Read Maru EZEKELA 20 Bible Online

EZEKELA 20 - Maru bible

EZEKELA 20

¹Ngonhaung" pyaung" nha: to: qhug' ru nhad' zin ein: zin lho" ngo" khye' daxe ba: ba ngad: ra". Israel byu phaung mae" au: jhaung: daqhae: wa ngo jhao" li" mung: ASANG myid: o: ru we' sin: yang: myid' qham: qu" ako". Yao: bam wa nga" qhid' kheim: mae li" zaung: bam: ako".

²Ailao" ASANG wa ngo re jhau: ra".

³Shid ba: ra" yaug we"- ce: byu jham re jhau mung: yao: bam re kho:kham ASANG ta" na: rure ta" kyo: wa,- naonhaung" wa ngo myid: o: rure myid: nae" qhid' mae" joe" li" ko" ra" mangad: i? Ngo wa kao so' daui: na: ra" Mao"So ngad:- aimung: naonhaung" re ngo mae" pe" daja: re mho' nae" akhang" mabyid: nae". Kho:kham ASANG ngo ta" to: va".

⁴Shid ba: ra" yaug we"- nao wa yao: bam re dao: kho' pye' naeva" ein: i? Ailao" wa airu kad' wa,- yao: bam: phug' pho" jham kad' ra" maca' majhad' ru jham yao: bam re ta" peim: wa,-

⁵Ngo ta" na: ru yao: bam re ta" kyo: wa,- Israel re ngo khyin: yu: au: re- yao: bam re ngo dao:so: dalam: byid' to"- ngo wa Egutu mae yao: bam re ngo yao" gaung qhu" byid: mung: ta" kyo: va". Ngo wa ASANG naonhaung" nho: Mao"So ngad:-

⁶Ai: au: ngo wa yao: bam re Egutu mae" jhui" thug' yu mung: yao: bam: qhid' mae" ngo khyin: to" ra" jo,nho" dai kham we' myid xau gai: ra" mug: myid- alhab' tho' gai: thao" ra" mug: myid khyo jhui" ye" lo" nae" ein: dao:so: byid' to" ru ngad:-

⁷Ngo wa ASANG yao: bam: Mao"So ngad: ra" mathao mae- yao: bam re- yao: bam jhid'de; ra" maca' majhad' qu" cae: sho' nho: so alho jham re shapye' pye' mung:- Egutu mae" so apyag' jham: yang yao: bam yao" gaung re masan masin" daboe" nhao ge, ein: ta" kyo: wa,- pe"mung:ga"re ngo wa yao: bam nho: Mao"So ASANG ngad:-

⁸Ngadqere:- yao: bam wa ngo re tug' lhe: mung: matae" gyo: qad ngad: ako". Yao: bam wa maca' majhad' ngad: ra" so alho jham rere: mashapye'- Egutu mae" so jham rere: malhag' ke' ngad: ako". Ngo wa yao: bam re ai: Egutu mae nga" nho: nhag' yo: byang" sho' mung: rure kham zo: nhao nae" jin" jin" za: angad lo".

⁹Ngadqere: ngo airu: makad'- pe"mung:ga"re- airu: kad' re ngo yao" mang re nga: yeim nhao ja: boe" li" nae" ngad: ra". Yao: bam alhau: alhag' bo: na" ra" tau mae" byumyu" qe: qhid' kheim: mae- ngo wa yao: bam re Egutu mae" jhui" phao: thug' yu nae" ein: Israel byumyu" qere ta" to: va" ru ngad:-

¹⁰Aimung: ngo wa yao: bam re Egutu mae" jhui" thug' yu yang: din"pyad' yo khyo jhui" lo" va".

¹¹Ngo wa yao: bam re nga" amyin" jham re byid: mung: phug' cao" ra" yaug khao:ngo" re kao so' byid' ra" nga" nho: tarha" jham byid: va".

¹²Yao: bam re ngo ASANG: yang gyang" lho" nhao: ru ngad: ru peim: byid: nae" qhid' mae" yao: bam we' nga" agyo: mae aso: khyo" yang- Dugno: Ba re cao" nhao: to: va".

