Read Maru EZEKELA 12 Bible Online

EZEKELA 12 - Maru bible

EZEKELA 12

¹ASANG wa ngo re jhau: ra".

²Shid ba: ra" yaug we"- nao wa tau: lhan" ra" byumyu" qenho: phaung gaung: mae daui: na: jo; ra". Yao: bam myo; jid' de, ngadqere: pe" mamyao: ngad: ako". Yao: bam nokhye' de; gengadqere:- pe" mathe' gyo: ngad: ako". Pe"mung:ga"re yao: bam tau: lhan: myid bo: ako".

³Shid ba: ra" yaug we"- ana" gye phao phao: khug: qin" yaug dayaug we' dakhyo: zai seim" dang: wa, aimung: mug: macad' shi: mae" thug' su" qhid wa,- nao phao: thug' lo" ru we' gatau: jo, qo khyo ye" lo" rure yaug khao:ngo" the' myao ko" vashao:- ai: tau: lhan: mo, wa nao re the' myao: re the' myao vageshao:-

⁴Na" gaung myo, myao shi" au: re- ni" zai jham re pyaung" nha: to: qhug' ru qhid' mae" ein: seim" dang" qhu" wa,- ai:thao pyaung" nha: to" ru qhug' ra" khyo nao ye" lo" nhohab myi" thao zo" mae nao ye" lo" rure yao: bam ceim" lhaug' qu" myao: ke' vageshao:-

⁵Yao: bam ceim" lhaug' qu" na ko" au:- ni" yham mae" khinqae mae abung" dabung" cad' phung" mung: ni" zai zeim re ai: khyo" yu: thug' lo" wa,-

⁶Ni" zai zeim re ni" lo,sin mae gaug: kai" vo; ci mung: nao khai: khyo ye" lo" na: rure mathe' myao sho' ni" myo,jid' re nghoe' ci yang: mug: cad' yo khyo thug' ye" lo" rure yao: bam lhaug' qu" ko" vashao:- nao kad' ru wa Israel byumyu" qe: qhid' mae" ta" peim" ru ngad: li" nae"- ga: ta" ra".

⁷Ngo wa ASANG: yang ngo re kad' nhao: ru kad' va". Ai: ba ngo wa- phao: khug: qin" ru dayaug we' dakhyo: zai seim" dang: mung: ai: ba: myi" thao mug cad' qhid: li" au: ngo wa khinqae mae abung" dabung" re nga" lo, yang phung" mung: phao: thug' lo" va". Yaug khao:ngo" ceim" lhaug' qu" na ko" au:- ngo wa zai zeim re nga" lo, sin mae gaug: kai: mung: phao: thug' lo" va".

⁸Thao: ba ne, kao-

⁹ASANG wa ngo re jhau: ra". Shid ba: ra" yaug we"- ana" ce: Israel byumyu" tau: lhan: mo, wa nao pe" kad' na: rure myid' na: ako".

¹⁰Yao: bam re kho:kham ASANG ngo ta" na: ru yao: bam re ta" kyo: wa,- ce: mung dao: wa- Yerusalem mae eib: na: ra" kho:kham nau" we' aimae na: ra" mung" byu alhab' mo; qhid' mae" ngad:-

¹¹Nao kad' ru wa yao: bam mae boe" lo nae" aso: ngad: ru yao: bam re ta" kyo: wa,- yao: bam wa phao: khug: qin" mo, we' taung" to" ra" thaung: byu qe boe" li" genae".

¹²Yao: bam re eib: na: ra" kho:kham nau" wa yao" qhid' mae" vang khyae bao mae dau" phung" byid' ra" khyae bung" khyo" mug: cad' yo mae yao" mai bau: zeim re lo, sin mae gaug: vin mung: phao: loe; lo" li" nae". Yao: wa yao" nho: myo,jid' jham re nghoe' ci mung: yao: khai: khyo ye" lo" na: rure mamyao nae".

¹³Ngadqere:- ngo wa nga" geim re pheim: myhung" ke' mung: ai: yang yao: re taung" myhi" yu nae". Ailao" ngo wa yao: re Babelon vomo" khyo jhui" lo" nae". Ai: jo, qo mae yao: mamyao lo: shid: lo" li" nae".

