Read Maru NGUG JI: 4 Bible Online

NGUG JI: 4 - Maru bible

NGUG JI: 4

¹Ngonhaung" nho: qhi qhi mung: ra" qhang wa sham: lo" va". Caung:pa" Yham mae" laug baui jham wa hau" mo" khyo jham mae abyi asin: boe" jo; ako".

²Ziun nho: zolau: qe wa ngonhaung" qhid' mae" qhang we' dakhyo: phug' de; ako". Ngadqere: ana" yao: bam ne, qug: ci" ra" zhogam: ug' yae: jham we' dakhyo: nug: khyo: cekad' ru qhug' ako".

³Zagne myhi" lhao" re: yao: zo: nug' nau" re nug' jhaug' li" nae". Ngadqere: nga" byumyu" qe wa gola:u ngho' we' dakhyo: yao: bam: zoshao qere abe, akhyad' ce kad' ako".

⁴Yao: bam wa yao: bam: nug' nau" qere moe, shab' phau: nhao mung: to" se' pye' ako". Zoshao qe wa- khag' yang mabyid: nae" zo: shaug re cao" mho' qin" ako".

⁵Qhid' phyao: myho' thao" ra" zo:ve gai zo: mo, wa hau" mo" khyo jham mae moe; shid: lo" ako". Langa: khyo" magan: mago" zo: shaug' mung: khau: qhi" ke' mo, wa basad bam" mae zo:ve pug: qho: qin" ako".

⁶Nga" byumyu" qe wa- Mao"So: lo,khug: mae nyag din taung" gyoe; gyo" lo" ra" Sodom vobyu qe tho' lao" je: dae xo: ra" khyo" qobo dae byid' ru qhug' ako".

⁷Ngonhaung" nho: kho:kham myiqe: zo: qe wa- gyu: we' dakhyo: gyang" san: ako". Qam: byang" ru we' qam: qi: mung: qao" zin" ruyang bao: yaung" ako".

⁸Ana" kam" wa hau" mo" khyo jham mae yao: bam re khag' yang maba: ru lang" bam: ako". Yao: bam: myo, khung: jham wa cag' cag' no; mung: shid: jo; ako". Sag' kaug' we' dakhyo: kyaug' ho: ra" yao: bam nho: sho:qid jham wa yao: bam: shoqug: jham mae lham" de; byaug: ako".

⁹Gye poe mae shid: byaug mo, wa kao so' daui: na nae" qhid' mae" zo: shaug' maqo" mung: zo" mae" vae: moe' shid: lo" mo, tho' je: gai: ako".

¹⁰Nga" byumyu" jhao" joe" li" ra" qug: khai: wa gyaug din ja: bobo: ra". Jhid' de; myid bo: ra" myhi" zang qe wa- yao: bam yao" yao: zo: qere zo:ve khyo" kyug' zo" ako".

¹¹ASANG wa yao" nhag' yo" rure qam: byang" sho' phin" thug' ke' ra". Yao: wa Ziun re myi:mab bam boe" sho' ngha" jheim" khyo" pye' ra" myi: re theim" te' ke' ra".

¹²Khotau mae" khag' re: taung bug: mang: mae" zug: qe lhao" re: Yerusalem vomo" kham: khyo khag' re: maqo" jhin" vao ye: ga: myid: lam: ako".

¹³Ngadqere: yao" lapa qe wa qobo shad' mung: yao" khinjaung qe wa qobo maqo" mo, re shid nhao ko" ra" qobo: mathao yang airu: boe" lo ru ngad: ra".

¹⁴Yao" nho: au: jhaung qe wa hau" mo" khyo jham mae myo,jid mo, we' dakhyo: na: du" lae" qin" ako". Yao: bam wa sa: de, mung: yao: bam re khag' re: maye nug: tin: ngad: ako".

¹⁵Byu qe wa thug' lo" ge,- naonhaung" wa masan masin" mo, ngad: ako" ngonhaung" re datin: ge,- ga: hug' ako". Aimung: yao: bam wa- damung" mae" damung" khyo khag' yang malham: tug yu: ru na: du" lae" qin" ako".

¹⁶ASANG wa yao: bam: qhid' mae" pe" gaung mayug lo:ngad: ra". Yao: bam re yao" yang yao: khe' sin" pye' ava". Yao: wa ngonhaung" nho: khinjaung qe we' au: jhaung qere pe" xan: masun: lo:ngad: ra".

¹⁷Ngonhaung" wa khonhae" re: ngonhaung" jhao" majoe" li" ra" bao" thaug' yu nae" rure maqo" lao" losho' qho va". Ngonhaung" re bao" yu nae" maqo" ra" mung"dan: dalam: mae" bao" thaug' rure xo' yang: lao" bam va".

¹⁸Gyevo wa ngonhaung" re lhaug' qu" na: ra". Ngonhaung" wa hau" mo" khyo mae lhao" maqo" gai: su" qin"- Ngonhaung" nho: ba na jham wa gan: byaug va"- lo" thao" ru joe" li" va".

¹⁹Yao: bam wa mug:gaung mae" dao" lhu: gyo" li" ra" zeim baung: tho' je: phyad: ra" khyo" ngonhaung" re cao" khe' lo: ako". Yao: bam wa ngonhaung" re bug gaung jham khyo joe" sho' cao" khe' qho: ako". Yao: bam wa ngonhaung" re din"pyad' yo mae nyag din taung" li" taung" yu: ako".

²⁰Yao: bam wa ngonhaung" nho: kao so' ajhaung re ASANG: yang khyin: to" ra" kho:kham re jhin" vao li" ra" yaug khao: ngo" lo, mae" ngonhaung" re gug: gam byid: nae" qhid' mae" ngonhaung" yang myid: lam: to: yaug re yao: bam: yang taung" yu: pye' byid' ako".

²¹Edom we' Uza vobyu qe we"- xo' yang: qi ge,- naonhaung" qo" ngaui bau" au: ngaui bau" na ge,- naonhaung" qug: khai: kyi" khyag' ru wa joe" li" na: ra". Naonhaung" re: qho' phau" ru we' gaung pyad' su" gyang: lang" qin" li" genae".

²²Ziun wa yao: yao" qobo jhin xe' ava". ASANG wa ngonhaung" re pyaung" nha: to" rumae myao" sho' mato: lo: nae". Ngadqere: Edom we"- ASANG wa nao re qobo dae byid' li" nae" yao: wa ni" qobo mau" zo" jham re paui: qhu" li" nae".