¹³Ngadqere:- yao: bam wa din"pyad' yo mae lao" re: ngo re tug' lhe" ako". Yao: bam wa- nga" nho: tarha" jham re phyo' lhoe" pye' mung:- phug' cao" ra" byu yaug khao:ngo" re kao so' byid' ra" nga" nho: amyin" jham re ngag: lhaui" pye' ako". Yao: bam wa Dugno: Ba re bin sho' yao: maca' majhad' boe" nhao: pye' ako". Ngo wa yao: bam re ai: din"pyad' yo mae yao: nga" nho: nhag' yo: byang" sho' ra" qam: re de, zo: nhao mung: yao: bam re phyo' qheim" pye' nae" jin" jin" ngad va".

¹⁴Ngadqere: ngo ai ru: makad'- pe"mung:ga"re- airu: kad' re ngo wa yao: bam re Egutu mae" jhui" thug' yu: rure the' myao: ke' ra" byumyu" qe: phaung gaung: mae nga" mang re nga: yeim nhao: ru boe" nae".

¹⁵Aimung:- ngo wa yao: bam re byid' to" ra" mug: myid- jo,nho" we' myid xau gai: ra" mug: myid alhab' tho' je: myan: ra" mug: khyo majhui" vao lo" nae" ein: ai: din"pyad' yo mae dao:so: to: va".

¹⁶Ngo wa- yao: bam khyo" yang nga" nho: amyin" jham re ngag: lhaui" pye' mung:- nga" nho: tarha" jham re phyo' pye' ru we' Dugno: Ba re maca' majhad' kad' pye' ra" mathao mae ngo wa dao:so: dalam: ke' ra". Yao: bam wa yao: bam: so alho jham re je: caung:pa" nug: ako".

¹⁷Ngadqere:- ailao" ngo wa yao: bam re nhag' khyag' ra". Ngo wa yao: bam re ai: din"pyad' yo mae mase' pye' nae" qhid' mae" myid: phyid' va".

¹⁸Ai: atha" ngo wa yao: bam: phaung gaung: mae" zolau: qere ceru: ta" peim: va". Naonhaung" nho: phug' phyid' jham kad' to" ra" tarha" jham re dazam: ge,. Yao: bam: thung" li jham rere: dacao" ge,. Yao: bam: so alho jham: yang re: naonhaung" yao" gaung re masan masin" daboe" nhao: pye' ge,.

¹⁹Ngo wa ASANG naonhaung" nho: Mao"so ngad:- nga" tarha" jham we' nga" amyin" jham re phug' cao" ge,.

²⁰Ngonhaung" to" ra" dao: thang" aso: khyo" boe" nae" qhid' mae" we' ngo wa ASANG naonhaung" nho: Mao"So ngad: ru naonhaung" re peim" na nae" qhid' mae" Dugno: Ba re phug' cao" ge,- ein: ta" va".

²¹Ngadqere:- ai: qae" mae" byu qere: ngo re tug' lhe" ako". Yao: bam wa nga" nho: tarha" jham re phyo' lhoe" mung:- phug' cao" ra" yaug khao:ngo" re kao so' byid' ra" nga" amyin" jham re macao" ngad: ako". Yao: bam wa Dugno: Ba re masan masin" boe" nhao: ako". Ngo wa yao: bam re din"pyad' yo mae- nga" nhag' yo: aso' byang" sho' re de, zo: nhao mung: yao: bam alhab' mo, re se' pye' nae" jin" jin" yao: ngad va".

²²Ngadqere: ngo airu: makad'- pe"mung:ga"re- airu: kad' re ngo yang yao: bam re Egutu mae" jhui" thug' lo: rure the' myao: ke' ra" byumyu" qenho: phaung gaung: mae ngo yao" mang re nga: yeim nhao: ru boe" nae" ngad: ra".

²³Aimung: ngo wa din"pyad' yo mae dao:so: gatau dalam: dam: to: va". Ngo wa yao: bam re damug: myid: geim" khyo khe' sin" pye' nae" ein: jham tang" to: va".

²⁴Ngo ceru: kad' ru wa- yao: bam wa nga" amyin" jham re ngag: lhaui" pye' mung:- nga" tarha" jham re lhoe" pye'- Dugno: Ba re masan masin" kad' ru we'- yao: bam: phug' pho" qe caung da" byid' lai: lo: ra" ai: so alho jham re caung:pa" geyang: kad' ru ngad: ra".

²⁵Ailao" ngo wa yao: bam re magai: ra" tarha" jham we' kao so' mabyid' ra" amyin" jham byid: va".

