Read Maru EZEKELA 10 Bible Online

EZEKELA 10 - Maru bible

EZEKELA 10

¹Daui: ra" gug'nyhug' jham: nho: au: jham: dao mae" akhung" ru" rure ngo qu" ke' re yao: bam: au: tho' mae phug' de; ra" laug nyug: yang kad' to" ra" zaung tao" ru"ru the' myao:-

²Mao"So wa- jid: mo" mai bau: ve, yaug re ai: gug'nyhug' jham: agyid' khug mae" lhin" ce' jham: agyo: khyo ye: mung: ni" lo, mae nga" na: ra" myi:gyoe: byang" sho' gag: sai" yu wa,- Aimung: ai: myi:gyoe: jham re ai: vomo" dao mae pye' sin" ke' wa,- ga: ta" ra".

³Yao: ye" lo" rure ngo cao" qu" ke'- Caung:pa" Yham khug khyo yao: vao ye" lo" ra" au: gug'nyhug' jham wa Caung:pa" Yham mug: thao shad' mae ye; jo, gemung:- jham thaui: dathaui: wa- vang" akhug shad' mae byang" jo; ra".

⁴ASANG: nho: qhid' kheim: mae" qhi qhi mung: ra" bo" bao wa- gug'nyhug' jham mae" to" do, lo mung:- Caung:pa" Yham khyo vao lo" ra" kham shad' khyo qui" lo" ra". Ailao" ai: jham thaui: wa Caung:pa" Yham mae byang" byaug: ra". Aimung: vang" mae bo" bao bao: qhui: jo; ra".

⁵Gug'nyhug' jham: nho: daung jham mae" thoe wa taung gaung shad' vang" mae" lhao" re: the' gyo" ra". Airu wa qam: so' bo: thao" ra" Mao"So: thoe we' dau: ra".

⁶ASANG: yang ai: jid: mo" mai bau: ve; ra" yaug re- lhin" ce' jham: agyo: mae" myi: re yu nae" qhid' mae" amyin" byid' ke' lao" ai: yaug wa vao ye: mung: lhin" ce' dace' nhae mae yeye; jo; ra".

⁷Gug'nyhug' jham mae" dadau: wa- yao: bam: phaung gaung: mae jo; ra" myikhug' khyo yao" lo, re yheim" ke' mung: myi:gyoe: jham re gaug: yu yang:- jid: mo" mai bau: ve, yaug: nho: lo, khug mae ke' byid' ra". Ai: yaug wa myi:gyoe: re yu ci mung: thug' lo" ra".

⁸Ai: gug'nyhug' dau: khao:ngo" nho: daung jham: aqao: mae xao su byu: nho: lo, ru" ru de; ako".

⁹Ngo wa- daru" za" ra" lhin" ce' byid ce' wa gug'nyhug' dadau" nhae mae dace' de; jo; rure re: the' myao:- lhin" ce' jham wa phug' de; ra" laug jham we' dakhyo: de; bao mung: lhin" ce' lam: khao:ngo" mae gatau lhin" ce' dalam: lam: ajheim vang" vang" jho" thug' zhaug' te' to" ako".

¹¹Gug'nyhug' jham su" qui" lo" lao"- ai: shad' khao:ngo" khyo qo" lo" ra". Yao: bam alhab' wa malhang lo: za: yao: bam ye: nug: ra" shad' khyo daga" qo" lo" ako".

¹²Yao: bam: gaung khyao jham- dao kao" jham- lo,jham- daung jham we' lhin" ce' jham wa- myo,jid' za: byang" de; nghoe' jo; ako".

¹³Ce: lhin" ce' jham wa- lhang: na: ra" lhin" ce' jham ga: ta" na: ra"- thoe dathoe re ngo the' gyo".

¹⁴Gug'nyhug' dau: khao:ngo" mae myo, khung: byid lam: lam: de; ako". Sao Qhid' myo, khung: wa nung: jhaung nho: myo, khung: ngad: ra"- shid' lam: ein: lam: wa xao su byu: myo, khung: ngad: ra". Sam lam: ein: lam: wa khang khyi myo, khung: ngad: ra". Aimung: byid lam: ein: lam: wa zeim baung: myo, khung: ngad: ra".

¹⁵(Yao: bam wa Kheba qid gyaung: yae mae ngo myao co' va" gug'nyhug' jham yao: ngad: ako".) Ai: gug'nyhug' jham mug: phyo: khyo do, lo" mung:-

¹⁶Du" qui" lo" au: re- lhin" ce' jham wa yao: bam we' daga" qui" lo" ako". Dao" lo" nae" qhid' mae" yao: bam: daung jham re phyid: lhu: ke' khao:ngo" lhin" ce' jham wa yao: bam we' daga" alo" na: ashiko".

¹⁷Gug'nyhug' jham thang lao"- lhin" ce' jham thang: ako". Gug'nyhug' jham dao" lo" lao" ai: lhin" ce' jham re: bo: lo" ako". Pe"mung: ga"re gug'nyhug' jham wa aijham re zaui" ci: ako".

¹⁸Ailao" ASANG: nho: qhid' kheim: mae" qhi qhi mung: ra" bo" bao wa Caung:pa" Yham khyo vao ye" ra" kham: dung: mae" phao: thug' lo" ra". Aimung: ai: gug'nyhug' jham: atho' mae" jo, qo khyo qui" lo" ra".

¹⁹Ngo lhaug' qu" na: au: re- yao: bam wa daung jham re phyid: ke' mung: myid: gaung mae" adao khyo dao" do, lo" ako". Aimung: lhin" ce' jham re: yao: bam we' daga" lo" ako". Yao: bam wa Caung:pa" Yham nho: ba thug' shad' kham: dung mo" mae thang mung:- qhi qhi mung: ra" bo" bao wa yao: bam: atho' mae jo; jo; ra".

²⁰Ngo wa yao: bam re- Kheba qid gyaung: mae Israel qenho: Mao"So: agyid' mae myao co' va" ra" gug'nyhug' jham yao: ngad: ko" rure ba: qu" se" ke' va".

²¹Yao: bam mae" dau: khao:ngo" mae myo, khung: byid lam: lam:- daung byid lam: lam: we' yao: bam: daung jham: aqao: mae xao su byu: nho: lo, ru" ru dalam: lam: de; ako".

²²Yao: bam: myo, khung: jham wa Kheba qid gyaung: nhae mae ngo the' myao co' va" ru we' jhaug' yao: qu" dau: ako". Gug'nyhug' dau: khao:ngo" wa qhid' kheim: shad' khyo vang" vang" za: du" qui" ye" lo" ako".