Read Maru EZEKELA 21 Bible Online

EZEKELA 21 - Maru bible

EZEKELA 21

¹ASANG wa ngo re jhau: ra".

²Shid ba: ra" yaug we"- Yerusalem re qobo zhaug' ta" phoe: pye' wa,- mung" byu qe caung:pa" ra" jo, qo re qobo zhaug' ta" phoe: pye' wa,- Israel mug: myid re-

³Ngo ASANG ta" na: ru ta" peim: wa,- ngo wa naonhaung" nho: gyevo ngad:- ngo wa nga" shae pyang: re phoe' mung:- naonhaung" alhab' mo, gai yaug we' magai yaug re dakhyo: za: se' pye' nae".

⁴Ngo wa mug: am: mae" mug: thao joe" sho' mae na: ra" yaug khao:ngo" re nga" shae pyang: ci mung: zin: nae".

⁵Ngo ASANG wa nga" nho: shae pyang: re shae byao mae" she: thug' yu mung: ai re ngo shae byao mae madam: ke' nae" ga" rure yaug khao:ngo" ba: li" genae".

⁶Shid ba: ra" yaug we"- ni" nho: sang: wa baug: go; lo" na: va" ru we' dakhyo: nokyang: kyang: wa,- nao re yaug khao:ngo" yang qo" lhaug' qu" myao nae" jo, qo mae nokyang: kyang" na wa,-

⁷Nao re pe" mung: airu: nokyang: kyang" na: i? ga: yao: bam myid' re- joe" lo: na: ra" lau dao: mathao mae myang: na: ein: ta" kyo: wa,- ai: lau dao: joe" lo: re yao: bam: nhag' lam: mae gyaug: ru byang" lo: li" genae". Yao: bam: lo, jham wa lo, gyi: shid mung: pyaung" lhao" jo; li" genae". Yao: bam: vae" myid baui" byaug: li" genae". Aimung: yao: bam: pad' laug jham wa ko, ko, ga: laui" nin" genae" ayo, joe" va". Ai wa cemae yao: ngad: ava"- ga: ta" ra". Kho:kham ASANG ngo ta" to: va".

⁸ASANG wa ngo re ta" ra".

⁹Shid ba: ra" yaug we"- lapa pa wa,- mung" byu qere ngo ASANG ta" na: ru ta" kyo: wa, shae pyang: dakhyae:- shae pyang: dakhyae: re saui" tho' mung: boe; yhaung" to: va".

¹⁰Airu wa se' nae" qhid' mae'' saui" tho' to: mung:- lhe' cad' we' dakhyo: qhi qhi mung: bao nae" qhid' mae" boe; yhaung" to: va". Ngaui bau: nae" khyo maqo" jo, pe"mung:ga"re nga" byumyu" qe wa- ta" peim" ru ja: khao:ngo" we' qobo dae byid' ru ja: khao:ngo" re pe" masun: kad' pye' avako".

¹¹Shae pyang: wa ci nae" jin" jin" boe; yhaung" to: va". Airu wa se' yaug: nho: lo, mae ke' to: nae" qhid' mae" saui" tho' mung: boe; yhaung" to: va".

¹²Shid ba: ra" yaug we"- kaug' qhui mung: ngug: yao" yao" wa,- ce: shae pyang: wa- nga" byumyu" qe: qhid' mae" we' Israel au: jhaung qe: qhid' mae" ngad: ra". Yao: bam wa dang: ra" mo, alhab' we' daga" se' pye' ru qhug' li" genaeva". Ni" nho: qao gao re nhag' lam: thao" ru we' theim wa,-

¹³Ngo wa nga" byumyu" qere jham" ca: qu" na:- Aimung: yao: bam nhag' lam: matha" qad ko" ngad: re- cegu: alhab' wa yao: bam: dao mae boe" lo: li" nae".

¹⁴Shid ba: ra" yaug we"- ana" lapa pa lose,- lo, pyo' pyo' wa,- ai re shae pyang: wa paug' yang: paug' yang: qam" li" nae". Airu wa byu se' ra" shae pyang:- kyaug' tin" mung: qam" se' ra" shae pyang: ngad: ra".

¹⁵Airu wa nga" byumyu" qere vae" myid baui" byaug nhao mung: khyid au: tha" thu: lang: nhao: ra". Ngo wa lhe' cad' we' dakhyo: qhi qhi bao mung: se' nae" jin" jin" ngad: ra" shae pyang" yang yao: bam: vomo" re kyaug' tin" naeva".

¹⁶Tho' ra" shae pyang: nao we"- lo, yo shad' zin:- lo,kaung: shad' zin: kad' wa,- nao lhang: phaug' lo" ra" shad' khao:ngo" khyo zin: wa,-

¹⁷Ngo re: lo, pyo' pyo' mung: nga" nhag' yo" ru wa gyo" byaug: li" nae". Ngo ASANG ta" to: va".

¹⁸ASANG wa ngo re ta" va".

