: yang pyid' to" ako".

⁵⁴Ngo re qid yang nhai" lo: na mung: shid nae" ru joe" li" na va" ein: ngo myid: pye' va".

⁵⁵O" ASANG we"- dungkhung: athai: mae" ngo nao re khai: yao: ke' ra".

⁵⁶Aimung: nga" hug' yao thoe re tae" gyo: byid: nae" qhid' mae" nao re ngo mho' ra" au: nao gyo: byid' ra".

⁵⁷Nao wa ngore tau: byid: mung: magyaug nae" qhid' mae" ta" ra".

⁵⁸ASANG we"- nao wa ngore khyad' yu nae" joe" li" mung: nga" kao so' re khyad' yu: ra".

⁵⁹Nga" shad' bode, mung: dao: kho' byid: la,- ngore shad' nghung" ra" mau" jham re nao ba byid' ra".

⁶⁰Nga" gyevo qe ngore khoqhi" nghang: ko" ru we' ngore gye kad' nae" kyae: rure nao ba: ra".

⁶¹O" ASANG we"- yao: bam: yang ngore ceim" roe" rure re: nao the' gyo: mung: yao: bam khug: kad' ra" mau" zo" alhab' re yao: bam: byin phyo: mau" alhab' re nao ba: pye' byid' ra".

⁶²Yao: bam wa daba gyam geim" geim" nga" khyo re za: ta" na mung: yao: bam: byin phyo: mau" zin" ako".

⁶³Ne,seim mae" myi" ayo, joe"sho' yao: bam wa ngore jung" ako".

⁶⁴O" ASANG we"- yao: bam kad' lai: lo: ra" mau" zo" mathao mae yao: bam re qobo dae byid: wa,.

⁶⁵Yao: bam re nhang: mung: nhag' lam: thao" lo" nhao: pye' wa,.

⁶⁶Yao: bam re sho: ru: kung" pye' mung: myid gaung: dao mae" jhad' za: se' paui" pye' byid: la,.