²⁶Ngo wa yao: bam re yao: bam yao" ngaui" xeim: jham: yang yao: bam yao" gaung re masan masin" boe" nhao: pye' va". Aimung: ngo wa yao: bam: zoqhid' yauggai zo: qere xeim: ngaui" byid: nhao va". Ceru wa yao: bam re qobo dae byid: nae" qhid' mae" we' ngo ASANG ngad: rure qhu" byid: nae" qhid' mae" ngad: ra".

²⁷Shid ba: ra" yaug we"- ailao" ana" wa- Israel byumyu" re kho:kham ASANG ngo ta" na: ru ta" kyo: wa,- ceru wa yao: bam: jhaug' mazaug: ruyang yao: bam: phug' pho" qe ngo re maphug' makhyad' kad' ko" ra" khyo daja: ngad: ra".

²⁸Ngo wa yao: bam re byid: nae" ein: dao:so: byid' to" ra" mug: khyo yao: bam re jhui" lo va". Yao: bam wa myhao: ra" bug gaung jham we' nyug: ra" sag' gae jham re the' myao lao"- aijham alhab' mae xeim: ngaui" byid' ako". Yao: bam wa yao: bam phad' ngha" ra" xeim: jham we' xeim: khyo" yao: bam cili" ra" sabyi qang jham: yang ngo re nhag' yo: nhao: ako".

²⁹Ngo wa yao: bam re myid: va"- ce: naonhaung" ye" ra" jo, qo myhao jham wa pe" ngad: ra" i? ein: myid'- aimung: ai: au: mae" myhao: ra" jo, qo ga: mhang" ako".

³⁰Ana" kho:kham ASANG ngo ta" na: ru Israel byumyu" qere ta" kyo: wa,- naonhaung" wa pe" mung: naonhaung" nho: phug' pho" qe shad' lai: lo: ra" qobo jham re kad' mung: yao: bam: so alho jham: thao cao" qin" ko" i?

³¹Ana" ba lao" re: naonhaung" wa- ai: so alho jham yao: re ai: jhaung qhu" jham yao: qhaug' byid: mung: naonhaung" nho: zoshao qere myi: mae phad' ngha" mung: so alho jham re ngaui" byid' ra" khyo" naonhaung" yao" gaung re masan masin" boe" nhao: ako". Ai: thao Israel byumyu" naonhaung" wa ngo myid: o: ru pe" ngad: laug ga: li" myid' ashiko". Kaoso' ASANG ngo wa daui: na: ra" Mao"So dang dang ngad:- aimung: ngo wa naonhaung" re ngo jhao" pe" daja: re: mali" myid: nhao nae".

³²Naonhaung" wa- gatau: mung"dan: jham we' dakhyo: ga: mung"dan: khaung: mae na mung: sag' gae jham we' laug bam jham re caung:pa" ra" gaje: byumyu" qe we' dakhyo: dau: nug: ga: myid: phyid' to" ako". Ngadqere: airu: khonhae" re boe" nae" mangad:-

³³Kho:kham ASANG ngo dang dang kao so' daui: na: ru ngad:- aimung: ngo wa nga" nhag' yo" ruyang- naonhaung" dao mae nga" nho: qam: bo: ra" lo, we' nga" kheim: so' alhab' khyo" eib nae".

³⁴Naonhaung" re khe' sin" nha: to" ra" mung"dan: alhab' tau mae" ngo naonhaung" re khai: zhang: yu mung: jhui" lo: au: re- ngo wa naonhaung" re nga" nho: kheim: so' we' nga" nho: nhag' yo" ru qhu" byid: nae".

³⁵Ngo wa naonhaung" re mung"dan: jham: nho: Din" Pyad' yo khyo jhui" lo" nae". Aimung: ngo wa ai: jo, qo mae naonhaung" re myo, khung: qang yang: dao: phyid' byid: nae".

³⁶Ngo wa Sina Din" pyad' yo mae naonhaung" nho: phug' pho" qere- dao: phyid' ru we' dakhyo: yao: ana" naonhaung" re dao: phyid' nae" ga: kho:kham ASANG ta" ra".

³⁷Ngo wa naonhaung" re tang za: zaui" ci mung:- nga" dao: thang" re naonhaung" phug' cao" gesho' kad' nae".

