Read Maru EZEKELA 14 Bible Online

EZEKELA 14 - Maru bible

EZEKELA 14

¹Israel au: jhaung: daqhae: wa ASANG myid: o: ru myid: zham: qu" nae" qhid' mae" ngo jhao" li" ako".

²Ailao" ASANG wa ngo re dao: jhau: ra".

³Shid ba: ra" yaug we"- ce: byu jham wa yao: bam: nhag' lam: re solho jham khyo byid' pye' mung: solho jham: yang yao: bam re qobo khug khyo jhui" she: lo" nhao: ako". Ngo yang dao: phyid' byid' li" nae" laug- ga: yao: bam myid: jho ko" ra" i?

⁴Ana" yao: bam re- kho:kham ASANG ngo ta" na: ru yao: bam re dao: jhau mung: ta" kyo: wa,- Israel byumyu" mae" yao: yao" nhag' lam: re solho jham khyo byid' pye' mung: ai: solho jham: yang yao: bam re qobo jhui" shad' nhao: ra" yaug khao:ngo" lapa dayaug jhao" li" myid' qham: ngad re- ngo mae" dao: phyid wa yao" nho: solho jham myo: sho' the' yu nae" man: qi" ra" ga" ra" dao: phyid ngad nae".

⁵Ai: sulho jham alhab' wa- Israel byumyu" qere ngo mae" va: khyo jhui" lhang: lo" nhao ngadqere:- yao: bam: dao:so: zaung: rure nga" dao: phyid yang dam: qo" aung: nghoe" yu nae" ein: myid: lao" ra".

⁶Aimung: ana" wa- kho:kham ASANG ngo ta" na: ru Israel byumyu" qere ta" kyo: wa,- dam: lhang: tug' lo mung: naonhaung" nho: maca' majhad' qu" cae: sho' ra" solho jham re to" pye' co' ge,-

⁷Israel byumyu" qemae" dayaug yaug ngad: re ngad- Israel byumyu" qe: phaung mae na: ra" taung bug byumyu" qe mae" dayaug yaug ngad: re ngad- ngo mae" lhang: phaug' lo" mung: solho jham re caung:pa" lo" yang: ai: thao lapa dayaug re yemyid' qham: qu" ngad: re- kho:kham ASANG ngo wa yao: re yao" nho: dao: phyid byid: nae".

⁸Ngo wa yao: re ngag: thaug' pye' nae". Ngo wa yao: re aso: toe' pye' nae". Yao: re nga" byumyu" qenho: phaung mae" yu: pye' nae". Ailao" naonhaung" wa ngo ASANG ngad: ru ba: li" genae".

⁹Lapa dayaug yaug qe shad' ra" dao: phyid re byid: nae" qhid' mae" mhug' pyag' ru qhug' ngad: re- ngo ASANG: yang yao: re mhug' pyag' pye' yang: ngad: li" nae". Ngo wa yao: re Israel byumyu" qe: phaung mae" yu: pye' nae".

¹⁰Lapa pho" we' li" myid' qham: qu" yang shid' zo" geim" wa qobo dae dakhyo: za: qo" de, zo: genae".

¹¹Ngo wa- Israel byumyu" qe ngo re mato: co' genae" we' yao: bam: qobo jham: yang yao: bam yao" gaung re maphyo' qheim" pye' genae" qhid' mae" ceru re kad' ke' nae". Yao: bam wa nga" byumyu" ngad mung: ngo wa yao: bam: Mao"So boe" li" nae". Kho:kham ASANG ta" va"- ga: ta" ra".

¹²ASANG wa ngo re jhau: ra".

¹³Shid ba: ra" yaug we"- mung"dan: dalam: wa qobo shad' mung: ngo re jhaug' mazaug ngad: re- ngo wa nga" lo, re yheim" ke' mung: ai: mung"dan: mae" zo:ve re phyo' qheim" pye' byid: nae". Ngo wa bao" khug' re nhao: ke' mung: byu we' gug'nyhug' jham re dakhyo: za: se' pye' nae".

¹⁴Ai: byu sam zo: Noa- Daniela we' Yoba qe ai: mae na: bam gengadqere:- yao: bam: gai: ru wa yao: bam: kao so' jham re za: aqo" khyad' yu: li" genae"- kho:kham ASANG ta" to: va".

¹⁵Mangad: lao" ngo wa- byu jham re se' nae" seyo: gug'nyhug' jham re nhao: ke' byid: mung:- ai: mug: myid khyo" khag' gyaung: mavae" su" lai: lo" sho' gyaug ci" ja: jo, qo boe" nhao: pye' nae".

¹⁶Aimung: ai: byu sam zo: qe ai: jo, qo mae na gengadqere:- kho:kham ASANG ngo wa daui: na: ra" Mao"So ngad: ra". Amung: yao: bam wa yao: bam: zoshao qere lao" re: maqo" khyad' yu: li" genae". Yao:bam yao" nho: kao so' jham re za: qo" khyad' yu mung:- ai: mug: myid wa din"pyad' yo boe" lo" li" nae".

¹⁷Mangad: lao"- ngo wa ai: mung"dan: khyo mang: byo; rure nhao: ke' byid: mung:- byu we' gug'nyhug' jham re jhad' yu: pye' nae" qhid' mae" phyo' qheim" ba: ra" shae lhae jham re nhao: ke' byid: nae".

¹⁸Aimung:- ai: byu sam zo: ai: jo, qo mae na gengad yang: lao" re:- kho:kham ASANG ngo wa kao so' daui: ra" Mao"So ngad: ra". Amung: yao: bam wa yao: bam: zoshao qere lao" re: maqo" khyad' yu genae"- yao: bam wa yao: bam: kao so' jham re za: qo" khyad' yu: li" genae".

¹⁹Ngo qe- ai: mung"dan: khyo qam" no daja: re nhao: ke' byid: mung: nga" nhag' yo" ru yang: byu myo: sho' we' gug'nyhug' myao: sho' re se' pye' mung: kao so' myo: sho' re yu: pye' ngad: re-

²⁰Noa- Daniela we' Yoba bam qe ai: jo, qo mae na: bam gengad yang: lao" re:- kho:kham ASANG ngo wa kao so' daui: na: ra" Mao"So ngad: ra". Amung: yao: bam wa yao: bam yao" zoshao qere lao" re maqo" khyad' yu: li" genae"- yao: bam: gai: ru wa yao: bam yao" kao so' jham re za: aqo" khyad' yu: li" genae".

²¹kho:kham ASANG wa ceru: ta" na: ra". Ngo wa byu qe we' gug'nyhug' jham re dakhyo: za: se' pye' nae" qhid' mae" nga" nho: dae xo: thao" ra" qobo dae byid lam: ngad: ra" mang byo; ru bao" khug'- seyo: gug'nyhug' we' no phyo: aqam" re Yerusalem khyo nhao: ke' byid: nae".

²²Dayaug yaug qe mashid lo: qo" na: dang mung: yao: bam: zoshao qere qo" khyad' yu ko" ngad: re- yao: bam nao jhao" khonhae" li" lo: genae" rure qu" to: wa,- yao: bam khonho" makhyang: mashab ko" rure qu" wa,- aimung: ngo: yang Yerusalem dao mae byid' ra" qobo dae wa jo: ra" rure myid lam wa,-

²³Ailao" nao wa- ngo kad' ru ja: khao:ngo" qhid' mae" gai: ra" athao jo; rure ba: li" nae"- ga: ta" ra". Kho:kham ASANG ngo ta" to: va".