¹⁹Shid ba: ra" yaug we"- Babelon kho:kham wa yao" nho: shae pyang: ci mung: qo" gai: joe" li" nae" ra" khyo shid' khe' re tung" khyang: wa,- ai: khyo shid' khe' geim" wa,- damung" dan: mae" za: qhid ca" nae". Khyo kao: mae aso: zang zhaug' to: wa,-

²⁰Khyo dakhe' wa kho:kham pho" re Amon vomo" Raba khyo ceim" qhu" nae"- khyo dakhe' wa Yuda mung"- gyetab vogaung: Yerusalem khyo ceim" qhu" nae" ngad: ra".

²¹Babelon kho:kham wa- khyokao: mae" aso: zang nhae mae ye; jo; li" nae". Yao: khoshad' khyo ye: nae" ru ba: qho: yu nae" qhid' mae" yao: wa myokhe' jham re lhaui" qu" mung: boe, phyid' ra". Yao: wa yao" nho: so alho jham re myid' qham: qu" ra". Yao: wa ngaui" xeim: gug'nyhug' nho: sang: re jo: qu" ra".

²²Ana" yao" nho: lo, yo shad' mae- Yerusalem ga: tung" to" ra" myo: khe' re zhab' ci: ra". Ai wa ye: mung: vang phyo' ra" sag' thaung: jham kang" jhid' nae"- gye khe' yao thoe zag: hug' nae". Kham: mo" jham phyo' ra" sag' thaung: jham tai: jhid' nae"- myid zhai: dau" tai: pye' nae" we' gyab lhao: jham dau: nae" qhid' mae" yao: re boe, ta" shid' ra".

²³Yerusalem vobyu qe wa yao: bam kad' to" ra" myid vang" thao: ce' mathao mae ceru: boe" lo nae" rure malam" genae". Ngadqere: ce: gau: qhid' khae" mung: ta" to" ru jham wa yao: bam re- yao: bam: qobo jham ta" peim: mung:- yao: bam re taung" yu: pye' nae" rure ta" peim" ru za: angad:-

²⁴Aimung: ceru wa- ngo kho:kham ASANG ta" na: ru ngad:- naonhaung" nho: qobo jham wa dae: dae: myao: thug' li" va". Naonhaung" khonho" qobo qo" rure yaug khao:ngo" ba: ako". Naonhaung" wa naonhaung" nho: khyid lab lo, lab ave, khao:ngo" mae naonhaung" nho: qobo re qhu" byid' ako". Naonhaung" wa dao: phyid' ru qhug' mung: ngo wa naonhaung" re naonhaung" nho: gyevo qe: lo, khyo ab: pye' nae".

²⁵Israel nho: makhyang: mashab mung: magyang" lho" ra" kho:kham nao we"- ni" nho: ba na- ni" qobo dae byid: qhug' nae" lo" thao" ba na joe" li" na: ava".

²⁶Ngo kho:kham ASANG ta" va". Ni" nho: ba maug: we' au: thab' re khyad' pye' wa,- pe" re: qhid' phyao: we' madam: dau lo: nae". Myaung mo, re kheim: so' qo" nhao wa,- zug: kad' mung: eib: zo" na mo, re lao" khyo" pye' wa,-

²⁷Byo; qeim va"- byo; qeim va"- ngad va"- ngo wa vomo" re byo; qeim: jo, qo kad' pye' nae". Ngadqere:- ai: vomo" re qobo dae byid: nae" qhid' mae" ngo khyin: to" ra" yaug majoe" li" li" wa- ceru maboe" nae". Ai: ayo, joe" lao" ngo wa ai: vomo" yao: re byid' pye' nae".

²⁸Shid ba: ra" yaug we"- lapa pa wa- Israel byumyu" qere maphug' makhyad' kad' na: ra" Amon byu qere kho:kham ASANG ngo ta" na: rure hau" kyo: wa,- yao: bam re ceru: ta" wa,- Shae pyang: dakhyae: wa phyo' qheim" pye' nae" jin" jin" ngad: jo; ra". Airu wa se' nae" qhid' mae"- lhe' cad' we' dakhyo: qhi qhi mung: bao nae" qhid' mae" boe; yhaung" to: va" ein: ta" wa,-

²⁹Naonhaung" myao: ra" qhu" lho jham wa madang: ru apyag' ngad: ra". Aimung: naonhaung" no' mae" boe" nae" ja: ta" byu: to" ru jham wa mhug' dao: jham ngad: ra". Naonhaung" wa nhag' lam: kaui mung: makhyang: mashab ngad: ako". Aimung: naonhaung" nho: ba na- naonhaung" nho: lo" thao" qobo dae qhug' zo: nae" ba na wa joe" li" na: ava". Shae pyang: wa naonhaung" nho: lang zang: jham mae gyo" zao" naeva" myao:-

³⁰Shae pyang: re dam: ke' to: wa,- ngo wa nao re phan" phaug' to" ra" jo, qo mae nao khau: li" ra" mung"dan: mae - ngo nao re dao: phyid' nae".

³¹Nga" nhag' jam: yo" rure ni" dao mae myishae: yang thug' phad' reru: kad' ke' au: nao ba: li" nae".

³²Nao wa myi" yang phyo' qheim" pye' ru qhug' li" nae". Ni" nho: sa: wa naoyao" mug: mae yug: mung: nao re khag' yang mamyid: beim: lo: genae" ASANG ta" to: va".