Read Maru EZEKELA 1 Bible Online

EZEKELA 1 - Maru bible

EZEKELA 1

¹Sam xe zin ein: zin lho" byid khye' khye' ngo" ba ein: ba re Buzi nho: yauggai zo: ngo khinjaung Ezekela wa pyaung" nha: to: qhug' ra" Yuda byu qe we' daga" Babelon mung" Kheba qid gyaung: nhae mae na: jo;- Mug:gaung bung" li" mung: ngo wa Mao"So re qhu" lho mae the' myao:-

²(Ai wa kho:kham Yehoiakhin pyaung" yu: ru qhug' thao ngo" zin ein: zin ngad: ra".)

³Ai: Babelon mung" mae" Kheba qid gyaung: nhae mae ngo re ASANG jhau ra" thoe re ngo the' gyo: mung: yao" nho: kheim: so' rere: qo" kham: yu: ra".

⁴Ngo tau: qu" ke' re mug: am: shad' khyo" la qam" dalam: lo: na: rure ngo the' myao:- Jham thaui: aqi: dalam: mae" lhe' cad' thug' li" mung:- ai: avai: ayae mae" mug:gaung wa bao: jo; ra". Lhe' cad' cad' na: ra" jo, qo mae gyid bo" ru" ru daja: bo" bao: jo; ra".

⁵La qam" agaung: kao" mae byu lho ru" ra" gug'nyhug' byid dau: re ngo the' myao:-

⁶Ngadqere:- ai jham mae" dau: khao:ngo" wa- myo, khung: byid lam: lam: de, mung: daung byid lam: lam: de; ako".

⁷Yao: bam: khyid jham wa din: din: mung: yao: bam mae nung: lo: khu sin: ru" ru de; ako". Ai jham wa boe; jhad' to" ra" gyid: bo" we' dakhyo: bao: qhui: jo; ako".

⁸Yao: bam: myo, khung: byid lam: we' daung byid lam: lam: tho' mae- yao: bam dau: khao:ngo" mae byu: lo, byid lo, wa daung qao: khao:ngo" mae dalo, lo, de; ako".

⁹Gug'nyhug' dau: khao:ngo" mae" daung shid' lam: lam: wa phyid: lhu: khyo" to: mung: ai: gug'nyhug' jham wa yao: bam: daung au: jho" tin" ci yang: byid khyug mung: boe" jo; ra". Yao: bam dao" qui" lo" re yao: bam: gaung jham re malhang lo: za: daga" ga" qui" lo" ako".

¹⁰Kaoso' daui: ra" gug'nyhug' dau: khao:ngo" mae majho" dau: ra" myo, khung: byid lam: lam: de; ako". Qhid' kheim: shad' mae byu: myo, khung:- lo, yo shad' mae khang khyi myo, khung:- lo,kaung: shad' mae nung: lo: myo, khung:- nhaung thao" shad' mae zeim baung: myo, khung: de; ako".

¹¹Gug'nyhug' dau: khao:ngo" nho: daung shid' lam: daung au: jham to' ci: ru wa ayae mae" gug'nyhug' nho: daung au: mae zao" tin" to: mung:- dang: ra" yao: bam: daung shid' lam: wa yao: bam: gaung re sham" dang" nghoe' ci: ako".

¹²Gug'nyhug' dau: khao:ngo" wa byid shad' geim" khyo myo,nho qang mung: ai: phung: wa malhang: phaug' ca" lo: yao: bam o: ra" shad' khyo gai: ye" ako".

¹³Ai: gug'nyhug' jham mae" khyao za: su" qui" na mung: myi: shae de; na: ra" myidam we' dau: ru daja: bobo: ra". Myishae de; li" mung: lhe' cad' myi: jhang: jham zin: thug' li" ra".

¹⁴Ai: gug'nyhug' jham yao: re- lhe' cad' we' dakhyo: thoeshad' ceshad' khyo lhe' cad' qhi" phyad: khyo" thug' jhoe" qin" ako".

¹⁵Ai: gug'nyhug' byid dau: re ngo qu" na: au:- lhin" ce' byid ce' wa myid gaung mae zao" tin: mung: dace' nhae mae dace' jo; jo; ko" rure ngo the' myao:-

¹⁶Lhin" ce' byid ce' geim" wa daru" ru za: ngad gemung: ce' khao:ngo" wa phug' de; laug we' dakhyo: bao: qhui: jo; ako". Aimung: ce' khao:ngo" wa dace' khug mae gatau dace' te' to" ruru: zhaug' to" ra".

¹⁷Ailao" lhin" ce' jham wa byid shad' geim" khyo galin: gago: khyao khyao qo" lhang: qin" ako".

¹⁸Lhin" ce' naung" gam: gam: gu: mae wa myo,jid' jham de; nghoe' bam: ako".

¹⁹Gug'nyhug' jham lab: du" lo" khao:ngo" lhin" ce' jham wa aijham we' daga" bo: qui" lo" ako". Aimung: gug'nyhug' jham myid gaung mae" do,lo" lao" lhin" ce' jham re: bodo, lo" ako".

²⁰Gug'nyhug' jham wa yao: bam nug: ra" khyo ye: mung:- lhin" ce' jham wa gug'nyhug' jham kad' ra" khyo: yao: cao" kad' ako". Pe"mung:ga"re yao: bam re gug'nyhug' jham: yang zaui" ci: ako".

²¹Aimung: gug'nyhug' jham lab: du" lo" lao" ngad ngad- thang: lo" lao" ngad ngad- mug: khyo do, lo" lao" ngad ngad- lhin" ce' jham re: airu: yao: cao: kad' ako".

²²Gug'nyhug' jham: nho: au: lam: jham: au: tho' mae wa- qhi qhi mung: laug phyu: yang kad' to: nhohab ru" ru akhung" dalam: jo; ra".

²³Ai: akhung" agyid' mae gug'nyhug' jham ye; jo, mung: dau: khao:ngo" wa yao" anhae mae" dau: shad' khyo daung shid' lam: re phyid: lhu: ke' ra". Daung gatau shid' lam" yang wa yao: yao" gaung re nghoe' ci: ra".

²⁴Ngo wa- yao: bam dao" lo" ra" au: yao: bam: daung jham myang thoe re the' gyo"- ai: myang thoe wa panglai: myang thoe we' dakhyo:- gyetab aqi: datab: nho: thoe we' dakhyo:- qam: so' bo: thao" ra" Mao"So: thoe we' dakhyo: gyo" dau: ra". Yao: bam dao" ru thang lao"- yao: bam: daung jham re kan: ci: ako".

²⁵Ngadqere: yao: bam: au: dao mae" akhung" atho' shad' khyo" thoe dathoe amyang: na: ashi"-

²⁶Ai: akhung" atho' mae wa laug nyhug: yang kad' to" ra" zaung tao" ru" ru daja: jo, mung: ai: zaung tao" dao mae wa byu ru" ru dayaug zaung: jo; ra".

²⁷Ai: byulho wa myikhyeim" agaung: mae" gyid: bo" we' dakhyo: qhi qhi mung: bao: jo: ra". Ai wa daqang: geim" mae bo" bao qi: khyo" bao: jo; ra".

²⁸Ai: bo" bao mae sang yhao mae" anyhug alhab' bo: ra". Ceru wa ASANG na: jo; rure qhu" byid' ra" myo, qhi qhi sho' ru bo" bao ngad: ra". Ceru re ngo myao lao"- ngo wa myid gaung khyo lamhaung: lagoe, goe; gyo" mung: lang" lo" va". Ailao" thoe dathoe jhau: na: rure ngo the' gyo" ke' va".