Read Maru EZEKELA 22 Bible Online

EZEKELA 22 - Maru bible

EZEKELA 22

¹ASANG wa ngo re jhau: ra".

²Shid ba: ra" yaug we"- nao wa byu se' mo, byang" jo, ra" vomo" re dao: kho' nae" jin" va" i? Yao: kad' ra" maca' majhad' mau" jham alhab' re yao: de: de: myao sho' qhu" byid: wa,-

³Kho:kham ASANG ngo ceru: ta" na: rure- vomo" re ta" kyo: wa,- nao wa nao yao" byu myo: sho' re se' pye' ra" mathao mae- solho jham re caung:pa" ra" khyo" yang nao yao" gaung re masan masin" boe" nhao: ra" mathao mae- ni" ayo, akhyin: wa joe" li" na: ava".

⁴Nao wa ai: byu se' mau" jham: mathao mae qobo qo" mung: nao kad' ra" solho jham khyo" yang nao yao: masan masin" sho' boe" nhao ra". Aimung: ni" ba na joe" li" mung: ni" ayo, byang" byaug va". Ai: mathao mae ngo wa nao re byumyu" qe: yang qi: jung" mung: mung"dan: alhab' yang ceim" nyhe' ru qhug' nhao va".

⁵Nao tarha" maci: ra" mathao mae avai: ayae mae" mung"dan: jham we' va: mae" mung"dan: jham wa nao re ceim" nyhe' ako".

⁶Israel au: jhaung qe alhab' wa yao: bam yao" qam: re myid: lam mung: byu se' mau" shad' ako".

⁷Vomo" khug mae" khag' dayaug re: yao: myhi" yao: pho" bam re nga: mayhe' byid: ngad: ako". Nao wa taungbug: byu qere mhug' vhan" zo: mung: cug' mo" qe we' cug' zo: nau" qere cab' zo" ako".

⁸Nao wa gyang" lho" ra" jo, qo jham re maphug' mung: Dugno: Ba rere: macao" ngad: ra".

⁹Ni" nho: byu damyo" wa su gaje re qo" se' pye' nhao nae" qhid' mae" mhug' ta" ako". Yao: bam mae" damyo" wa solho jham re qhaug' byid' ra" xeim: jham re zo" ako". Damyo" gu: wa yao: bam: yao" shab' mhin: rure nhag' dag sho' khonhae" re kad' na: ako".

¹⁰Yao: bam mae" damyo" wa yao: pho" nho: yham sang myhi" we' yab: ako". Damyo" wa myiqe: qere mai ci: ra" yo, gyo: gu: mae re: gaung sho: zam" khug nae" qhid' mae" maqad maqui" jhan" ako".

¹¹Damyo" gu: wa su: myi: shad' ako". Gaje daqhae: wa yao: bam: dau mo" jham re mangad lao" yao: bam yao" nhae: mo" bye" re ngad ngad mhai" yu: ako".

¹²Ni" nho: byu qe mae" damyo" gu: wa ngaui yu zo: mung: byu se' ako". Damyo" gu: wa yao: bam: Israel byumyu" sang: cao: qere ngaui jhid' byid' ra" au: gau pai: mho' zo" ako". Airu: yao: bam re cab' zo" ra" khyo" yang jo,nho" qo" li" ako". Yao: bam wa ngo re to" myhid' pye' avako". Kho:kham ASANG ta" to: va".

¹³Ngo wa nao lhad' yu: to: mung: byuse' yang: qo" rumae nga" nho: lo, zhab' theim: khyo" ke' nae".

¹⁴Nao re ngo phyo' qheim" pye' au: vae" myid dang shinae" ein: nao myid: jho: i? Mangad lao" ni" lo, re qo" tau: to' nae" qam: bo shinae" ein: nao myid: jho: na: i? Ngo ASANG ta" na: rumung: nga" dao: re boe" sho' kad' nae".

¹⁵Ngo wa ni" byu jham re mung"dan: we' byumyu" khao:ngo" khyo khe' sin" pye' mung: ni" nho: makhyang: mashab: ra" ave, jham re thao" nhao: pye' nae".

¹⁶Aimung: gatau: byumyu" qe wa nao re nga: yeim nhao: li" genae" ngadqere:- nao wa ngo ASANG ngad: rure ba: li" nae".

¹⁷ASANG wa ngo re ta" ra".