³⁸Ngo wa- naonhaung" nho: phaung gaung: mae" tau: lhan: mung: qobo de, mo, re jhui" yu: pye' nae". Ngo wa yao: bam re ana" yao: bam na: ra" mug: myid mae" yu: pye' nae". Ngadqere: yao: bam re Israel mung" khyo madam: tug' phao: lo nhao nae". Ailao" ngo ASANG ngad: rure naonhaung" ba: li" genae".

³⁹Kho:kham ASANG ta" ra". Ana" naonhaung" Israel byumyu" alhab' naonhaung" yao" gaung re ngaui bau" na ge, lhe"- naonhaung" nho: so alho jham re xo' yang: caung da" byid: ge, lhe"- ngadqere: naonhaung" re ngo no' mae" ta" peim: geli"- ce: thao mae- naonhaung" wa ngo re phug cao" ca" mung: naonhaung" nho: so alho jham re xeim: ngaui" byid' ra" khyo" nga" mang re nga: yeim nhao: ru thang: pye' ca" li" genae".

⁴⁰Ai: mug: mae" nga" nho: gyang" lho" ra" bam dao mae- Israel nho: myhao: ra" bam dao mae- naonhaung" Israel byumyu" alhab' mo, ngo re caung:pa" li" genae". Ngo wa naonhaung" re qu" ngaui mung: ngo jhao" naonhaung" nho: ngaui" xeim: jham- gai: thao" ra" alu: xeim: jham we' naonhaung" nho: gyang" lho" ra" jhaung qhu" jham cili" genae" rure myid: lao" nae".

⁴¹Ngo wa naonhaung" re khe' sin" nha: to" ra" mung"dan: jham mae" jhui" yu mung: qo" khai: zhang" to: thao- naonhaung" phad' ngaui" byid' ra" xeim: jham re lham: khae: yu byid: nae". Aimung: byumyu" mung"dan: jham wa ngo gyang" lho" yaug ngad: rure the' myao: li" genae".

⁴²Ngo wa naonhaung" nho: phug' pho" qere byid: nae" ein: ngo dao:so: byid' to" ra" mug:- Israel mang: khyo naonhaung" re dam: jhui" tug' yu: au:- ngo ASANG ngad: rure naonhaung" ba: li" genae".

⁴³Ailao" naonhaung" wa- naonhaung" kad' lai: lo: ra" nga: yeim- ja: alhab' re we'- naonhaung" yao" gaung re khoru: masan masin" kad' pye' rure myid: beim" li" genae". Naonhaung" wa- naonhaung" kad' va" ra" maca' majhad' mau" jham: mathao mae- naonhaung" yao" gaung re ca' pye' li" genae".

⁴⁴Ngo wa nga" nho: nga: re gug: gam: yu nae" kad' ra" au:- ngo wa naonhaung" nho: nhag' lam: kaui: ru we' makhyang: mashab: ra" ave, qhid' mae" man: qi" ra" khyo" naonhaung" re makad' ruyang ngo ASANG ngad rure Israel byumyu" naonhaung" ba: li" genae". Kho:kham ASANG ngo ta" ra".

⁴⁵ASANG wa ngo re dao: jhau: ra".

⁴⁶Shid ba: ra" yaug we"- mug: thao shad' khyo qu" ke' wa,- mug: thao shad' re ngag thaug' ra" khyo" jhau mung: mug: thao shad' mae" sag' mo" yo re qobo zhaug' yang: lapa pa: wa,-

⁴⁷Kho:kham ASANG ta" na: rure gyo: nae" qhid' mae" mug: thao shad' mae" sag' mo" yo re ta" kyo: wa,. Qu" wa,- ngo wa myi: ngha" ke' naeva". Ai: myi: wa nao mae yaug: ra" sag' gae khao:ngo"- ajam: ngad ngad akyaug' ngad ngad nga" pye' li" nae". Pe" yang re: ai re maqo" se' pye' li" nae". Airu wa mug: thao mae" mug: am: khyo de; du: joe" lo" mung: yaug khao:ngo" wa ai: myishae laung: rure the' kham zo" li" genae".

⁴⁸Ngo ASANG myi: ngha" ke' ru we' ai re khag' yang maqo" se' pye' rure yao: bam alhab' mo, ba: li" genae"- ga: ta" ra".

⁴⁹Ngadqere:- ngo wa kho:kham ASANG we"- ngo re airu: dakad' nhao la,- ngo wa khonhae" re: vai: sham" jham khyo" za: lhaung" jhau: rure yaug khao:ngo" ba: to: gau ngad: ako"- ein: ngag: ha: ke' va".