¹⁴Ngo wa yao" nho: kho:kham vang" mae" byu qe alhab' yao" nho: pha,jhi" byid: mo, we' kao lhaug' mo, re shad' khao:ngo" khyo khe' sin" pye' byid: mung: su jham wa yao: bam re se' pye' nae" ga: cao" qho: qin" li" genae".

¹⁵Ngo: yang yao: bam re gatau: byumyu" qe: phaung gaung: khyo we' taung bug: mung"dan: khaung: mae khe' sin" pye' au:- ngo wa ASANG ngad: rure yao: bam ba: li" genae".

¹⁶Ngo wa yao: bam mae" dajhid' zo: re gye khe' poe mae"- zo:ve bao: khug' mae" we' no: phyo: aqam" mae" mashid na: dang nhao nae". Aimung: ai: byumyu" qe: nho: phaung gaung: mae- yao: bam khonho" maca' majhad' ngad: rure beim: so: mung: ngo ASANG ngad: rure aso: xam" yu li" genae".

¹⁷ASANG wa ngo re jhau: ra".

¹⁸Shid ba: ra" yaug we"- nao zo" na: au: nin" wa,- aimung: nao qid shaug' na: au: gyaug: nan" wa,-

¹⁹Ceru wa ai: mug: mae daui: na: shi" ra" mo, Yerusalem vobyu qere- kho:kham ASANG pyang: ke' ra" mungdao: ngad: ein: damyu" geim" re yeta" kyo: wa,- yao: bam zo" ra" au: nin" mung: shaug' ra" au: gyaug: nan" li" genae". Yao: bam: mug: myid wa pyad lad sade" boe" byaug: li" nae". Pe"mung:ga"re- ai: mae na: ra" yaug khao:ngo" wa tarha" maci ngad: ako".

²⁰Ana" byu byang" na: ra" vomo" jham wa- phyo' qheim" pye' ru qhug' li" genae". Aimung: seyo: vogaung: jham re din"pyad' yo boe" nhao: pye' nae". Ailao" ngo ASANG ngad: rure yao: bam ba: li" genae"- ga: ta" ra".

²¹ASANG wa ngo re jhau: ra".

²²Shid ba: ra" yaug we"- Israel byumyu" qe wa pe" mung: yang: ayo, lai: lo" mung: ta" to" ru wa pe" maboe" lo:- ga" ra" ce: dao: zham" re dam: paug' ta" na ko" laug i?

²³Ana" airu we' sin: yang: qam: so' bo: ra" kho:kham ASANG ngo ta" ca" ru- yao: bam re ta" kyo: wa,- ngo wa ai: dao: zham" re thao" nhao: pye' nae". Airu re Israel mung" mae malhaung" paug' ta" lo: genae". Ai: atha" yao: bam re ceru: ein: ta" kyo: wa, ayo, joe" lo va"- aimung: ta" to" ru jham jo; boe" li" nae"- ein: ta" wa,-

²⁴Israel byumyu" qenho: phaung gaung: mae mhug' pyag' ra" qhu" lho jham we' khyo nghung: jhui" nghung" ra" lapa dao: jham majo, lo: nae".

²⁵Ngo ASANG yao:- yao: bam re jhau mung:- ngo ta" ru boe" lo: li" nae". Byin nhan" manhan" na lo: nae"- tau: lhan: mo, naonhaung" we"- naonhaung" yao" apyad mae ngo kad' ke' nae" ein: naonhaung" re ta" peim" to" rure ngo kad' boe" nae". Ngo yao: jhau: ke' va"- ga: kho:kham ASANG ta" ra".

²⁶ASANG wa ngo re ta" ra"- shid ba: ra" yaug we"- ni" qhu" lho jham we' lapa dao: jham wa cethao: ne, gyai va: shi" ayo, mae" khyo angad: ga: Israel byumyu" qe myid: jho: ako".

²⁸Aimung: yao: bam re- ngo kho:kham ASANG ceru: ta" ra" ein: ta" kyo: wa,- byin nhan nhan" na lo nae" mangad:- ngo ta" to: va" rure kad' boe" ke' nae". Kho:kham ASANG wa ta" va".