¹⁸Shid ba: ra" yaug we"- Israel byumyu" qe wa nga" qhid' mae" pe" akyu" yao: mabo ngad: ako". Yao: bam wa jo,to' ape' we' dau: ako". Ngaui re khyeim" mo" myi: mae phad' yhug' kyang" pye' thao dang: jo, ra" gyid: ne- to' phyu- jo,to' we' xa ru" ru dau: ako".

¹⁹Airumung: yang: ana" kho:kham ASANG ngo wa yao: bam re- yao: bam wa ai: ru we' dakhyo: pe" yao: akyu" mabo ko" rure ta" kyo" na va".

²⁰Ngaui jam:- gyid:ne- jo,to'- xa we' to' phyu jham re phad' yhug' kyang" yu: ra" khyeim" mo" myi:khug' mae daga" khyeim: ke' to" ru we' dakhyo: yao: bam alhab' re Yerusalem khyo jhui" zhang: to: nae". Ngaui jham re myi" yang phad' yhug' ke' ru we' dakhyo: yao:- nga" nho: nhag' yo" ru we' nhag' jam: yo" ruyang yao: bam re phad' yhug' pye' nae".

²¹Ngad va"- ngo wa yao: bam re Yerusalem mae zhang: nha: to: mung:- yao: bam: agyid' mae myi: mad: te' to: byid: nae". Aimung: nga" nho: nhag' yo" ruyang yao: bam re phad' yhug' pye' nae".

²²Ngaui re khyeim" mo" myi: mae phad' yhug' pye' ru we' dakhyo: yao: Yerusalem mae yao: bam re phad' yhug' pye' nae". Ailao" yao: bam wa- ASANG: nho: nhag' yo: re de, zo" na: rure ba: li" genae".

²³ASANG wa ngo re dam: jhau: ra".

²⁴Shid ba: ra" yaug we"- Israel byumyu" qere yao: bam: mug: wa magyang" lho" mung: ngo wa aire qobo dae byid' na: ru ngad: ra" ein: ta" kyo: wa,-

²⁵Au: jhaung qe wa- yao: bam se' to" ra" sho: re kyid' na ko" ra" khang khyi jham we' dau: ako". Yao: bam wa mung" byu qere se' pye' mung: yao: bam qo" yu: nho" ngaui re yu: ako". Aimung: yao: bam: byuse' mau" zo" yang cug' mo" myo: sho' boe" nhao: ako".

²⁶Khin jaung qe wa nga" nho: tarha" re phyo' mung: gyang" lho" rure maphug' ngad: ako". Yao: bam wa gyang" lho" ru we' magyang" lho" rure pe" makho' ngad: ako". Yao: bam wa gyang" san: ru we' magyang" san: ru de: de: za: jho" shai" ru pe" makad' ko" ngad: ra". Yao: bam wa Dugno: Ba re pe" shui manho ngad: ako". Ai: mathao mae Israel byumyu" qe wa ngo re maphug' ngad: ako".

²⁷Asuya mung" zug: qe wa- yao: bam qo" se' to" ra" gug'nyhug' re bin" phyo' na: ra" zag ne jham we' dau: ako". Yao: bam wa jo,nho" qo" nae" qhid' mae" byuse' mau" shad' ako".

²⁸Lapa qe wa- vang khyae bao re shaqhui" yang xug' phyu: to" ra" mo, we' dakhyo: ce: qobo jham re nghoe' yang: nyham" to" ako". Yao: bam wa madang: ra" qhu" lho apyag' jham we' madang: ra" khyo" lapa pa: ako". Yao: bam wa kho:kham ASANG: nho: mungdao: re ta" na: ga: ta" gengadqere:- ngo ASANG wa yao: bam re majhau-

²⁹Jo,nho" qo" mo, wa mhug' pyag' mung: lhad' zo" ako". Yao: bam wa myaung mo, re mangad mangung: ra" khyo" zam" khug mung: taung bug byu qere cab' zo" ako".

³⁰Ngo wa vang re nga" nhag' yo" ruyang phyo' qheim" pye' nae" au: dam: qo" zao: to: nae" byu dayaug- vang gyoe; gyo" jo; ra" khyi" mae qo" ye; jo, mung: ai: mug: myid re qo" gug: gam byid nae" byu re qho:- ngadqere: ngo wa dayaug rere: maqhug' myao-

³¹Aimung: ngo wa nga" nho: nhag' yo" rure yao: bam: dao mae nhao: khyo" ke' nae". Aimung: ngo wa- myi: we' dakhyo: yao: bam kad' lai: lo: ra" mathao mae- yao: bam re phyo' qheim" pye' nae" Kho:kham ASANG ta" to: va".