Read Maru NGUG JI: 5 Bible Online

NGUG JI: 5 - Maru bible

NGUG JI: 5

¹O" ASANG we"- ngonhaung" mae boe" lai: lo: rure myid: beim: byid: la,- ngonhaung" re qu" mung: ngonhaung" nho: nga: yeim khyo re myao byid: la,.

²Ngonhaung" nho: jo,nho" jham wa taung bug byubang" qenho: lo, mae joe" jo; ra". Taungbug: mang: byu qe wa ngonhaung" yham khug mae laung" jo; ako".

³Ngonhaung" yao: pho" bam wa gyevo qeyang se' pye' qhug' ako". Aimung: ana" ngonhaung" nho: yao: myhi" bam wa cug' mo" mo" na: ako".

⁴Ngonhaung" shaug' ra" qid phug' re ngonhaung" byid: ca". Ngonhaung" ngha" nae" thao: re ngonhaung" vai byid: ca" ra".

⁵Ngonhaung" wa- loze jham re gola:u jham re we' dakhyo: cebe, keim" ru qhug' mung: myaung" bam va". Ngadqere: thang: yu nae" akhang" mabyid: ngad: ako".

⁶Ngonhaung" wa kao so' qo" daui: na- laug za: zo: shaug' qo" yu nae" qhid' mae" Egutu we' Asuri khyo ye: mho' qin" ra".

⁷Ngonhaung" phug' pho" qe wa qobo shad' lhoe" avako". Ana" wa yao: bam mana lo:- Aimung: yao: bam: kheim: so' mae" khag' yang re: ngonhaung" re maqo" khyad' yu ngad: ako". Ngonhaung" wa yao: bam: qobo phug' re dayin dayo: kham zo" na ca" ra".

⁸Ngonhaung" wa jeim tho' maje: gai: ra" byu qeyang eib: ru qhug' bam va". Yao: bam: kheim: so' lo, mae" khag' re: ngonhaung" re maqo" khyad' yu ngad: ako".

⁹Seyo: vogaung: mae byu se' mo, na: du" qin" ako". Ngonhaung" wa zo:ve qho zo" qin" au: ngonhaung" kao so' re dan: pye' ca" ra".

¹⁰Vae: moe' ru wa ngonhaung" re xomyid: jam" nhao va". Aimung: ngonhaung" nho: shoqid wa myi:khyeim" we' dakhyo: laung: ra".

¹¹Ngonhaung" yham sang myhi" qe wa- Ziun bam mae yao: deim" zag: yab: pye' ru qhug' ako". Yuda vogaung: khao: ngo" mae ngonhaung" nho: myiqe: zo: qe wa matarha" deim" zag zo" ru qhug' ako".

¹²Ngonhaung" au: jhaung qe wa taung" yu: mung: cui" lhao" se' pye' ru qhug' ako". Ngonhaung" nho: phug' mao: qere maphug' makhyad' kad' ako".

¹³Ngonhaung" nho: zolau: qere- jeim re we' dakhyo: maqad maqui" khaung: gyag nhao: ako". Yauggai nau" qe wa- thao: qo ala: vin mung: gyang: be; qin" ako".

¹⁴Mao: zo: qe wa- vomo" kham: mae mazaung lo:ngad: ako". Ve, qae" qere: nghaui" thoe make' lo:ngad: ako".

¹⁵Ngaui pyo" ru wa ngonhaung" kao so' gyaung: khyo mae" thug' lo" baui" byaug va". Kaug' qhui: ru wa- ngonhaung" nho: go" nhan" rumae jo, qo tha" yu: pye' ra".

¹⁶Ngonhaung" phug: ru alhab' mae" daja: re: madang lo:- Ngonhaung" qobo shad' lhoe" mung: ana" ngonhaung" jeim: va".

¹⁷Ngonhaung" wa ngonhaung" nhag' kao" mae no mung: ngonhaung" nho: ngug byid jham khyo" maqo" qu" kyao" ke' lo:ngad: ra".

¹⁸Pe"mung:ga"re- Ziun bam wa cae: jhug tag jo; jo; mung: shapye' to" ru qhug' na: ra". Aimung: seyo: zag ne jham wa ai: nho: byo: qeim bam khaung: mae jhug' du" qin" ako".

¹⁹Ngadqere:- O" ASANG we"- nao wa apyad ato mae kho:kham ngad: ra". Aimung: ayo, aban: thao" sho' nao eib: na: li" nae".

²⁰Nao wa ngonhaung" re pe"mung: yang: ai myhao" myao" sho' shapye' to" i? Nao ngonhaung" re dam: myid: beim: shinae" i?

²¹ASANG we"- ngonhaung" re nao jhao" dam: jhui" tug' yu la,- ngonhaung" re dam: jhui" tug' yu la, wo"- ngonhaung" nho: ganhae" gaco' mae" phungbao re dam: tug' bao nhao la,.

²²Mangad: lao"- nao wa ngonhaung" re apyad ato mae ngag: lhaui" pye' va" i? Ni" nhag' yo" ru wa- kyodam: majo; lo: i?